DEUTERONOMIO 11
11
I ñuclel lac Yum
1Jini cha'an yom mi la' c'uxbin lac Yum Dios. Ti pejtelel ora yom mi la' jac'ben i t'an tsa' bʌ i yʌlʌ, yic'ot pejtel i cʌntesʌbal, yic'ot i mandar, yic'ot la' tic'ol. 2La' wujilix bajche' tsi' ju'sʌbeyetla la' pusic'al jini lac Yum Dios, pero maxto anic tsi' yubiyob la' walobilob i ju'sʌntel i pusic'al. Cʌmbil la' cha'an i ñuclel lac Yum yic'ot i p'ʌtʌlel yic'ot i yejtal i p'ʌtʌlel. 3Tsa' la' q'uele che' bʌ tsi' pʌsʌ jini bʌbʌq'uen tac bʌ yic'ot ñuc tac bʌ i p'ʌtʌlel ti' contra Faraón jini rey ti Egipto yic'ot ti' contra jini año' bʌ ti Egipto. 4Tsa' la' q'uele chuqui tsa' tumbentiyob jini soldadojob año' bʌ ti Egipto, yic'ot i caballo, yic'ot i carreta tac. Tsa' laj jisʌntiyob ti colem ja' i c'aba' Chʌchʌc bʌ che' bʌ tsa' tiliyob ti ajñel ti la' pat. Lac Yum tsi' laj jisayob ti ja'. Ma'anix tsi' yʌc'ʌyetla ti' c'ʌb. C'ʌlʌ wʌle librejetixla. 5Tsa'ix la' q'uele pejtel chuqui tac tsi' melbeyetla Dios ti colem bʌ i tiquiñal pañimil, c'ʌlʌl che' wʌ'ix añetla wʌle. 6La' wujil chuqui tsi' mele ti' tojlel Datán yic'ot Abiram, i yalobilob Eliab, tilemo' bʌ ti Rubén. Q'uelel la' cha'an bajche' tsi' jambeyob lum che' bʌ tsa' mujquiyob ti' wut pejtelel israelob. Tsi' laj mujlayob Datán yic'ot Abiram, yic'ot i yijñamob, yic'ot i yalobilob, yic'ot i yototob yic'ot pejtelel i chubʌ'an. 7Tsa'ix la' q'uele pejtelel ili ñuc tac bʌ tsa' bʌ i mele lac Yum ti cabʌl i p'ʌtʌlel.
I bendición lac Yum tsa' bʌ wʌn subentiyob
8Jini cha'an yom ts'ʌcʌl mi la' jac' pejtelel jini mandar woli bʌ c subeñetla, cha'an mi la' wutsi p'ʌtesʌntel che' mi la' majlel ti chumtʌl ti jini lum mu' bʌ caj la' ch'ʌm. 9Che' jini mi caj i ñajt'an la' jabilel ila ti lum mu' bʌ caj i yʌq'ueñetla che' bajche' tsi' wʌn subeyob lac ñojte'elob. Che' jini mi' caj ti colel ti uts'at pejtelel pʌc'ʌbʌl. 10Mach tiquinic jini lum mu' bʌ caj la' taj che' bajche' i lum Egipto ba' tsa' loq'uiyetla. Che' bʌ tsa' la' cha'le pac' ti Egipto, tsa'ix la' jambe i bej yoc ja'lel ti la' woc cha'an mi' yʌch'esan lum. 11Ya'an wits yic'ot joctʌl ti jini lum baqui mi caj la' c'axel. Mi' yʌch'an cha'an ja'al. 12Lac Yum Dios mi' cʌntan jini lum. Pejtel ora woli' q'uel jini lum ti jujump'ejl jab.
13Mi tsa' la' wen jac'ʌ pejtel i mandar woli bʌ c subeñetla, mi xuc'ul mi la' c'uxbin lac Yum Dios, mi xuc'ul mi la' bʌc'ñan ti pejtelel la' pusic'al yic'ot ti pejtelel la' ña'tʌbal, 14muq'uix i choc tilel jini ja'al che' ti' yorajlel, jini seb bʌ ja'al yic'ot jini wi'ilix bʌ cha'an mi' wen colel la' pac'. Che' jini mi caj la' wen cha'len c'ajbal. Mi caj la' wen taj i ya'lel ts'usub yic'ot aceite. 15Muq'uix i yʌq'ueñetla ja'el jini jam ti la' jamil cha'an mi' c'ux la' wʌlac'. Jatetla ja'el mi caj la' taj cabʌl i bʌl la' ñʌc'. Tijicña mi caj la' wajñel. 16Jini cha'an yom chʌn xuc'ul la' pusic'al. Mach yomic mi la' tʌts' la' bʌ cha'an mi la' ch'ujutesan jini melbil tac bʌ dios. Mach yomic mi la' ñocchocon la' bʌ ti' tojlel. 17Mi che'ʌch mi la' mel che' bajche' tic'biletla, mi caj i mich'an lac Yum. Mi caj i ñup' jini tocal cha'an ma'anix mi' chʌn tilel ja'al. Ma'anix mi caj i colel pʌc'ʌbʌl. Che' jini mach jalix mi caj la' wajñel ti jini wen bʌ lum tsa' bʌ i yʌq'ueyetla lac Yum.
18Pero yom mi la' chʌn ac' ti la' pusic'al pejtelel c t'an. Mach yomic mi' ñajʌyel la' cha'an. Yom mi la' cʌch ti la' c'ʌb ba' mi la' teñe q'uel, yic'ot ja'el ti la' pam cha'an mi la' chʌn ña'tan. 19Yom mi la' chʌn cʌntesan la' walobilob che' buchuletla ti la' wotot, yic'ot che' ma' majlel ti xʌmbal ti bij, yic'ot che' mi la' caj ti ñoltʌl, yic'ot che' mi' la' cha' ch'ojyel. 20Yom mi la' ts'ijban ja'el ti' chumte'elel la' wotot, yic'ot ti' ti' la' wotot, 21cha'an mi' wen tam'esʌntel la' jabilel yic'ot i jabilel la' walobilob ti jini lum mu' bʌ i yʌq'ueñetla lac Yum che' bajche' tsi' wʌn subeyob la' ñojte'elob. Che' jini tijicñayetla ti pejteletla che' ya' to an jini panchan ti' chañelal pañimil. 22Come mi ts'ʌcʌl mi la' jac' pejtelel ili mandar mu' bʌ c subeñetla, mi c'ux mi la' wubin lac Yum Dios, mi xuc'ul mi la' chʌn ñopben i bijlel cha'an mi la' tsajcan, 23che' jini lac Yum mi caj i choc loq'uel pejtel jini winicob año' bʌ ti tejclum tac. Mi caj la' ch'ʌmben i lum, anquese ñumen p'ʌtʌlob bajche' jatetla. 24La' cha'añʌch pejtelel jini lum baqui mi caj la' c'otel ti xʌmbal, ya' ti colem bʌ i tiquiñal pañimil c'ʌlʌl ti Líbano, yic'ot ya' ti ñoja' i c'aba' Eufrates ba' mi' pasel q'uin, c'ʌlʌl ti colem ñajb ya' ba' mi' bʌjlel q'uin. 25Ma'anic majqui mi caj i wis tic'lañetla, come lac Yum Dios muq'uix caj i yʌq'ueñob i bʌc'ñañetla baqui jach mi la' ñumel che' bajche' tsi' wʌn subeyetla.
26Ña'tanla jini cha'chajp tilem bʌ ti Dios. An bendición yic'ot an i mich'lel Dios. Yajcanla. 27An la' bendición tilem bʌ ti Dios mi tsa' la' chʌn jac'be i t'an lac Yum Dios woli bʌ c subeñetla wʌle. 28Mi caj la' taj wocol cha'an i mich'lel Dios mi tsa' la' ñusʌbe i t'an lac Yum Dios, mi tsa' loq'uiyetla ti jini bij woli bʌ c subeñetla cha'an mi la' yajcan majlel i dios tac jini winicob parte bʌ i lumal. 29Che' tsa'ix i pʌyʌyetla ochel ti jini lum lac Yum, che' ch'ʌmbilix ti la' wenta, che' jini ya' yom mi' la' sub jini bendición ya' ti wits i c'aba' Gerizim. Jixcu jini wocol cha'an i mich'lel, ya' yom mi la' sub ti wits i c'aba' Ebal. 30Jiñʌch cha'p'ejl wits ti junwejl Jordán ba' mi' bʌjlel q'uin lʌc'ʌl ti Gilgal. An ti' t'ejl jini c'olol am bʌ ti More ya' ba' chumulob cananeojob año' bʌ ti Arabá. 31Mux caj la' c'axel ti Jordán cha'an mi la' chumtʌl ti jini lum woli bʌ i yʌq'ueñetla lac Yum Dios. Mux caj la' ch'ʌm cha'an mi la' cha'len chumtʌl. 32Yom mi la' wen jac'ben pejtelel i t'an yic'ot i mandar lac Yum woli bʌ c subeñetla wʌle.
Currently Selected:
DEUTERONOMIO 11: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.