DEUTERONOMIO 10
10
Lac Yum tsi' cha' ts'ijba xuc'ul bʌ t'an
(Éx. 34.1-10)
1Ti jim bʌ ora lac Yum tsi' subeyon: Yom ma' cha' toj'esan yambʌ cha'q'uejl xajlel che' bajche' ti ñaxan. Mele ja'el jump'ejl Arca ti te'. Yom ma' cha' letsel ti wits tic tojlel. 2Mi caj c ts'ijban ya' ti xajlel jini t'an am bʌ ti ñaxan bʌ xajlel tac. Mux caj a wʌc' ti mal Arca, che'en. 3Che' jini tsac mele Arca ti te' i c'aba' acacia. Tsac cha' toj'esa cha'q'uejl xajlel che' bajche' ti ñaxan. Che' jini tsa' letsiyon majlel ti wits yic'ot jini cha'q'uejl xajlel tij c'ʌb. 4Lac Yum tsi' cha' ts'ijba jini t'an am bʌ ti ñaxan. Jini jach bʌ lujump'ejl mandar tsa' bʌ i yʌlʌ lac Yum ya' ti' yojlil c'ajc ti Horeb wits che' bʌ tempʌbilob pejtelel winicob ti yebal wits. Lac Yum tsi' yʌq'ueyon jini cha'q'uejl xajlel. 5Tsac sutq'ui c bʌ. Tsa' cha' jubiyon ti wits. Tsa cotsa jini cha'q'uejl xajlel ya' ti Arca tsa' bʌ c mele che' bajche' tsi' subeyon lac Yum. Ya'to an c'ʌlʌ wʌle. 6Tsa' loq'uiyob jini israelob ti Beerot Benejaacán. Tsa' majliyob ti Mosera. Ya' tsa' chʌmi Aarón. Ya' tsi' mucuyob. Che' jini tsa' caji i tajben i motomajil Eleazar. 7Tsa' majliyob ti Gudgoda. Tsa' loq'uiyob ti Gudgoda, tsa' majliyob ti Jotbata, jini lum ba'an cabʌl i jajp lum am bʌ i ya'lel. 8Ti jim bʌ ora lac Yum tsi' wa'choco i p'olbal Leví cha'an mi' ch'ʌmob majlel jini Arca ba' lotol jini xuc'ul bʌ t'an i cha'an lac Yum. Tsi' wa'chocoyob cha'an mi' chʌn ajñelob ti' tojlel lac Yum, cha'an ja'el mi' subob i yutslel i pusic'al lac Yum che' bajche' woli' chʌn melob c'ʌlʌl wʌle. 9Jini cha'an ma'anic tsa' tem t'oxbentiyob lum levíjob yic'ot i pi'ʌlob. Lac Yum i cha'añobʌch, i wentajʌch lum yic'ot chubʌ'añʌl che' bajche' lac Yum tsi' wʌn subeyob. 10Ya' tsa' cʌleyon ti wits che' bajche' ti ñaxan, cha'c'al q'uin yic'ot cha'c'al ac'ʌlel. Lac Yum tsi' cha' ñich'tʌbeyon c t'an ti ili ora. Ma'anic tsi' jisayetla. 11Lac Yum tsi' subeyon: I yorajlelix mi la' cha' tech xʌmbal. Cucu ti ñaxan ti' tojel i wut jini winicob cha'an ma' pʌyob ochel ti jini lum woli bʌ cʌq'ueñob che' bajche tsac wʌn subeyob la' ñojte'elob, che'en lac Yum.
Jini yom bʌ mi lac mel
12Ñich'tanla israelob. ¿Chuqui woli' c'ajtibeñetla lac Yum Dios? Jini jach yom mi la' bʌc'ñan lac Yum Dios cha'an mi la' chʌn cha'len xʌmbal ti' bijlel. Yom mi la' c'uxbin cha'an mi la' chʌn melben i ye'tel lac Yum Dios ti pejtelel la' pusic'al yic'ot ti pejtelel la' ña'tʌbal. 13Xuc'ul yom mi la' jac' pejtelel i mandar yic'ot pejtelel i t'an woli bʌ c subeñetla cha'an mi' yujtel chuqui tac uts'at ti la' tojlel. 14Come laj i cha'añʌch lac Yum Dios jini panchan c'ʌlʌl ti' chanlel yic'ot pejtelel chuqui an ti pañimil yic'ot pejtelel mu' bʌ laj q'uel. 15Anquese ñuc bʌ Yumʌlʌch, tsi' wen cʌnta lac ñojte'el. C'ux tsi' yubiyob. Jini cha'an tsi' yajcayetla, i p'olbaletla. Ma'anic tsi' yajca yan tac bʌ tejclum. 16Yom mi la' sʌq'uesan la' pusic'al i yejtal bʌ tsep pʌchʌlel. Mach la' chʌn ac' ti tsʌts'an la' pusic'al. 17Come lac Yum Dios i Diosʌch jini diosob, i Yumʌch jini yumʌlob. Wen ñuc lac Yum, wen bʌc'ñʌbil. Mach jelchojquic mi' c'uxbin winicob x'ixicob. Mach yujilic i ch'ʌmol majtañʌl cha'an mi' ñusan jontolil. 18Lac Yum mi' coltan meba' alʌlob yic'ot meba' x'ixicob. Mi caj i melob mu' bʌ i tic'lañob. Mi' c'uxbin ja'el jini ñajt bʌ ch'oyolob mu' bʌ i cʌyob i lumal cha'an mi' chumtʌlob ti lac tojlel. Muq'uix i yʌq'uenob i bʌl i ñʌc' yic'ot i pislel. 19Che'ʌch yom mi la' mel jatetla ja'el. Yom mi la' c'uxbin jini winicob parte bʌ i lumal, come ti yambʌ ora ya' chumuletla ti Egipto mach bʌ mero la' lumalic. 20Wersa yom mi la' bʌc'ñan lac Yum Dios. Jini jach mi caj la' yuman. Yom mi la' tsajcan. Cojach ti' caba' lac Yum yom mi la' wʌc' la' t'an. 21Jiñʌch yom bʌ mi la' ch'ujutesan. Jiñʌch lac Dios tsa' bʌ i mele jini ñuc tac bʌ yic'ot bʌbʌq'uen tac bʌ tsa' bʌ la' q'uele. 22Lac ñojte'elob tsa' jubiyob majlel ti Egipto yic'ot i yalobilob, lujuntiquil i chʌnc'al winicob ti pejtelob. Wʌle cabʌletixla come lac Yum Dios tsa'ix i p'ojlesayetla che' bajche' jini ec' tac ti panchan.
Currently Selected:
DEUTERONOMIO 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.