2 SAMUEL 21
21
Wocol ti' caj gabaoñob
1Che' woli ti yumʌntel David, tsa' caji wi'ñal uxp'ejl jab ya' ti' lumal. David cabʌl tsi' cajtibe lac Yum chuqui i sujmlel. Awilan, lac Yum tsi' sube cha'an ti' caj i mul Saúl, come jini tsi' bec'beyob i ch'ich'el jini gabaoñob. 2Jini rey tsi' choco ti pʌyol jini gabaoñob cha'an mi' pejcañob. Awilan mach israelobic jini gabaoñob. Jiñobʌch amorreojob. Jini israelob tsi' cʌn wa'chocoyob i t'an ti yambʌ ora yic'otob, pero Saúl tsi' ñopo i jisañob. Tsi' ña'ta i ñuq'uesan i lumal Israel yic'ot Judá.
3David tsi' subeyob jini gabaoñob: ¿Bajche' mi mejlel ti tojtʌl i mul Saúl cha'an mi la' c'ajtiben Dios i yutslel i t'an ti' tojlel pejtel Israel? che'en. 4Jini gabaoñob tsi' jac'ʌyob: Ma'anic mij c'ajtin lojon oro mi plata cha'an i q'uexol jini wocol tsa' bʌ i melbeyon lojon Saúl. Mach comic lojon mi' chʌmel mi juntiquilic israel, che'ob. David tsi' jac'ʌ: ¿Chuqui la' wom mic melbeñet? Muq'uix c mel, che'en. 5-6Jini gabaoñob tsi' jac'beyob: Saúl tsi' ñopo i jisañon lojon quic'ot c pi'ʌlob lojon. Jini cha'an yom mi la' wʌq'ueñon lojon wuctiquil i yalobilob cha'an mic jich'e lojon ti' tojlel lac Yum ya' ti Gabaa i tejclum Saúl, che'ob. Jini rey tsi' jac'beyob: Muq'uix cʌq'ueñetla, che'en.
7David ma'anic tsi' choco majlel Mefiboset (i yalobil Jonatán i yalobil bʌ Saúl), cha'an jini t'an tsa' bʌ i yʌq'ue Jonatán ti' tojlel lac Yum. 8Pero tsi' pʌybeyob cha'tiquil i yalobilob Saúl tsa' bʌ i cʌnta Rizpa (i yalobil Aja), i c'aba'ob Armoni yic'ot Mefiboset. Tsi' pʌybeyob ja'el jo'tiquil i yalobilob Mical, i yixic'al Saúl. Jini jo'tiquil i yalobilobʌch Adriel (i yalobil bʌ Barzilai chumul bʌ ti Meholat). 9Jini rey tsi' choco majlel jini wuctiquil i yalobilob Saúl ba' añob jini gabaoñob. Tsi' jich'iyob ya' ti bujtʌl ti' tojlel lac Yum. Che'ʌch tsa' chʌmiyob jini wuctiquilob che' ti ñaxan bʌ q'uin che' mi' tuc'ob cebada.
10Rizpa (i yalobil Aja) tsi' lich'i jump'ejl coxtal ya' ti' pam xajlel cha'an mi' wʌytan che' bʌ tsa' tejchi i tuc' cebada. Ya' tsa' cʌle jinto tsa' yajli ñaxan bʌ ja'al. Ma'anic tsi' wis ac'ʌ ti t'uchtʌl mi' juncojtic te'lemut ya' ti ch'ujlelʌl tac. Ma'anic tsi' yʌc'ʌ ti ochel bʌte'el ti ac'ʌlel. 11An majqui tsi' sube David chuqui woli' mel Rizpa. 12-14David tsi' yʌc'ʌ i t'an cha'an mi' mujquel i bʌquel jini winicob ya' ti' t'ejl i mucoñib Cis jini i tat Saúl. Tsi' c'ajtibeyob jini winicob ti Jabes Galaad i bʌquel Saúl yic'ot Jonatán. Come tsa'ix i chiliyob jini ch'ujlelʌl tac ya' ba' joc'chocobilob ti Betsan che' bʌ tsi' tsʌnsayob jini filisteojob ya' ti Gilboa. Jini winicob ti Jabes Galaad tsi' ch'ʌmbeyob sujtel i bʌquel Saúl, yic'ot i bʌquel Jonatán, yic'ot i bʌquel pejtelel tsa' bʌ jijch'iyob. Tsi' mucuyob i bʌquel Saúl yic'ot i bʌquel Jonatán ti' lumal benjamiñob ti Zela ya' baqui tsa' mujqui i tat i c'aba' Cis. Che'ʌch tsi' laj meleyob che' bajche' tsi' subeyob jini rey. Che' jini Dios tsa' caji i jac'ben i yoración cha'an mi' cha' ac' i wut jini lum.
Tsi' jisayob jini filisteojob
(1 Cr. 20.4-8)
15Jini filisteojob tsa' cha' cajiyob ti guerra yic'ot israelob. Jini cha'an David tsa' majli ti guerra yic'ot i soldadojob, pero ti jim bʌ ora David tsa' lujb'a. 16Juntiquil colem bʌ filisteo i c'aba' Isbibenob chucbil bʌ i lanza am bʌ i yalel jo'p'ejl kilo bronce, ts'ita' colel i tsʌnsan David. 17Pero ti jim bʌ ora Abisai (i yalobil Sarvia) tsa' c'oti i coltan David. Tsi' tsʌnsa jini filisteo. Jini cha'an jini winicob tsa' caji i subeñob David: Mach yomix ma' chʌn loq'uel ti guerra ti pejtelel ora ame a wʌc' ti jisʌntel i ñuclel israelob, che'ob.
18Mach jalic tsa' cha' ujti guerra ti' contra jini filisteojob ya' ti Gob. Sibecai jini husat tsi' tsʌnsa Saf, juntiquil wen colem bʌ winic. 19Che' bʌ tsa' cha' ujti guerra ya' ti Gob ti' contra jini israelob, jini Elhanán (i yalobil Jaare Oregim ch'oyol bʌ ti Belén) tsi' tsʌnsa Goliat jini geteo, chucbil bʌ i cha'an wen colem bʌ lanza. Che'ʌch bontʌl i c'ʌb lanza bajche' te' mu' bʌ i c'ʌñob ti jalbal. 20-21Che' bʌ tsa' cha' ujti yambʌ guerra ya' ti Gat, ya'an juntiquil winic wen chan bʌ, am bʌ wʌcts'ijt i yal i c'ʌb ti jujunts'ijt i c'ʌb, yic'ot wʌcts'ijt i yal i yoc ti jujunwejl. Ili winic tsi' techbe i mich'ajel israelob. Pero Jonatán (i yalobil i yeran David, i c'aba' Simea) tsi' tsʌnsa jini colem winic. 22Ili chʌncticlelob ya' lu' ch'oyolob ba'an colem winicob ya' ti Gat. Pejtel ili winicob tsa' yajliyob ti' c'ʌb i winicob David.
Currently Selected:
2 SAMUEL 21: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.