2 SAMUEL 1
CTUBI
1
David tsi' yubi chʌmenix Saúl
1Che' bʌ tsi' cha'le guerra David ti' contra amalecob, tsa' mʌjli i cha'an. Tsa' jijli cha'p'ejl q'uin ya' ti Siclag. 2Che' anix uxp'ejl q'uin i chʌmel Saúl, tsa' tili juntiquil winic tsa' bʌ loq'ui ba' tempʌbilob Saúl yic'ot i winicob. Laj tsijlem i bujc, an ts'ubejn ti' jol. Tsa' c'oti ba'an David. Tsi' pʌcchoco i bʌ. 3David tsi' c'ajtibe: ¿Baqui tilemet? che'en. Tsa' mejliyon ti puts'el ti' tojlel jini soldadojob israelo' bʌ, che'en. 4David tsi' sube: ¿Chuqui tsa' ujti? A wocolic yom ma' subeñon, che'en. Jini winic tsi' jac'ʌ: Pejtelel winicob tsa' laj puts'iyob. Chʌmenobix cabʌl winicob. Tsa'ix chʌmiyob ja'el Saúl yic'ot Jonatán i yalobil, che'en. 5David tsi' sube jini winic tsa' bʌ tili i tsictesʌben chuqui tsa' ujti: ¿Bajche' ma' ña'tan mi tsa'ix chʌmi Saúl yic'ot i yalobil Jonatán? che'en.
6Jini winic tsi' jac'ʌ: Come loq'uemonix ti Gilboa ba' tsac taja Saúl, ñuc ye'el i cha'an i lanza. Woli' tilel carreta tac ti' contra yic'ot winicob c'ʌchʌlo' bʌ ti caballo. 7Saúl tsi' sutq'ui i wut ti' pat, tsi' q'ueleyon. Tsi' pʌyʌyon. “Wʌ' añon”, cho'on tsac jac'ʌ. 8Tsi' c'ajtibeyon: “¿Majquiyet?” che'en. Tsac jac'ʌ: “Joñon amalecon”, cho'on. 9Che' jini tsi' subeyon: “Mic subeñet ti wocol t'an, yom ma' tilel tic tojlel cha'an ma' tsʌnsañon. Cuxulon to, pero ts'ita jax yom cha'an mic chʌmel”, che'en. 10Jini cha'an tsac ñochta, tsac tsʌnsa, come tsac ña'ta mach mejlix ti chʌn cuxtʌyel che' lojwemix. Jini cha'an tsac jochbe i corona am bʌ ti' jol yic'ot jini xotol bʌ am bʌ ti' c'ʌb. Wʌ'ix an. Tsac ch'ʌmbeyet tilel, c yum, che'en.
11Che' bʌ tsi' yubi iliyi, David tsi' jet' tsili i bujc. Che'ʌch tsi' meleyob ja'el pejtelel i winicob. 12Tsi' cha'leyob uq'uel. Tsi' wen meleyob i pusic'al. Ma'anic chuqui tsi' c'uxuyob. Ma'anic chuqui tsi' japʌyob c'ʌlʌl tsa' ochi ac'ʌlel cha'an tsʌnsʌbilobix ti guerra Saúl yic'ot Jonatán i yalobil Saúl, yic'ot jini israelob i cha'año' bʌ lac Yum. 13David tsi' sube jini winic tsa' bʌ i tsictesʌbe jini t'an: ¿Baqui ch'oyolet? che'en. Tsi' jac'ʌ: Ch'oyolon ti' lumal jini amalecob, che'en. 14David tsi' sube: ¿Mach ba anic ma' bʌc'ñan Dios? ¿Bajche' tsa' mejli a tsʌnsan jini winic yajcʌbil bʌ i cha'an lac Yum? che'en. 15Jini cha'an David tsi' pʌyʌ tilel juntiquil soldado. Tsi' sube: Tsʌnsan jini winic, che'en. Jini soldado tsi' jats'ʌ jini winic, tsi' tsʌnsa. 16David tsi' sube: La' ajnic ti a wenta a bajñel ch'ich'el. Come tsa'ix a wʌlʌc subu a bʌ cha'an tsa' tsʌnsa jini winic yajcʌbil bʌ i cha'an lac Yum.
David tsi' yuc'ta Saúl yic'ot Jonatán
17-18David tsi' wen cha'le uq'uel cha'an tsa' chʌmi Saúl yic'ot Jonatán i yalobil Saúl. Tsi' yʌc'ʌ mandar cha'an mi' cʌntesʌntelob pejtel año' bʌ ti Judá jini c'ay ts'ijbubil bʌ ti' juñilel Jaser:
19Tsa'ix jili i ñuclel jini israelob ti' joytʌlel.
Tsa'ix jiliyob jini ch'ejl bʌ winicob.
20Mach yomic mi la' tsictesan ya' ti Gat
Yic'ot ya' ti tejclum Ascalón,
Ame tijicñayic mi yubiñob jini filisteojob,
Ame mi' tse'tañonla jini winicob mach bʌ anic mi' cʌñob Dios.
21P'ump'un jax jini wits tac am bʌ ti Gilboa,
Mach chʌn talix ja'al yic'ot tijil ti pejtelel q'uin.
Mach i chʌn ac' i wut jini lum ti a witsilel.
Come ya'i tsa' bib'esʌnti i mʌctijib jini p'ʌtʌlo' bʌ.
Tsa'ix jili i yumʌntel Saúl, wa'chocobil bʌ ti Dios.
22Jini jalʌjb i cha'an bʌ Jonatán tsi' wen tsʌnsa i contra ti pejtelel ora.
Tsi' loc'sʌbe i ch'ich'el winicob.
Jini i yespada Saúl ma'anic ba' ora tsa' to'o sujti ti' yotot.
23Wen p'untʌbilob Saúl yic'ot Jonatán. Wen c'uxbibilob ja'el.
Ma'anic tsi' wis t'oxoyob i bʌ c'ʌlʌl che' bʌ tsa' chʌmiyob.
Ñumen sejbob ti xʌmbal bajche' xiye'.
Ñumen p'ʌtʌlob bajche' bajlum.
24X'ixicob ti Israel, uc'tanla Saúl, tsa' bʌ i wen ch'ʌlʌyetla ti la' pislel yic'ot ti oro.
25Q'uelela bajche' tsa' jiliyob jini ch'ejl bʌ winicob ti guerra.
P'ump'un jax tsa' chʌmi Jonatán.
26Wen ch'ijyem jax c pusic'al, c'uxbibil bʌ quermano Jonatán.
Ñumen c'ux tsa cubi a c'uxbiya bajche' i c'uxbiya x'ixicob.
27Tsa'ix jiliyob jini ch'ejl bʌ winicob.
Tsa'ix jisʌntiyob i ye'tijib ti guerra.
Che'ʌch ts'ijbubil ti' juñilel Jaser.

© Wycliffe Bible Translators, Inc. All rights reserved.

Learn More About I T’an Dios