1 SAMUEL 8
8
Jini israelob tsi' c'ajtiyob i rey
1Che' ñoxix Samuel, tsi' yotsa i yalobilob ti juez ti' tojlel israelob. 2Jini ñoj ñaxan bʌ i yalobil jiñʌch Joel. Jini ijts'iñʌl bʌ jiñʌch Abías. Tsi' cha'leyob meloñel ya' ti Beerseba. 3Pero mach lajalobic tsi' meleyob che' bajche' i tat. Tsa' jach caji i mulañob taq'uin. Tsi' ch'ʌmʌyob tac i majtan. Mach tojic tsi' cha'leyob meloñel. 4Tsa' caji i tempañob i bʌ pejtelel jini ñoxobix bʌ ti' tojlel israelob. Tsa' majliyob ti Ramá ya' ba' chumul Samuel. 5Tsi' subeyob: Awilan ñoxetix. Leco jax woli' melob a walobilob. Mach lajalobic che' bajche'et. Jini cha'an yom ma' wa'chocobeñon lojon c rey cha'an mic yuman lojon che' bajche' mi' melob ti yan tac bʌ tejclum, che'ob.
6Tsa' caji i wen mel i pusic'al Samuel cha'an tsi' c'ajtiyob rey cha'an mi' yumañob. Tsa' caji i pejcan lac Yum ti oración. 7Lac Yum tsi' sube Samuel: Yom ma' wen ñich'tʌbeñob i t'an jini winicob ti pejtelel chuqui mi' subeñetob. Mach jatetic woli a ts'a'lentel, pero woli' ts'a'leñoñob. Mach chʌn yomobix i yumañon. 8Che' bʌ tsac loc'sayob ti Egipto c'ʌlʌl wʌle mi' chañ'esañob i bʌ. I tilelʌch mi' cʌyoñob cha'an mi' ch'ujutesañob yambʌ diosob. Che'ʌch woli' melob ti a tojlel ja'el. 9Jini cha'an yomix ma' wubibeñob i t'an. Pero tsictesʌbeñob ti jamʌl bajche' mi caj i ñusañob wocol ti' tojlel i reyob mu' bʌ caj i yumañob, che'en.
10Jini cha'an Samuel tsi' cha' pejca jini año' bʌ i ye'tel tsa' bʌ i c'ajtiyob i rey. Tsi' subeyob pejtelel i t'an lac Yum. 11Tsi' yʌlʌ: Che'ʌch mi caj i melbeñetla jini rey mu' bʌ caj la' yuman. Mi caj i pʌy majlel la' walobilob cha'an mi' cʌntʌbeñob i carreta tac tujc'ʌbil bʌ majlel ti caballo. C'ʌchʌlob ti caballo mi caj i majlelob ti guerra. Yaño' bʌ ajñel mi caj i majlelob ti' tojel i carreta i yum. 12Jini rey mi caj i wa'chocon ñuc taco' bʌ i ye'tel cha'an mi' cʌntañob winicob ti mil tac, yic'ot lujuntiquil i yuxc'al tac año' bʌ i ye'tel ti guerra. Yaño' bʌ mi caj i top'beñob i lum, mi' cajelob ti c'ajbal. Yaño' bʌ mi caj i melbeñob i ye'tijib cha'an guerra yic'ot i te'el tac i carreta. 13Jini rey mi caj i pʌy ja'el jini xch'oc bʌ la' walobilob cha'an mi' melbeñob xojocña bʌ perfume. Yaño' bʌ mi caj i melbeñob i waj yic'ot i bʌl i ñʌc'. 14Mach jinic jach pero mi caj i chilbeñetla uts'at tac bʌ la' chol, yic'ot la' ts'usubil, yic'ot la' wolivojil cha'an mi' yʌq'ueñob x'e'telob i cha'an. 15Mi caj i ch'ʌm i diezmojlel la' ts'usub yic'ot la' pac', cha'an mi' yʌq'ueñob x'e'telob i cha'an. 16Mi caj i pʌy x'e'telob la' cha'an, yic'ot la' criada, yic'ot wen ch'ejl bʌ ch'iton winicob la' cha'an, yic'ot la' burro cha'an mi' c'ʌn i mel i ye'tel. 17Mi caj i ch'ʌm i diezmojlel la' tiñʌme'. Mi caj la' melbeñob i ye'tel. 18Ti jim bʌ q'uin mi caj la' cha'len c'am bʌ t'an cha'an cabʌl la' wocol ti' tojlel jini rey tsa' bʌ la' lon yajca. Pero ti jim bʌ q'uin ma'anic mi caj i jac'beñetla lac Yum. Che' tsi' yʌlʌ Samuel.
19Jini winicob ma'anic tsi' mulayob i ñich'tʌben i t'an Samuel. Tsi' yʌlʌyob: Mach isujmic bajche' wola' wʌl. Wersa mi caj c taj lojon c rey cha'an mic yuman lojon. 20Com lojon ajñel che' bajche' yan tac bʌ tejclum. Jini c rey lojon mi caj i cha'len meloñel tic tojlel lojon. Mi caj i pʌyon lojon ti guerra, che'ob. 21Samuel tsi' laj ubi pejtelel chuqui tsi' yʌlʌyob. Tsi' cha' sube lac Yum. 22Lac Yum tsi' sube Samuel: Jac'beñob i t'an. Wa'chocobeñob i rey, che'en. Che' jini Samuel tsa' caji i subeñob israelob cha'an mi' laj sujtelob ti' lumal.
Currently Selected:
1 SAMUEL 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.