1 SAMUEL 24
24
David ma'anic tsi' tsʌnsa Saúl ti Engadi
1Saúl tsi' cʌyʌ i yajñesan jini filisteojob. Tsa' subenti: Ya' mucul David ti' tiquiñal pañimil i c'aba' Engadi. 2Tsi' pʌyʌ majlel uxp'ejl mil winicob yajcʌbilo' bʌ ti Israel. Tsa' majli i sʌclañob David yic'ot i winicob ya' ba'an xajlelol i c'aba' Mate' Chivo ya' ti' tojel i pasibal q'uin. 3Che' woli ti xʌmbal majlel, Saúl tsa' c'oti ba' an corral cha'an tiñʌme'. Ya'an tam bʌ ch'en ba' tsa' ochi cha'an mi' majlel ti wutstʌl. Ya' mucul David ti' mal jini ch'en yic'ot i winicob. 4I winicob David tsi' subeyob: Tsa'ix c'oti i yorajlel. Lac Yum wolix i yʌc' a contra ti a c'ʌb cha'an ma' melben bajche' jach a wom, che'en. Ti mucul jach tsa' majli David ba' wutsul Saúl. Tsi' c'unte' tsepbe junxujt' i ti' i bujc Saúl. 5Che' bʌ tsa' ujti i tsep, tsa' caji' mel i pusic'al cha'an tsi' tsepbe jini junxujt' i bujc Saúl. 6Tsi' sube i winicob: Mach yomic Dios. Ma'anic chuqui mi caj c tumben c yum, come yajcʌbilʌch ti lac Yum. Mach yomic mic wis tic'lan come lac Yum tsi' wa'choco ti' ye'tel, che'en. 7Che' jini David tsi' mʌcta i winicob cha'an ma'anic mi' techob i bʌ ti' contra Saúl. Tsa' ch'ojyi Saúl. Tsa' loq'ui ti ch'en. Tsa' majli ti' bijlel.
8Che' jini David tsa' loq'ui ja'el ya' ti ch'en. Tsi' cha'le oñel ti' pat Saúl: C yum rey, che'en. Saúl tsi' sutq'ui i bʌ cha'an mi' q'uel. David tsi' c'uchchoco i bʌ ti lum. 9David tsi' sube: ¿Chucoch ma' ñop che' mi' lon subob a winicob an i mul David ti a tojlel? Ma'anic wolij contrajiñet. 10Q'uele bajche' lac Yum tsi' yʌc'ʌyet tij c'ʌb ya' ti ch'en. C winicob tsi' xiq'uiyon cha'an mic tsʌnsañet. Pero tsac p'untayet. Tsa cʌlʌ: Mach mejlic c tic'lan c yum come yajcʌbilʌch i cha'an lac Yum, cho'on. 11C tat, q'uele i xujt'il a bujc. Che' bʌ tsac tsepbe i xujt'il a bujc, ¿chucoch ma'anic tsac tsʌnsayet? Ña'tan che' jini, ma'anic c jontolil. Ma'anic tsac cha'le mulil ti a tojlel. ¿Chucoch woli a sʌclañon cha'an ma' chilbeñon j cuxtʌlel? 12La' i melonla lac Yum. La' i q'uextʌbeñet a mul. Pero joñon ma'anic mi caj c tic'lañet. 13Che' bajche' tsi' yʌlʌyob wajali lac ñojte'elob: “Ti' tojlel xjontolil mi' tejchel jontolil”, che'ob. Jini cha'an mach muq'uic c tic'lañet. 14Reyet ti Israel. ¿Majqui wola' contrajin? ¿Majqui wola' wajñesan? ¿Mach ba joñonic? ¿Chʌmen ts'i'on ba? ¿Ch'ʌcon ba? 15Jini cha'an, la' i melonla lac Yum come jiñʌch Xmeloñel. La' i wen q'uelon. La' i coltañon. La' i yʌc'on ti colel ti a c'ʌb. Come wen yujil toj bʌ meloñel. Che' tsi' yʌlʌ David.
16Che' bʌ tsa' ujti ti t'an David, Saúl tsi' yʌlʌ: ¿Jim ba a t'an calobil David? che'en. Tsa' caji ti uq'uel. 17Saúl tsi' yʌlʌ: Ñumen tojet calobil che' bajche' joñon. Tsa'ix a pʌsbeyon a wutslel. Pero jontol tsac pʌsʌ c bʌ ti a tojlel. 18Tsa'ix a p'untayon ti' yutslel a pusic'al. Come lac Yum tsi' yʌc'ʌyon ti a c'ʌb. Isujm, ma'anic tsa' tsʌnsayon. 19Cujil ma'anic wola' contrajiñon, come mach che'ic mi lac melben laj contrajob che' mi lac tajyob che' mach yʌxʌlic i yo. ¿Mu' ba la cʌc'ob ti colel ti laj c'ʌb? Jini cha'an, la' i wen pʌsbeñet i yutslel lac Yum cha'an tsa' p'untayon. 20Cujil mi caj a wochel ti yumʌl. Pejtelel israelob mi caj i tajob i wenlel ti a yumʌntel. 21Jini cha'an com ma' wʌc' a t'an ti' tojlel lac Yum cha'an ma'anic ma' choc loq'uel calobilob che' yumʌletix, ame junyajlel jisʌntic j c'aba', che'en Saúl. 22David tsi' yʌq'ue i t'an. Che' jini tsa' sujti Saúl, pero tsa' cha' majli David yic'ot i winicob ya' ti ch'en ba' wen mʌcbilob.
Currently Selected:
1 SAMUEL 24: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.