1 SAMUEL 23
23
Ya'an David ti' tiquiñal pañimil
1Jini filisteojob tsa' cajiyob ti leto ti Keila. Tsi' xujch'iyob trigo ya' ba' mi' jajts'el. 2Che' bʌ tsi' yubi David, tsi' pejca lac Yum. Tsi' yʌlʌ: ¿Yom ba mic majlel ti guerra yic'ot filisteojob? che'en. Lac Yum tsi' jac'be: Cucu, cha'len guerra ti' contra filisteojob. Coltan jini año' bʌ ti Keila, che'en. 3Pero jini año' bʌ yic'ot David tsi' subeyob: Mach yomic mi lac majlel ti Keila. Bʌbʌq'uen mi lac chʌmel wʌ' ti Judá. Ñumen wocol mi tsa' majli laj contrajin jini filisteojob ya' ti Keila, che'ob. 4Jini cha'an David tsi' cha' c'ajtibe lac Yum. Lac Yum tsi' jac'be: Juben majlel ti Keila. Joñon mi caj cʌc' ti a c'ʌb jini filisteojob, che'en. 5Jini cha'an tsa' majli David yic'ot pejtelel i winicob. Tsi' cha'leyob guerra yic'ot filisteojob ti Keila. Tsi' laj ch'ʌmbeyob i wacax. Tsi' wen jisayob. Che'i David tsi' colta jini año' bʌ ti Keila.
6Abiatar i yalobil Ahimelec tsa' puts'i tilel ba'an David ti Keila. Tsi' ch'ʌmʌ tilel jini bujcʌl cha'an motomaj. 7Saúl tsi' yubi ya'ix majlem David ti Keila. Tsa' caji' bajñel ña'tan: Dios tsa'ix i yʌq'ueyon tij c'ʌb, come tsa'ix i bajñel ñup'u i bʌ ti jini tejclum am bʌ i puertajlel yic'ot i ñejt'il tac, che'en. 8Saúl tsi' tempa pejtelel jini soldadojob cha'an mi' majlelob ti guerra ti Keila cha'an mi' chucob David yic'ot i winicob. 9David tsi' yubi woli' tilel Saúl ti' contra. Tsi' sube Abiatar jini motomaj: Ch'ʌmʌ tilel jini bujcʌl, che'en. 10David tsi' cha'le oración. Tsi' yʌlʌ: C Yum i Dios Israel, a winicon. Tsa'ix cubi yom tilel Saúl ti' contra Keila cha'an mi' jisan, cha'an yom i jisañon lojon. 11¿Chuqui mi caj i melob jini winicob ti Keila? ¿Mu' ba caj i yʌc'oñob ti' c'ʌb j contrajob? ¿Mu' ba caj i jubel tilel Saúl che' bajche' tsa cubi? C Yum i Dioset Israel, mic subeñet ti wocol t'an, tsictesʌbeñon, come a winicon, che'en. Lac Yum tsi' yʌlʌ: Mu'cu caj i jubel Saúl, che'en. 12Tsi' c'ajtibe David: ¿Mu' ba cajel i yʌc'oñob quic'ot c winicob ti' c'ʌb Saúl jini chumulo' bʌ ti Keila? che'en. Lac Yum tsi' jac'ʌ: Mu'cu caj i yʌq'uetla, che'en. 13Jini cha'an David tsa' loq'ui ti Keila yic'ot i winicob. Añob lujunc'al i cha'bajc' (600) ti pejtelelob. Tsi' cha'leyob xʌmbal baqui jach tsa' mejliyob. Che' bʌ tsi' ña'ta Saúl loq'uemix David ti Keila ma'anix chuqui tsi' mele. 14David tsa' ajni ya' ti' tiquiñal pañimil i c'aba' Zif ba' wen mʌctʌbil ti xajlelol ya' ti wits. Saúl tsi' sʌcla David ti pejtelel q'uin. Pero Dios ma'anic tsi' yʌq'ue ti' c'ʌb.
15David tsa' ajni ti Hores ya' ti' tiquiñal pañimil ti Zif come yujil woli' sʌclan Saúl cha'an mi' tsʌnsan. 16Tsa' tili Jonatán i yalobil Saúl ba'an David ya' ti Hores. Tsi' p'ʌt'esa ti Dios. 17Tsi' sube: Mach a cha'len bʌq'uen, come ma'anic mi caj i tajet Saúl jini c tat. Jatet mi caj a wochel ti yumʌl ti' tojlel Israel. Joñon mi caj cochel ti a waj coltaya. Jini c tat Saúl yujilix iliyi, che'en. 18Comol tsi' yʌc'ʌyob i t'an ti' tojlel lac Yum. Jonatán tsa' majli ti' yotot. David tsa' cʌle ya' ti Hores.
19Che' ya'an Saúl ti Gabaa, jini año' bʌ ti Zif tsi' subeyob: Ubibil c cha'an lojon cha' wʌ'ix an David ti lac lum. Ya' mucul ti xajlelol tac ti Hores. An ti bujtʌl i c'aba' Haquila am bʌ ti' tojel i tiquiñal pañimil ya' ti sur. 20Jini cha'an mi a wom jubel majlel ti ora, c rey, mi caj cʌc' David ti a c'ʌb, che'ob. 21Saúl tsi' yʌlʌ: La' i yʌq'ueñetla i tijicñʌyel la' pusic'al lac Yum come tsa'ix la' p'untayon. 22Cucula ti ñaxan. Wen q'uelela jini lum ba' mucul. Pejcanla jini tsa' bʌ i q'uele, come cujil wen p'ip' jini David. Mi' wen cʌntan i bʌ. 23Wen tsajinla. Yom mi la' wen cʌn jini ch'en ba' mi' muc i bʌ. Cha' sujtenla tilel cha'an mi la' subeñon baqui mero mucul. Che' jini muq'uix c majlel la' wic'ot. Mi wʌ'to an ti ili pañimil David, mi cajel c sʌclan ti pejtelel xchumtʌl tac ti Judá. Che' tsi' yʌlʌ Saúl.
24Ñaxan tsa' majliyob ti Zif i winicob Saúl. David yic'ot i winicob ya' añob ti joctʌl i c'aba' Maón ya' ti Arabá ti sur. 25Tsa' majli Saúl yic'ot i winicob cha'an mi' sʌclan. Tsa' tsictesʌbenti David. Jini cha'an tsi' mujcu i bʌ ba'an colem xajlel tac. Tsa' cʌle ya' ti joctʌl i c'aba' Maón. Che' bʌ tsi' yubi Saúl, tsi' tsajca majlel David ya' ti joctʌl Maón. 26Saúl woli' majlel ti junwejl jini wits. Jixcu David yic'ot i winicob, ya' añob ti yambʌ junwejl. David yic'ot i winicob tsi' cha'leyob wersa cha'an mi' puts'tañob Saúl. Pero Saúl yic'ot i winicob tsi' joy mʌctayob cha'an mi' chucob. 27Ti jim bʌ ora tsa' tili juntiquil suboñel ba'an Saúl. Tsi' sube: La' ti ora come tsa'ix ochiyob filisteojob ti lac lumal, che'en. 28Saúl tsi' cʌyʌ i sajcan David. Tsa' majli i contrajin jini filisteojob. Jini cha'an tsi' yotsʌbeyob i c'aba' jini xajlel tsa' bʌ i mʌctayob: T'oxoñib. 29David tsi' cʌyʌ jini joctʌl, tsa' letsi majlel. Tsa' caji ti jijlel ya' ti ch'en tac ba' wen mʌctʌbil ya' ti Engadi.
Currently Selected:
1 SAMUEL 23: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.