1 SAMUEL 12
12
I subal Samuel
1Samuel tsi' sube pejtelel israelob: Tsa'ix cubi pejtelel chuqui tsa' la' subeyon. Tsa'ix c wa'chocobeyetla la' rey. 2Jini cha'an q'uelela jini rey woli bʌ i toj'esañetla. Ñoxonix, sʌquix c jol. Wʌ' añob calobilob la' wic'ot. Tsa'ix c mele chuqui toj ti la' wut c'ʌlʌl che' alobon to. 3Wʌ'ix añon wʌle. Yomix mi la' sub ti' tojlel lac Yum, yic'ot ti' tojlel jini yajcʌbil bʌ rey, mi an chuqui leco tsac melbeyetla. Subula mi an juntiquil tsa' bʌ c tic'la, mi tsac ch'ʌmʌ la' wacax, mi la' burro, mi mach tojic tsac meleyetla, mi tsac ch'ʌmʌ c majtan cha'an mij coltan jini am bʌ i mul. Subuxla wʌle. Che' tsi' yʌlʌ Samuel. 4Jini israelob tsi' yʌlʌyob: Ma'anic tsa' wis tic'layon lojon. Ma'anic chuqui tsa' chilbeyon lojon. Ma'anic tsa' ch'ʌmʌ a majtan, che'ob. 5Samuel tsi' yʌlʌ: Lac Yum jiñʌch testigo c cha'an ti la' tojlel. Jini yajcʌbil bʌ rey i cha'an, jiñʌch testigo ja'el ti ili q'uin, come ma'anic chuqui leco tsa' la' taja tic tojlel, che'en. Tsi' jac'ʌyob: Melel bajche' ma' wʌl. Jiñʌch testigo Dios, che'ob.
6Samuel tsi' subeyob: Lac Yum jiñʌch tsa' bʌ i wa'choco Moisés yic'ot Aarón. Tsi' pʌyʌ loq'uel la' ñojte'elob ya' ti' lumal Egipto. 7Jini cha'an yom mi la' wa'tʌl ti' tojlel lac Yum cha'an mic subeñetla pejtelel chuqui tac uts'at tsi' melbeyetla yic'ot la' ñojte'elob. 8Che' bʌ ya'ix an israelob ti Egipto, tsa' caji i yubiñob wocol i p'olbal. Jini la' ñojte'elob tsi' pejcayob lac Yum ti c'am bʌ t'an. Jini cha'an lac Yum tsi' chocbeyob majlel Moisés yic'ot Aarón tsa' bʌ i loc'sayob ti Egipto. Tsi' pʌyʌyob tilel ilayi.
9Pero tsa' ñajʌyi i cha'añob lac Yum Dios. Jini cha'an Dios tsi' yʌc'ʌyob ti' c'ʌb Sísara i yum jini soldadojob loq'uemo' bʌ ti Hazor, yic'ot ti' c'ʌb filisteojob, yic'ot ti' c'ʌb jini moabob tsa' bʌ i contrajiyob ti guerra. 10Jini cha'an tsi' pejcayob lac Yum ti c'am bʌ t'an. Tsi' yʌlʌyob: “Tsa'ix c cha'le lojon mulil, come tsaj cʌyʌyet lojon. Tsa'ix c lon ch'ujutesa lojon jini Baal yic'ot Astarot. Cha' coltañonix lojon. Che' jini mux c cha' mel lojon chuqui a wom”, che'ob. 11Lac Yum tsi' chocbeyob majlel Jerobaal, Barac, Jefté yic'ot Samuel. Tsi' coltayetla loq'uel ti' p'ʌtʌlel la' contrajob am bʌ ti la' joytʌlel. Che' jini cha' ñʌch'ʌletixla wʌ' ba' chumuletla.
12Che' bʌ tsa' la' bʌc'ña Nahas i rey jini amoñob che' woli' contrajiñetla, tsa' la' subeyon: “Wersa comix lojon c rey”, che'etla, anquese añʌch la' rey, jiñʌch lac Yum Dios. 13Jini cha'an wʌ'an la' rey tsa' bʌ la' yajca. Jiñʌch tsa' bʌ la' c'ajti. Awilan lac Yum tsa'ix i wa'chocobeyetla la' rey. 14Mi muq'uix caj la' wen bʌc'ñan lac Yum, mach yomic mi la' ñusʌben i t'an. Che' jini mi caj la' tsajcan lac Yum Dios jatetla yic'ot jini rey mu' bʌ caj i cha'len yumʌl ti la' tojlel. 15Pero mi ma'anic mi la' wubiben i t'an lac Yum, mi mux la' ñusʌben i t'an, che' jini lac Yum mi caj i yʌq'ueñetla wocol che' bajche' tsi' yʌq'ueyob la' ñojte'el.
16Pijtanla jini ñuc bʌ i melbal lac Yum. Q'uelela chuqui mi caj i mel ti la' tojlel. 17¿Mach ba i yorajlelix mi' tujq'uel trigo che' ma'anic mi' cha'len ja'al? Joñon mi caj c pejcan lac Yum. Mux caj i yʌc' ti t'an chajc. Mi caj i choc tilel ja'al cha'an mi la' ña'tan ñucʌch la' mul ti' contra lac Yum cha'an tsa' la' c'ajti la' rey. Che' tsi' yʌlʌ Samuel. 18Che' jini Samuel tsi' pejca lac Yum ti oración ti jini jach bʌ q'uin. Lac Yum tsi' choco tilel i t'an chajc yic'ot ja'al. Pejtelel jini winicob tsa' caji i bʌc'ñañob lac Yum. Tsi' bʌc'ñayob Samuel ja'el.
19Ti pejtelelob tsa' caji' subeñob Samuel: A wocolic, pejcan a Yum Dios ti oración. C'ajtiben cha'an mi' coltañon lojon ame chʌmicon lojon cha'an pejtelel c mul lojon. Melel jontolon lojon. Jini cha'an tsaj c'ajti lojon c rey, che'ob. 20Samuel tsi' sube jini winicob: Mach la' cha'len bʌq'uen. Melel tsa' la' cha'le mulil, pero mach yomic mi la' chʌn tʌts' la' bʌ ti' tojlel lac Yum. Ch'ujutesanla ti pejtelel la' pusic'al. 21Mach la' lon majlel ba'an dios te' tac, come ma'anic chuqui mi' yʌq'ueñetla, come ma'anic i c'ʌjñibal. 22Ma'anic mi caj i bajñel cʌy i tejclum lac Yum ame ts'a'lentic jini ñuc bʌ i c'aba', come woli' ña'tan ti' pusic'al bajche' yom i yotsañetla ti' tejclum. 23Joñon ja'el mi caj c chʌn coltañetla ti oración. Machiqui, mic taj c mul ti' contra lac Yum. Mi caj j cʌntesañetla ti jini wen bʌ bij, jini toj bʌ. 24Chʌcʌ q'uele la' bʌ cha'an mi la' wen bʌc'ñan lac Yum, cha'an mi la' ch'ujutesan ti pejtelel la' pusic'al. P'isila ti wenta jini ñuc tac bʌ i ye'tel tsa' bʌ i melbeyetla. 25Pero mi tsʌts to la' pusic'al mi la' chʌn cha'len jontolil jatetla yic'ot jini la' rey, p'ump'un mi caj la' cʌytʌl. Che' tsi' yʌlʌ Samuel.
Currently Selected:
1 SAMUEL 12: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.