1 SAMUEL 11
11
Saúl tsi' jisa jini amoñob
1Ti wi'il tsa' caji i tech guerra Nahas jini amón. Tsa' tili yic'ot i soldadojob i contrajiñob Jabes am bʌ ti Galaad i cha'an bʌ israelob. Pejtelel jini winicob chumulo' bʌ ti Jabes tsi' subeyob Nahas: Yom ma' laj a t'an quic'ot lojon. Che' jini mi caj c mel lojon chuqui a wom, che'ob. 2Pero jontol Nahas jini amón. Tsi' jac'ʌ: Uts'atʌch bajche' woli la' wʌl. Mux lac laj lac t'an. Wersa mi la' wʌc' la' bʌ cha'an mic loc'sʌbeñetla jini ñoj bʌ la' wut ti jujuntiquiletla. Che' jini mi caj i yubiñob quisin pejtelel israelob, che'en. 3Jini xñoxob ti Jabes tsi' jac'ʌyob: Aq'ueñon lojon wucp'ejl q'uin cha'an mic choc lojon majlel suboñel ti' tojlel pejtelel Israel. Mi ma'anic majqui yom i coltañon lojon, che' jini mi caj cʌc' lojon c bʌ ti a wenta, che'ob. 4Che' bʌ tsa' c'otiyob jini suboñelob ti Gabaa ba' chumul Saúl, tsa' caji i subeñob jini t'an pejtelel tejclumob. Che' bʌ tsi' yubiyob, tsa' cajiyob ti uq'uel. Wen c'amob i yuq'uel.
5Ya' tilel Saúl. Woli' toj'esan tilel tat wacax come ujtemix i ye'tel ti jamil. Tsi' yubibeyob i t'an i yuq'uel. Tsi' c'ajti: ¿Chuqui tsa' ujti ti' tojlel winicob ya' ti tejclum? ¿Chucoch woliyob ti uq'uel? che'en. Tsa' caji i subeñob chuqui tsi' yʌlʌyob jini ch'oyolo' bʌ ti Jabes. 6Che' bʌ tsi' yubi jini t'an Saúl, i yEspíritu Dios tsa' tili ti' tojlel yic'ot i p'ʌtʌlel. Tsa' wen mich'a. 7Tsi' ch'ʌmʌ cha'cojt wacax. Tsi' bic'ti t'ojo. Tsi' choco majlel yic'ot winicob ti pejtelel Israel. Tsi' yʌlʌ: Che' lajal mi' caj i tumbentel i tat wacax jini winic mach bʌ anic mi' loq'uel majlel yic'ot Saúl yic'ot Samuel ja'el, che'en. Che' jini lac Yum tsi' techbeyob i bʌq'uen pejtelel winicob. Ti' pejtelelob tsa' laj tiliyob cha'an mi' coltañob Saúl. 8Saúl tsi' tempayob tilel ti Bezec. An jo'lujunc'al ti mil (300,000) winicob loq'uemo' bʌ ti Israel, yic'ot lujump'ejl i cha'c'al mil (30,000) winicob loq'uemo' bʌ ti Judá. 9Tsa' caji' subeñob jini suboñel ch'oyolo' bʌ ti Jabes: Yom mi la' suben la' pi'ʌlob año' bʌ ti Jabes ti Galaad: “Ijc'ʌl che' ticʌwix q'uin mi caj la' coltʌntel”. Che'ʌch yom ma' subeñob, che'ob. Che' jini tsa' majliyob ti Jabes jini suboñelob. Tsi' subeyob i pi'ʌlob. Che' bʌ tsi' yubiyob, toj tijicñayob i pusic'al. 10Jini cha'an jini año' bʌ ti Jabes tsi' subeyob i contrajob: Ijc'ʌl mi caj cʌc' lojon c bʌ ti la' c'ʌb cha'an mi la' mel pejtelel chuqui la' wom tic tojlel lojon, che'ob. 11Che' ti yijc'ʌlal Saúl tsi' yʌc'ʌ mandar cha'an mi' t'oxob i bʌ ti uxmojt soldadojob. Ti sʌc'ajel tsa' ochiyob ba' woli' jijlelob jini amoñob ti' t'ejl tejclum. Tsa' caji' jisañob c'ʌlʌl che' ticʌwix q'uin. Jini tsa' bʌ cʌleyob tsa' pam pujquiyob, jujuntiquil ti' bijlel.
12Jini israelob tsi' subeyob Samuel: ¿Baqui an jini winicob mach bʌ yomobic i yumañob Saúl? Pʌyʌ tilel jini winicob cha'an mic tsʌnsañob lojon, che'ob. 13Pero Saúl tsi' jac'ʌ: Ma'anic majqui mi' caj ti chʌmel wʌle cha'an i mul, come lac Yum tsa'ix i colta israelob, che'en. 14Samuel tsi' subeyob jini winicob: La' cula, conla ti Gilgal cha'an mi lac wa'chocon jini rey cha'an mi' tech i yumʌntel, che'en. 15Jini cha'an tsa' majliyob pejtelel jini winicob ti Gilgal. Tsi' wa'chocoyob Saúl ti rey ti' tojlel lac Yum. Tsi' yʌq'ueyob i majtan lac Yum cha'an mi' subeñob wocolix i yʌlʌ. Tsi' wen ubi i tijicñʌyel i pusic'al Saúl yic'ot pejtelel jini israelob.
Currently Selected:
1 SAMUEL 11: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.