1 REYES 9
9
I trato lac Yum ti' tojlel Salomón
(2 Cr. 7.11-22)
1Che' jini Salomón tsa' ujti i mel jini Templo yic'ot uts'atax bʌ i yotot, yic'ot pejtel yan tac bʌ tsa' bʌ i ña'ta i mel. 2-3Lac Yum tsi' cha' pʌsʌ i bʌ ti' tojlel che' bajche' tsi' pʌsʌ i bʌ ya' ti Gabaón. Lac Yum tsi' sube: Tsa'ix cubibeyet a woración. Ch'ujul jini Templo tsa' bʌ a mele, come tsac ch'ʌmʌ tic wenta. Wʌ' mi caj cajñel ti pejtelel ora. Mi caj c chʌn cʌntan. Tijicña mij q'uel. 4Mi xuc'ul ma' chʌn tsajcañon che' bajche' tsi' tsajcayon a tat David, mi ti jump'ejl jach a pusic'al ma' jac' pejtel jini c t'an yic'ot j cʌntesa, 5mi caj c xuc'chocobeñet a yumʌntel ti' tojlel israelob ti pejtelel ora che' bajche' tsac sube a tat David: “Mi caj cʌq'ueñet a q'uexol tilem bʌ ti a p'olbal cha'an mi' cha'len yumʌl ti pejtelel ora ti' tojlel israelob”, cho'on tsac sube.
6Pero mi tsa' cʌyʌyon, jatet yic'ot a walobilob, mi ma'anic mi la' jac'beñon c mandar yic'ot c t'an tsa' bʌ c subeyetla, mi che'ʌch mi la' mel cha'an la' wom la' ch'ujutesan yan tac bʌ dios, 7che' jini mi caj c loc'san israelob wʌ' ti' lumal tsa' bʌ cʌq'ueyob. Mi caj c sʌc jisan ili ch'ujul bʌ Templo ba' tsa cʌc'ʌ c bʌ ti cʌjñel. Che' jini mi caj i wajlentelob israelob. 8Ili Templo mi caj i jejmel. Majqui jach mi' ñumel ilayi ba' p'ul jembil ili xajlel mi caj i yʌl: “¿Chucoch tsa' jejmi? Jini lac Yum ¿mach ba anic tsi' c'uxbi i lum yic'ot i Templo?” che'ob. 9Mi caj i yʌlob: “I mulʌch i winicob cha'an tsi' cʌyʌyob i Yum Dios tsa' bʌ i loc'sa i ñojte'elob ya' ti' lumal Egipto. Tsi' ch'ujutesayob dioste' tac, tsi' yumayob. Jini cha'an lac Yum tsi' yʌq'ueyob pejtel ili wocol”. Che' mi caj i yʌlob. Che' tsi' yʌlʌ lac Yum.
Yambʌ i melbal Salomón
(2 Cr. 8.1-18)
10Junc'al jab tsa' jal'a ti melol jini Templo yic'ot i yotot Salomón. Che' ujtemix i mel, 11-12Salomón tsi' yʌq'ue jini rey Hiram am bʌ ti Tiro junc'al tejclum an tac bʌ ti Galilea. Jiñʌch i tojol jini ch'ujte' yic'ot ciprés yic'ot oro tsa' bʌ i yʌc'ʌ Hiram. Tsa' c'ʌjni pejtel iliyi cha'an i melol jini Templo yic'ot i yotot Salomón. Hiram tsa' tili i q'uel jini tejclum tac, pero ma'anic tsi' mula. 13Tsi' yʌlʌ: Mach uts'atic mij q'uel iliyi, queran. Ma'anix i c'ʌjñibal ili tejclum tac, che'en. Jini cha'an tsa' pejcʌnti jini lum ti jumpejt lum mach bʌ anic i c'ʌjñibal. 14Pejtel jini oro tsa' bʌ i yʌq'ue Salomón an i tojol che' bajche' cha'c'al millón ti peso.
15Salomón tsi' wersa wets'e tilel winicob cha'an mi' melob Templo, yic'ot i yotot, yic'ot Milo, yic'ot i ts'ajquilel Jerusalén, yic'ot uxp'ejl tejclum i c'aba' Hazor, yic'ot Meguido, yic'ot Gezer. 16Gezer jiñʌch tejclum tsa' bʌ puli ti c'ajc ti guerra ti oñiyi. Tsa' mʌjli i cha'an jini rey am bʌ ti Egipto. Tsi' tsʌnsa jini israelob. Ti wi'il tsi' yʌc'ʌ jini tejclum ti' wenta xch'oc bʌ i yalobil. Jiñʌch i majtan che' bʌ tsa' ñujpuñi yic'ot Salomón. 17-18Salomón tsi' cha' mele jini Gezer, yic'ot Bethorón am bʌ ti entʌl, yic'ot Baalat, yic'ot Tadmor am bʌ ti colem bʌ i tiquiñal pañimil ti' lumal Judá. 19Tsi' mele ja'el cabʌl tejclum ba' mi' lojtel trigo yic'ot carreta tac cha'an guerra. Tsi' mele tejclum tac ba' mi' yajñelob soldadojob mu' bʌ i c'ʌchtañob caballo, yic'ot xñijca carretajob. Tsi' mele cabʌl otot ja'el ya' ti Jerusalén yic'ot ti Líbano yic'ot ti pejtelel i lumal. 20-21Ti jujump'ejl lum ba' tsa' mʌjli i cha'an, Salomón tsi' wets'e tilel winicob ti e'tel. Jiñobʌch tsa' bʌ colobajiyob ti' tojlel i pi'ʌlob, amorreojob, yic'ot heteojob, yic'ot ferezeojob, yic'ot heveojob, yic'ot jebuseojob. Come jini israelob ma'anic tsi' lu' jisayob che' bʌ tsi' cha'leyob guerra ti Canaán. C'ʌlʌl wʌle che'ʌch mi' melob israelob. 22Salomón ma'anic tsi' yotsayob ti mozo jini israelob. Tsa' ochiyob ti soldadojob, ti' yumob soldadojob, ti xc'ʌchta caballojob, yic'ot ti xñijca carretajob. Laj añob i ye'tel.
23An lujump'ejl i waxʌcc'al i cha'bajc' (550) winicob ti Israel tsa' bʌ ochiyob ti' yumob x'e'telob. 24Tsa' chumle i yixic'al Faraón ya' ti' tejclum David. Che' melbilix i yotot Salomón tsi' c'axtesa tilel i yijñam ti tsijib bʌ i yotot tsa' bʌ i melbe ya' ti Jerusalén. Ti wi'il tsi' mele ts'ajquibil bʌ i yotot tac soldadojob i c'aba' Milo.
25Che' ujtemix ti mejlel jini Templo, Salomón tsa' caji i yʌq'uen i majtan tac lac Yum uxyajl ti jujump'ejl jab ya' ba' tsi' mele pulʌntib. Tsi' yʌq'ue lac Yum pulbil tac bʌ i majtan, yic'ot majtañʌl cha'an i tijicñʌyel i pusic'al, yic'ot pom.
26Salomón tsi' mele cabʌl colem barco ya' ti Ezión Geber lʌc'ʌl ti Elot am bʌ ti' ti' Chʌchʌc bʌ Colem Ñajb ya' ti' lumal Edom. 27-28Hiram tsi' choco tilel x'e'telob yujilo' bʌ i ñijcʌntel barco cha'an mi' coltañob i winicob Salomón. Tsajniyob ti Ofir cha'an mi' ch'ʌmbeñob tilel oro jini Salomón. I tojol ti pejtelel jiñʌch che' bajche' lujump'ejl i waxʌc'al (150) millón ti peso.
Currently Selected:
1 REYES 9: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.