1 REYES 8
8
Salomón tsi' c'axtesa majlel Arca ya' ti Templo
(2 Cr. 5.2-14)
1Salomón tsi' tempa tilel ti Jerusalén pejtelel jini xñoxob yic'ot ñuco' bʌ i ye'tel ti' tojlel israelob cha'an mi' loc'sañob jini Arca ba' lotol jini Xuc'ul bʌ i T'an lac Yum ya' ti Tabernáculo am bʌ ti Sion, i tejclum David, cha'an mi' c'axtesañob ti Templo. 2Pejtelel jini israelob temel tsa' c'otiyob ba'an Salomón che' i yorajlel mi' melob jini q'uin cha'an Tabernáculo che' ti octubre. 3-4Che' jini tsi' cha'leyob q'uiñijel. Jini motomajob tsi' ch'ʌmʌyob tilel jini Arca yic'ot pejtel jini ch'ujul bʌ e'tijibʌl tac am bʌ ti' mal jini Tabernáculo. 5Jini rey Salomón yic'ot pejtelel israelob tsi' tempayob i bʌ ya' ti' tojel jini Arca. Tsi' tsʌnsayob cabʌl tiñʌme' yic'ot wacax cha'an i majtan Dios. Ma'anic tsa' mejli ti tsicol jini alʌc'ʌl, come c'ax cabʌl.
6Jini motomajob tsa' c'oti i yotsañob jini Arca ya' ti' mal jini Ch'ujul bʌ Templo ya' ti C'ax Ch'ujul bʌ Ajñibʌl. Tsi' yʌc'ʌyob jini Arca ti ojlil i mal, ti' yebal i wich' jini ángelob. 7Come laj bʌ lich'il i wich'ob ya' ti pam jini Arca. Ya' tsa' ajni jini Arca yic'ot jini cha'ts'ijt q'uechlintib ti' yebal i wich' ángelob. 8Wen tam jini cha'ts'ijt te'. Tsa' ts'ita' tsictiyi i ñi' i te'el Arca ya' ti Ch'ujul bʌ Ajñibʌl, pero mach tsiquilic ti jumpat. Ya'to an wʌle che' woli' ts'ijbuntel ili jun. 9Ma'anic yambʌ i bʌl jini Arca. Cojach an jini cha'q'uel xajlel tsa' bʌ i yotsa Moisés che' bʌ tsi' yʌc'ʌ xuc'ul bʌ i t'an lac Yum ti Horeb ti' tojlel jini israelob che' loq'uemobix ti' lumal Egipto. 10Che' bʌ tsa' loq'uiyob jini motomajob ya' ti Ch'ujul bʌ Ajñibʌl, tsa' bujt'i ti tocal i yotot lac Yum. 11Jini cha'an jini motomajob ma'anic tsa' mejli i chʌn cha'leñob i ye'tel ti mal cha'an jini tocal. Tsa' loq'uiyob ti jumpat, come tsa' wen bujt'i otot ti' ñuclel lac Yum.
Tsa' aq'uenti ti wenta Dios jini Templo
(2 Cr. 6.1—7.10)
12-13Salomón tsi' cha'le oración: C Yum, a melbalʌch jini q'uin ti panchan, pero tsa' wʌlʌ jiñʌch a wajñib jini pim bʌ tocal. C Yum, tsa'ix c wa'chocobeyet wen uts'atax bʌ a wotot, a wajñib ba' mi mejlel a chumtʌl ti pejtelel ora. Che' tsi' cha'le oración Salomón.
14Tsi' sutq'ui i bʌ jini rey ba' wa'alob winicob x'ixicob. Tsi' yʌq'ueyob i yutslel i t'an pejtelel israelob. 15Tsi' yʌlʌ: La' sujbic i ñuclel lac Yum i Dios israelob tsa' bʌ i pejca c tat David. Cha'an ti' p'ʌtʌlel tsa'ix ts'ʌctiyi pejtel iliyi. Dios tsi' sube c tat David: 16“C cha'añob jini israelob. Che' bʌ tsac loc'sayob ya' ti Egipto, ma'anic tsac yajca i yajñib c Templo, pero tsac yajca winic cha'an mi' yochel ti' yum israelob”, che'en lac Yum. 17Jini c tat David tsi' wʌn ña'ta ti' pusic'al i wa'chocoben i yotot lac Yum i Dios Israel. 18Pero lac Yum tsi' sube c tat David: “Uts'at a pusic'al cha'an tsa' ña'ta a wa'chocobeñon cotot. 19Pero yambʌ mi caj i wa'chocobeñon cotot, mach jatetic. Jini a walobil mi caj i wa'chocobeñon cotot”, che'en lac Yum. 20Lac Yum tsa'ix i mele che' bajche' tsi' yʌlʌ, come tsac taja que'tel ti' q'uexol c tat David cha'an mic cha'len yumʌl ti' tojlel israelob. Tsa'ix ujti c melben i yotot lac Yum i Dios israelob. 21Tsa'ix c mele ja'el i yajñib Arca ba' lotol jini xuc'ul bʌ i t'an lac Yum tsa' bʌ i yʌq'ue lac ñojte'elob che' bʌ tsi' loc'sayob ya' ti Egipto. Che' tsi' yʌlʌ Salomón.
22-23Tsa' wa'le Salomón ti' tojel jini pulʌntib i cha'an lac Yum. Ti' wutob pejtelel israelob tsi' letsa i c'ʌb ti panchan. Tsi' yʌlʌ: C Yum i Dioset israelob, ma'anic yambʌ Dios che' bajche' jatet, mi ti panchan mi ti' yebal panchan. Come xuc'ulet yic'ot a t'an. Ma' chʌn c'uxbin a cha'año' bʌ mu' bʌ i chʌn tsajcañetob ti pejtelel i pusic'al. 24Tsa'ix a ts'ʌctesa a t'an ti cabʌl a p'ʌtʌlel che' bajche' tsa' sube c tat David. Wolij q'uel lojon ti ili ora. 25Wʌle, c Yum i Dioset bʌ israelob, ts'ʌctesan ja'el yambʌ a t'an tsa' bʌ a sube c tat David, come tsa' sube: “Mi xuc'ul mi' chʌn jac'ob c mandar a walobilob mi caj cʌq'ueñet a q'uexol mu' bʌ caj i cha'len yumʌl ti pejtelel ora ti' tojlel israelob. Yom xuc'ul mi' ñopoñob che' bajche' tsa' ñopoyon”, che'et. 26Jini cha'an wʌle, c Yum, i Dioset bʌ israelob, ts'ʌctesan a t'an tsa' bʌ a sube a winic David.
27¿Isujm ba mi' caj ti ajñel Dios ti pañimil? Awilan mach ñuquic ma' q'uel panchan cha'an ya' ma' chumtʌl. Ch'o'ch'oc jax jini otot tsa' bʌ c wa'chocobeyet. 28Ubibeñon coración ti' yutslel a pusic'al, c Yum Dios, come a winicon. Ti wocol t'an mic pejcañet. 29Q'uele ili Templo ti q'uiñil ti ac'ʌlel, come tsa' wʌlʌ mi caj a wajñel ilayi. Jini cha'an yom ma' wubibeñon coración wʌ' ti' tojel a wotot. 30A cha'añon. A cha'añob ja'el pejtelel israelob. Jini cha'an yom ma' wubibeñon lojon coración che' an chuqui mij c'ajtibeñet lojon ti' tojel a wotot. Ya' ba' chumulet ti panchan yom ma' ñich'tañon lojon. Che' ma' wubiñon lojon yom ma' ñusʌbeñon lojon c mul.
31Che' an juntiquil mu' bʌ i taj i mul ti' tojlel i pi'ʌlob, mi tsa' tili i tsictesan i bʌ ti' tojel a pulʌntib, mi tsi' yʌc'ʌ i t'an ti a tojlel cha'an ma'anic i mul, 32che' jini yom ma' ñich'tʌben i t'an ti panchan. Yom ma' mel che' bajche' an i melbal. Mi an i mul jini winic, la' ajnic ti' wenta cha'an mi' toj. Mi isujm ma'anic i mul, la' ajnic ti uts'at.
33-34Che' mi' yubiñob wocol a cha'año' bʌ ti' tojlel i contrajob cha'an tsi' ñusayob a t'an, mi tsi' cha' sutq'uiyob i bʌ ti a tojlel cha'an mi' c'ajtiñob i ñusʌntel i mul wʌ' ti' tojel a wotot, yom ma' ñich'tʌbeñob i t'an ya' ti panchan. Yom ma' ñusʌbeñob i mul. Cha' pʌyʌyob tilel ti jini lum tsa' bʌ a wʌq'ueyob i ñojte'elob.
35Mi tsa' mʌjqui jini panchan cha'an ma'anic mi' chʌn tilel ja'al ti' caj i mul, p'untañob che' mi' cha' sutq'uiñob i bʌ ti' tojel ili Templo cha'an mi' pejcañetob ti wocol t'an. Mi tsi' cʌyʌyob i mul che' bʌ tsa' ju'sʌbeyob i pusic'al, 36ñich'tʌbeñob i t'an ya' ti panchan. Ñusʌbeñob i mul a winicob israelob. Cʌntesañob ti jini wen bʌ bij. Cha' choco tilel ja'al ti ili lum tsa' bʌ a wʌq'ueyob.
37Che' an wi'ñal ila ti pañimil, o mi jontol tac bʌ c'amʌjel, o mi i chʌnil pʌc'ʌbʌl che' bajche' jini sajc' mu' bʌ i mʌctan pañimil, o mi an i tic'lʌntel a cha'año' bʌ ti jump'ejl tejclum cha'an i contrajob, o mi tal bʌbʌq'uen bʌ c'amʌjel, 38che' jini yom ma' ñich'tʌbeñob i yoración majqui jach mi' pejcañet che' mi' yubin i ñijcʌntel i pusic'al. Mi tsi' sʌts'beyet i c'ʌb ti tojel ili Templo, 39yom ma' ñich'tʌben i t'an ya' ti panchan. Yom ma' ñusʌben i mul. Aq'uen che' bajche' yom i melbal, come jatet ma' cʌmbeñob i pusic'al pejtelel winicob x'ixicob ti pañimil. 40Che' jini mi caj i bʌc'ñañetob ti pejtelel ora ti jini lum tsa' bʌ a wʌq'ue c ñojte'el lojon.
41-42Jini ñajt bʌ chumulob mach bʌ israelobic mi caj i yubiñob wen ñucʌch a c'aba', ñuc a melbal. Che' mi' tilelob i pejcañetob ti' tojel ili Templo, 43yom ma' q'uelob ya' ba' chumulet ti panchan. Ubibeñob i t'an jini ñajt bʌ chumulob. Mele che' bajche' mi' c'ajtibeñet cha'an mi' laj cʌñob a c'aba' ti pejtelel pañimil cha'an mi' bʌc'ñañetob che' bajche' mic bʌc'ñañet lojon. La' i ña'tañob ma' wʌc' a bʌ ti cʌjñel wʌ' ti Templo tsa' bʌ c wa'choco.
44Che' ma' subeñob majlel ti guerra jini israelob ti' tojlel i contrajob, mi tsi' sutq'uiyob i wut ti' tojel a tejclum Jerusalén, ti' tojel ili Templo tsa' bʌ c wa'choco cha'an i c'uxbintel a c'aba', mi tsi' pejcayetob ti oración, 45yom ma' wubibeñob i yoración ya' ti panchan. Coltañob ti jini wocol.
46Mi tsi' cha'leyob mulil ti a tojlel, come an lojon c mul tic pejtelel lojon, mach ma' cʌyob che' mich'et che' ma' wʌc'ob ti' c'ʌb i contrajob cha'an mi' cʌjchelob majlel ti yambʌ lum, mi ti ñajt mi ti lʌc'ʌl. 47Mi tsa' caji i cha' ña'tañetob ya' ti yambʌ lum baqui mi' majlelob, mi tsi' cha' sutq'uiyob i bʌ cha'an mi' pejcañetob ti oración, mi tsi' yʌlʌyob: “Tsac cha'le lojon mulil ti a contra. Tsac mele lojon chuqui jontol”, mi che'ob, 48ubibeñob i t'an che' mi' cha' sutq'uiñob i bʌ ti a tojlel ti pejtelel i pusic'al. Mi tsi' pejcayetob ti oración che' woli' ñajti q'uelob jini lum tsa' bʌ a wʌq'ue i ñojte'elob, yic'ot jini tejclum tsa' bʌ a yajca, yic'ot a wotot tsa' bʌ c wa'choco, 49yom ma' ñich'tʌbeñob i t'an ya' ba' chumulet ti panchan. Yom ma' wʌq'ueñob chuqui woli' c'ajtiñob. 50Ñusʌbeñob i mul jini winicob tsa' bʌ i cha'leyob mulil ti a tojlel yic'ot jini tsa' bʌ i ñusʌbeyetob a t'an. Cha' utsesʌbeñob i pusic'al i yumob tsa' bʌ i cʌchʌyob majlel, cha'an mi' p'untañob. 51Come i p'olbalobʌch jini tsa' bʌ a loc'sayob ti Egipto ba' tsi' yubiyob cabʌl wocol. 52Ubin coración yic'ot i yoración a tejclum Israel. Ubibeñob i t'an che' mi' pejcañetob ti wocol t'an. 53Come tsa' yajcayob ti' tojlel pejtel winicob, c Yum Dios, cha'an a cha'añʌch mi' yajñelob che' bajche' tsa' sube Moisés che' bʌ tsa' loc'sa c ñojte'el lojon ti Egipto.
54Tsa' ujti ti oración Salomón. Tsa' ch'ojyi ya' ba' ñocol ti' t'ejl jini pulʌntib i cha'an lac Yum, sʌts'ʌl i c'ʌb ti' tojel panchan. 55Ti c'am bʌ t'an tsi' yʌq'ue i yutslel i t'an pejtelel israelob: 56La' sujbic i ñuclel lac Yum, come tsi' yʌq'ueyob i ñʌch'tʌlel i pusic'al israelob che' bajche' tsi' subeyob. Ma'anic mi jump'ejlic i t'an mach bʌ ts'ʌctʌyemic ti pejtelel i t'an tsa' bʌ i sube Moisés i yaj e'tel. 57La' ajnic lac Yum Dios la quic'ot che' bajche' tsa' ajni yic'ot lac ñojte'elob. Mach yomic mi' cʌyonla ti pejtelel ora. 58La' i ñijcʌbeñonla lac pusic'al che' bajche' tsi' melbeyob lac ñojte'elob cha'an mi lac chʌn cha'len xʌmbal ti' tojlel, cha'an mi lac jac'ben i mandar yic'ot i t'an yic'ot i cʌntesa. 59Jini cha'an la' i ch'ʌm ti' wenta lac Yum ti q'uiñil ti ac'ʌlel pejtel chuqui tsaj c'ajtibe cha'an mi' chʌn coltañon yic'ot pejtelel israelob. 60Che' jini pejtel winicob ti pañimil mi caj i ña'tañob Yumʌlʌch Dios. Ma'anic yambʌ Dios. 61Jini cha'an yom jump'ejl jach lac pusic'al ti' tojlel lac Yum Dios cha'an mi lac chʌn jac'ben pejtel i t'an yic'ot i mandar che' bajche' woli lac mel wʌle. Che' tsi' yʌlʌ Salomón.
62-63Jini cha'an jini rey yic'ot pejtelel israelob tsa' caji i tsʌnsʌbeñob i majtan lac Yum cha'an mi' ch'ʌm ti wenta jini Templo. Jiñʌch majtañʌl tac mu' bʌ i yʌc' i ñʌch'tilel lac pusic'al. Tsi' tsʌnsayob cha'p'ejl i cha'c'al mil tat wacax (22,000) yic'ot wʌcc'al mil (120,000) tiñʌme'. Che'ʌch tsi' meleyob i q'uiñilel i yotot lac Yum jini rey yic'ot pejtelel israelob. 64Ti jini jach bʌ q'uin jini rey tsi' yʌq'ue lac Yum jini patio am bʌ ti' tojel i yotot lac Yum cha'an ya' mi' pulbentel i majtan, come ch'o'ch'oc jax jini pulʌntib melbil bʌ ti bronce am bʌ ti' tojel lac Yum. Mach ochic ti pejtelel. Tsi' yʌq'ue lac Yum ja'el jini majtañʌl melbil bʌ ti trigo, yic'ot cha'an i ñʌch'tilel i pusic'al. Wen on jini majtañʌl.
65Ti jim bʌ ora Salomón tsi' mele ñuc bʌ q'uiñijel temel yic'ot pejtelel israelob. Cabʌl winicob tsi' tempayob i bʌ tilemo' bʌ ti' joytilel Israel. Cha'p'ejl semana tsi' cha'leyob q'uiñijel ti' tojlel lac Yum Dios cha'an jini Templo. 66Che' ti' waxʌcp'ejlel q'uin Salomón tsi' subeyob sujtel jini israelob ti' yotot. Pejtelel jini israelob tsi' yʌq'ueyob i yutslel i t'an jini rey. Wen tijicñayob i pusic'al tsa' sujtiyob majlel ti' yotot, come tsi' q'ueleyob i yutslel i pusic'al lac Yum ti' tojlel David yic'ot pejtelel israelob.
Currently Selected:
1 REYES 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.