1 REYES 7
7
Yan tac bʌ otot tsa' bʌ i mele Salomón
1Salomón tsi' ñusa uxlujump'ejl (13) jab cha'an i melol i yotot. 2Jump'ejl i mal otot i c'aba' Líbano. I tamlel jini tsalʌl jiñʌch lujump'ejl i yuxc'al (50) metro. I xujc jiñʌch jo'p'ejl i cha'c'al (25) metro. Jo'lujump'ejl (15) metro i chanlel. An chʌntsolom i chunte'lel tac ba' tsa' ajni i cucujlel ch'ujte' tac bʌ. 3-4An jo'p'ejl i yuxc'al (45) i ventanajlel. An jo'lujump'ejl ventana ti jujump'ejl i xujc ti' yuxp'ejlel i xujc. An jo'lujump'ejl ventana ti yebal. An yambʌ jo'lujump'ejl ventana ti' cha'p'ejlel piso. An yambʌ jo'lujump'ejl ventana ti' yuxp'ejlel piso. 5An i marcajlel jujump'ejl ventana yic'ot jujump'ejl i puertajlel, joy lajal i ñuclel. Junlajal mi' lajal q'uelob i bʌ jini ventana tac.
6An yambʌ i mal i c'aba' I Corredor Jini Oy Tac. An jo'p'ejl i cha'c'al metro i tamlel. An jo'lujump'ejl metro i xujc. An i corredor yic'ot i yoyel ba' tsa' ajni i cucujlel cha'an i jol.
7An yambʌ i mal ba' tsi' cha'le meloñel. Ya' tsa' buchle Salomón cha'an mi' cha'len meloñel. Joy ñotbil ti ch'ujte' bʌ tabla i pisojlel c'ʌlʌl ti' jol. 8Tsa' chumle Salomón ti' pat jini tsalʌl ba' tsi' cha'le meloñel. An i patiojlel joy melbil bʌ yic'ot tsalʌl tac. Jujump'ejl tsalʌl ñotbil ti tabla tac bʌ ch'ujte'. Che' ja'el tsi' mele yambʌ cha'an juntiquil i yijñam i yalobil bʌ Faraón.
9Tsi' mele jini otot tac ti colem bʌ xajlel wen letsem tac bʌ i tojol, wʌn c'olbil taquix ti p'isol. Tsa' c'ʌjni tac c'ʌlʌl ti' patiojlel otot c'ʌlʌl ti' colem bʌ i patiojlel. 10Jini xajlel tac tsa' bʌ i c'ʌñʌyob cha'an i buchlib jini otot tac jiñʌch chʌmp'ejl yic'ot jo'p'ejl metro i ñuclel ti' jujunwejl i xujc tac. 11Jini colem tac bʌ xajlel am bʌ ti ts'ajc tac ti p'isol jach c'olbil tac. Ñotbebil tabla tac bʌ ch'ujte' ja'el. 12An uxlʌjts i ts'ajquil jini colem bʌ patio. An i cucujlel ja'el puro ch'ujte' tac, che' bajche' melbil i patiojlel Templo yic'ot i corredor i yotot Salomón.
Tsa' caji ti e'tel Hiram
(2 Cr. 2.13-14; 3.15-17)
13Salomón tsi' pʌyʌ tilel winic chumul bʌ ti Tiro, i c'aba' Hiram, wen yujil bʌ e'tel ti bronce. 14I yalobilʌch meba' x'ixic ch'oyol bʌ ti Neftalí. Ch'oyol ti Tiro i tat. Yujil e'tel i tat ti bronce. Jini cha'an tsa' majli jini winic i melben i ye'tel Salomón.
15Tsi' mele cha'tejc i yoyel jini otot ti bronce. Bolomp'ejl metro i chanlel. Wʌcp'ejl metro i bonticlel jini oy. Tocol i mal oy, an i pimlel che' bajche' chʌnts'ijt i yal c'ʌbʌl. 16-22Wox melbil i ñi' jini cha'p'ejl oy melbil bʌ ti bronce. Wen uts'at melbil che' bajche' i nich pimel. Melbil ti bronce ja'el. I chanlel i ch'ʌjlil i ñi' jiñʌch ojlil i yuxp'ejl metro. I colemlel jiñʌch cha'p'ejl metro. Ti jujump'ejl i ch'ʌjlil i ñi' oy an wucp'ejl wen uts'at bʌ cadena melbil ti bronce, yic'ot jumbajc' ch'umac' melbil bʌ ti bronce, cha' tsolom melbil che' ti' joytilel tac. Hiram tsi' wa'choco jini cha'tejc i yoyel ya' ti' tojel i ti' Templo. An i c'aba' jini am bʌ ti sur jiñʌch Jaquín. I c'aba' jini am bʌ ti norte jiñʌch Boaz.
Jini e'tijibʌl tac ti Templo
(2 Cr. 4.1—5.1)
23Hiram tsi' xot mele i yajñib ja' ti bronce, ojlil i yuxp'ejl metro i tamlel, jo'p'ejl metro i p'isol i pam, che' joy p'isbil i ti' jiñʌch jo'lujump'ejl metro. 24Joy ch'ʌlbil tac i ti' ti'il, ti cha'tsolom, melbil ti bronce. 25Buchul jini i yajñib ja' ti lajchʌncojt melbil tac bʌ tat wacax, joy cotolob jini wacax tac. I ñej an ti mal. Uxcojt sujtem majlel ti norte, uxcojt sujtem majlel ba' mi' bʌjlel q'uin, uxcojt sujtem majlel ti sur, uxcojt sujtem majlel ba' mi' pasel q'uin. 26I pimlel i yajñib ja' jiñʌch che' bajche' diez centímetros. Xetel i ti'. Mi' yochel ja' ya'i cha'c'al mil litro.
27-30Tsi' mele yambʌ i yajñib ja' yic'ot lujump'ejl i buchlib. Cha'p'ejl metro ti jujunwejl i xujc tac. Ojlil i cha'p'ejl metro i chanlel. An i xijc'unte'el tac cha'an i tsʌtsijib. Ch'ʌlbil jini i xijc'unte'el tac ti' yejtal tac bajlum yic'ot ti wacax yic'ot ti ángelob. Ti' chañelal yic'ot ti' yebal jini i ch'ʌjlil tac an xotol tac bʌ i ch'ʌjlil. Ti jujump'ejl i buchlib an chʌmp'ejl xotol tac bʌ i yoc melbil bʌ ti bronce. Ti jujump'ejl i xujc an jujunts'ijt i yoyel tac melbil bʌ ti bronce. Xot ch'ʌlbil tac ti jujunts'ijt. 31Ti' pam jini i buchlib ja' an xotol bʌ ba' mi' buchtʌl i yajñib ja'. Loq'uem tac ojlil metro ti jujunwejl i xujc. An xotol tac bʌ i ch'ʌjlil ti' pat ba' mi' buchtʌl i yajñib ja'. I buchlib i yajñib ja' mach xotolic, an tac i xujc junlajal i p'isol. 32Ti jujump'ejl i yajñib ja' an chʌmp'ejl xotol tac bʌ i yoc. Che' ti cha'cha'p'ejl i yoc an junts'ijt i te'el mu' bʌ i laj tajben i yojlil, melbil ti bronce. Ti jujump'ejl xotol tac bʌ i yoc an i chanlel che' bajche' jo'lujump'ejl i chʌnc'al (75) centímetro. 33Che' yilal bajche' i yoc carreta mu' bʌ i c'ʌñob ti guerra. Pejtelel tsa' bʌ c'ʌjni tac ti melol jini i yajñib ja' puro bronce. 34An xijc'unte'lel ti jujump'ejl i xujc melbil ti bronce. 35An jump'ejl xit melbil bʌ ti' chanelal i buchlib ja' melbil bʌ ti bronce. An i welticlel che' bajche' jo'p'ejl i yuxc'al centímetro. 36Ya' tsuyul yic'ot jini i buchlib ja' melbil tac ti bronce ja'el i yejtal tac ángelob, yic'ot bajlum, yic'ot bonxan. 37Jini lujump'ejl i buchlib ja' junlajal melbil ti bronce, junlajal i p'isol ja'el.
38Che' bʌ tsa' ujti i mel pejtel iliyi, tsa'ix caji i mel ti bronce lujump'ejl ba' mi' lʌmtʌl tac ja'. Tsi' buchchoco ya' ba' tsi' melbe tac i buchlib. Jini jujump'ejl i yajñib ja' an chʌmp'ejl i xujc. Jujump'ejl i xujc an che' bajche' cha'p'ejl metro. Ya' ti jujump'ejl i yajñib ja' tsa' ochi che' bajche' cha'bajc' litro ja'. 39Ya' ti' ts'ejtʌlel jini otot tsi' yʌc'ʌ jini jo'p'ejl i yajñib ja' tsa' bʌ i mele. Ya' ti' yambʌ junwejlel jini otot tsi' yʌc'ʌ yambʌ jo'p'ejl i yajñib ja'. Ya' ti xo'tʌl ti' tojel sureste tsi' yʌc'ʌ jini colem bʌ i yajñib ja' jini bon melbil bʌ. 40Hiram tsi' mele ja'el jini p'ejt tac, yic'ot pala tac, yic'ot poquic'ʌbʌl. Che' jini tsa' ujti i c'un mel pejtel jini e'tel ti' Templo lac Yum tsa' bʌ i yʌq'ue Salomón ti' wenta Hiram. 41-46Iliyi jiñʌch tsa' bʌ i mele Hiram:
Cha'tejc i yoyel, cha'p'ejl i jol i yoyel, i ch'ʌjlil tac i jol, jumbajc' ch'umac' cha'tsolom ac'bil ti jol jujuntejc i yoyel, lujump'ejl i buchlib i yajnib ja' mu' bʌ mejlel lac ñijcan majlel, yic'ot lujump'ejl i yajñib ja', jump'ejl colem bʌ i yajñib ja', yic'ot lajchʌncojt melbil bʌ tat wacax ba' mi' buchtʌl i yajñib ja', p'ejt tac, yic'ot pala tac, yic'ot poc' tac.
Pejtelel iliyi melbil tac ti bronce. Ya' tsa' mejli ti' joctʌlel Jordán ja', xinlʌpʌl ti Sucot yic'ot Saretán. 47I p'isol i yalel che' ti pejtelel ñumen che' bajche' tsa' mejli i p'isob.
48Pejtel jini e'tijibʌl tsa' bʌ i c'ʌñʌyob ti Templo melbil tac ti puro oro. Tep'bil ti puro oro i pulʌntib pom yic'ot jini mesa ba' mi' pʌsbentel waj lac Yum. 49-50Melbil ti puro oro ja'el pejtelel iliyi:
Jini jo'p'ejl i buchlib jini lámpara tac am bʌ ti ñoj yic'ot jo'p'ejl am bʌ ti ts'ej am bʌ ya' ti' tojel jini C'ax Ch'ujul bʌ Ajñibʌl, yic'ot i yejtal i nich pimel, yic'ot lecho' c'ajc, yic'ot taza tac, yic'ot mu' bʌ i c'ʌñob i yʌp c'ajc, yic'ot poc' tac, yic'ot cuchara tac, yic'ot semet tac ba' mi' yajlel i nich c'ajc, yic'ot i bisagrajlel i puertajlel jini C'ax Ch'ujul bʌ Ajñibʌl, yic'ot i bisagrajlel i puertajlel jini Templo.
51Che' bʌ tsa' ujti i mel pejtelel jini e'tel ti Templo, Salomón tsi' yʌc'ʌ ti cʌntʌntel ti Templo pejtel jini letsem tac bʌ i tojol i cha'an bʌ i tat tsa' bʌ i yʌq'ue Dios: plata, yic'ot oro, yic'ot e'tijibʌl.
Currently Selected:
1 REYES 7: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.