YouVersion Logo
Search Icon

1 REYES 21

21
Acab tsi' chilbe i ts'usubil Nabot
1Tsa' caji' taj i mul Acab ti' tojlel Nabot ch'oyol bʌ ti Jezreel. An i ts'usubil Nabot ya' ti' tojel i yotot jini rey Acab ti Samaria. 2Acab tsi' sube Nabot: Aq'ueñon a ts'usubil cha'an mic pʌq'ue yan tac bʌ pimel, come lʌc'ʌl jach an cotot ti' t'ejl. Mi caj cʌq'ueñet yambʌ a ts'usubil ñumen wem bʌ, o mic toj ti taq'uin mi a wom, che'en Acab. 3Nabot tsi' jac'be Acab: La' i coltañon lac Yum. Ma'anic mi caj cʌq'ueñet i lum c ñojte'el, che'en. 4Wen ch'ijyem jax i pusic'al Acab. Wen mich' tsa' cha' sujti ti' yotot cha'an ma'anic tsi' jac'ʌ i chon Nabot jini ch'oyol bʌ ti Jezreel, come tsi' sube: Ma'anic mi caj cʌq'ueñet i lum c ñojte'el, che'en. Ma'anix tsi' chʌn c'uxu waj Acab. Tsa' majli ti ñoltʌl ti' wʌyib. Tsi' mʌyʌ majlel i wut ti' ñʌc' bojte'.
5Jezabel, i yijñam, tsa' c'oti ba' ñolol. Tsi' c'ajtibe: ¿Chuqui woli a pensarin? ¿Chucoch mach a womix we'el? che'en. 6Acab tsi' jac'be i yijñam: Cha'an ma'anic tsi' jac'ʌ i chombeñon i ts'usubil Nabot che' bʌ tsaj c'ajtibe. Tsac sube mi caj cʌq'uen i q'uexol mi yom, pero tsa' jach i subeyon: “Ma'anic mi caj cʌq'ueñet c ts'usubil”, che'en. Che' tsi' yʌlʌ Acab. 7Jezabel tsi' jac'be: ¿Isujm ba i reyet israelob? Ch'ojyen, c'uxu a waj. Tijicñesan a pusic'al, come joñon mi caj cʌq'ueñet i ts'usubil Nabot ch'oyol bʌ ti Jezreel, che'en.
8I yijñam Acab tsi' mele jump'ejl carta ti' c'aba' Acab i ñoxi'al. Tsi' yʌq'ue i sellojlel. Che' jini tsi' choco majlel jini carta ba'an jini xñoxob yic'ot año' bʌ i ye'tel ya' ti' tejclum Nabot. 9Jezabel tsi' yʌlʌ ti carta: Yom mi la' tem cha'len ch'ajb. Yom mi la' pʌy tilel Nabot cha'an mi la' wa'chocon ti' tojlel i pi'ʌlob. 10La' tilicob cha'tiquil jontol bʌ winicob cha'an mi' jop'beñob i mul Nabot. La' i yʌlob ti' tojel i wut: “Tsa'ix a p'aja Dios yic'ot jini rey”. Che' yom mi' yʌlob. Che' jini yom mi la' choc loq'uel Nabot ti tejclum cha'an mi la' jul ti xajlel cha'an mi' chʌmel, che'en. 11Jini xñoxob yic'ot jini año' bʌ i ye'tel ti tejclum tsi' jac'beyob i t'an Jezabel che' bajche' tsi' subeyob ti jun. 12Tsi' yʌc'ʌyob i t'an cha'an mi' cha'leñob ch'ajb. Che' jini tsi' pʌyʌyob tilel Nabot cha'an mi' wa'chocoñob. 13Tsa' c'otiyob jini cha'tiquil jontol bʌ winicob. Tsa' buchleyob ti' tojlel i wut Nabot. Jini cha'tiquil tsi' yʌlʌyob: Nabot tsi' p'aja Dios. Tsi' p'aja jini rey, che'ob. Tsi' pʌyʌyob loq'uel ti jini tejclum. Tsi' juluyob ti xajlel. Che' jini tsa' chʌmi Nabot. 14Che' bʌ ujtemix iliyi tsi' chocbeyob majlel t'an Jezabel: Chʌmenix Nabot cha'an tsa' jujli ti xajlel, che'ob.
15Che' bʌ tsi' yubi Jezabel chʌmenix Nabot, ti ora jach tsi' sube Acab: Tejchen ti ora. Cucu ch'ʌmben i ts'usubil Nabot ch'oyol bʌ ti Jezreel, come chʌmenix i yum jini lum mach bʌ yomic i chon, che'en. 16Che' bʌ tsi' yubi Acab chʌmenix Nabot, ti ora jach tsa' majli i ch'ʌmben i ts'usubil cha'an mi' ch'ʌm ti' wenta.
17-18Pero ti jim bʌ ora lac Yum tsi' pejca jini x'alt'an Elías: Tejchen ti ora. Cucu q'uele Acab i rey Israel am bʌ ti Samaria, come ya'ix an ti' ts'usubil jini Nabot. Tsa' majli i ch'ʌm ti' wenta. 19Yom ma' suben ili t'an: “Lac Yum woli' yʌl: Tsa' tsʌnsa winic. Tsa' chilbe i lum. Ya' ba' tsi' lembe i ch'ich'el Nabot jini ts'i' ya' talob ts'i' i lembeñet a ch'ich'el ja'el”. Che' yom ma' suben, che'en lac Yum. Che'ʌch tsi' mele Elías.
20Acab tsi' sube Elías: Tsa'ix a cha' tajayon, j contrajet, che'en. Elías tsi' jac'be: Tsa' cu c tajayet, come tsa'ix a wʌc'ʌ a bʌ cha'an ma' mel chuqui jontol ti' wut lac Yum. 21Awilan lac Yum mi caj i chocbeñet tilel tsʌts bʌ wocol. Mi caj i wets'et majlel che' bajche' misujelʌl. Mi caj i laj jisan pejtel ch'iton bʌ a walobilob año' bʌ ti Israel. 22Lajal mi caj i melbeñet che' bajche' tsi' melbe Jeroboam (i yalobil Nabat), che' bajche' tsi' melbe Baasa (i yalobil Ahías) cha'an ti' caj tsa' techbe i mich'ajel lac Yum. Tsa' xiq'ui ti mulil jini israelob. 23Lac Yum tsi' yʌlʌ mi caj i toj i mul Jezabel ja'el. Jini ts'i' mi caj i c'uxben i bʌc'tal a wijñam ya' ti Jezreel. 24Mi caj i c'uxbeñob i bʌc'tal a walobilob mu' bʌ i chʌmelob ti tejclum. Jini xta'jol mi caj i c'uxbeñob i bʌc'tal a pi'ʌlob mu' bʌ i chʌmelob ti jochol bʌ lum, che'en Elías.
25Come ti isujm ma'anic yambʌ bajche' Acab tsa' bʌ i yʌc'ʌ i bʌ cha'an mi' mel chuqui jontol ti' wut lac Yum, come i yijñam tsi' xiq'ui ti maña jax bʌ i melbal. 26Wen jontol bajche' tsi' mele. Tsi' ch'ujutesa jini dios tac che' bajche' tsi' meleyob jini amorreojob tsa' bʌ i jisayob lac Yum ti' tojlel israelob.
27Acab tsi' yubibe i t'an Elías. Tsi' jet' tsili i pislel. Tsa' caji i lʌp coxtal ti q'uiñil yic'ot ti ac'ʌlel. Tsi' cha'le ch'ajb. Wen ch'ijiyem tsa' caji ti ajñel. 28Ti jim bʌ ora lac Yum tsi' cha' pejca jini x'alt'an Elías: 29¿Tsa' ba a q'uele bajche' woli' peq'uesan i bʌ Acab tic tojlel? Cha'an ti' caj tsi' peq'uesa i bʌ tic tojlel, ma'anic mi caj cʌq'uen ili wocol che' cuxul to. Mux caj cʌq'uen wocol i yalobilob Acab, che'en lac Yum.

Currently Selected:

1 REYES 21: ctuBI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy