1 REYES 18
18
Elías tsa' sujti i q'uel Acab
1Ñumenix uxp'ejl jab lac Yum tsi' sube Elías: Cucu ba'an Acab. Suben mi caj c cha' choc tilel ja'al, che'en. 2Jini cha'an Elías tsa' majli i suben Acab. Ti jim bʌ ora wen woli wi'ñal ya' ti Samaria. 3-4Abdías jiñʌch x'ac' e'tel ti' yotot Acab. Abdías tsi' wen tsajca lac Yum. Che' bʌ tsi' ñopo i tsʌnsan jini x'alt'añob i cha'an lac Yum jini Jezabel, Abdías tsi' colta jo'c'al x'alt'añob. Tsi' t'oxoyob ti cha'mojt, ti lujuntiquil i yuxc'al (50) tac. Tsi' mucuyob ti ch'en. Tsi' yʌq'ueyob chuqui mi' c'uxob yic'ot chuqui mi' japob. 5Tsa' tili Elías cha'an mi' q'uel Acab ti jini jach bʌ q'uin che' woli' loq'uel i sʌclañob ja'. Jini rey tsi' sube Abdías: Cucu ti ñumel ti pejtelel lum. Yom ma' sʌclan jam ba'an pa' am bʌ i ya'lel, ame laj chʌmic cʌlac' ti wi'ñal. 6Tsi' t'oxoyob i bʌ cha'an mi' pam ñumelob ti lum. Tsa' majli Acab ti jump'ejl bij. Abdías tsa' majli ti yambʌ bij.
7Che' woli' majlel Abdías tsa' c'oti Elías i taj. Abdías tsi' cʌñʌ ti ora. Tsi' ñocchoco i bʌ ti' tojel. Tsi' yʌlʌ: ¿Mach ba jatetic, c yum Elías? che'en. 8Elías tsi' jac'ʌ: Joñon cu. Cucu, suben a yum: “Wʌ'ix an Elías”. Che' yom ma' suben, che'en. 9Pero Abdías tsi' jac'ʌ: ¿Chuqui c mul cha'an ma' chocon majlel ba'an Acab cha'an mi' tsʌnsañon? 10Melel chuqui mic subeñet, come mic bʌc'ñan lac Yum Dios. Jini rey tsi' choco majlel winicob ti pejtelel colem tejclum ti pejtelel i lumal cha'an mi' sʌclañet. Che' bʌ tsi' subeyob: “Mach wʌ'ic an Elías ilayi”, che'ob, jini rey Acab tsi' wersa subeyob cha'an mi' wa'chocoñob i t'an ti' tojlel Dios. 11Awilan wolix a subeñon: “Cucu, suben a yum: Wʌ'ix an Elías”, che'et. 12Pero che' mic majlel, jini i yEspíritu lac Yum mi caj i pʌyet majlel ba' ma'anic mic ña'tan. Che' mi' tilel Acab i sʌclañet, che' ma'anic mi' tajet, mi caj i tsʌnsañon, anquese c'ʌlʌl che' ch'itoñon to tsac wen tsajca lac Yum. 13¿Maxto ba anic tsa' subentiyet chuqui tsac mele che' bʌ tsi' tsʌnsa jini x'alt'añob i cha'an lac Yum jini Jezabel? Tsac subeyob puts'el ya' ti ch'en. Tsac t'oxoyob ti lujuntiquil i yuxc'al. Tsac we'sayob ti waj. Tsa cʌq'ueyob ja'. 14Wʌle wola' subeñon: “Cucu, suben jini rey: Wʌ'ix an Elías”, che'et. Mi tsac mele bajche' jini, mi caj i tsʌnsañon. Che' tsi' yʌlʌ Abdías. 15Pero Elías tsi' jac'ʌ: Mi cʌc' c t'an ti' c'aba' lac Yum Dios am bʌ ti panchan come mi cajñel ti' tojlel. Ti wʌle jach mi caj c pʌsben c bʌ Acab, che'en Elías. 16Jini cha'an Abdías tsa' majli i suben Acab. Ti ora tsa' tili Acab ba'an Elías.
17Che' bʌ tsi' q'uele, Acab tsi' sube: ¿Jatet ba woli bʌ a tic'lan Israel? che'en. 18Elías tsi' jac'ʌ: Mach joñonic. Ma'anic wolic tic'lan Israel. Jatet yic'ot a pi'ʌlob woli la' tic'lan Israel, come tsa'ix la' ñusʌbe i t'an lac Yum. Tsa'ix la' tsajca jini dios Baal. 19Wʌle tempan pejtelel israelob. Pʌyʌyob majlel ya' ti wits i c'aba' Carmelo, yic'ot jini lujuntiquil i yuxc'al i cha'bajc' (450) x'alt'añob i cha'an Baal, yic'ot jini jumbajc' x'alt'añob i cha'an Asera mu' bʌ i c'uxob waj ti' wenta Jezabel.
Elías ya' ti Carmelo
20Che' jini Acab tsi' pʌyʌ majlel pejtelel israelob yic'ot jini x'alt'añob. Tsi' tempayob ya' ti wits i c'aba' Carmelo. 21Elías tsi' c'ajtibeyob: ¿Jayp'ejl to q'uin mi caj la' chʌn ajñel ti cha'chajp la' pensar? Mi jiñʌch Dios jini lac Yum, tsajcanla. Mi jiñʌch lac Yum jini Baal, tsajcanla, che'en. Ma'anic tsa' mejli i jac'ob. 22Elías tsi' cha' subeyob: Ma'anic yambʌ x'alt'an i cha'an lac Yum, cojachix joñon, pero an jumbajc' yic'ot lujuntiquil i yuxc'al x'alt'añob i cha'an Baal. 23Pʌyʌla tilel cha'cojt tat wacax. Jini x'alt'añob i cha'an bʌ Baal la' i yajcañob juncojt. La' i bic'ti t'ojob. La' i yʌc'ob ti pam si', pero mach yomic mi' yotsʌbeñob c'ajc ti' yebal. Jini yambʌ juncojt mi caj c chajpan joñon. Mi caj cʌc' ti pam si', pero ma'anic mi caj cotsʌben c'ajc, che'en. 24Yom mi la' pejcan la' dios. Mi caj c pejcan c Yum ja'el. Jini dios mu' bʌ i jac', mu' bʌ i choc tilel c'ajc jiñʌch Dios, che'en. Ti pejtelelob tsi' yʌlʌyob che'ʌch yom.
25Elías tsi' subeyob jini x'alt'añob i cha'an bʌ Baal: Yajcanla juncojt wacax, chajpanla. Ñaxañetla, come cabʌletla. Pejcan la' dios Baal, pero mach yomic mi la' wotsan c'ajc ti' yebal i majtan, che'en. 26Che' jini tsi' ch'ʌmʌyob jini tat wacax tsa' bʌ i yʌq'ueyob. Tsi' pejcayob Baal ti sʌc'ajel c'ʌlʌl ti xinq'uiñil. Tsi' yʌlʌyob: Baal, jac'beñon lojon, che'ob. Pero ma'anic tsi' jac'ʌ. Tsi' cha'leyob tijp'el ti' joytilel i pulʌntib i majtan Baal. 27Che' xinq'uiñilix, Elías tsa caji i wajleñob: Ñumen tsʌts yom mi la' pejcan, come jiñʌch a dios. Tic'ʌl mi woli ti t'an yic'ot i pi'ʌlob o woli' mel i ye'tel o majlem ti bij, o wʌyʌl. Yom mi la' ñijcan ch'ojyel, che'en Elías. 28Tsa' utsi cajiyob ti c'am bʌ t'an. Tsi' lowoyob i bʌ ti cuchillo yic'ot lanza tac che' bajche' i tilel mi' melob jinto tsa' bejq'ui i ch'ich'el. 29Tsa' ñumi xinq'uiñil. Tsi' chʌn cha'leyob oñel c'ʌlʌl tsa' bʌjli q'uin che' ti' yorajlel pulo' majtañʌl. Ma'anic tsi' jac'ʌ. Ma'anic t'an. Ma'anic c'ajc.
30Tsi' yʌlʌ Elías: Lʌc'tesan la' bʌ tic tojlel, che'en. Tsi' lʌc'tesayob i bʌ. Elías tsi' cha' melbe i pulʌntib i majtan Dios, come jejmenix. 31Tsi' ch'ʌmʌ lajchʌmp'ejl xajlel jujump'ejl i wentajlel jujunmojt i p'olbal Jacob, jini Jacob tsa' bʌ cha' otsʌbenti i c'aba' Israel che' bajche' tsi' yʌlʌ Dios. 32Elías tsi' c'ʌñʌ jini xajlel tac ti' melol jump'ejl pulʌntib cha'an mi' c'uxbintel i c'aba' lac Yum. Tsi' mele i bijlel yoc ja' ti' joytʌlel che' bajche' i tamlel cha'cujch pac'. 33Tsi' ts'ʌlʌ jini si'. Tsi' jacu jini tat wacax. Tsi' yʌc'ʌ ti pam si'. 34Tsi' c'ajti tilel chʌmp'ejl uc'um ja'. Tsi' subeyob: Mulu jini majtañʌl am bʌ ti pam si', che'en. Che'ʌch tsi' cha'leyob. Tsi' yʌlʌ: Cha' mele, che'en. Tsi' cha' meleyob. Tsi' yʌlʌ: Cha' mele, che'en. Tsi' cha' meleyob ti' yuxyajlel. 35Tsa' ts'ʌjmi jini ja' ti' joytʌlel i pulʌntib majtañʌl. Tsa' bujt'i i yoc ja'lel.
36Che' bʌ tsa' c'oti i yorajlel cha'an mi' pulbentel i majtan lac Yum, tsi' lʌc'tesa i bʌ Elías. Tsi' yʌlʌ: C Yum, i Dioset bʌ Abraham yic'ot Isaac yic'ot Israel, la' tsictiyic wʌle a winicon ti isujm. Tsac laj mele che' bajche' tsa' subeyon. 37Jac'beñon c t'an. La' i cʌñetob ili winicob, come jatet jach Dioset, c Yumet lojon. La' ñijcʌbenticob i pusic'al cha'an mi' cha' sutq'uiñob i bʌ ba'añet, che'en. 38Tsa' bʌc' tili c'ajc chocbil tilel ti lac Yum. Tsa' puli i majtan Dios yic'ot si' yic'ot xajlel yic'ot lum. Jini ja' tsa' laj tsʌc'mi. 39Che' bʌ tsi' q'ueleyob pejtel jini winicob, tsi' pʌcchocoyob i bʌ. Tsi' yʌlʌyob: Lac Yum jiñʌch Dios, lac Yum jiñʌch Dios, che'ob. 40Elías tsi' yʌlʌ: Chucula i winicob Baal cha'an ma'anic mi' puts'elob mi juntiquilic, che'en. Tsi' chucuyob. Elías tsi' pʌyʌ majlel jini x'alt'añob i cha'an Baal ya' ti pa' i c'aba' Cisón ba' tsi' tsʌnsayob ti pejtelelob.
Elías tsi' c'ajti ja'al
41Elías tsi' sube Acab: Cucux ti a wotot. Cha'len we'el uch'el, come tsiquil i t'an ja'al woli bʌ tilel, che'en. 42Acab tsa' majli ti we'el uch'el. Elías tsa' letsi ti wits i c'aba' Carmelo. Tsi' ñocchoco i bʌ ti lum ti oración. Tsi' yʌc'ʌ i wut ti' pix. 43Tsi' sube jini x'e'tel i cha'an: Cucu, q'uele ya' ba' mi' bʌjlel q'uin, che'en. Tsa' majli i q'uel. Ma'anic chuqui tsiquil. Wucyajl tsi' sube Elías cha'an mi' majlel i q'uel. Wucyajl tsa' majli. 44Tsi' yʌlʌ: Tsaj q'uele che'ʌch wistʌl tocal che' bajche' i patstilel i c'ʌb winic. Woli' loq'uel letsel ti colem ñajb, che'en. Jini cha'an tsi' sube: Cucu suben Acab: “Chajpan a carreta. Cucu ti ora, ame i mʌctañet ti bij jini colem ja'al”. Che'ʌch yom ma' suben, che'en Elías. 45Ti ora tsa' mʌjqui jini panchan ti tocal wets'bil tilel ti ñuqui ic'. Tsa' wen tili ja'al. Acab tsa' majli ti carreta ti' bijlel Jezreel. 46Lac Yum tsi' wen p'ʌtesa Elías. Tsi' cʌchʌ i bʌ. Ñaxan tsi' cha'le ajñel majlel Elías ti' tojlel i carreta Acab c'ʌlʌl tsa' c'oti ti Jezreel.
Currently Selected:
1 REYES 18: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.