1 REYES 10
10
X'ixic bʌ yumʌl ti Sabá tsi' jula'ta Salomón
(2 Cr. 9.1-12)
1Jini x'ixic bʌ yumʌl chumul bʌ ti Sabá tsi' yubi an cabʌl i ñuclel Salomón cha'an ñuc bʌ i ye'tel ti' tojlel lac Yum. Jini cha'an tsa' tili i cʌmben i ña'tʌbal cha'an yom i ch'ʌmben isujm jini wocol tac bʌ ti ña'tʌntel. 2Tsa' c'oti ti Jerusalén jini x'ixic bʌ yumʌl yic'ot cabʌl camello tac. Tsi' p'ʌtbeyob i cuch camello cha'an mi' ch'ʌm tilel xojocña bʌ perfume, yic'ot cabʌl oro, yic'ot wen uts'at tac bʌ xajlel. Che' bʌ tsa' c'oti ba'an Salomón jini x'ixic, tsi' sube pejtelel chuqui tsi' ña'ta ti' pusic'al. 3Salomón tsi' jac'be pejtelel chuqui tsi' c'ajtibe. Ma'anic mi junchajpic mach bʌ anic tsa' mejli i jac' jini rey Salomón. 4Che' jini tsi' ña'ta jini x'ixic wen cabʌl i ña'tʌbal Salomón. Tsi' q'uele ja'el wen i t'ojol jax jini otot tsa' bʌ i mele. 5Tsi' q'uele ja'el pejtelel chuqui tac mi' c'uxob yic'ot bajche' tsi' cha'leyob e'tel i yaj e'telob, yic'ot i pislel mu' bʌ i lʌpob, yic'ot bajche' tsi' ñusʌbeyob i bʌl i ñʌc' jini rey. Tsi' q'uele bajche' tsi' yʌq'ueyob cabʌl i majtan tac Dios ya' ti' yotot. Tsa' toj sajti i pusic'al.
6Jini x'ixic bʌ yumʌl tsi' sube Salomón: Isujm che' bajche' tsa cubi tic lumal. An cabʌl a ña'tʌbal. 7Ma'anic tsac ñopo jinto tsa' tili j q'uel. Cujil wʌle ma'anic tsa' subentiyon lamital, come cabʌl jax a ña'tʌbal yic'ot a chubʌ'an ñumen bajche' tsa cubi. 8Tijicñayob jax jini israelob. Tijicñayob jini x'e'telob a cha'an mu' bʌ i ñich'tañob a t'an cha'an cabʌl a ña'tʌbal. 9La' sujbic i ñuclel a Yum Dios tsa' bʌ i yajcayet cha'an ma' wochel ti' yum israelob. Tsiquil cabʌl jax i c'uxbiya lac Yum ti pejtelel ora come tsi' yʌq'ueyet a ña'tʌbal cha'an ma' cha'len meloñel ti toj. Uts'at bajche' ma' cha'len yumʌntel ti' tojlel i cha'año' bʌ, che'en. 10Tsi' yʌq'ue i majtan jini rey Salomón, cha'c'al millón peso ti oro, yic'ot cabʌl xojocña bʌ perfume, yic'ot wen i t'ojol tac bʌ xajlel. Ma'anic ba' ora tsa' c'oti cabʌl xojocña bʌ perfume ba'an Salomón che' bajche' tsi' ch'ʌmʌ tilel jini x'ixic bʌ yumʌl ch'oyol bʌ ti Sabá.
11I barco tac Hiram tsi' ch'ʌmʌyob c'otel oro tilem bʌ ti Ofir yic'ot wen tac bʌ te' i c'aba' sándalo yic'ot wen i t'ojol tac bʌ xajlel. 12Jini rey Salomón tsi' c'ʌñʌ jini te' cha'an mi' melben i yoyel i yotot lac Yum. Tsi' c'ʌñʌ ja'el ti' melol jini arpa tac yic'ot yan tac bʌ música am bʌ i ch'ajñal mu' bʌ i c'ʌñob xc'ayob. Ma'anic yambʌ i t'ojol bʌ te' lajal bajche' jini sándalo c'ʌlʌl wʌle.
13Salomón tsi' q'uextʌbe i majtan x'ixic bʌ yumʌl ch'oyol bʌ ti Sabá. Tsi' yʌq'ue pejtel chuqui yom i pusic'al yic'ot yan tac bʌ majtañʌl tsa' bʌ i yajcʌbe ti' yutslel i pusic'al. Tijicña tsa' cha' sujti majlel ti' lumal yic'ot i winicob.
I ñuclel Salomón yic'ot i chubʌ'an
(2 Cr. 9.13-24)
14Ti jujump'ejl jab Salomón tsa' aq'uenti oro am bʌ i tojol che' bajche' lujunc'al yic'ot lujump'ejl i yuxc'al (250) millón ti peso. 15Che' ja'el tsi' ch'ʌmbeyob i tojoñel jini xchoñoñelob. Tsi' cha'le ganar ti choñoñel ti' tojlel jini reyob ti Arabia. An ja'el chuqui tsi' ch'ʌmbeyob tilel jini año' bʌ i ye'tel ti Israel yic'ot ti Judá. 16-17Salomón tsi' c'ʌñʌ lamital cha'an mi' mel lujunc'al mʌctijibʌl tac cha'an guerra. Ti jujump'ejl mʌctijibʌl tsi' c'ʌñʌ oro am bʌ i tojol che' bajche' jo'lujump'ejl i chʌnc'al mil peso. Tsi' mele ja'el jo'lujunc'al (300) yambʌ e'tijibʌl cha'an guerra. Ti jujump'ejl tsi' c'ʌñʌ oro am bʌ i tojol che' bajche' junc'al mil peso. Tsi' loto ti colem bʌ i yotot i c'aba' Líbano. 18Tsi' mele ti marfil i buchlib cha'an i ye'tel. Tsi' tep'e ti oro. 19An wʌcquejp letsibʌl ya' ti buchlib. Xotol i pat, an i c'ʌb ja'el. Ti jujunwejl an i yejtal tac bajlum. 20Che' ja'el ti jujump'ejl letsibʌl an cha'cojt i yejtal tac bajlum, lajchʌncojt ti pejtelel. Ti pejtelel pañimil ma'anic yambʌ i t'ojol jax bʌ buchlibʌl che' bajche' iliyi. 21Pejtelel i vaso Salomón puro oro. Pejtel latu tac am bʌ ti tsalʌl i c'aba' Líbano melbil tac ti puro oro. Ma'anic tsi' c'ʌñʌyob plata come mach letsemic i tojol. 22Cabʌlʌch i barco Salomón yic'ot Hiram. Tsi' coltayob i bʌ ti' ye'tel ti colem ñajb. U'uxp'ejl jab tsa' c'oti cabʌl colem barco. Tsi' cuchu tilel cabʌl oro, yic'ot plata, yic'ot marfil, yic'ot colem bats', yic'ot chʌc mut.
23Cabʌl i ña'tʌbal Salomón yic'ot i chubʌ'an, ñumen bajche' yaño' bʌ reyob ti pañimil. 24Winicob tilemo' bʌ ti cabʌl lum ti pañimil tsa' c'otiyob cha'an mi' yubibeñob i t'an Salomón cha'an cabʌl i ña'tʌbal tilem bʌ ti Dios. 25Ti jujuntiquilob tsi' yʌq'ueyob tojoñel ti jujump'ejl jab, plata, yic'ot oro, yic'ot uts'atax bʌ pisil, perfume, yic'ot i ts'ʌcal i bʌl ñʌc'ʌl, yic'ot caballo yic'ot mula.
Caballo yic'ot carreta tac
(2 Cr. 1.14-17; 9.25-28)
26Salomón tsi' tempa cabʌl caballo yic'ot carreta tac, yic'ot cabʌl xc'ʌchta caballojob. An lujunc'al i chʌmbajc' (1,400) carreta tac ti pejtelel, yic'ot lajchʌmp'ejl mil xc'ʌchta caballojob. Ojlil tsa' chumleyob ya' ti tejclum ba' lotol carreta tac. Ojlil tsa' chumleyob ti Jerusalén lʌc'ʌl ba'an jini rey. 27Ti jim bʌ ora lajal i yonlel plata che' bajche' xajlel ya' ti Jerusalén. On jini ch'ujte'. Tsa' caji ti q'uejlel che' bajche' i yonlel sicómoro. 28I winicob Salomón tsi' mʌmbeyob tilel caballo tac ti Egipto yic'ot ti Turquía. 29Juncojt carreta melbil bʌ ti Egipto an i tojol ya' ti Jerusalén che' bajche' jo'p'ejl mil peso. I tojol caballo jiñʌch lujunc'al i jo'bajc' (1,800) peso. Salomón tsi' cha' choño lamital jini caballo ti' tojlel jini reyob, heteojob yic'ot siriajob.
Currently Selected:
1 REYES 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.