1 CRONICAS 14
14
Hiram tsi' choco majlel suboñelob ba'an David
(2 S. 5.11-12)
1Hiram i rey jini año' bʌ ti Tiro tsi' choco majlel suboñelob ba'an David. Tsi' choco majlel ch'ujte' yic'ot albañilob yic'ot carpinterojob cha'an mi' melbeñob i yotot David. 2Che' jini David tsi' ña'ta che' bʌ tsa' ochi ti rey ti' tojlel jini israelob, wa'chocobilʌch i cha'an lac Yum cha'an mi' tajob i wenlel jini israelob.
I yalobilob David tsa' bʌ i yilayob pañimil ti Jerusalén
(2 S. 5.13-16; 1 Cr. 3.5-9)
3Tsi' pʌyʌ yambʌ i yijñam jini David ya' ti Jerusalén. Tsi' yilayob pañimil ch'iton bʌ yic'ot xch'oc bʌ i yalobilob David.
4-7Jiñʌch i c'aba' tac i yalobilob tsa' bʌ i yilayob pañimil ti Jerusalén:
Samúa, Sobab, Natán, Salomón, Ibhar, Elisúa, Elpelet, Noga, Nefeg, Jafía, Elisama, Beeliada, Elifelet.
David tsi' jisa jini filisteojob
(2 S. 5.17-25)
8Che' bʌ tsi' yubiyob jini filisteojob wa'chocobilix David ti rey ti Israel, tsa' letsiyob tilel cha'an mi' wersa chucob David. Pero David tsi' yubi wolix i tilelob. Jini cha'an tsi' tempa i soldadojob. 9Jini filisteojob woli' jisañob ñumel jini joctʌl bʌ lum i c'aba' Refaim. 10David tsi' c'ajtibe lac Yum ti oración: Mi tsa' majli j contrajin jini filisteojob ti guerra, ¿mu' ba caj a coltañon? che'en. Lac Yum tsi' jac'ʌ: Mu' cu caj j coltañet, che'en. 11Jini cha'an David tsa' majli i contrajin jini filisteojob ya' ti Baal Perazim. Tsi' laj jisayob. Che' jini David tsi' yʌlʌ: Dios tsa'ix i c'ʌñʌyon cha'an mic laj misun majlel jini filisteojob che' bajche' but'ja' mu' bʌ i poc majlel misujelʌl, che'en. Jini cha'an tsi' yotsʌbe i c'aba' jini lum ti Baal Perazim (mu' bʌ i yʌl ti lac t'an, mi' laj misuntel majlel). 12Jini filisteojob tsi' cʌyʌyob i dioste' tac. David tsi' yʌc'ʌ mandar cha'an mi' pulob ti c'ajc.
13Ti wi'il jini filisteojob tsa' cha' ochiyob ti jini joctʌl. 14David tsi' cha' c'ajtibe Dios bajche' yom mi' mel. Dios tsi' sube: Yom mi la' joy majlel jini filisteojob. Che' jini mi mejlel a contrajiñob ti guerra ya' ba'an jini te' i c'aba' balsamera. 15Che' ma' wubin jini ju'ucña bʌ ya' ti balsamera te', yom ma' majlel ba' añob ti ora, come mi caj j coltañet cha'an ma' jisan jini filisteojob. Che' tsi' yʌlʌ Dios. 16Che' jini David tsi' mele che' bajche' Dios tsi' sube. Tsi' laj jisa jini filisteojob c'ʌlʌl ti Gabaón c'ʌlʌl ti Gezer. 17Tsa' pam tsictiyi ti' joytʌlel i lumal chuqui tac ñuc woli' mel David. Lac Yum tsi' yotsʌbeyob i bʌq'uen jini tejclumob cha'an mi' p'isob ti' wenta David.
Currently Selected:
1 CRONICAS 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.