YouVersion Logo
Search Icon

Abdiyas 1

1
1Wana ni vama Salad’a Ma didina mi ndum mbei mi Abdiyas yam zla d’a mi dat mi suma Edom-mid’a:
Ma didina mi de yam b’laka hi Edom-mid’a
Ami humumi zlad’a tcholï ata Ma didina;
mi sun sana aduk andjaf suma, mi dala:
Agi tchologi akulo, ei i ndeï suma Edom-ma durâ.
2Ma didina mi dala: Agi suma Edom-ma,
an nga ni mbud’ugi akid’eid’a aduk andjaf suma,
suma pet a mba gologi is mi.
3Yam mba ad’eng magid’a ti vid’igi wa woyo.
Agi suma nga kak aduk ahuniyôna
ata yima sana ndak á lagi va kua d’uo na,
agi nga dagi ala:
Ni nge ba, mba mi digimi woi kua ge?
4Wani le agi i kagagi sä nakulo dei
d’igi b’aruna na
d’oze agi minigi aziyagi sä nakulo aduk tchitchiud’a pî,
an mba ni tchugugï asegi kä woyo.
5Le suma kula d’oze suma hurum ahlena
a mba avo hatagi andjege ni,
gagazi, a mba b’lagagiya,
a mba kulï ahle suma huruzi minizina d’uo zu?
Le suma dut guguzlud’a a mba avo hatagiya ni,
a mba arî guguzlud’a blangâtna akulo hol luo zu?
6Agi andjafâ hi Esau-na,
a fegegi wa aziyagiya,
ndjondjoî magi d’a nga ngeid’id’a pî,
a ndat wa ad’ut tei abu mi.
7Buniyôgina a digigi gak a igi ir hagad’a,
a mbud’ugi iragiya.
Buniyôgina a kus kagiya.
Suma a tagi te maginina
a gunugi nga dauna kä avorogiya,
a nga de kagi ala
agi ni suma bei ned’a.
8An Ma didina nga ni dagiya:
Kur bur máma an mba ni dap
suma ne suma yam ambas sa Edom-mbina woyo,
an mba ni ar sama wad’ud’a
yam ahina mamba tu d’i.
9Agi suma Teman-na,
mandarâ mba mi ve grang magi suma durâ,
azigar suma kur ambasina pet,
a mba tchazi woi mi.
Edom-ma a nga le furîd’a yam ndaka hi Israel-lîd’a
10Kayam murud’um mba agi lat
mi b’oziyogi suma hi Jakob-mid’a,
zulona mba mi lagiya,
a mba dabagi woi ki iragi fafat.
11Agi tagid’a nga ata yima suma djangûna
a kus kazi a i kal avo hatazina,
ata yima andjaf ma ding máma mi le togina
yam ndjondjoî d’a Jerusalem-mbina,
agi lagi d’igi azi na mi.
12Agi suma Edom-ma, nga djivid’a agi lagi furîd’a
yam b’oziyogi suma Juda-na
kur bur ma azi nga kur ndakina d’i,
nga djivid’a agi lagi furîd’a
ata yima b’laka mba kazina
d’oze agi sanagi ad’uzi
kur bur ma azi nga kur pupulukina d’uo mi.
13Nga djivid’a agi kalagi avo hi sum mana
kur bur ma b’laka mba kazina d’i,
nga djivid’a agi sogi iragi kazi
kur bur ma azi nga kur ndakina d’i,
nga djivid’a agi tinigi abogi ata ndjondjoî mazid’a
kur bur ma azi nga kur ndakina d’uo mi.
14Nga djivid’a agi tchologi avun grak lovota
á tchagi mazi suma a nga ringâ d’i,
nga djivid’a agi hagi mazi suma a arâ
mi ma djangûna kur bur ma ndaka d’uo mi.
Israel-lâ a mba hlatchuguluzi ki Edom-ma
15Kayam burâ hi Ma didinina mi ar go á mbad’a
á ka sariyad’a yam andjaf suma pet.
Mba mi lagi ni d’igi agi tagi lagi na,
sun magid’a mba d’i hulong kagagiya.
16Agi Israel-lâ,
agi tchagiya wa kur kop man ma ayîna
yam ahina man nda a tinit irat vata.
Andjaf suma dingâ a mba tchumî hina baba,
azi mba tchum gak a gurut kiya.
Bugola, azi mba dap pei ki irazi fafat.
17Wani suma a sut teina a mba kak
yam ahina d’a Siyon-nda.
Azi mba ka’î suma a tinizi irazi vazina.
Suma hi Jakob-ma a mba hle
yi mazi ma a hlum abozi adjeuna.
18Suma hi Jakob-ma a mba mbut
ni d’igi akud’a na,
suma hi Josef-fâ a mba mbut
ni d’igi sin akud’a na.
A mba ngal suma hi Esau-na woi
d’igi akud’a ti ngal kuzad’a na,
sa mam tu pî mba mi ar ri,
kayam an Ma didina ni de na.
Israel-lâ a mba hlambas sa nguyuzid’a
19Suma Juda-na a mba hlahinad’a hi Esau-d’a, suma a nga kaka kä ata yima ligitimina a mba hlahinad’a hi suma Filistê-nid’a, a mba hle leud’a hi suma Efraim-mid’a ki d’a hi suma Samari-nid’a, suma hi Benjamin-na a mba hle Galät mi.
20Azigar suma Israel suma mimiyâk suma a yozi magombina a mba hlambasa hi suma Kanan-nid’a gak Sarepta, suma Jerusalem suma a yozi magomba suma a nga kaka Sefarat-na a mba yo azì ma nglo ma hur ful ma abo ma sutnina mi. 21Suma a sutna a mba djak akulo yam ahina d’a Siyon-nda, a mba te yam ahina d’a Edom-mba mi.
Ma didina mba mi kak amula!

Currently Selected:

Abdiyas 1: BA

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy