YouVersion Logo
Search Icon

Jean 2

2
WAL LA TCHID’A HI JESUS D’A WOI ADUK SUMID’A
(2—12)
Jesus mi i ata yima tela avo Kana
1Kur bur ma hindina, tela nga avo Kana d’a Galile-d’a, Jesus asum nga kua mi. 2A yi Jesus ki mam suma hata ata yima tela mi. 3Kid’a süma mi kid’aka, Jesus asum ti dum ala: Azi nga ki süm mbi.
4Jesus mi dat ala: Asunu, vama ndolok ki an ni me? Yi mana ndak nga biya d’i.
5Asum mbi de mi suma le sunda ala: Agi lagi ahlena pet suma mam mba dagi kazina.
6Afud’ogei suma ahinad’a karagaya a nga tinda ata yi máma yam mbusa hi Juif-fîd’a yam gat mazid’id’a. Hur afud’ogei ndazina a selî agolongeîna mbàmbà d’oze hihindi. 7Jesus mi de mi suma le sunda ala: Agi oyôgi afud’ogei ndazina ki mbina. A oyôzi woi pupulî mi.
8Mi dazi ala: Ki tchetchemba, agi gulugiziya, agi igizi mi ma ngolâ hi telina. A imzi mi.
9Kid’a ma ngolâ hi telina mi djuk mbiyo ma a mbud’um süm mámid’a, mi we nga yima azi mbeï ki süm máma kuana d’i, wani suma a le sun suma a gulï mbinina a we. Ata yi máma, mi yï sala tela, 10mi dum ala: Sama lara pî mi he ni suma süm ma djivina avok tua. Le azi tche a ndak wa tua ni, mi hazi ma abei ayîna tua. Wani ang ar ma djivina gak ki tchetchemba nana ge?
11Wana ni vama simat ma avok kikidji ma Jesus mi lum kur Kana d’a Galile-d’ina. Mi tak subur mamba woyo, mam suma hata a he gagazid’a kam mi.
12Bugol ahle ndazina, mi i Kapernayum zlapa kasum azi ki b’oziyoma ki mam suma hata. A kak nga kua burâ ngol li.
Jesus mi kal kur gong nga kud’ora
(Gol Mat 21.12-13; Mar 11.15-17; Luc 19.45-46)
13 Vun til ma Pa’â hi Juif-fîna mi mba go. Kayam ndata, Jesus mi djak i Jerusalem. 14Mi kal kur gong nga kud’ora hAlonid’a, mi fe suma a nga gus amuzleina ki tumiyôna ki gugud’a woina a nga kua. Suma mbut beged’a woina a nga kaka kä avun tabul mazina mi.
15Mi par ziyona blafâ, mi digizi woi abu kur gong nga kud’ora hAlonid’a pet zlapa ki tumiyôna kamuzleina. Mi yak beged’a hi suma mbut beged’a woina woyo, mi zut tabul mazina kä mi. 16Mi de mi suma gus gugud’a woina ala: Agi yogi ahle ndazina sä woyo. Ar agi mbud’ugi gonga hAbunda ni gong nga mbut abona d’i. 17Mam suma hata, humazi gazi yam zla d’a a b’irit kur mbaktumba hAlonid’a ala: Alo mana, tan nga d’i lan zlezleû yam gong manga d’a.
18Juif-fâ a djobom ala: Ang lami ni me ma simata yam ahle suma ang lazi wana ge?
19Jesus mi hulong dazi ala: Agi togi gong nga kud’ora hAlona d’a wanda kä, wani kur bur ma hindina, an mba ni minit akulo.
20Kayam ndata, Juif-fâ a dum ala: A min gong ndata a le ni bizad’a dok fid’i yam karagaya! Ni nana ba, ang dala ang mba minit akulo kur bur ma hindina ge?
21Wani gong nga kud’ora hAlona d’a Jesus nga mi de kata ni hliwimu. 22Kayam ndata, ata yima Alona mi tcholom akulo aduk suma matnina, mam suma hata humazi gazi yam zla d’a mi data, a he gagazid’a yam zla d’a a b’irit kur mbaktumba hAlonid’a, yam zla d’a Jesus mi data mi.
Jesus mi we vama hur sanina
23Kid’a Jesus nga avo Jerusalem ata yima vun til ma Pa’îd’a, suma ablaud’a a he gagazid’a kamu, kayam a wahle suma simat suma teteng suma mi lazina. 24Wani Jesus mi tin nga hurum kazi d’i, kayam mam wazi pet. 25Mi min ala sana dum yam sa d’i, kayam mam tamba mi we vama nga hur sanina.

Currently Selected:

Jean 2: BA

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy