Buzuk ka Abud’a 1
1
ALONA MI BUZUK ISRAEL-LÂ WOI AVO EZIPTE
(1.1—15.21)
A djop vun Israel-lâ avo Ezipte
1Wana ni simiyê Israel grom suma a mba ki sed’em Ezipte-na, nge nge pî mi mba ki sum mama: 2Ruben, Simeon, Levi, Juda, 3Isakar, Zabulon, Benjamin, 4Dan, Neftali, Gad ki Aser. 5Andjafâ hi Jakob ma mbeï ki sed’em Ezipte-na pet ni dok kid’iziya, wani Josef mi sä ni Ezipte da’. 6Josef mi mit zlapa ki b’oziyoma pet, ki suma a mba kabum kur atchogoi ndatina pet mi. 7Gro Israel-lâ a nga vud’a, a nga zul avogovogo, a zul mimiyâk, a nga mbut ad’enga, a oî yam ambasa mi.
8Amul ma awili ma we nga Josef fuo na, mi te yam Ezipte. 9Mi de mi sum mama ala: Gola! Israel-lâ a zul ablaud’a, a kalei kad’enga mi. 10Ei halei lovota á d’elezi á zula. Le hina d’uo ni, le ayîna tchola ni, a mba zlap ki mei suma djangûna, a mba duriya. Bugola, a mba buzuk kei kur ambasa.
11Ata yi máma a tin suma a golozi ata yima sundina kazi á kid’eyêzi irazi ki sun nda aneka. Ni hina ba, a min azì ma Pitom ki Ramses-sâ á tchuk ahlena hi Faron-na kua. 12A nga kid’eyêzi irazi ngola hina pî wani, a nga zula, a nga i avogovogo. Ezipte-na huruzi nga mi zal kaziya. 13Ni kayam ndata ba, a tin Israel-lâ ata sun nda aneka d’igi magumeina na. 14A mbud’uzi yima kaka irazi tchod’a ki sun nda aneka, nala, a tub’ok lubuna, a tchi derengelâ, a nga le sun nda asined’a mi. Ni hina ba, a tinizi sun nda anek ka lara ge pet kaziya, a nga wazi hohowozi d’i.
Faron mi djop vun Israel-lâ
15Arop suma Hebre suma vud’aropma a nga mbà; d’a hid’a a yat ala Sifra, d’a hid’a a yat ala Puwa. Amul ma Ezipte-na mi dazi ala: 16Le agi vud’ugi arop suma Hebre-na, le agi wagi ni gor mandjufâ ni, agi tchum mbeyo; le ni gor atchad’a ni, agi arat bei tchid’a. 17Wani arop suma vud’aropma a nga ring mandara Alona, a le nga d’igi amul ma Ezipte-na mi hazi vuna na d’i, a nga ar gro andjofâ bei tchid’a.
18Amul ma Ezipte-na mi yï arop suma vud’aropma, mi dazi ala: Ni kayam me ba, agi lagi hina ge? Agi aragi gro andjofâ bei tchid’a nana ge?
19Arop suma vud’aropma a hulong dum ala: Arop suma Hebre-na a nga d’igi arop suma Ezipte-na na d’i; azi ad’enga heî; ami mbamiza ni d’igi azi vut wa da’.
20Alona mi mun yam arop suma vud’arop ndazina. Israel-lâ a nga zul kam kua kam kua, a mbut ad’enga. 21Alona mi zul andjafâ harop suma a vud’aropmina, kayam a lum mandaramu. 22Wani Faron mi he vuna mi sum mama ala: Agi tchugugi gro andjof suma Hebre suma a vut awilina woi pet kur aluma. Wani agi tchugugi gro aropma woi aduk aluma d’i.
Currently Selected:
Buzuk ka Abud’a 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.