Zakari 5
5
Vama nde tam á karagayad’ina: Mbaktum mba ge vuna
1Vana nde tam mbei iran kua. An we mbaktum mba d’uta ti pir akulo.
2Malaikana mi dan ala: Ang we ni me ge?
An hulong ni dum ala: An we mbaktum mba d’uta nga d’i pir akulo, fiyagat metred’a vahl, bubuwat metred’a dogo mi.
3Mi dan kua ala: Mbaktum ndata ni vun ma ge ma mba mi ndja abom mbei yam andagad’a petna. A b’ir kurut ala a mba dik suma kula woi kur ambasa, a mba dik suma a gun tazi ir gurzulina woi mi. 4Ma didin ma ad’engêm kal petna mi dala: An mba ni sunï vun ma ge máma, mba mi kal avo hi ma kul ma lara d’oze avo hi sama lara ma nga mi gun tam ir gurzula ki simiyêna, mba mi kak avo hatam mba mi ngalam ahligiyem mbei kagu ma murgulina kahinad’a woi pet.
Vama nde tam á kid’iziyad’ina: Atcha d’ala ti ta’î tchod’a
5Malaika ma nga mi dan zlad’ina mi mba mi dan ala: Ang gola, ni me mi djï na ge?
6An hulong ni dum ala: Ni me ge?
Mi dan ala: Ni vama nga ahle ma tchod’a hi suma yam ambasina pet nga kuruma.
7Ata yi máma a mal vun vama nga ahle ma a lum ki lombina woyo. Atchad’a ti nga kaka kur vama nga ahlena. 8Malaikana mi dan ala: Ti ta’î tchod’a.
Mi zud’ut sä kä kur vama nga ahlena, mi dugut vunat kä ki vun vama a lum ki lombina. 9An hle iran akulo, an we aropma mbà a buzugï woyo. Simetna nga mi zud’uziya, gigingâzi mi hle tam d’igi ma hi gorandulîna na, a hle vama nga ahlena woi akulo yam andagad’a mi. 10An de mi malaika ma dan zlad’ina ala: Azi i ki vama nga ahle máma ni lara ge?
11Mi hulong dan ala: A i ni ki sed’em Mesopotami ata yima azi mba minim gong mamba kuana. Le a min wa gonga ni, azi mba tinim kua.
Currently Selected:
Zakari 5: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
