Zakari 10
10
Agi tchenegi Ma didina, agi aragi fileina woyo
1Agi tchenegi Ma didina
kayam mi sagi alo ma hod’ogoid’a ata yamu.
Mam ma nga mi mba ki babarîna,
mba mi sagi alona ngola,
mba mi d’uf asuna asine hi nge nge pî adigagiya.
2Filei ma agi nga djoboma
nga mi dagi ni zla d’a kad’a,
suma djopa, ahle suma a nde tazi irazina,
nahle suma hawa ya’â.
Adï d’a azi vagizi ad’uta,
ni zla d’a hawa yaka mi.
B’leng hur ma azi nga b’lengêgi ki hurugina,
ni mbut ira.
Kayam ndata, azi nga kur hohoud’a
d’igi d’uwar ma salam ma pola nga d’uo na na.
Vun ma hle ma yam sutina
3An hurun nga mi zal yam suma pol
suma ding suma a nga yi tazi ala
azi ni suma pol sum mana na.
An mba ni mba á ngoboziya.
Gagazi, an Ma didin ma ad’engên kal petna nga ni dala:
An mba ni ngom d’uwar man suma Juda-na,
an mba ni i ki sed’ezi ata yima durâ
d’igi akulum ma subura na.
4Ahina d’a djik gonga
ki ponde ma b’al ahlena
kagu yeû d’a dur ayîna,
a mba tcholï nadigaziya,
amuleina pet a mba buzugï nadigazi mi.
5Azi mba mbut ni d’igi grang suma durâ na,
a mba miret suma a duruzina kä kasezi
d’igi a miret lubuna kä kur lovota na,
a mba duruziya,
kayam an Ma didina mba ni kak ki sed’eziya.
Suma djang akulumeina hi mazi suma djangûnina
a mba mbut zulona.
6An mba ni had’enga mi suma Juda-na,
an mba ni sut suma hi Josef-fâ,
an mba ni hulongôzï ata yaziya,
kayam an wazi hohowoziya.
Azi mba mbut ni d’igi suma an arazi woi d’uo na na,
kayam an ni Ma didina Alo mazina,
an mba ni hum tchen mazid’a mi.
7Suma Efraim-ma a mba mbut ni grang suma durâ,
a mba le furîd’a kuruzi krovo
d’igi suma a le furîd’a ki süm guguzlud’a na.
Grozina a mba we, a mba le furîd’a,
a mba le furîd’a kuruzi krovo
yam an Ma didina.
8An mba ni yazi ki feta, an mba ni togoziya,
kayam an nga ni tchuguzi akulo,
azi mba zul d’igi azi zul adjeu na.
9An mba ni ndjoyôzi woi aduk andjaf suma.
Sä ata yima deina azi mba djib’er kanu,
a mba kak ki grozina,
a mba hulongî mi.
10An mba ni buzuguzï woi yam ambas sa Ezipte-d’a,
an mba ni togozï woi Asiri,
an mba ni mbazi yam ambas sa Galät-ta
ki d’a Liban-nda,
yina mba mi ndagazi d’i.
11A mba djak alum ma ndaka,
a mba wat abilâ halum ma ngolîna,
galilei ma yiyi’â halum ma Nil-lîna pet
mba mi so woyo.
Subur tad’a hi Asiri-nid’a mba d’i hulong kä,
ad’enga hi suma Ezipte-nid’a mba d’i dap peyo.
12An mba ni hazi ad’enga,
a mba tit ni ki simiyênu.
Ni an Ma didina ba, ni de na.
Currently Selected:
Zakari 10: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
