YouVersion Logo
Search Icon

Jean 19

19
1Ata yi máma Pilat mi ve Jesus, mi hazizi ala a tom ki blafâ. 2Azigarâ a tchil avaval aweid’a, a kulubut yam Jesus, a tchugum baru d’a hleud’a atamu. 3Azi hut gevemu, a gum depa ala: Lafiya, amulâ hi Juif-fîna, a tom kaboziya.
4 Pilat mi hulong ndabu kua, mi dazi ala: Agi gologiya! An mbagizi woi abu wana, kayam agi wagi ala an fe nga zla kam mbi. 5Kayam ndata, Jesus mi nde woi abu kavaval aweid’a kam ki baru d’a hleud’a atamu. Pilat mi dazi ala: Agi gologi sa máma.
6Kid’a nglo suma ngat buzuna ki suma a ngom yina a wumba, a de ki delezi akulo ala: B’alam akulo ata aguna, b’alam akulo ata aguna.
Pilat mi dazi ala: Agi tagi vagiziya, agi b’alagizi akulo, kayam an fe nga zla kam mbi.
7Juif-fâ a hulong dum ala: Ami nga ki gata. Kur gat ndata djivid’a mi mid’a, kayam mam mbut tam ala mam mi Alona Goroma.
8Kid’a Pilat mi hum zla ndatid’a, mi le mandarâ kua kala. 9Mi hulong kur azina hi ma te yambina, mi de mi Jesus ala: Ang tcholï ni lara ge?
Wani Jesus mi hulongôm nga zla d’a ded’a balum mbi. 10Kayam ndata, Pilat mi dum ala: Ang nga dan zla d’i? Ang we nga ala an nga kad’enga á gang akulo, an nga kad’enga á b’alang akulo mi d’uo zu?
11Jesus mi hulong dum ala: Ladjï Alona mi hangzi ni mam mbuo ni, ang nga kad’enga kan ndi. Kayam ndata, sama han abongâ, mi kalang ki tchod’a.
12Kayam ndata, Pilat mi min gum akulo, wani Juif-fâ a de ki delezi akulo ala: Ang le ge sa máma akulo ni, angî Sesar banama d’i. Sama lara pî ma mbut tam amulîna, mi ka’î djangûna ki Sesar.
13Kid’a Pilat mi hum zla ndatid’a, mi nde ki Jesus abua, mi kak kä yam zlam mba ka sariyad’a. Yi máma simiyêm ala Atranga, a yum ki vun Hebre-na ala Gabata. 14Bur máma ni bur ma a min ahle suma vun til ma Pa’îna, go kafata faleya. Pilat mi de mi Juif-fâ ala: Agi gologi amul magina wana.
15Kayam ndata, azi de ki delezi akulo ala: Tchum mbeyo, tchum mbeyo, b’alam akulo ata aguna.
Pilat mi djobozi ala: An b’alagi amul magina akulo zu?
Nglo suma ngat buzuna a hulong dum ala: Ami nga kamul ma ding ngi, ni Sesar tu. 16Kayam ndata, mi hazi Jesus á b’ala.
A b’al Jesus akulo ata aguna
(Gol Mat 27.32-44; Mar 15.21-32; Luc 23.26-43)
Kayam ndata, azi ve Jesus, a i ki sed’emu. 17Jesus mi hlagu mam ma b’ala, mi nde ki woi abua, mi i ata yima a yum ala Asok yamba na, a yum ki vun Hebre-na ala Golgota. 18Nata yi máma ba, azigarâ a b’alam akulo ata aguna, zlapa ki suma dingâ mbà, tu abo hî, tu abo hî, Jesus adugu.
19 Pilat mi he vuna á b’ir kam akulo ata agu ma b’ala ala: Wana ni Jesus ma Nazarat-na, amulâ hi Juif-fîna. 20A b’irit ni ki vun Hebre-na ki vun Romê-na ki vun Gre’â. Juif-fâ ablaud’a a nga ndum zla ndata, kayam yima a b’al Jesus kuana ni go kazì ma ngolâ.
21Nglo suma ngat buzuna hi Juif-fîna a de mi Pilat ala: Ang b’ir ala: Amulâ hi Juif-fîna d’i, wani ang b’ir ala: Mi dala: An namulâ hi Juif-fîna.
22 Pilat mi hulong dazi ala: Vama an b’irâ, ni b’ir da’.
23Kid’a azigarâ a b’al Jesus dad’a, a yo baru mama, a b’rawam aduk fid’i, azigar ma lara pî ki mama ki mama. A yo baru mam mba ngola bei dupid’a, a tchilit ni tchila, ei akulo kelem dei gak mba kä asemu. 24Kayam ndata, azigarâ a de tazi ala: Ei haweîzi woi d’i, wani ei tumi gumara kad’u, ei wei sama mba yotna. Ahle ndazina a le hina á ndak vun zla d’a a b’irit kur mbaktumba hAlonid’a ala:
A b’rau baru mana aduk taziya,
a tum baru man nda ngola gumara mi
d’a ti ndak memet. Wana nahle suma azigarâ a lazina.
25Wani Jesus asum ki wiyeta Marie atchad’a hi Klopas-sa ki Marie d’a Makdala-d’a, a nga tchola go kagu ma b’ala hi Jesus-na. 26Kid’a Jesus mi wasum ki ma hat ma mam le kam heîna mi nga tchola go ki sed’eta, mi de masum ala: Asunu, ndak gol goro’â wana! 27Bugola, mi de mi ma hat máma ala: Ang gol asung wana! Ata yi máma, ma hat máma mi vat mi i ki sed’et avo hatamu.
Matna hi Jesus-na
(Gol Mat 27.45-56; Mar 15.33-41; Luc 23.44-49)
28Bugol ahle ndazina, Jesus mi wala ki tchetchemba ahlena pet a ndak wa memet. Kayam mi min ndak zla d’a a b’irit kur mbaktumba hAlonid’a, mi dala: Vunan so.
29Ata yi máma, agela nga tinda, oîd’a ki süm guguzlu d’a azleîd’a. Sana mi hle epos ma nga oîd’a ki süm guguzlu d’a azleî ndatina, mi djinim avun agu hisopma, mi tinimzi avunamu. 30Kid’a Jesus mi tche süm ma azlei máma dad’a, mi dala: Ahlena pet a ndak wa, mi tchok yam kä, mi duk vunamu.
Azigarâ tu mi tchok Jesus fefed’emu
31Bur máma ni bur ma a min ahlena yam bur ma sabatna. Juif-fâ a djop Pilat á kus suma a b’alazina aseziya, á pad’azi kä, kayam mad’azi mi ar akulo ata aguna kur bur ma sabatna d’i, kayam bur ma sabat máma ni bur ma ngolâ. 32Kayam ndata, azigarâ a mba, a kus asem ma a fum avo’â ki ma ding ma a b’alam gen Jesus-na. 33Azi mba yam Jesus, a golom mam mit da’, a kuzum nga asem mbi. 34Wani ma dingâ aduk azigarâ, mi tchogom fefed’em kasapa. Ata yi máma na wat, buzuna ki mbina a djang ngeyo. 35Mam ma we na, mi le glangâsâ. Glangâs mama ni gagazi, mi wala mi de ni zla d’a irata mi, kayam agi hagi gagazid’a kad’u. 36Ahle ndazina a le hina kayam zla d’a a b’irit kur mbaktumba hAlonid’a ala: A mba kuzum asogom tu d’uo d’a ti ndak memet. 37Zla d’a b’ir ra dinga hAlonid’a ti de kua ala: Azi mba mbut irazi yam ma azi tchogoma.
Tosa hi Jesus-d’a
(Gol Mat 27.57-61; Mar 15.42-47; Luc 23.50-56)
38Bugol ahle ndazina, Josef ma Arimate-na, ni ma hata hi Jesus-na, wani ni kur ngeid’a kayam mandarâ hi Juif-fîna, mi djop Pilat kayam mi i mi pat mad’a Jesus. Pilat mi humumu. Josef mi mba, mi pad’am mad’amu. 39Nikodem ma i gen Jesus andjege adjeuna, mi mba ki mbul mir ra hlumba ki alowena, anegem ni d’igi kilona dok hindi na. 40Azi hle mad’a Jesus, a d’ud’um ki baktana ki mbul ma his ma afufuî máma, d’igi Juif-fâ a tos tazi na. 41Ata yima a b’alam kuana, asinena tu nga. Zul la awili d’a a ge nga sa mad’am kua d’uo d’a ti nga kuru. 42A ge Jesus kua, kayam bur ma a min ahlena yam bur ma sabatna hi Juif-fîna mi ar go, kayam zul ndata ni go ki yima a b’alam kuana mi.

Currently Selected:

Jean 19: BA

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy