Ezekiyel 31
31
Amul ma Ezipte-na, a ngam kagu sedrena
1Kur biza d’a dogo yam tud’a bugol la a yomi magombid’a, kur bur ma tuna hi til ma hindinina, Ma didina mi dan ala: 2Ang gor sana, ang i de mi Faron amul ma Ezipte-na ki mam suma ablauna ala:
An Ma didina ni ngang ngol manga ni ki me ge?
3Gola! Suma Asiri-na ni d’igi agu sedre ma Liban
ma abom mi djif heî ma d’ufa gugulî
ma wul fiyaka gak yam mbi do d’ugulina na.
4Alo ma sed’a mi hum ad’enga,
mbiyo ma kä andagana mi deyêmu.
Mbiyo máma mi djang ata yima sideyem nga kuana pet,
mbiyo máma mi djang gak mi i ad’u agu ma abageina pet.
5Ni kayam ndata ba,
mi wul fiyaka kal akulo yam agu ma abageina pet,
mi tchuk grona ablaud’a,
abom mi ruî woi
ni yam mbiyo ma mi djang ad’um heîna.
6Aluwei suma akulona pet
a min aziyazi ata abomu,
amburei suma abageina pet
a vut grozina kä ad’umu,
andjaf suma pet a mba a kak kä ad’u anguzamu.
7Mi djif ki fiyak mamba heî,
abom mi ruî woi ruruî,
kayam sideyem mi i kä aduk mbiyo ma pûpûndjîna.
8Agu sedre ma kur asinena hi an Alonina pî
ma mi kalama nga d’i,
agu sipre ma nga tam kaboma nga d’i,
agu platan ma nga d’igi abom hina na nga d’uo mi.
Agu ma kur asinena hi an Alona ma mi nga tam
ki sed’em ki djifîna mi nga d’uo.
9An hum abo ma djifâ atamu,
agu ma Eden ma kur asinena
hi an Alonina pet a le yungôra kamu.
Amul ma Ezipte-na mi ni d’igi sedre ma kus seina na
10Ni kayam ndata ba, Ma didina mi dala: Mi wul fiyaka gak yam mbi do d’ugula, mi hle yam akulo yam fiyak mamba. 11Ni kayam ndata ba, an hum abo ma gangrang ma te yam andjaf sumina, mba mi le ki sed’em ngad’a yam asa’at mam mba mi lata, kayam an aram mbei da’. 12Andjaf suma ding suma asa’at mazid’a kal ndrozinina, a kam a gum mbeyo. Abom mi nde kä yam ahuniyôna kur hor ra lara ge pet, abom mi kus kä woi kur b’irlim ma yam ambasina. Suma yam andagad’ina pet a buzuk kei ad’u anguzamu, a aram mbeyo. 13Aluwei suma akulona pet a mba kak ata abom ma kus kä woina, amburei suma abageina pet a ka domina kä ad’u abomu. 14A le hina ni kayambala agu ma avun mbina ma mi tche mbina heîna, mi wul gak yam mbi do d’ugula d’oze mi subur tam yam fiyak mamba d’uo d’a, kayam aguna pet a lum ná matna d’igi suma na, a mba i kä ad’u andagad’a gen suma a i kä azuleina.
15Salad’a Ma didina mi dala: Kur bur ma mi i kä azuleina, an zut ahlena á tchi horâ kamu, an duk ir mbiyo ma zul ma yiyi’â kamu, an d’el alum mama, an d’el mbiyo ma nglona bei djangâ, an mbut Liban nduvunda kamu, agu ma abageina pet mi so woi kam mi. 16Ata yima an zud’um kä na, andjaf suma mi zlak abo tchi máma. Ata yima an ni im kä azulei zlapa ki suma a i kä azuleina, agu ma kur Eden-na pet, ma djifâ ki ma djivi ma kal tegles ma Liban-na kaguna pet ma nga mi tche mbinina, huruzi mi b’leng kä ad’u andagad’a. 17Suma a nga kaka kä ad’u anguzam aduk andjaf sumina, a i kä azulei ki sed’em gen suma a tchazi avun ayînina.
18Ang hle tangî kagu me ma subur ma ngol ma aduk agu ma Eden-na ge? A mba zud’ung kä kagu ma Eden-na kä ad’u andagad’a. Ang mba bur kä aduk suma bei ngat bayâd’a zlapa ki suma a tchazi avun ayînina. Wana nahle suma a mba yam Faron kablau mambina. An Salad’a Ma didina ni de na.
Currently Selected:
Ezekiyel 31: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
