2 Korente-na 1
1
Dep pa ged’a hi Paul-la
1Ni an Paul ma a sunuma hi Jesus Christ-sâ yam minda hAlonid’ina, zlapa ki wiyeina Timote.
Ami nga b’irimi mbaktum mba wanda mi agi Toka hAlona d’a nga kur Korente-d’a ki suma hAlona suma avo Akai-na ki zlazi pet mi. 2Ar Alona Abuya ki Salad’a Jesus Christ a vagi sumad’a ki b’leng nga halasa.
Paul mi le mersi mAlona
3Ar ei lei mersi mAlona, Abu Saleina Jesus Christ, Abui ma we hohowa sumina, ni Ma nga mi b’leng hur suma ata yima lara ge petna. 4Nga mi b’lengêmi hurumi kur ndak mamid’a pet, kayam ami fami ad’enga á b’lengêmi hur suma a nga kur ndak ka lara ge pet ki b’leng hur ma Alona tamba nga mi b’lengêmi ki hurumina. 5D’igi ami fami ndaka ngola zlapa ki Christ na, Alona nga mi b’lengêmi hurumi ngola yam Christ mi. 6Le ami nga fami ndaka ni, ná b’lengêgi hurugi á sud’ugiya. Le ami hurumi b’lengâ ni, ná b’lengêgi hurugiya, kayam agi vagi tagi ad’enga kur ndak ka ami nga kuruta mi. 7Kayam ndata, ami tinimi hurumi kagi ngola. Ami wami ala le agi nga fagi ndaka zlapa tu ki sed’emiya ni, Alona mba mi b’lengêgi hurugi zlapa tu ki sed’emi mi.
8B’oziyomina, ami minimi ala agi wagi ndak ka ami fat kur ambas sa Asi-d’id’a. Aneka ngola kal kamiya, ti kal yam ad’engêmi gak hur mami ma tinim ala ami mba sud’umi woyo na dap da’! 9Ami djib’eremi kurumi ala ami mba bami ni woyo. Kayam ndata, ndak mamid’a ti zud’umi á tinimi hurumi yam ami tami d’i, wani ni yam Alo ma tchol suma matna akulona hol. 10Mam ma sud’umi woi avun matnina, mba mi sud’umi woi kua. Ami tinimi hurumi kam ala mam mba mi sud’umi woi kua d’ei. 11Ar agi ndjunumi kur tchen magid’a mi. Hina wani, Alona mba mi hum tchenda hi suma ablaunid’a kamiya. Kayam ndata, suma ablaud’a a mba le mersi mAlona yam djivi d’a mi lat kamid’a.
PAUL KI TOK KA KORENTE-D’A
(1.12—7.16)
Paul mi mbut nga hur mama ni kayam me ge?
12Ami nga suburumi tami yam djib’er ra kurumi d’a nga d’i le glangâsâ kami yam tit mamid’a avok suma duniyad’id’a, kal pet navok agiya. Ami nga tid’imi ni tit ta luluma d’a bei lop ir ra tcholï ata Alonid’a. Ami nga tid’imi ni yam ned’a hi sumid’a d’i, wani nad’u ad’enga hi sumad’a hAlonid’a. 13-14Kayam kur mbaktum mamid’a, ami b’irigi nga vama ding ngi, ni vama agi nga ndumugizina, agi humum mi. An djib’er ala ki tchetchemba, agi nga wagi ad’um nde, wani an hal ala agi wum ad’um mbei tetet mi. Hina, kur burâ hi Saleina Jesus Christ-sâ, agi mba suburugi tagi kami d’igi ami suburumi tami kagi na mi.
15Kayam ndata, an tin wa hurun ala an mba ni iza avok hatagi tua, kayam agi fagi djivid’a yagi á mbàd’a. 16An djib’er ala an hleza hatagi tua ba, an i Maseduwan; hulong man nda ei Maseduwan-nda, an mba ni hleï kagi d’ei, agi mba tinin kur i man nda kur ambas sa Jude-d’id’a mi. 17Ata yima an djib’er hina na, an mbut ni sama mbàmbàd’a zu? D’oze vama an nga hurun kama, an nga hurun ni yam hliuna zu? An dala: Â, Â! ki Hawa, Hawa! ata yima tuna zu? 18D’igi Alona ni Ma d’engzengâ na, zla d’a ami dagizid’a nga ni  ki Hawa d’i. 19Kayam Jesus Christ Alona Gorom ma an ki Silas ki Timote tchagizi walama, mam mi  ki Hawa d’a d’i, wani mam mi  d’a hAlonid’a teteu. 20Mam mi  d’a yam vun ma hled’a hAlonina pet. Kayam ndata, kur Jesus Christ ei nga dei ala Amin yam subura hAlonid’a. 21NAlona tamba ba, mi sirami ami ki agi yam Christ, mi tini irei vei mi. 22Mi kei geuna ki simiyêmu, mi hei Muzuk mama kuri d’igi vama gap ma djivi ma mam nga mi ngomom keina na mi.
23An ka ni zlad’a d’i, Alona ni ma glangâs mana mi. An ar bei hulong iza hatagi Korente kayam an min zalagi hurugi d’i. 24Kayam ami minimi á te yam he gagazi magid’a d’i, kayam agi nga kaka ngingring kur he gagazid’a, wani ami min ei lei sunda zlapa tu yam djivi magid’a.
Currently Selected:
2 Korente-na 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.