2 Sunda Hamuleinid’a 1
1
ZLAD’A HI SALOMON AMUL MA ISRAEL-LÎD’A
(1—9)
1Salomon David goroma nga mi sira leu mamba. Ma didina Alo mama mi nga ki sed’emu, mi hlum yam akulo avok suma pet.
Salomon mi tchen Alona á hum ned’a á tamula
(Gol 1 Amul 3.4-15)
2Salomon mi yi Israel-lâ pet, nala, azigar suma nglo suma avok azigar suma dudubuna, suma avok azigar suma kikisâ, suma ka sariyad’a, suma nglo suma avok Israel-lâ pet ki suma avok sum mazinina mi. 3Salomon mi i kablau d’a peta ata yima nding ma Gabawon ma a tinim iram vama ata yima zlub’u d’a ngaf tad’a hAlona d’a Moise azongâ hi Ma didinina mi minit abagei hur fulîd’a ti nga kuana.
4Wani zandu’â hAlonina David mi hlumï Kiriyat-Jarim, mi mbam Jerusalem kur zlub’u d’a mam vumzi kamba. 5Ata yi máma yima ngal ahle suma ngat buzu ma Besalel ma Uri gorom ma Hur gorom ngolona mi minim ki kawei ma hleunina, mi nga avun zlub’ud’a ata yi máma. Salomon kablaud’a a i á djop Ma didina.
6Ata yi máma Salomon mi djak akulo yam yima ngal ahle suma ngat buzu ma a minim ki kawei ma hleunina avok Ma didina, ni ma nga avun zlub’u d’a ngaf tad’ina, mi hahle suma ngat buzu suma ngala dubu. 7Kur andjege ndata Alona mi nde tam mbei ir Salomon, mi dum ala: Ang tchenen vama ang minima, an hangziya!
8Salomon mi hulong dum ala: Ang le yam abun David ngola, ang tinin wa á vrak tamula blangâmu. 9Ki tchetchemba, Ma didina Alona, zla d’a ang dat mabun David-ta ti ndak wa. Ang tinin wa á vrak tamula yam suma a ablaud’a d’igi andaga d’a gugud’upa na na. 10Ki tchetchemba, ang han ned’a ki wad’ud’a, kayam an we lovota á tit avok sum ndazina. Ni nge ba, mi ndak á te yam mang suma ablau suma tchotcho ndazina ge?
11Alona mi de mi Salomon ala: Yam djib’er mang nga kurunga, ang tchen nga ala ang mbut ma ndjondjoîna, d’oze ma fahlena, d’oze subura, d’oze an tchang mang suma djangûna na d’i. Ang tchen nga ala burung mi i fiyaka yam andagad’a d’uo mi. Wani ang tchen ni ned’a ki wad’ud’a á te yam man suma an tining á tamula kazina ni, 12ned’a ki wad’ud’a, an nga ni hangziya, an mba ni mbud’ung sama ndjondjoîna, sama fed’a, sama suma a suburuma mi. Sama tamula avorongâ d’oze sama mba mi tamula blogong ma kalangâ nga d’i.
13Salomon mi tcholï ata yima nding ma a tinim iram vam ma Gabawon-na avun zlub’u d’a ngaf tad’a, mi mba Jerusalem, nga mi tamula yam Israel-lâ.
Ad’enga ki ndjondjoîd’a hi Salomon-nda
(Gol 1 Amul 10.26-29; 2 Sun hAm 9.25-28)
14Salomon mi tok pus ma dur ayîna ki suma djang akulumeina. Mi nga ki pus ma dur ayîna 1400 ki suma djang akulumeina 12.000, mi ar suma dingâ kä gevem avo Jerusalem, mi i suma dingâ kur azì ma nglo ma a tchuguzi kuana. 15Amulâ mi mbut kawei ma hapma ki lora ablaud’a avo Jerusalem ni d’igi gireina na, agu sedrena ablaud’a ni d’igi diyaga d’a deî yam andaga d’a kä ata yima ligitimid’a na mi. 16Salomon mi feï akulumei mama ni Ezipte ki Silisi#1.16 Ezipte ki Silisi: Mbut ta dinga ala: Musri ki Kuwe.. Mam suma mbut abozina a i nadesâ adesâ, a guzuzï nadesâ adesâ ki gus sa a ngata mi. 17Suma mbut abozi ndazina a guzï pus ma dur ayîna ki bege d’a hapa kikisa karagaya, akulum ma tuna a guzumî ki bege d’a hapa kis kam dok vahl. Sum ndazina a hulong a gus suma dingâ woi abo amulei suma Het-na kamulei suma Siri-na mi.
Currently Selected:
2 Sunda Hamuleinid’a 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.