Yoohanee 6
6
Yisufa faifa tauseenna fasiqa narana nimu ufafa.
(Mat 14:13-21; Mak 6:30-44; Ruk 9:10-17)
1Yisufa Yuda maqannaa rakisirausa mi ufana qimannimiseenoo miqooqari Kariree firaa farumma dinni afainni finau. Mi farummana auqu moo marinau, Tibeeriasa farummee qiqau. 2Faiqí anaasee Yisufa amiqi amiqiunara aurimarusa findifunara iriseeqa moomoosa uqanna afaqee fiqau. 3Yisufa nammari afainni kaqikaa amuaqunamusaa narí faiqi namu faqa ooruree ooqumarinau.
(Ooqai Isaraee maqannaa nikeeku nikaaku Isipa maqannaa karafusaki marufanoo Mooseefa qufaqa sipsipa aanaaqiuqa arusee mina fidikauqa tatiiseeqa nári kooqimau raaraamasoofanoo Anutuna qangiroo fannoo narirara anireenoo fidika qafamasee ainaaqareenno Isipa maqannaasa kai ooqa faiqiuqa narinau. Miqooqari Isaraee maqannaasa oosana arasee Anutuna qangiroo ainaaqaroo qoomaqana sakasaida neemariqau.)
4Mi ainaaqarara qoomaqana Yeerusaree maqusai qusasaa kambiqararee qimarufanoo mi fasannai Yisufa Kariree nammari afainni marinau. 5-6Yisufa nindafoofaqa faiqí anaasee moomoo narí marunnai amuaqunamusaa urimarufanoo nindafeenoo Firipina irammirinoo qinau. Yisufa faasai Firipifa ianinnanara iriseenoo Firipina kaqi amanamasee qafarara maaqi qimasee iranau. Firipi faiqí anaasee moomoo nianaindari uri mariafaqa yai fee misa narana feefauru mandee nimianauree.
7Firipifa mi ufana iriseenoo maaqi qimasee qimaminoo qinau. Faiqí anaasee muduka moomoo mariafaqa moomoo ooni maramaree oonu feemu moomoo feefauru mamaree minisaifanoo sia misa nimana mariannoo. Moodaa moodaakai namasee naarara fifaranoo.
8Yisuna faiqi namukiqari moo mina auqu Andurufa, Simoona moo auqu Peetooroona akaqa marufa mifa mina iriseenoo qinau. 9Kumaaraa moo kaqikaafa mai maridanoo narí sakuma feemu moodaanai qisauku faqa noodaanna qaaraqanda faqa uaqee idanoo. Amanee mina mareennaree. Oodaa sia amanaikiannoo.
10Yisufa mina iriseenoo qinau. Innee faiqí anaasee qimannimifaqa qusau rasooqnookamasee ooqumariaqa. Qusau moomoo misaqa marinau. Faiqí anaasee mina iriseeqa aiqama ooqumariqau. Faifa tauseenna fasiqa mariqau. Ooni saqarimma auqiqa mariqau. 11Ooqu marifufanoo Yisufa mi kumaaraana sakuma feemu qumareenoo Anutunara dufi dufi qimaseenoo doo ruqi ruqimmeeqeenoo faiqí anaasee niminau. Noodaanna qaara faqa miqikaimasee niminau. Nimisoofaqa namasoofanoo aiqama nimuaqu inau. 12Aiqama nimuaqumasoofanoo Yisufa narí faiqi namu qimanniminoo qinau. Ataraasa mareeqee uqa ruaqa sia kaqikaana rairaaiani. 13Misa irisee eedoo qimasee ataraasa rumasee asaana rumasee qisaukuqara taikasee qikunni ooqu qaaraqanda marasee uqa qumbiqanoo marinau. Mi ataraasana moodaanai qisauku sakuma feemusaaqaraana uqariqau.
14Mi fasiqa anaaseesa mina qafoofanoo sia faiqí undeeufanoo naaquqanau. Naaquqamasoofaqa qiqau ooqai tamummaqara fasiqauqa moo tamummaqara fasiqa kambiqaaninnanara akara rumaqoofa doo maana narimma animaridanoo. 15Yisufa misa irirana iriseenoo misa afeekaikamasee qini qumareeqee maa maqana saaqaaraa karaambaiqaika maqimaqee foora qimasee quqaseenoo doo naríara quqasee aaqanai ooruree miqoo marinau.
Yisufa nammari amuaqumaufu ufafa.
(Mat 14:22-23; Mak 6:45-52)
16-17Yisufa aaqanai fufaqa mi eendanaki sia kafaa qumunara mina faiqi namu Kariree nammari afainni ooqureeqa sipaki akaramafiqa nammari dinni afainai Kapeeranaumma maqusai nammari amuaqumau fitaqararee qiqau. 18-19Misa kanuqaki fidaqa aikannai nammari ruakairisaidaqa fimarufaqa qaara maqusa fiaaqarana amanasaa kaiqaaqoo kisaaqasaa oonuroofanoo ufai firaafa uqinoo nammari faqa misa kanuqa faqa amakaurinau. Amakaurufaqa qafoofanoo Yisufa naríara misunnai kanuqaaqa animarinau nammari amuaqumau aiku ramasaida aninau. Misa mina qafamasee tautumasee kaaqa naaquqoofaqa rufiaqau. 20Rufioofanoo Yisufa nindafeenoo qinau. Sia rufiaqa, qinee maridaqa. 21Misa Yisuna mareeqee sipaki quqasee firaree qu maqusanai aaqee kai dauni oonuraqau.
Faiqí anaasee Yisunara randoo ufafa.
22Yisufa nimu feemuna noosa nimuqoo kai faiqaqau. Kananaana iqaqoofaqa findifi sipara randoosia moodaakai miqoo maruna. 23-24Yisuna faiqinamu moo kanuqaki fufaqa Yisunara sia misa faqa fiifoo qimasee Tibeeriasa maqusai maqee maqee nimaru kanuqausa aniroofaqa doo minauqaki akaramafufaqa Kapeeranaumma maqusai Yisunara randarara minauqaki fiqau.
Yisufa nariara naaru naaru naranara maqi mariranara qimaqoo ufafa.
25Misa Kariree nammari fitaqee muqu afainai oonureeqa Yisuna paqurimasee maaqi qiqau. Oo ufasaa rakisirafa anee yairee fee mai anireenee.
26Yisufa iriseenoo quandaki qimanniminoo qinau. Qinee kuqaa anoona ufa inni qimannimidaqa. Qinee qeeqa afeeka uqannifiqaunnanara innee sia minara kai irisee qiniara randaidaqa. Innee feemu namasaafanoo nimuaquinoo maqee qumiqaraaninna ainainara innee minara kai qiniara randee mariafanoo. Yisufa kaifaa quandafufanoo qimanniminoo qinau. 27Innee sia dauni putaa ira naranara ainainiaqa. Naaru marirana nimira naranara minara ainainiaqa. Qinee maa naranna qinee faiqí nimaaku inni nimianaura. Qini qikoofa Anutufa qiniara aidimarifanoo narí aiqama ainaina qini daaku qimaqasaina inni amana mi naaru marira naranna nimianaura.
28Misa minara iriseeqa Yisuna irammiriqa qiqau. Nanee qimasee Anutuna ainainianauree.
29Yisufa iriseenoo maaqi qimasee qimanniminau. Innee maaqimasee Anutuna ainainamaisaaqa. Narí aqiqainna fasiqana mina saqarikiqa minasaa naundura rusiaqa. Anutuna ainainirafa miqimminoo maridanoo.
30Misa mi ufana iriseeqa kaifaa irammiriqa qiqau. Anee nana moo ainaina firaa ainaina auqainaqa maasa qafamasee aniara kuqaa Anutuna asauku mundira fee qianauree anee nana ainainee auqinnaree. 31Maasa qisaifaqausa aadana maqa maaqaki pupusamuara foora aqufuna narana neemariqau. Mooseena akara minara maaqi qinau. Innaarunaidaraa feemu narana mifa niminau maqi qinau. 32Miqi qimasoofanoo Yisufa kafaa qimanniminoo qinau. Mooseefa maru aukuanna pupusamuara maqi ira narana sia mifau nimimarinau. Anutufa innaarunaindari nimimarinau. Sia anoona narana nimimarinau. Doo maa aukuanna qinee qumu marunnaqoo qinisaaqari anoona naranara foora inni nimidanoo. 33Anutufa nimunnaranna innaarunaindari qumu maridanoo maa maqanasaa mariasa naaruara marirana nimidanoo.
34Mi fasiqa anaaseesa iriseeqa qiqau mi feemuna naaru naaru maasa qiminaqa naa.
35Yisufa kaifaa qimanniminau. Qinee kaqi marira nimira narana marunausa maridaqa. Faiqí moo fannoo qinee marunannai anireenoo qini saqarikinafa mifa sia kafaa naranara foora aararaannoo sia kafaa nammariara foora aidiannoo. 36Faasai inni qimannimundee kai innee imariafanoo innee qini qiqafaidaqa sia anoonee qimasee qinisaa naundura rusimariafanoo. 37Qini qikoofa eedoo qira irirana niminausa misa qinee unnannai nári naundura ubeekama qimaqeefaranoo. Miqi mariasa qinee ianannai animariasa sia niqiqaanaqa fifaranoo. 38Qinee qeeqa qikoona iriranamau innaarunaindari sia qinee qeeqa qumiqa, qipaqeena ufara mina ainainirara qumiqa minara qinee sia moona aqiqaananoo fuannoo. 39Mina ainaina auqarafa maaqinoo marina qini qiminau. Aiqama qini qikoofa qini qutaaqama qimaqaqaisa kai sia moo fannoo kaqinni fuannoo. Aiqama uqanna taikara faasaana qinee misa uqeereeqee qeeqa naaru mariranaki quqaanaura. 40Qini qikoofa maanara ridanoo. Mina amaaku qiqafee mariasa minasaa irirana rusimariasa mi kamuqoo kai naaru marirana mareefaranoo. Taikara faasaana qinee misa uqeereeqee naaru mariranaki quqannisaanaura.
41Yuda maqannaasa uriqararausa mi fasiqa anaaseesaki mariasa misa Yisuna ufa irisee mifa nariara innaarunaindari qumuafanausa maridee qidanoo. Miqi qimasee dapi dapi ufa qimariqau. 42Misa maaqi qiqau maafa Yisufa Yooseefaana amaaku maridanoo. Mina anausa akausara maasa iridaqa. Naqi fee qidanoo fee nariara innaarunaindaraasee qidanoo fee. Akooqooqaraafa maridanoo.
43Yisufa iriseenoo qinau sia innee narinni narinni qiniara manda ufa qiaqa. 44Sia faiqí moo fannoo kaqi qinee ianannai anifaranoo. Qini qikoofa rarisameeqee quqainna fasiqa aanaaseesa misa kai qini naundura ubeekama qimaqeefaranoo. Misa miqifaqa taikara faasaana misa uqeereeqee naaru mariranaki quqannisaanaura. 45Ooqai tamummaqara fasiqa maaqi qimasee akara riqau. Anutufa aiqamausa naamuaqira ufa qimannimiannoo. Qinee mi ufana iridaqa maaqi qimasee inni qimannimidaqa. Aiqamausa qini qikoona ufa iriseeqa mina aamua qira ufa irimariasa qinee ianannai anidaqa. 46Sia moo fannoo qini qikoona qafeenoo. Anutufinaindari qumufa kai mifa kai qini qikoona qafeenoo.
47Qinee anoona ufa uqanna qimannimidaqa faiqí moo fannoo irirana qinisaa rusimarinafa naaru marirana doo mareenoo. 48Qinee kaqi marira feemuara foora marunausa maridaqa. 49Ooqai inni nikeeku nikaaku Mooseena faqa kaasau maqa maaqakina nimaru aukuanna innaarunaindaraa feemu minauqa manna fee qimariqau. Mi feemufa ufaasu marifandinna feemuna namasaida kisaaqasaa moomoo aukuana mariufaqa kaqi kuqimariqau. 50Maa qinee kaqi marira feemuara foora maridee qimarunausa faiqí namasee sia kuqifandinna feemusa maridaqa. 51Qinee kaqi marira feemu innaarunaindari qumu marunausa maridaqa. Faiqí anaasee moo fannoo qinee amianna feemuna namasainafa naaru naaru mariannoo. Qinee nimianna feemufa qini qimaqi maridanoo. Maa maqa maaqana afaaqasasa mariasa kaqi mariaqeera nimidaqa.
52Yisufa miqi qimasoofaqa Yuda maqannaasa narí afumau narí afumau aanoo qidaqa qiqau. Naqimasee maa fasiqafa narí amaqi maasa qiminaqa naanauree qidaqinoo fee.
53Yisufa iriseenoo qimanniminoo qinau. Qinee kuqaa anoona ufa qimannimidaqa. Innee qini faiqí nimaaku qimaqi fidika sia naifanoo sia kaqi marirafa inniki mariannoo. 54Moo fasiqa anaasee fannoo qini qimaqi faqa qini fidika faqa namasainafa naaru marirana doo mareenoo, marainara taikara faasaana mina uqeeraanaura. 55Qini qimaqi narana uqanna maridanoo qini fidika nammari uqanna maridanoo. 56Faiqí anaasee moo fannoo qini qimaqi fidika neemarifa qiniki maridanoo qinee minaki faqa maridaqa. 57Qini qikoofa Anutufa kaqi marira oosana faqaafa qini diqiqoofaqa maaqoo maridaqa minasaaqaraa marirana maraidaqa. Miqi kai inoo qini namasainafa qinisaaqaraa marirana maraannoo. 58Doo qinee innaarunaindaraa naranara foora maridaqa. Sia inni nisaifaqausa neemaru naranausara foora maridaqa. Misa mina namasee mariiqa aiqama faiqí faiqi oosanamau fiqa kuqimariqau. Maa naranna namaseeqa naaru naaru kaqi marifaranoo.
59Yisufa mi ufana Kapeeranaumma maqusai ufa suqira maqaki qimanniminau.
Naaru naaru mariranaki fifandinna ufausa akiaqa.
60Yisuna faiqi namu akaqausa mi ufana iriseeqa qiqau. Oo yafee maa ufana amana iriannoo fee. Irisee sia auqaaqaa ira ufa maridanoo.
61Misa miqi qimasee noori runusee randoofanoo Yisufa narí kai iriseenoo qimanniminoo qinau. Innee qini amiqira afeeka ufara rufiasee qini minnisararee qidee. 62Qinee kafaa uqeeree qumuafannannai ooru fuanaqa innee mina qafamasee naqi fee ifaree. Mikari qini ufara kuqaa anoonee qimasee firaaqoo rufieefaranoo. 63Amaqiara qunnana amaqi fifau ainaina maridanoo sia mina naaqee qiqa maraquna fannoo kai anoona maridanoo mifa kaqi marirana nimidanoo. Qinee qeeqa dookinaa ufa qimannimimarunafa mifa maraquna maridanoo kaqi marirana anoona maridanoo. 64Doo qinee akooqoo kooroomasee qimannimunaqa innee akaqausa siamma irimariafanoo. Yisufa narí faiqi namu oosana faasai irinau. Misaki akaqausa mina ufa sia irusa faasai Yisufa nindafanau. Misaki moodaa fannoo ueeqaaninnana faasai qafanau. 65Yisufa minara maa ufana atiki kafaa qimanniminau. Qinee minara faasai qunnana sia amana moo fannoo narí kai qinee ianannai aniannoo. Qini qikoofa dadaaqinanoo kai qinee ianannai aniannoo.
66Miqi qimasoofaqa Yisuna faiqi namu moomoo Yisuna minnisee sia kafaa mina faqa firara qiqau. 67Yisufa miquna nindafamasee quandafi narí faiqi namu (12) qisaukuqara taikasee qikunnoo ooqu qaara marasee faiqi namu maaqi qimasee qimanniminoo qinau. Innee faqa misa naanna reefaree qini minniqiseeqa fifaree.
68Simoona moo auqu Peetooroofa mina iriseenoo Yisuna qimaminoo qinau. Oo karaambaiqa ani minnisee yanasaa fee atooqaanauree. Naaru marirana nimira ufa anee kai marananuananoo. 69Doo maqee maasa aniara kuqaa anoonee qidaqa aniara Anutufinaindari naaquqarafa mariifoo qidaqa.
70Yisufa iriseenoo kafaa qimanniminoo qinau qinee qeeqa kai qisaukuqara taikasee qikuqara marasee fasiqa naarauna qini faqa nimariafanoo. Moo fannoo inniki afaanna maridanoo. 71Yisufa afaannee quna Yudasinara narí qumee qimirinau. Yudasifa Keerioota maqusanaafa moo fasiqa Simoona amaaku marinau. Yudasifa Yisuna (12) qisaukuqara taikasee qikunni ooqu qaara marasee faiqinamu misaki marufa marinau. Kasooqaqee mi fasiqafa Yisuna uqeeqasainaqa aunirira saqarisaa arifandinnanara Yisufa minara oonu mafi iriseenoo afaanna fee qinau.
Currently Selected:
Yoohanee 6: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.