Luk 1
1
Wɔlɩa 'la gbʋa Luku zie 'lɛ na
1'Klʋnyɔ Teofili, ncaabhutukpa ya nʋnʋgbɩa ‑ɩ 'plɩ 'lɛ ‑anyɩ sidiin, ɩla saa ɩ 'plɩplɩlɩ 'lɛ na, zielɩɛ bhɔ. 2Ma ya wɔlɩa zie, saa maa ‑ɔla 'ci 'lɩ 'lɛ bhɔdaa tooto 'nyɩ ‑ɔ 'plɩ 'lɛ Dɩnanɩa* 'la ‑sanya na, ma ‑salɩɩ 'lɛ ‑anyɩ 'dɩ 'kʋ na. 3Ɩmɩ 'wluku na, ‑amʋ ‑ma, n ya ɩmɩa ‑ɩ 'plɩ 'lɛ bhɔdaa tooto na, 'nanɩ neencla 'nyɩ n ya ncɩ 'claa le n 'ka ‑naa gbʋ, saa ɩ 'plɩplɩlɩ 'lɛ na, ‑gbalɩɛɛn ‑gbalɩɛɛn zie, 'klʋnyɔ Teofili, 4ɩya ‑n ka cibhlili le ɩmɩa ma cɔɔ 'lɛ na, ɩ ‑glɩ ‑nʋawlɛ.
Zakalii ɩya Elizabɛtɩ
5'Bhlɛsʋan nɩkplaan Ewlɔdʋ ‑glɩa 'lɛ Zudeebhlɩa 'kʋ 'la nyɩbhɛlʋ na, ‑teyiyinyɔ bhlo, ma laa 'mɔɔ Zakalii, ɔ ‑kʋa ‑teyiyinyɔ Abia 'la ‑kandea nɩkplaan. Ma laa ɔ nʋŋlɔ Elizabɛtɩ, ɔ glɩa ‑teyiyinyɔ ‑kpasa Awlɔɔn 'la valɩnɩkplaa nɩkplaan 'la 'ŋlɔ. 6Zakalii ɩya ɔ nʋŋlɔ ‑glɩa 'kʋnylugolunya Laagɔ 'ci 'kʋ 'nyɩ ma 'plɩlɩa Laagɔ 'la ‑jlɩmaa ɩya ɔla niwɔlɩa ‑tɛtɛa ylɛɛylɛɛ 'kʋ. 7‑Ma ma 'taa 'cilee ‑ka, sa Elizabɛtɩ valɩ 'taa 'nyɩ maa ‑mɔsɔa ‑plaa kplɩɩ.
'Blaandlee ya Zakalii 'dɩ ‑la
8Clɩɩ bhlo, Zakalii ‑kʋa Laagɔpaakadiea* ‑zɔn, 'nyɩ ɔ nʋa ɔla ‑teyiyilobholia, sa ɩ ‑glɩa ɔla ‑kandea 'la clɩɩ na. 9Saa ‑teyiyinyaa nʋ ‑azla 'lɛ na, ‑nigbea ma paa 'lɛ le ma 'kaa nclɔɔa ‑ɔ cɩ ka 'lɛ bhibhiepalʋa* ‑zɔn ble ɩya ‑ɔ ka donyia ‑sie na cibhlili na, ya 'dɛ 'la clɩɩa 'kʋ, Zakalili 'kʋ bhlili. 10Daa ɔ ‑kʋ 'lɛ donyia ‑sieda na, ncɛlɩa 'fɩan ‑kʋa ‑jlukuun 'nyɩ ma bhibhiea. 11Na, ‑Kwlenyɔ 'la 'bhlaandlee* bhlo ɔ ya Zakalii 'ciinfutolu, ɔ 'nylugoa ‑gbatɩa 'kʋa ɔ sielia 'lɛ donyia na, ɩla 'lipasɔa 'kʋ.
12Daa Zakalii 'lɩɔ 'lɛ na, 'wugo yɔɔ 'wlu 'wlʋ 'nyɩ ŋanɔ yɔɔ pla. 13‑Ma 'bhlaandleea yɔɔ 'cla lebhe: «Zakalii, ŋanɔ 'la 'bhlɔɔ sa Laagɔ ɔ ya ‑naa bhibhiea 'nu. ‑N nʋŋlɔ Elizabɛtɩ cɩ 'kɔɔ 'ciŋodico valɩ ɩya ‑n kɔɔ Zaan la. 14Ɩ cɩ 'kɔɔ pɔlɛkʋmɛnɔ ɩya ‑jaka nʋ, ɩya ɔla valɩlɩɛa 'wluku, ncaabhutukpa 'ka ‑pɔpʋɛ nʋ. 15Sa ɔ cɩ 'ka ‑laagɔlobholinʋnyɔ 'kadie 'plɩ. 'Ɔ cɩ 'ta ‑diinvɛɛn 'mla naa ɔ cɩ 'ta nʋtɛtʋ bhlogbɩɩ 'mla. Ɔ cɩ 'ka ɔ 'nɔ nɩkplaan kʋ ɩya ‑Kpɔkplɔ ‑Wugoa ʋ 'kɔɔ 'lɛ yeli. 16Ɔ cɩ 'ka gba Izlayɛlɩnya* ‑bhutukpa 'ka kwlacala ɩya ma 'ka ‑Kwlenyɔ, mala Laagɔ 'klʋtla. 17Ɔ cɩ 'ka Laagɔ 'kʋklʋʋnpʋ, ɔ 'ka 'wugoa ɩya 'tɛtɩa ‑ɩ ‑kʋa 'lɛ Laagɔnekʋnyɩtɛnyɔ* Elii 'kʋ na kalɩ. Ɔ cɩ 'ka tocɩa ɩya mala 'cuoa cɩzʋlʋ ɩya ɔ 'ka maa ‑ɔla 'nyi yi 'ta 'lɛ Laagɔ na kwlacala ɩya ma 'kanɩ 'kʋnylugolunya 'bhisa 'kʋ gugu ɩya ɔ 'ka 'lɔlʋa ‑ʋ ‑bhɔsʋa 'lɛ ‑Kwlenyɔ 'la gbʋ na kpo 'kʋ zʋ.»
18Daa 'bhlaandleea ‑bhle 'lɛ na, Zakalii yɔɔ neencla lebhe: «'Nsasa n cɩ 'kaa 'lɛ sɛɛ cibhlili bha? Sa n ‑glɩnɩ ‑glɛɛglɛnyɔ 'nyɩ n nʋŋlɔ ‑ma ɔ ya kplɩɩ pla.» 19'Bhlaandleea yɔɔ 'cla lebhe: «‑Amʋ ‑glɩ 'lɛ Gabliyɛlɩ, ‑ɔ 'nylugo 'lɛ Laagɔ ‑deliin le ‑ɔ kɔɔ lobho na. Ka ɔ lobhuun 'lɛ le n soluo ɩya n ‑lɔɔ dɩnanɩ ‑naa. 20Sa ‑n 'ta 'lɛ 'na niwɔlɩa ‑nʋawlɛ la na, 'lɩka, ‑n ‑cɩ ka ‑amunaan kʋ, ‑n cɩ 'tanɩ nyɩtɛlɩɛ mino ‑aan ɩya clɩɩa 'kʋa ɩmɩ ‑naa ɩ cɩ 'ka 'lɛ 'kʋglalɩ na, ɩ 'ka ŋeni, ‑ofi lebhe daa ɩla clɩɩa 'cɩ 'ka 'lɛ ŋeni na, ɩ cɩ 'ka 'kʋglalɩ.»
21Ncɛlɩa 'fɩan ‑bɛa Zakalii ‑ma saa ɔ gwlɛlɩa 'lɛ laagɔbhibhiepalʋa ‑zɔn na, ɩ slaa maa nikpoo. 22Daa ɔ 'wlʋ 'lɛ ‑zɔn na, 'ɔ mino 'taa ɔ 'kaa nyɩtɛ ɩya ɔ 'kaa maa solu. Na, ma ya sɛɛ cibhlili le ɔ ya bhibhiepalʋa ‑zɔn wɔlɩ 'ciinlɩ. Ɔ solulua maa sɩɩn 'nyɩ ɔ ‑kʋ kaa ‑amunaan. 23Daa ɔla lobhoclɩɩa ɩ bhɩa 'lɛ na, ɔ ya ɔ 'bhisleen cɔlɔ. 24Ɩ 'la leean ɔ nʋŋlɔ Elizabɛtɩ ɔ ya nɩkpla 'ma. Ɔ 'ta ‑zɔnwlʋ ‑aan 'cɩ ‑ngbi. Ɔ claa ɔcɩ lebhe: 25«Ɩmɩa ‑ɩ ‑glɩa 'lɛ 'na ‑zo ncɛlɩ 'ci 'kʋ na, daa ‑Kwlenyɔa wabha 'lɛ le ɔ cɩɩn mɩ 'kʋ sa na, 'lɩka wɔlɩa ɔ nʋʋn 'lɛ cɩ na.»
'Blaandlee ya Malii 'dɩ ‑la
26Elizabɛtɩ 'la nɩkplaa 'la ‑ngbʋflʋ cʋa nɩkplaan, Laagɔ ya 'bhlaandleea* ma la 'lɛ Gabliyɛlɩ na, Galileebhlɩa 'kʋ 'la 'dua ma la 'lɛ Nazalɛtɩ na 'kʋ lobhu, 27ŋlʋgbɩɔa bhlo 'bhlɩ, ‑ɔ 'ta 'lɛ ŋodi ‑ci na. Ŋlʋgbɩɔde ‑naa ‑glɩa Daviti 'la 'lɔlʋa nɩkplaan nclɔɔa ma 'la 'lɛ Zozɛfʋ na, ɔla ‑zlazlaŋlɔ, ma laa 'mɔɔ Malii. 28'Bhlaandleea ya ɔ 'bhisleen ble 'nyɩ ɔ yɔɔ 'cla lebhe: «‑Ayoka Malii, Laagɔ la ‑wawaŋlɔ, ‑Kwlenyɔa ‑kʋɔ cɩ.»
29Daa Malii 'nu 'lɛ wɔlɩ ‑naa na, 'wugo yɔɔ 'wlu 'wlʋ 'nyɩ ɔ claa ɔcɩ ‑ayopalɩɛ ‑naa ɩla ‑zɔnsalɩɛa neen. 30Na, 'bhlaandleea yɔɔ 'cla lebhe: «Malii, ŋanɔ 'la 'bhlɔɔ, sa Laagɔ yɔɔ ɔla ‑walʋa pala. 31'Lɩka, ‑n ‑cɩ ka nɩkpla 'ma, ‑n ka 'ciŋodico valɩ ɩya ‑n kɔɔ Zozii la. 32Ɔla 'ŋlɩa cɩ 'ka daa ‑tɛtɛa dlolu ɩya ma 'kɔɔ 'Kʋzilo Laagɔ 'la 'Cʋ la. ‑Ala ‑Kwlenyɔ Laagɔ cɩ 'kɔɔ ɔ to Daviti 'la ‑kwlekpoa 'kʋ zʋ. 33Ɔ cɩ 'ka Izlayɛlɩnyaa* 'la nyɩbhɛlʋ 'plɩ 'lʋkʋlʋkʋ ɩya 'lʋkʋlʋkʋ, ɩya ɔla ‑kwleliea 'la ka bhɩada kalɩ.» 34Malii ya 'bhlaandleea 'cla lebhe: «'Nsasa ɩ cɩ 'kaa 'lɛ 'plɩplɩlɩ bha? Sa n 'ta ŋodi ‑ci na.» 35'Bhlaandleea yɔɔ 'cla lebhe: «‑Kplɔkplɔ ‑Wugoa* cɩ 'kɔɔ 'kʋ kwlili ɩya 'Kʋzilo Laagɔ 'la 'tɛtɩa 'kɔɔ 'kʋwɔlɩ. Ɩla gbʋ, dɛ 'cileea ‑n ‑cɩ ka 'lɛ valɩ na, ɔ cɩ 'ka 'lɛ ‑kplɔkplɔnyɔ 'plɩ ɩya ma 'kɔɔ 'lɛ Laagɔ 'la 'Cʋ la. 36'Lɩka, ‑naa 'lɔlʋŋlɔ Elizabɛtɩ, ɔmɔ ‑ma ɔla ‑glɛɛglʋʋa nɩkplaan, ɔ ‑ka 'ciŋodico 'la nɩkpla 'nyɩ ɔ ‑kʋnɩ ɔla ‑ngbʋflʋ cʋ nɩkplaan, ɔmɔa ma laa 'lɛ 'fifiŋlɔ na, 37sa wɔlɩ bhlogbɩɩ 'ta Laagɔ 'la da 'tɛ.» 38Malii ya 'cla lebhe: «‑Kwlenyɔa 'la lobhoŋlɔ n ‑glɩ 'lɛ. Na, saa ‑n 'bhli 'lɛ 'kʋ na, 'naa ɩ ‑tɛtɛa 'plɩ sɛɛ 'na gbazɔ.» 'Nyɩ 'bhlaandleea yɔɔ cɩɩnwlʋlʋ.
Malii ya Elizabɛtɩ kopekan mʋ
39Na, 'dɛ 'la clɩɩa nɩkplaan, Malii ya ‑gugwie 'ma 'faanfan 'nyɩ ɔ ya 'kikia nɩkplaan, Zudeebhlɩa 'kʋ 'la du bhlo 'kʋ mʋ. 40Ɔ ya Zakalii 'bhisleen ble 'nyɩ ɔ ya Elizabɛtɩ ‑ayo 'pa. 41Daa Elizabɛtɩ 'nu 'lɛ Malii 'la ‑ayopalɩɛa na, ɔla nɩkplaa ya 'pa. ‑Kplɔkplɔ ‑Wugoa* yɔɔ yeli 'nyɩ 42ɔ ya nikadieen nyɩtɛlɩ, ɔ ya 'cla lebhe: «‑N ‑palɩɔ 'nyu 'ŋwlɛa 'fɩan sidiin 'nyɩ 'cileea ‑ɔ ‑kʋɔ 'lɛ nɩkplaan na, ɔmɔ ‑ma ɔ ‑palɩɔ 'nyu! 43'Lɩsaa n ‑glɩa 'lɛ ɩya 'na ‑Kwlenyɔa ɔ 'nɔ, ɔ 'kaan 'lɛ 'bhlɩ ci bha? 44Sa daa n 'nu 'lɛ ‑naa ‑ayopalɩɛa na, 'cileea ‑ɔ ‑kʋʋn 'lɛ nɩkplaan na, ɔ ya 'dɩdɔ pɔlɛkʋmɛnɔmɛnɔsa. 45Ɔ ‑kʋ 'nanɩ, ɔmɔa ‑ɔ ‑ka 'lɛ pɔɔtɛtɛ le ɩmɩa ‑Kwlenyɔa soluo 'lɛ na, ɩ cɩ 'ka 'kʋglalɩ na.»
Malii 'la lʋʋa
46Na, Malii ya 'cla lebhe:
«'Na 'wugoa wo ‑Kwlenyɔ ‑evli.
47'Nyɩ 'na pɔlɛa ‑kʋ pɔlɛkʋmɛnɔɔn,
Laagɔ, 'na gbʋʋsanyɔa 'la gbʋ.
48Ɔ ya ɔla ŋaazɩlobhoŋlɔa, 'ci 'kʋ 'pa.
‑Ghɛɛ, ‑zɔkpʋa ‑tɛtɛa ‑ɩ cɩ ka 'lɛ 'jeen 'plɩplɩlɩ na,
ɩ cɩ 'kaan 'nanɩkʋŋlɔ la.
49Laagɔa, 'tɛtɩa 'fɩan toa,
ɔ yaan ‑jakajakagbɩ cɩ nʋ.
Ɔla 'ŋlɩa ‑kplɔ
50'nyɩ ɔla ŋaazɩɩlɩlɩɛa ‑kʋ clɩɩa 'fɩan
maa ‑ɔ zʋɔ 'lɛ na 'kʋ.
51Ɔ ya ɔla 'tɛtɩkalɩsɔa 'ma
'nyɩ ɔ ya maa ‑ɔ ‑ka 'lɛ ‑tutulepɔlɛ na dlolu.
52Nyɩbhɛlɩa, ɔ ya maa mala ‑kwlekpua 'kʋ ‑sa
'nyɩ maa ‑ɔ la 'lɛ maa ‑ɔ la 'lɛ macɩ ‑dʋdʋ 'kʋ na, ɔ ya 'lɛ maa 'kʋbho.
53Maa ŋɔmʋ bhla 'lɛ na,
ɔ ya maa 'nanɩ ‑bhutukpa yeli,
'nyɩ maa ‑ɔ ‑lio 'lɛ 'bhɛlɩ na, ɔ ya 'lɛ maya wlɩɩ ‑kɔfɩa 'tli.
54Ɔ ya Izlayɛlɩ*, ɔla lobhocoa 'kʋ ci,
‑ghɛɛ ɔ ya ɔla ŋaazɩɩnlɩlɩɛa ɔ talɩa 'lɛ ‑ndanyɩ 'kʋ na luoli.
55Saa ɔ 'cla 'lɛ ‑a tokadɔcɩa lebhe,
ɔ cɩa Ablaamʋ ɩya ɔla valɩnɩkplaa
ŋaazɩɩn 'lɩ 'lʋkʋlʋkʋ ɩya 'lʋkʋlʋkʋ na.»
56Malii ‑kʋa Elizabɛtɩ cɩ ‑aan 'cɩ ‑mɔta 'bhisa, 'nyɩ ɔ ya 'lɛ ɔ 'bhlɩ cɔlɔ.
Ma ya 'Nyuwluzʋnyɔ valɩ
57Daa ɩmɩ ‑naa 'fɩan 'plɩ 'lɛ na, Elizabɛtɩ 'la valɩda ya ŋeni 'nyɩ ɔ ya 'ciŋodico valɩ. 58Ɔla cɩkʋnyaa ɩya ɔla 'lɔlʋnyaa ya 'nu le ‑Kwlenyɔa yaa 'mɔɔ ɔla ŋaazɩɩnlɩlɩɛ pala 'nyɩ ma ‑yɔɔsɔ ya ‑pɔpʋɛ nʋ. 59Daa ‑ngbaata clɩɩa ŋeni 'lɛ na, ma ya 'cileea ‑slekʋdɩkan ci 'nyɩ ma ya wabha le ma 'kaa 'mɔɔ Zakalii la, ɔ to 'bhisa. 60‑Ma ɔ 'nɔ ya nesa 'nyɩ ɔ ya 'cla lebhe: «‑Wɔɔ, Zaan ma cɩ 'kɔɔ 'lɛ la.» 61Ma yɔɔ 'cla lebhe: «Ka ‑naa 'lɔlʋa nɩkplaan 'la nclɔɔ ‑lio 'lɛ ŋlɩ ‑naa bha?» 62Na, ma ya toa sɩɩn neenclalɩɩ le ma 'kaa saa ɔ ‑waa 'lɛ le ma lalalɩa 'cileea na cibhlili. 63Ɔ ya 'kpakpʋ 'clalɩ 'nyɩ ɔ yʋʋ 'kʋ zie lebhe: «Ɔla ŋlɩɩ ‑glɩ 'lɛ Zaan.» 'Nyɩ nikpoo ya maa 'fɩan sla. 64Dɩpɩa bhlogbɩɩ ɔla nea ya 'gbo kalɩ, ɔla mɩɔ ya ‑blulu, ɔ nyɩtɛanɩa 'nyɩ ɔ woa Laagɔ ‑evli. 65Na, ŋanɔ ya ɔla cɩkʋnyaa 'fɩan pla. 'Nyɩ 'kikia nɩkplaan Zudee bhlɩa 'fɩan 'kʋ, ma salɩa ɩmɩa ‑ɩ 'plɩa 'lɛ na 'dɩ 'kʋ. 66Maa 'fɩan ‑ɔ 'nua 'lɛ wɔlɩ ‑naa na, ma yɩɩ mala pɔlɩa nɩkplaan zʋ. 'Nyɩ ma claa macɩ neen lebhe: «'Lɩsaa 'cilee ‑naa, ɔ cɩ 'kakɩnɩ 'lɛ 'plɩ bha?» 'Nyɩ ‑zaagbʋsa ‑Kwlenyɔa 'la sɔa ‑kʋa 'mɔɔ 'kʋ.
Zakalii wo Laagɔ ‑evli
67Na, ‑Kplɔkplɔ ‑Wugoa* ya Zakalii, 'cileea toa yeli 'nyɩ ɔ nyɩtɛa Laagɔ ne 'kʋ ɔ claa lebhe:
68«'Nyupalɩɛ ŋeni ‑Kwlenyɔ, Izlayɛlɩ* 'la Laagɔa
‑ofile ɔ ya ɔla 'lɔlʋa klalɩ 'nyɩ ɔ yʋʋ geyliin ‑sa.
69Ɔ ya ‑anyɩ gbʋʋnsanyɔ 'kadie 'nyɩ,
nyɩbhɛlʋ Daviti, ɔla lobhocoa 'la 'lɔlʋa nɩkplaan.
70Ɩmɩ ɔ nyɩtɛlɩwaa 'lɛ tooto ɔla ‑kplɔkplɔ nekʋnyɩtɛnyaa neen lebhe:
71Ɔ cɩ 'kaa ‑anyɩ ‑ala ‑zɔbhɛlɩgbanyaa
ɩya maa ‑ɔ ‑zɔ 'lɛ anyɩ na wlɩɩn ‑sa.
72Ɔ ya ɔla ŋaazɩɩnlɩlɩɛa ‑a tokadɔcɩ pala
'nyɩ ɔ ya 'lɛ ɔla ‑kplɔkplɔmɛnʋa luoli,
73‑ɔ ‑glɩ 'lɛ ‑ndanyɩa ɔ tawaa 'lɛ ‑a tokadɔkadɔ Ablaamʋ
74le ɔ cɩa ‑anyɩ ‑zɔbhɛlɩgbanya wlɩɩn ‑sa
'nyɩ ‑a cɩɔ pɔlɛ bhloon lobholu,
75'ɔ 'ci 'kʋ, ‑kplɔlɩɛɛn ɩya ɔla 'kʋnylugolulɩɛɛn,
clɩɩa ‑a cɩ ka 'lɛ dʋdʋa 'kʋ li na.
76'Nyɩ ‑mɔ 'na 'cilee, ma cɩ 'kɔɔ 'kʋzilo Laagɔ 'la nekʋnyɩtɛnyɔ la.
‑N ‑cɩ ka ‑Kwlenyɔa 'kʋklʋʋn pʋ ɩya ‑n ka ɔla ‑gugwiea bhɔsʋa.
77‑N cɩ ka gba ɔla 'lɔlʋa 'ka gbʋʋnsalɩɛa
‑ɩ 'wlʋlʋ 'lɛ nyinyivalɩɛ nɩkplaan na cibhlili!
78Ɩ ‑glɩ ‑ala Laagɔ 'la ŋaazɩɩnlɩlɩɛ 'kadiea 'la palalɩɛ.
Ŋaazɩɩnlɩlɩɛ ‑naa ya gba
'nyɩ zezezeliea ‑ɩ 'wlʋlʋ 'lɛ ‑laagɔɔn na,
ɩ ya ‑anyɩ 'kʋ ŋeni le ‑zʋkpaylʋbhuoa 'bhisa,
79le ɩ 'ka maa ‑ɔ ‑kʋ 'lɛ 'tutuun
ɩya 'kwɩ 'la ‑zuzua nɩkplaan na 'kʋ leli
ɩya ɩ 'ka ‑anyɩ pupue 'la ‑gugwiea 'kʋ zʋ.»
80'Cileea glɛa 'nyɩ ɔla 'wugoa zʋa 'tɛtɩ. Ɔ ‑kʋa 'pʋpʋa nɩkplaan ‑aan 'nyɩ clɩɩa 'kʋa ɔ pala 'lɛ ɔcɩ Izlayɛlɩlɔlʋ na, ɩ ya 'lɛ ŋeni.
Currently Selected:
Luk 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.