YouVersion Logo
Search Icon

Zan 20

20
Zozii ya lesua nɩkplaan 'wlʋ
(Mat 28.1-8; Mak 16.1-8; Luk 24.1-12)
1Nyamaclɩɩ ‑zʋkpaa 'pɩɩ, daa daa ‑plaa ka ka 'lɛ 'tutu na, Malii Madalaaŋlɔa ya lesua 'kʋ mʋ, 'nyɩ ɔ ya 'lɩ lebhe ma ya cokwiea lesua ne 'kʋ ‑sa. 2Ɔ ya sɔmɩ fa, ɔ ya Simɔɔn Pɩɛlɩ ɩya ‑daa gɩlɩnyɔa* Zozii ‑waa 'lɛ ‑gbɔɔn na ŋeni, 'nyɩ ɔ ya maa 'cla lebhe: «Ma ya ‑Kwlenyɔa lesua nɩkplaan ‑sa 'nyɩ ‑a 'ta daa ma zʋlʋɔ 'lɛ na ‑ci.» 3Na, Pɩɛlɩ ɩya ‑daa gɩlɩnyɔa ya 'plɩ 'nyɩ ma ya lesua 'kʋ mʋ. 4Maa ‑mɔsɔa faa sɔmɩ ‑ma ‑daa gɩlɩnyɔa ya ylɩbhalɩ ɔ ya Pɩɛlɩ 'kʋ zi 'nyɩ ɔ ya lesua 'kʋ ‑bɛɛ ŋenini. 5Ɔ ya sakwlili 'nyɩ ɔ ya lokupɛlɩa ‑dʋdʋa 'kʋ 'lɩ. ‑Ma ɔ 'ta ble. 6Simɔɔn Pɩɛlɩ ‑ɔ gɩa 'mɔɔ 'lɛ 'kʋ na, ɔmɔ ‑ma ‑ɔ ya ŋeni. Ɔ ya lesua nɩkplaan ble 'nyɩ ɔ ya lokupɛlɩa ‑dʋdʋa 'kʋ 'lɩ 7ɩya ‑awlɛ lokwia ma ‑wɔlɩa 'lɛ Zozii 'wlu 'kʋ na. Lokwi ‑naa ɩya lokupɛlɩa 'taa dabhlo ‑kʋ, ‑ma ɛ ‑kʋa ɛcɩɩn ‑buun da. 8Na, ‑daa gɩlɩnyɔa ‑ma, ɔmɔa ‑ɔ ŋeninia 'lɛ lesua 'kʋ ‑bɛɛ na, ya ble. Ɔla 'ci ya 'lɩ 'nyɩ ɔ ya ‑nʋawlɛ la. 9'Bhlɩmɔɔn ma 'ta ka ka 'dɛ 'la daa Zieziewɔlɩa* ‑ɩ cla 'lɛ lebhe Zozii cɩ 'ka 'kwɩɩn 'kʋ ‑bho na, 'la ‑zɔn 'nu. 10Ɩla leen, gɩlɩnyaa ‑mɔsɔa ya 'plɩ 'nyɩ ma ya 'sleen mʋ.
Zozii ya Madalaaŋlɔ Malii 'ciinfutolu
(Mak 16.9-11)
11Malii ‑kʋa ‑jlukuun lesua cɩ 'nyɩ ɔ tua. Na, daa ɔ ‑kʋa 'lɛ 'tuda na, ɔ ya sakwlili le ɔ 'ka lesua nɩkplaan kope. 12Ɔ ya 'bhlaandleecɩ* ‑mɔsɔ 'lɩ. Ma ‑plaa loku 'pɔpʋ nɩkplaan 'nyɩ ma ‑kʋa da ma zʋa 'lɛ Zozii 'la ‑blaanyɛkɛa na sa. Bhlo ‑kʋa 'wlua 'la daa 'nyɩ bhlo ‑kʋa 'lɛ bhɩa 'la daa. 13'Bhlaandleecɩa yɔɔ neencla lebhe: «'Ŋlɔ, 'lɩsaa 'la gbʋ ‑n tua 'lɛ bha?» Ɔ ya maa neenŋonu lebhe: «Ma ya 'na ‑Kwlenyɔa famʋ 'nyɩ n 'ta daa ma zʋlʋɔ 'lɛ na ‑ci.» 14Ɔ ‑kʋ 'lɛ nyɩtɛda na, ɔ ya kwlacala 'nyɩ ɔ ya Zozii 'lɩ, ‑ma ɔ 'ta sɛɛ cibhlili lebhe ɔmɔ. 15Zozii yɔɔ neencla lebhe: «'Ŋlɔ, 'lɩsaa 'la gbʋ ‑n tua 'lɛ bha? Ncaasaa ‑n 'matɩa 'lɛ bha?» ‑Ma Malii ya gugu lebhe 'kɔkuoa 'la ‑bɛnyɔa ‑kʋa 'lɛ 'dɛ. Na, ɔ yɔɔ 'cla lebhe: «‑A to, ɩ ‑ka ‑kʋ lebhe ‑mɔ ‑ka ɔla ‑blaanyɛkɛa famʋ na, palaan daa ‑n zʋlʋɛ 'lɛ na ɩya n 'kɛɛ 'ma ‑kaan mʋ.» 16Zozii yɔɔ 'cla lebhe: «Malii!» Ɔ yɔɔ 'klʋtla 'nyɩ ɔ yɔɔ Ebleewɔlɩɩn 'cla lebhe: «‑Ghlabunii!» Ɩ sa ‑zɔn le canyɔ. 17Zozii yɔɔ 'cla lebhe: «‑Naa klaa kaan cɩ, sa n 'ta ka toa 'bhlɩ ‑gblaa na. ‑Ma mʋ ‑n solu n bholiecɩa lebhe n gblaa ka n To, ‑ɔ ‑glɩ 'lɛ anyɩ ‑ma a to na 'bhlɩ, 'na Laagɔ ‑ɔ ‑glɩ 'lɛ anyɩ ‑ma ala Laagɔ na 'bhlɩ.» 18Na, Madalaaŋlɔ Malii ya gɩlɩnyaa* 'bhlɩ mʋ 'nyɩ ɔ ya maa 'cla lebhe: «N ya ‑Kwlenyɔa 'lɩ!» 'Nyɩ ɔ ya maa ɩmɩa Zozii solua 'mɔɔ 'lɛ na 'dɩ 'kʋ ‑salɩ.
Zozii ya gɩlɩnyaa 'ciinfutolu
(Luk 24.36-49)
19Clɩɩ ‑naa bhlogbɩɩa ‑ɩ ‑glɩa 'lɛ nyamaclɩɩ ‑ylʋvaa na, gɩlɩnyaa* yaa ‑palʋ bhlo ‑zɔn 'wluwlalɩ. Ma ya gbinia 'safɛɛn tʋlʋ, sa ma 'gulua Zifʋnyaa* tocɩa na. Zozii ya ci, ɔ ya maa sidiin 'plɩ 'nyɩ ɔ ya 'nylugo. 'Nyɩ ɔ ya maa 'cla lebhe: «Pupue kʋ anyɩ 'kʋ!» 20Daa ɔ ‑kʋa 'lɛ nyɩtɛda na, ɔ ya maa ɔla ‑kɔgbʋa ɩya ɔla gbakɩa pala. Gɩlɩnyaa cibhlili 'lɛ lebhe ‑Kwlenyɔa ‑ɔ ‑kʋ 'lɛ 'dɛ na, pɔlɛkʋmɛnɔ ya maa yeli. 21Zozii ya ‑awlɛ maa 'cla lebhe: «Pupue kʋ anyɩ 'kʋ. Saa Toa lobhuun na, ‑amʋ ‑masɛɛ n lobhu anyɩ!» 22Ɔ nyɩtɛ 'lɛ ‑sa na, ɔ ya maa nyɔmʋ 'kʋ 'pa 'nyɩ ɔ ya maa 'cla lebhe: «‑Kplɔkplɔ ‑Wugoa* kʋ anyɩ 'kʋ!» 23'Nyɩ ɔ ya ‑awlɛ maa 'cla lebhe: «Maa a cɩ 'ka 'lɛ mala nyinyia va na, ɩ cɩ 'ka maa ‑vɔɔ. Maa a cɩ 'ta 'lɛ mala nyinyia va na, ɩ cɩ 'ta maa ‑vɔɔ.»
Zozii ya ɔcɩ Tomaa pala
24Tomaa, 'kʋgba ‑mɔsɔa nɩkplaan bhlo, ma la 'lɛ daplɩcoa na, 'taa dɩpɩa ‑kʋ, daa Zozii pala 'lɛ ɔcɩ ɔla gɩlɩnyaa* na. 25Na, ‑daa gɩlɩnyaa yɔɔ 'cla lebhe: «‑A ya ‑Kwlenyɔa 'lɩ.» ‑Ma Tomaa ya maa 'cla lebhe: «Ɩ ‑ka ‑kʋ lebhe n 'ta ɔla ‑kɔgbʋa nɩkplaan gblɔlɩa 'la 'kpafɩa 'lɩ, ɩya n 'ka 'na ‑wliciea 'ma, n 'ka gblɔlɩa 'la 'kpafɩa ko ɩya n ka 'na sɔa ɔla gbakiea nɩkplaan fa na, 'n cɩ 'ta ala wɔlɩa ‑nʋawlɛ la ‑ylɛylɛ.»
26Nyamaclɩɩa 'cɩlɩ 'lɛ 'kʋ na, Zozii 'la gɩlɩnyaa ya ‑awlɛ ‑palʋa ‑zɔn 'wluwlalɩ. Tomaa ‑kʋmʋnɩa 'dɛ. Gbinia ‑tʋlʋa 'safɛɛn, ‑ma Zozii ya ci, ɔ ya maa sidiin 'nylugo 'nyɩ ɔ ya maa 'cla lebhe: «Pupue kʋ anyɩ 'kʋ!» 27'Nyɩ ɔ ya Tomaa 'cla lebhe: «Zʋ ‑da ‑naa ‑wliciea ɩya kope 'na ‑kɔgbʋa. ‑Glɔɔ ‑naa sɔa nɩkplaan ɩya ‑n fʋʋ 'na gbakiea nɩkplaan. ‑Naa ‑saanɩ gbɩ ‑zɔn, ‑ma 'maa kalɩ pɔɔtɛtɛ!» 28Tomaa yɔɔ 'cla lebhe: «'Na ‑Kwlenyɔ ɩya 'na Laagɔ.» 29Zozii yɔɔ 'cla lebhe: «Sa ‑n yanɩɩn 'lɛ 'lɩ na, ‑n ‑kanɩ pɔɔtɛtɛ! ‑Ma maa ‑ɔ 'lɩ 'ta 'lɛ 'nyɩ ‑ɔ ‑ka 'lɛ pɔɔtɛtɛ na, ma ‑kʋ 'nanɩ.»
30Zozii ya ‑awlɛ ɔla gɩlɩnyaa 'ci 'kʋ 'ciinzizielɩlobholi ‑bhutukpa nʋnʋ, ‑ɩ 'ta 'lɛ ‑afluwaa ‑naa nɩkplaan ‑kʋ na. 31‑Ma ɩmɩa ‑ɩ ‑kʋ 'lɛ ‑afluwaa ‑naa nɩkplaan na, ka ɩ ‑zieo 'lɛ 'yɛpɩ lebhe a 'ka ‑nʋawlɛ la lebhe Zozii ‑glɩ 'lɛ Laagɔ 'la ‑Sasanyɔa*, Laagɔ 'la 'Cʋa ɩya a ‑kɔɔ ala pɔɔtɛtɛa 'kʋ zʋ na, a 'ka ɔla 'ŋlɩa nɩkplaan, jabhʋa 'lɩlɩ.

Currently Selected:

Zan 20: NTLD13

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy