Zan 17
17
Zozii bhibhie ɔla gɩlɩnyaa 'la da
1Daa Zozii bhɩalɩ ‑sa nyɩtɛlɩɛ na, ɔ ya 'wlu 'kʋ 'bhli, ɔ ya ‑laagɔɔn kope 'nyɩ ɔ ya 'cla lebhe: «To, clɩɩa ya ŋeni. ‑Gba ‑naa 'Cʋa 'klʋ ɩya ‑naa 'Cʋa ‑ma 'kɔɔ 'klʋgba. 2‑N yɔɔ ‑jioli 'nyɩ le ɔ ‑kwle ncɛlɩa 'fɩan ɩya ɔ 'nyɩ maa ‑n 'nyɩɔ 'lɛ na, jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 3'Nyɩ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na ‑glɩ lebhe ma cibhlilio, ‑mɔ bhlogbɩɩa ‑ɔ ‑glɩ 'lɛ Laagɔ 'titi na ɩya ma cibhlili Zozi Klisi, ɔmɔa ‑n lobhu 'lɛ na. 4N yɔɔ ‑dʋdʋa 'kʋ 'klʋgba, n ya lobholia ‑n 'nyɩɩn 'lɛ nʋda na 'wluko. 5Na, To, ‑mɔɔ ‑ma, gba ɩya n 'lɩnɩ ‑pɔtɔnʋ ‑naa 'klʋʋn, 'klʋagbaa n ‑kaa 'lɛ daa n ‑kʋa ‑mɔɔ 'lɛ cɩ 'fɩɔn 'nyɩ ‑n ya 'lɛ ‑laagɔzɔan nʋ na.
6N ya gba 'nyɩ maa ‑n 'manɩ 'lɛ ‑laagɔzɔan 'nyɩ ‑n 'nyɩɩn 'lɛ na, yɔɔ cibhlili. Ma ‑glɩa ‑naanʋa, ‑n yaan maa 'nyɩ, 'nyɩ ma ya 'lɛ ‑naa niwɔlɩa 'kʋ 'plɩlɩ. 7Ma ‑cinɩ sɛɛ ‑pɔtɔnʋ lebhe ɩmɩa ‑tɛtɛa ‑n 'nyɩ 'lɛ na, 'wlʋlʋɔ wlɩɩn, 8sa wɔlɩa ‑n soluun 'lɛ na, ɩmɩ n solu 'lɛ maa 'nyɩ ma yɩɩ 'ma. Ma ya sɛɛ cibhlili lebhe ‑zaagbʋsa n 'wlʋlʋɔ cɩ 'nyɩ ‑mɔ -ɔ lobhuun 'lɛ.
9Mala da n bhibhie 'lɛ. N bhibhie 'ta ‑laagɔzɔan 'la da, ‑ma maa n 'nyɩɩn 'lɛ na 'la da. ‑Na nʋa ma ‑glɩ 'lɛ. 10‑Tɛtɛa 'fɩan n ‑ka 'lɛ na, ɩ ‑glɩ ‑na 'nɩ, saa ‑tɛtɛa 'fɩan ‑n ‑ka 'lɛ na, ɩ ‑glɩ 'lɛ 'na 'nɩ na. 'Nyɩ 'na 'klʋagba ya maa nɩkplaan ‑zɔnwlʋlʋ. 11N cɩ 'tanɩ ‑laagɔzɔan 'kʋ. ‑Ma maa, ma ‑kʋ ka ‑laagɔzɔan 'nyɩ ‑amʋ, n mʋɔ 'lɛ 'bhlɩ. ‑Kplɔkplɔ To, 'lɩ maa 'klʋ ‑naa 'ŋlɩa ‑n zʋʋn 'lɛ na nɩkplaan ɩya ma 'ka bhlo 'plɩ le saa ‑a ‑glɩ 'lɛ bhlo na. 12Daa n ‑kʋ kaa 'lɛ maa cɩ na, n lɩa maa 'klʋ 'ŋlɩa ‑n zʋʋn 'lɛ na, nɩkplaan. N ya maa 'kʋtɩtɔlʋ 'nyɩ maa sidiin 'la bhlogbɩɩ 'ta mlɔ, ‑n 'ta le ɔmɔa ‑ɔ cɩ 'kaa 'lɛ mlɔ ɩya Zieziewɔlɩa* 'ka 'kʋglalɩ na. 13‑Ma ‑pɔtɔnʋ, ka n mʋnɩɔ 'lɛ 'bhlɩ 'nyɩ n nyɩtɛlɩ 'lɛ wɔlɩ ‑naa ɩya pɔlɛkʋmɛnɔa ‑ʋ 'ta 'lɛ 'yʋ ‑ka na, ka maa nɩkplaan kʋ. 14N ya maa ‑naa nɩwɔlɩa 'nyɩ, 'nyɩ ‑laagɔzɔan ya maa zɔbhɛlɩ, sa ma 'ta ‑laagɔzɔan 'nʋa ‑glɩ le saa n 'ta 'lɛ ‑laagɔzɔan 'nɔ ‑glɩ na. 15N bhibhie 'tɔɔ lebhe ‑n ‑sa maa ‑laagɔzɔan, ‑ma tlʋbhalɩ maa gɔzɛ cɩ da. 16Ma 'ta ‑laagɔzɔan 'nʋa ‑glɩ le saa n 'ta 'lɛ ‑laagɔzɔan 'nɔ ‑glɩ na. 17'Plɩlɩ ‑nʋawlɛ 'kʋ ɩya ‑n 'bhɛlɩ maa ‑ncɩ, sa ‑naa wɔɔnyɩtʋaa ‑glɩ 'lɛ ‑nʋawlɛ na. 18N ya maa ‑laagɔzɔn lobhu le saa n lobhuun 'lɛ ‑laagɔzɔan na. 19Mala gbʋ n 'bhɛlɩɔ 'lɛ ncɩ ɩya maa ‑masɛɛ ma 'ka ‑zaagbʋsa ‑na 'nʋa 'plɩ.
20N 'ta maa bhlobhlo 'la da ‑tɛɛ 'n bhibhie 'ta 'lɛ, ‑ma maa ‑anʋa mala ‑danʋfʋɛliliea 'la gbʋ, ‑ɔ ‑cɩ 'kaan 'lɛ mala pɔɔtɛtɛ 'kʋ zʋ la na, mala da ‑masɛɛ. 21'Naa maa 'fɩan 'plɩ bhlo le saa ‑mɔ, n To, n ‑kʋʋn 'lɛ nɩkplaan 'nyɩ ‑amʋ ‑masɛɛ n ‑kʋɔ 'lɛ nɩkplaan na, 'naa maa ‑masɛɛ ma kʋmʋ anyɩ nɩklplaan ɩya ‑laagɔzɔan 'ka ‑nʋawlɛ la lebhe ‑mɔ lobhuun 'lɛ. 22N ya maa 'klʋagbaa ‑n 'nyɩɩn 'lɛ na 'nyɩ le ma 'ka bhlo 'plɩ le saa n ‑yɔɔsɔ ‑a ‑glɩ 'lɛ bhlo na. 23Ɩ sa ‑zɔn lebhe n ‑kʋ maa nɩkplaan 'nyɩ ‑mɔɔ, ‑n ‑kʋʋn 'lɛ nɩkplaan. ‑Sa ma cɩ 'ka 'lɛ ‑zaagbʋsa bhlo 'plɩ ɩya ‑laagɔzɔan 'ka sɛɛ cibhlili lebhe ‑mɔ lobhuun 'lɛ 'nyɩ ‑n ‑wa maa le saa ‑n ‑waan 'lɛ na.
24To, maa ‑n 'nyɩ 'lɛ na, n ‑wa lebhe daa n ‑kʋ 'lɛ na, ma kʋmʋ 'dɛ ɩya ma 'ka 'na 'klʋagbaa ‑n 'nyɩɩn 'lɛ na 'ciinlɩ, sa 'fɩɔn ɩya ‑laagɔzɔan 'ka 'lɛ ‑nʋɔ na, ‑n ‑waa ‑amʋa tooto. 25To, ‑mɔɔa ‑ɔ ‑glɩ 'kʋnylugolunyɔ na, ‑laagɔzɔan 'tɔɔ cibhlili. ‑Ma ‑amʋ, n yɔɔ cibhlili 'nyɩ ‑anʋa ‑naa ya cibhlili lebhe ‑mɔ lobhuun 'lɛ. 26N ya gba 'nyɩ ma ya ‑na 'ŋlɩa cibhlili 'nyɩ n cɩ 'ka gba ma 'ka ‑awlɩɩ cibhlili ɩya ‑wawʋa ‑n ‑waan 'lɛ na, 'ka maa nɩkplaan kʋ ɩya ‑amʋ ‑ma n 'ka maa nɩkplaan kʋ.»
Currently Selected:
Zan 17: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.