Efz 1
1
‑Ayopalɩɛ
1‑Amʋ Pɔlʋ, n ‑glɩ Zozi Klisi 'la lobhulobhunyɔ*, saa Laagɔ wabha 'lɛ na. N zie anyɩ Efɛzɩdua#1.1 «Efɛzɩdua 'kʋ 'la» 'ta ‑gododofluwia ‑gbɔɔn nɩkplaan ‑zieo. 'kʋ 'la ‑kplɔkplɔnyaa ‑ɔ ‑kʋlʋ 'lɛ Zozi Klisi na. 2'Naa ‑a To Laagɔ ɩya ‑Kwlenyɔ Zozi Klisi 'la 'nyupalɩɛa ɩya mala pupuea kʋ anyɩ 'kʋ.
'Nanɩa ‑ɩ 'ta 'lɛ bhloluda ‑ka na
3‑A wo Laagɔ ‑evli, ‑ala ‑Kwlenyɔ Zozi Klisi To!
Klisi nɩkplaan,
ɔ ya ‑anyɩ 'Wugoa 'la 'nyupalɩɛa
‑tɛtɛa 'fɩan 'nyɩ, 'yɛpɩ ‑laagɔɔn.
4Ɔmɔ nɩkplaan,
'fɩɔn ɩya ‑laagɔzɔan 'ka 'lɛ ‑nʋɔ na,
ɔ ya ‑anyɩ desla le ‑a ka ‑kplɔkplɔnya 'plɩ ɔla ‑deliin,
ɩya ma 'la ka ‑anyɩ 'gesalɩda 'lɩ.
Ɔla ‑wawʋa nɩkplaan,
5ka ɔ wabhaa 'lɛ bhɔdaa tooto le ɔ 'ka ‑anyɩ ɔla 'cuo ple,
Zozi Klisi nɩkpaan.
Sɛɛ ɩ ‑plɔɔ 'lɛ 'tʋ le ɔ nʋ, ɔla ‑danaanɔa 'la gbʋ,
6ɩya ‑a kɔɔ 'klʋgbaa,
'nanɩ 'kadɩa ɔ pleli 'lɛ ɔla ‑Wawacoa 'kʋ,
'nyɩ ɔ nʋ 'lɛ ‑anyɩ na ɩla gbʋ.
7‑A ‑yɔɔsɔ 'la nebhloplɩlɩɛa nɩkplaan,
ɔla ‑dolua 'la gbʋ, ‑a ya geyliin 'wlʋ.
Ɔmɔ nɩkplaan, ‑ala ‑ngasɩtʋlɩɛa ya valɩɛ 'lɩ,
ɔla ‑wawʋ 'kadie 'la 'sasʋʋn.
8Laagɔ ya ‑anyɩ ɔla ‑wawʋa va,
'nyɩ ɔ ya ‑anyɩ dɩgalɩa ‑tɛtɛa
ɩya wɔɔcibhililiea ‑tɛtɛa 'gbokalɩ.
9Ɔ ya ‑anyɩ ɔla pɔɔsaa ‑ɩ ‑zizieoa 'lɛ na pala,
ɩmɩa ɔmɔ 'titi zʋ 'lɛ kpo 'kʋ bhɔdaa tooto,
10le ɩla daa ‑ka ŋeni na, ɔ 'kɩɩ 'kʋglalɩ na.
Ɔ 'ka ‑laagɔzɔn bhuoa, lɩɩa ‑ɩ ‑kʋ 'lɛ ‑laagɔɔn,
ɩya lɩɩa ‑ɩ ‑kʋ 'lɛ ‑dʋdʋa 'kʋ na,
‑kwleto bhlogbɩɩ 'la ‑kwleliea ‑zɔn zʋ,
ɔmɔ ‑ɔ ‑glɩ 'lɛ Klisi.
11Ɔmɔ nɩkplaan, ‑a 'lɩlɩ ‑awlɛ ‑ala da.
Ɔmɔa ‑ɔ zʋ 'lɛ ‑tɛtɛa 'fɩan kpo 'kʋ, saa ɔ wabha 'lɛ na,
ɔ ya ‑anyɩ bhɔdaa tooto desla
12le ‑a ka maa bhɔdaa tooto,
‑ɔ 'tɛbhalɩ 'lɛ Klisi pɔlɛ 'kʋ na, 'la sidiin ‑naanʋa 'plɩ,
ɩya ‑ɩ 'ka ɔla 'klʋgbaa 'la ‑evliwolɩɛ 'plɩ.
13Ɔmɔ nɩkplaan,
anyɩ ‑masɛɛ, a ya ‑nʋawlɛɛ -wɔɔnyɩtʋa 'nu,
Dɩnanɩa* ‑ɩ sa 'lɛ anyɩ gbʋʋn na.
Ɔmɔ nɩkplaan, a 'lɩlɩ ‑awlɛ 'lɛ pɔɔtɛtɛ, 'nyɩ 'Wugoa,
‑Kplɔkplɔ ‑Wugoa* Laagɔ talɩ 'lɛ ‑ndanyɩ 'kʋ na,
ʋla 'kukuunkpoa ya 'lɛ anyɩ 'kʋ ‑zʋɔ.
14Ʋmʋ -ʋ ‑glɩ 'lɛ 'nanɩa ‑tɛtɛa Laagɔ cɩ 'ka 'lɛ ‑anyɩ nʋ na,
ɩla 'kʋklʋʋnpʋlʋʋa ‑a cɩ ka 'lɛ kalɩ ‑aan,
ɩya ‑a ‑ka geylia ‑tɛtɛa nɩkplaan 'wlʋ na, ‑a kɩɩ 'lɩ,
ɩya ɩ 'ka ɔla 'klʋgbaa 'la ‑evliwolɩɛ 'plɩ na.
Pɔlʋ bhibhie Efɛzɩnyaa 'la da
15'Lɩka wɔlɩa 'la gbʋa, ‑amʋ ‑ma, daa n ‑kawa 'nu lebhe a ya ala pɔɔtɛtɛa ‑Kwlenyɔ Zozii 'kʋ zʋ 'nyɩ a ‑ka ‑kplɔkplɔnyaa 'fɩan 'la ‑walʋ na, 16n sɛ 'ta 'lɛ Laagɔ 'la bhɔlʋɛ 'kʋ ala gbʋ, 'nyɩ n sla 'lɛ anyɩ 'ŋlɩ 'na bhibhielia nɩkplaan na. 17'Naa ‑ala ‑Kwlenyɔ Zozi Klisi 'la Laagɔa, toa ‑ɔ nɩnɩ 'lɛ 'klʋagbaa na, ɔ 'nyɩ anyɩ dɩgalɩ ɩya wɔlɩzɔnwlawugo, ɩya a 'kɔɔ ‑nʋawlɛɛsa cibhlili. 18'Naa ɔ kalɩ ala pɔlɩa ɔla zezelia gbine, ɩya a 'ka pɔlɛkʋtɛlɔa ɔ la 'lɛ anyɩ 'kʋ na cibhlili, ɔla 'klʋagbaa 'la 'ghlilo, ‑aja ɔ 'wlalɩ 'lɛ aya ‑kplɔkplɔnyaa 'kʋ, ɩya 19'tɛtɩ 'kadiea ɔ pala 'lɛ ‑anyɩa ‑ɔ ‑ka 'lɛ ɔla pɔɔtɛtɛ na 'la gbʋ na. 20Ɩmɩ ɔ 'plɩlɩ 'lɛ Klisi 'kʋ, 'nyɩ ɔ ya 'lɛ pala, daa ɔ ‑bhoo 'lɛ 'kwɩɩn 'kʋ 'nyɩ ɔ zʋɔ 'lɛ ‑laagɔɔn, ɔla 'lipasɔa 'kʋ sakʋda na. 21Na, Klisi ‑zilo ‑kwleliea ‑tɛtɛa, ‑kwletɛtɩa ‑tɛtɛa, 'tɛtɩa ‑tɛtɛa ɩya 'ŋlɩa ‑tɛtɛa -ɩ cɩ 'lɛ 'kʋzilo na 'kʋ, ‑n 'ta le 'bhlɛsʋʋ ‑naa ‑tɛɛ nɩkplaan, ‑ma 'bhlɛsʋan ‑ʋ ci 'lɛ 'yɛpɩ na nɩkplaan -masɛɛ. 22‑Ghɛɛ, Laagɔ ya ‑tɛtɛa 'fɩan Klisi 'la ‑kwleliea ‑zɔn zʋ 'nyɩ ɔ yɔɔ 'lɛ ‑tɛtɛa 'fɩan 'wluku zʋ le ɔ 'plɩ ‑laagɔnɩkplaa 'la 'wlu. 23A ‑glɩ ɔla 'nyɛkɛa, ɔla ‑lɩɩbhuoa ‑kʋa nɩkplaan, ɔmɔa Laagɔ 'la ‑lɩɩbhuoa ‑yelio 'lɛ na.
Currently Selected:
Efz 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.