Kols 1
1
‑Ayopalɩɛ
1‑Amʋ Pɔlʋ, n ‑glɩ Zozi Klisi 'la lobhulobhunyɔ*, saa Laagɔ wabha 'lɛ na. N ‑ya ‑a bholi Timoti, ‑anyɩ 2‑ɔ zie 'lɛ anyɩ Kolɔsʋdua 'kʋ 'la ‑kplɔkplɔnyaa ‑ɔ ‑glɩ 'lɛ ‑a bholiecɩa ‑ɔ 'tɛlɩ 'lɛ Klisi ‑deli 'kʋ na. 'Naa ‑a To Laagɔ palɩ anyɩ 'nyu ɩya ɔ 'nyɩ anyɩ pupue.
Pɔlʋ bhɔlʋ Laagɔ
3‑A bhɔlʋ ‑ala ‑Kwlenyɔ Zozi Klisi To Laagɔ, bhibhielia ‑a bhibhieo 'lɛ clɩɩa 'fɩan ala gbʋ na nɩkplaan. 4‑A ya ala pɔɔtɛtɛa a ‑zʋɔ 'lɛ Zozi Klisi 'kʋ na, ɩya ‑walʋa a ‑wa 'lɛ ‑kplɔkplɔnyaa ‑tɛtɛa na, ɩla wɔlɩa 'nu. 5Ka a nʋ 'lɛ ɩmɩ ‑naa ‑ofi lebhe a 'tɛlɩ 'nanɩa ‑ɩ ‑bɛlɩ 'lɛ anyɩ ‑laagɔɔn na pɔlɛ 'kʋ. Pɔlɛkʋtɛlɔ ‑naa 'la wɔlɩa, Dɩnanɩa* ‑ɩ ‑glɩ 'lɛ ‑nʋawlɛ na 'kʋ ma 'plɩlɩ 'lɛ 'nyɩ ma yɩɩ 'lɛ anyɩ solu. 6Ɩmɩ ‑ɩ ŋeni 'lɛ anyɩ 'kʋ. Na, saa ‑tɛɛa ɩ tlʋ 'lɛ 'ca 'nyɩ ɩ 'cɩlɩ 'lɛ ‑laagɔzɔn bhuoa 'kʋ na, sɛɛ ‑tɛɛ bhlogbɩɩ ɩ 'plɩmʋ 'lɛ anyɩ sidiin, daa a ‑kaa 'lɛ Laagɔ 'la ‑dananɔa 'la wɔlɩa 'nu, 'nyɩ a ‑ka 'lɛ cibhlili lebhe ɩ ‑glɩ ‑nʋawlɛ, 7saa Epaflasɩ caa 'mɩ 'lɛ anyɩ na. Ɔ ‑glɩ ‑a 'nagɔ ‑naa ‑ayɔɔsɔ nʋ 'lɛ lobholi, 'nyɩ ‑ɔ ‑glɩ 'lɛ Klisi 'la lobhocoa ‑ɔ ‑kʋ 'lɛ ‑ala 'jeen 'nyɩ ‑a 'tɛlɩ 'lɛ ‑deli 'kʋ na. 8Ɔ ya ‑anyɩ ‑walʋa 'Wugoa zʋ 'lɛ anyɩ nɩkplaan na, ʋla wɔlɩa solu.
9Na, 'lɩka wɔlɩa 'la gbʋa, ‑anyɩ ‑ma, ‑a bhibhie 'lɛ ala da clɩɩa 'fɩan, daa ‑a ‑kaa 'lɛ wɔlɩ ‑naa 'nu na. ‑A 'clalɩ Laagɔ le ɔ 'nyɩ anyɩ dɩgalɩa ‑tɛtɛa ɩya wɔɔcibhliliea ‑ɩ 'wlʋlʋ 'lɛ ɔla 'Wugoa nɩkplaan na, ɩya a 'ka ɩmɩa ɔ 'matɩlɩ 'lɛ anyɩ wlɩɩn na cibhlili. 10Dɛ a cɩ 'ka 'lɛ saa ɩ ‑ŋwa 'lɛ 'kʋ le ma namʋnʋ ‑Kwlenyɔ 'la 'ŋlɩa nɩkplaan na namʋlɩɛ mino, ɩya ‑tɛtɛa 'fɩan nɩkplaan, a 'ka 'matɩ le a 'kɔɔ 'tʋ ‑pla. ‑Sa a cɩ 'ka 'lɛ 'ca tlʋ, nʋnʋgbɩ 'nanɩa ‑tɛtɛa nɩkplaan, ɩya a 'ka 'lɛ 'kʋklʋʋn mʋ, Laagɔ 'la cibhlililɩɛa nɩkplaan. 11‑Tɛtɛa 'fɩan nɩkplaan, ɔla 'tɛtɩa ‑ɩ 'wlʋlʋ 'lɛ ɔla 'klʋagbaa nɩkplaan na, cɩ 'ka anyɩ 'tɛtɩ 'nyɩ, ɩya a 'ka kpaan 'nylugo, pɔɔklalɩɛ nɩkplaan.
Na, pɔlɛkʋmɛnɔ nɩkplaan, 12a bhɔlʋ Toa, ‑ofi lebhe ɔmɔ ‑ɔ gba 'lɛ 'nyɩ a cɩ ka 'lɛ mino ɩya aya ‑kplɔkplɔnyaa 'ka 'lɛ ‑aja ɔ bhɔsʋa 'lɛ zezezelia nɩkplaan mala gbʋ na 'kʋwlalɩ. 13Sa ɔ ya ‑anyɩ 'tutua 'la ‑kwleliea ‑zɔn ‑sa, 'nyɩ ɔ ya 'lɛ ‑anyɩ ɔla ‑Wawacoa 'la Nyɩbhɛlɩdua* nɩkplaan blee. 14Ɔmɔ -ɔ ‑sa 'lɛ ‑anyɩ geylia nɩkplaan, 'nyɩ ‑ala nyinyia ya 'lɛ valɩɛ 'lɩ.
Klisi 'la lobholia ɔ nʋ 'lɛ na
15Ɔmɔ ‑ɔ ‑glɩ 'lɛ Laagɔa, ma 'ta 'lɛ ‑jlɛ na 'la 'klʋ,
ɔmɔ ‑ɔ ‑kʋ 'lɛ 'fɩɔn 'nyɩ ‑tɛtɛa 'fɩan ya 'lɛ ‑nʋɔ.
16Sa ɔmɔ nɩkplaan ‑tɛtɛa 'fɩan ‑nʋnʋɔ 'lɛ,
'yɛpɩ ‑laagɔɔn ɩya ‑wɔlʋ ‑dʋdʋa 'kʋ,
ɩmɩa ma ‑jlɛ 'lɛ ɩya ɩmɩa ma 'ta 'lɛ ‑jlɛ na,
‑kwlekpu ɩya ‑kwletɛtɩ, ‑kwlelie ɩya 'tɛtɩ.
Ɔmɔ Laagɔ 'plɩlɩ 'kʋ 'lɛ 'nyɩ ɔ ya 'lɛ ‑tɛtɛa 'fɩan nʋ,
'nyɩ ɔla gbʋ ɩ ‑nʋɔ 'lɛ.
17Ɔmɔ, ‑ɔ pʋʋ 'lɛ ‑tɛtɛa 'fɩan 'kʋklʋʋn,
'nyɩ ɔmɔ ‑ɔ gba 'lɛ 'nyɩ lɩɩa ‑tɛtɛa ‑kakalɩ 'lɛ.
18Ɔmɔ ‑ɔ ‑glɩ 'lɛ 'nyɛkɛa 'la 'wlu,
'nyɩ 'nyɛkɛa ‑glɩ 'lɛ ‑laagɔnɩkplaa.
Ɔmɔ ‑ɔ ‑glɩ 'lɛ bhɔda,
‑bɛka nclɔɔa ‑ɔ ‑bho 'lɛ 'kwɩɩn 'kʋ na,
ɩya ‑tɛtɛa 'fɩan nɩkplaan, ɔ 'ka ‑bɛka ‑naanɔ 'plɩ.
19Sa, ɩ ya Laagɔ 'tʋ ‑pla
le ɔla ‑lɩɩbhuoa kʋɔ nɩkplaan.
20Ɔmɔ 'kʋ ɔ 'plɩlɩ 'lɛ 'nyɩ ɔ ya 'lɛ pupue ɔya ‑tɛtɛa 'fɩan ‑gbaaglɩɩn ‑lamʋ,
‑wɔlʋ ‑dʋdʋa 'kʋ ɩya 'yɛpɩ ‑laagɔɔn.
Sa ɔla ‑dolua ‑ʋ kɔlɔlʋ 'lɛ dabhlalɩsua 'ciin na, ya pupue ‑lamʋ.
21'Nyɩ anyɩa ‑ɔ ‑glɩa 'lɛ ‑bɛka daa lowie na, anyɩa ‑ɔla wɔɔgugwie ɩya nʋnʋgbanyinyia palaa 'lɛ lebhe Laagɔ 'la ‑zɔbhɛlɩgbanya 'titi a ‑glɩa 'lɛ na, 22'lɩka, pupue yanɩ ayɔɔsɔ ‑gbaaglɩɩn ci ɔla 'Cʋa ‑ɔ sɛlɩ 'lɛ ɔla 'nyɛkɛa nɩkplaan na 'la gbʋ, le ɔ 'ka gba a 'ka ‑kplɔ, ma 'la kanɩ anyɩ pʋɛ cɩ 'lɩlɩ ɩya ma 'la kanɩ anyɩ 'gesalɩda 'lɩ ɔla ‑deliin. 23‑Ma ɩ ‑fata lebhe pɔɔtɛtɛ nɩkplaan, a kla kpaan ɩya a 'la tea acɩ ne ɩya a 'la tlʋbhalɩa pɔlɛkʋtɛlɔa Dɩnanɩa* 'nyɩ 'lɛ na cɩ da. Dɩnanɩ ‑naa a 'nu 'lɛ, ma ‑sa 'lɛ ‑laagɔzɔn 'la ncɛlɩa ‑tɛtɛa 'nyɩ ‑amʋ Pɔlʋ, n 'plɩ 'lɛ ɩla lobhoco na.
Pɔlʋ 'la lobholia ɔ nʋ 'lɛ na
24Na ‑pɔtɔnʋ, n 'lɩlɩ 'na pɔlɛkʋmɛnɔa 'kwlɩa ‑ɩ bhɩaan 'lɛ ala gbʋ na nɩkplaan, 'nyɩ sɛsʋa Klisi cɩ 'kaa ‑awlɛa 'lɛ sɛ na, 'na 'nyɛkɛa sɛnɩʋ 'lɛ, ɔla 'nyɛkɛa ‑ɛ ‑glɩ 'lɛ ‑laagɔnɩkplaa na 'la gbʋ. 25Ka n 'plɩ 'lɛ ala lobhoco, lobholia Laagɔ zʋʋn 'lɛ wlɩɩn ala gbʋ na ɩla 'sasʋʋn. Ɩmɩ ‑ɩ ‑glɩ 'lɛ lebhe n solua anyɩ Laagɔ 'la wɔɔnyɩtʋa ‑tɛtɛa, 26wɔlɩa ‑ɩ ‑zizieoa 'lɛ bhɔdaa tooto, 'nyɩ Laagɔ yanɩ 'lɛ ‑pɔtɔnʋ ɔla ‑kplɔkplɔnyaa pala na. 27Ɔ ya wabha lebhe ɔ 'ka gba ɩya maa ‑ɔ 'ta 'lɛ Zifʋnya* ‑glɩ na, ma 'ka zizieziziewɔlɩ ‑naa 'la 'nanɩa ɩya ɩla 'klʋagbaa cibhlili. Zizieziziewɔlɩ ‑naa ɩmɩ ‑ɩ ‑glɩ 'lɛ lebhe Klisi ‑kʋ anyɩ nɩkplaan, 'nyɩ ɔmɔ ‑glɩ 'lɛ pɔlɛkʋtɛlɔa a ‑ka 'lɛ, le a cɩ Laagɔ 'la 'klʋagba 'lɩmʋ na. 28Klisi ‑a plici 'lɛ, 'nyɩ ‑a zʋ 'lɛ nclɔɔ nclɔɔ flɩɩn, 'nyɩ dɩgalɩ nɩkplaan, ‑a ca 'lɛ maa, ɩya Klisi nɩkplaan, ma 'ka 'kʋglalɩ Laagɔ ‑deliin. 29'Lɩka wɔlɩa 'la gbʋa n nʋ 'lɛ lobholi ‑naa na, 'lɩka wɔlɩa 'la gbʋa n ma 'lɛ ɔla 'tɛtɩ 'kadɩa ‑ɩ nʋnʋʋn 'lɛ lobholi nɩkplaan na, 'nyɩ n vʋ 'lɛ na.
Currently Selected:
Kols 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.