Lobh 1
1
Zozii nyɩtɛ ‑Kplɔkplɔ ‑Wugoa 'la ciwɔlɩ
1Teofili, 'na ‑bɛkafluwaa nɩkplaan, n ya ɩmɩa Zozii nʋa 'lɛ 'nyɩ ɔ caa 'lɛ bhɔdaa tooto 2‑aan clɩɩa 'kʋa Laagɔ ‑sɔɔ 'lɛ ‑dʋdʋa 'kʋ na nyɩtɛ. 'Fɩɔn ɩya Laagɔ 'kɔɔ 'lɛ ‑dʋdʋa 'kʋ ‑sa na, ‑Kpɔkplɔ ‑Wugoa* 'la 'tɛtɩa nɩkplaan, ɔ ya ɔla cacawɔlɩa lobhulobhunyaa* ɔ sla 'lɛ de na te. 3Ɔla 'kwlɩbhɩɛa 'la leen, maa ɔ palaa 'lɛ ɔcɩ le ma 'ka cibhli lebhe ɔ ‑kʋ, 'nyɩ ma 'ka 'lɛ ‑danʋfʋɛ li lebhe ɩ ‑glɩ ‑nʋawlɛ na, clɩɩ ‑gwlɩɩ ‑mɔsɔ ‑gbaaglɩɩn, ɔ yaa maa 'ciinfutolu 'nyɩ ɔ yaa maa Laagɔ 'la Nyɩbhɛlɩdua* 'la cɩa wɔlɩ solu.
4Clɩɩ bhlo, ɔya maasɔ ‑kʋa lida 'nyɩ ɔ ya maa 'cla lebhe: «A 'la 'wlʋa Zolizalɛmʋdua nɩkplaan, ‑ma a ‑bɛlɩ 'yɛpɩ le ‑ndanyɩa Toa ta 'lɛ, 'nyɩ n solu 'lɛ anyɩ ɩla wɔlɩa na, 'ka 'kʋglalɩ. 5‑Masa, nyuu Zaan zʋ 'lɛ ncɛlɩ 'wlu. ‑Ma anyɩ, clɩɩ ‑zlʋsaasa nɩkplaan, ‑Kplɔkplɔ ‑Wugoa Laagɔ cɩ 'ka 'lɛ anyɩ 'wlu zʋ.»
Zozii ya ‑laagɔɔn ‑gblaa
6Na, maa ‑ɔ 'wlalɩa 'mɔɔ 'lɛ cɩ 'wlu na yɔɔ neencla lebhe: «‑Kwlenyɔ, clɩɩ ‑naa nɩkplaan ‑n cɩ ka 'lɛ Izlayɛlɩbhlɩa* 'la Nyɩbhɛlɩdua ʋla tooto saa ple bha?» 7‑Ma ɔ ya maa 'cla lebhe: «Ɔla ‑kwleliea nɩkplaan, clɩɩa ɩya 'ŋwacɩa Toa 'titi zʋ 'lɛ na, ɩla cibhliliwɔlɩa 'ta ala wɔlɩ ‑glɩ. 8‑Ma a cɩ 'ka 'tɛtɩ bhlo 'lɩ, ‑Kplɔkplɔ ‑Wugoa* ‑ʋ cɩ 'ka 'lɛ anyɩ 'kʋ kwlili na ʋla 'tɛtɩa, ɩya a 'ka 'na ‑danʋfʋɛlinya 'plɩ, ‑ɩ bhɔlʋ 'lɛ Zolizalɛmʋ, Zudeebhlɩa ‑tɛtɛa ɩya Samaliibhlɩa 'kʋ ‑aan ‑dʋdʋa 'la ‑kotia ‑tɛtɛa nɩkplaan na.» 9Ɔ bhɩalɩ 'lɛ wɔlɩ ‑naa nyɩtɛlɩɛ na, ɔ ya fle 'nyɩ ɔ ‑gblaa ‑laagɔɔn. Ma ‑kʋɔ 'ciinkpeda ‑aan 'nyɩ ɔ ya maa 'nyukplu nɩkplaan 'ciinmlɔnʋ.
10Na, ma ‑kʋ kaa ‑laagɔa nɩkplaan kopeda, gbazɩa Zozii mʋa 'lɛ na, 'nyɩ ncɛlɩ ‑mɔsɔ ya 'lɛ maa cɩ futolu. Ma ‑bibiea loku 'pɔpʋ, 11'nyɩ ma ya maa neencla lebhe: «Galileenyanyɩ, 'lɩsaa 'la gbʋ a ‑kʋa 'lɛ ‑da 'nyɩ a kopea 'lɛ ‑laagɔa nɩkplaan bha? Zozii ‑naa Laagɔ ‑saa 'lɛ anyɩ sidiin na, 'saa ɔ 'lɩɔ 'lɛ 'nyɩ ɔ ‑gblaa 'lɛ ‑laagɔɔn na, 'sɛtɛɛ bhlogbɩɩ a cɩ 'kɔɔ 'lɛ 'lɩ ɩya ɔ 'ka 'lɛ cɔlɔ.»
Zozii 'la lobhulobhunyaa ‑kʋa nebhlo
12Na, ma ya 'kikea ma la 'lɛ ‑Olivʋsikikea na 'wlu 'wlʋ 'nyɩ ma ya Zolizalɛmʋ cɔlɔ. 'Kike ‑naa ‑ya Zolizalɛmʋ 'ta cɩ da tlʋtlʋlʋ, ɩ cɩ ‑sa ‑kiloo bhlo nʋ. 13Daa ma cɔlɔ 'lɛ na, ma ya ‑laagɔsidiinpalʋa 'wlu ‑gblaa, gbazɩa Pɩɛlɩ, Zaan, Zakɩ, Andlee, Filipʋ, Tomaa, Batelemii, Matie, Alɩfee ‑yowli Zakɩ, 'bhlɩkʋtɩtɔlʋnyɔ Simɔɔn ɩya Zakɩ ‑yowli Zudu 'cɩlɩa ‑azla 'lɛ 'wlu na. 14Maa ‑tɛtɛa 'wlalɩa pɔlɛ 'kʋ 'nyɩ ma bhibhiea klɛɛklɛɛ. 'Ŋwlɛ ‑zlʋsaasa ɩya Zozii nɔ Malii ɩya Zozii bholiecɩa ‑kʋmʋa maa sidiin.
Matɩasɩ ya Zuda 'la 'jeen 'plɩ
15'Dɛ 'la clɩɩa nɩkplaan, Pɩɛlɩ ya bholiecɩa sidiin 'kʋbho. Ncɛlɩa ‑ɔ 'wlalɩa 'lɛ 'dɛ 'wlu na cɩa ‑sa ‑gwlɩɩ ‑ngbʋflʋ 'plɩ. 'Nyɩ ɔ ya 'cla lebhe: 16«Bholiecɩnyɩ, ɩ ‑fataa lebhe ɩmɩa ‑Kplɔkplɔ ‑Wugoa* 'plɩlɩ 'lɛ Daviti 'kʋ 'nyɩ ʋ nyɩtɛ 'lɛ Zieziewɔlɩa* nɩkplaan na, ɩ ‑glalɩ 'kʋ. Ɩmɩ ‑glɩ 'lɛ Zuda, ‑ɔ pʋa 'lɛ maa ‑ɔ 'nylugolu 'lɛ Zozii na 'kʋklʋʋn na ɔla wɔlɩa. 17Ma zɛlɩmʋa 'mɔɔ ‑anyɩ sidiin 'nyɩ ma yaa lobholia ‑a nʋ 'lɛ na, ɔ 'nɩ 'nyɩ. 18‑Ma, nclɔɔ ‑naa yaa ɔla nyinyia ɔ nʋ 'lɛ na, 'la 'dalaa ɔ 'lɩ 'lɛ na 'ma, 'nyɩ ɔ yaa 'kwla ‑pɩa. Ama nɩkplaan ɔ slalɩ 'lɛ ‑blɩɩ sa, ɔla nɩkpla ya 'lɛ 'pʋ 'nyɩ ɔla nɩkplaan 'la 'mɩa ‑tɛtɛa ya 'lɛ dlolu. 19Zolizalɛmʋnyaa 'fɩan ya wɔlɩ ‑naa 'nu, 'nyɩ ma 'bhlɩwɔlɩa nɩkplaan, ma ya kwla ‑naa Akɛdamaa la. Ɩ sa ‑zɔn le ‑dolukwla. 20Ɩ ‑zieo labhlɩfluwaa nɩkplaan lebhe: Ɔla 'slea we ɩya nclɔɔ bhlogbɩɩ 'la kʋa kɩnɩa nɩkplaan. 'Nyɩ ɩ ‑zieo ‑awlɛ lebhe: 'Naa ‑buun nclɔɔ 'plɩ ɔla 'jeen. 21Daa ‑Kwlenyɔ Zozii ‑kʋa 'lɛ ‑anyɩ 'kʋklʋʋn 'nyɩ ‑a -yɔɔsɔ namʋa 'lɛ na, ncɛlɩ gɩlɩ ‑anyɩ. 22‑Ɩ bhɔlʋ 'lɛ daa Zaan zʋlʋɔ 'lɛ 'nyu 'wlu ‑aan clɩɩa 'kʋa ɔ 'wlʋ 'lɛ ‑anyɩ sidiin na, ma gɩlɩ ka ‑azla ‑anyɩ. Na, ɩ ‑fata lebhe mala sidiian nclɔɔ ‑ya ‑anyɩ 'plɩ ɔla 'kwɩɩnkʋbhuea 'la ‑danʋfʋɛlinya.»
23Ma ya ncɛlɩ ‑mɔsɔ ‑sa. Zozɛfʋ, ma la 'lɛ Basabasɩ 'nyɩ ma pa 'lɛ 'ŋlɩ 'kʋ ma 'lɛ Zusutusu na ɩya Matɩasɩ. 24Na, ma ya bhibhie 'nyɩ ma ya 'cla lebhe: «‑Kwlenyɔ, ‑mɔa ‑ɔ ‑ci 'lɛ ncɛlɩa 'fɩan 'la pɔlɛ na, pala ‑anyɩ ɔmɔa ‑n sla 'lɛ de 25le ‑naa lobhulobhunya* 'la lobholia nɩkplaan, ɔ 'ma kpoa Zuda te 'lɛ 'nyɩ ɔ ya 'lɛ amaa ‑a ‑glɩ 'lɛ ɔ 'naa na 'kʋ sakʋkan mʋ na.» 26Ma ya ‑nigbe 'pa, Matiasɩ 'la ‑nigbea ya li, 'nyɩ ma yɔɔ lobhulobhunyaa 'kʋgba bhloa 'kʋ ‑gbɛ.
Currently Selected:
Lobh 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.