Luk 24
DNT
24
Zozii ya 'kwɩɩnkʋbho
(Mat 28.1-8; Mak 16.1-8; Zan 20.1-13)
1Nyamaclɩɩ ‑zʋkpaa 'pɩɩ, 'ŋwlɛa ya 'ŋɔnɔpalɩɩa ma bhɔsʋaa 'lɛ na, 'ma 'nyɩ ma ya lesua 'kʋ mʋ. 2Ma ŋeni 'lɛ na, ma ya 'lɩ le cokwiea ‑ɛ ‑kpaslɩlɩa 'lɛ lesua na, ɛ yaa 'bhisio. 3Ma yʋʋ nɩkplaan ble, ‑ma ma 'taa ‑Kwlenyɔ Zozii 'la ‑blaanyɛkɛa 'lɩ. 4Na, maa 'lɩ 'taa 'lɛ saa 'titia ma 'kanɩa 'lɛ nʋnʋnʋ na, 'lɩka, ncɛlɩ ‑mɔsɔ ya maa 'ciinfutolu, ma pla lokua ‑ɩ le 'lɛ na nɩkplaan. 5Ŋanɔ ya 'ŋwlɛa pla 'nyɩ ma ya 'klʋ ‑dʋdʋ 'kʋ ‑la. Ncɛlɩa ya maa 'cla lebhe: «'Lɩsaa 'la gbʋ a 'matɩa 'lɛ ‑jajanyɔa 'kua sidiin bha? 6Ɔ 'ta ‑da ‑kʋ, ‑ma ɔ ya 'kwɩɩnkʋbho. A luoli ɩmɩa ɔ solua 'lɛ anyɩ, daa ɔ ‑kʋa 'lɛ Galileebhlɩa 'kʋ na.» 7Ɔ yaa 'cla lebhe: «Ɩ ‑fata le Nclɔɔa 'Cʋa* ‑zʋlʋɔ nyinyinʋnya wlɩɩn 'pɛlʋ, ɔ ‑bhoo dabhlalɩsu 'ciin ɩya ‑mɔta ‑zelia, ɔ ‑bho 'kwɩɩn 'kʋ.» 8Na, ma ya Zozii 'la wɔɔnyɩtʋa luoli.
9Ma ya lesua 'kʋ 'wlʋ 'nyɩ ma ya ɩmɩa ‑naa 'fɩan lobhulobhunyaa* 'kʋgba bhloa ɩya ‑danaanʋaa 'fɩan, 'dɩ 'kʋ ‑salɩ. 10Ŋwlɛɛ ‑naa ‑glɩa: Malii, Madalaa ŋlɔa, Zanɩ ɩya Zakɩ nɔ Malii. Maya ‑daa 'ŋwlɛa maya maasɔ namʋa 'lɛ na yɩɩ lobhulobhunyaa solu. 11‑Ma ɩ ‑kʋa maa 'ciin le yooyowɔlɩ, na ma 'tɩɩ ‑nʋawlɛ la. 12'Bhlɩmɔɔn, Pɩɛlɩ ya 'kʋbho, ɔ ya sɔmɩfa 'nyɩ ɔ ya lesua 'kʋ mʋ. Daa ɔ kwlili 'lɛ sa 'nyɩ ɔ kopeu 'lɛ nɩkplaan na, lokua ‑tɛɛ ɔ 'lɩ 'lɛ. Na, ɩ yɔɔ nikpoo sla 'nyɩ ɔ ya ɔ 'bhisleen mʋ.
Zozii ya gɩlɩnya ‑mɔsɔ 'ciin futolu
(Mak 16.12-13)
13Na, 'dɛ 'la clɩɩa bhlogbɩɩ 'kʋ gɩlɩnya* ‑mɔsɔ, mʋa dua ma la 'lɛ Emayusu na 'kʋ. Duu ‑naa ɩya Zolizalɛmʋ nʋ ‑kiloo 'kʋgba bhlo. 14Ma nyɩtɛa nʋnʋgbɩ ‑naa ‑tɛtɛa ‑ɩ 'plɩa 'lɛ na, 'la cɩa wɔlɩ. 15Na, daa ma ‑kʋa 'lɛ nyɩtɛda 'nyɩ ma 'tɩtɔa 'lɛ wɔlɩ na, Zozii 'titi ya maa cɩ mɛ 'nyɩ ɔya maasɔ namʋnʋa cɩ. 16Maa ‑jlɛa 'mɔɔ, ‑ma lʋʋ bhlo gbaa na, 'ma cibhlili 'taa 'mɔɔ. 17Zozii ya maa neencla lebhe: «Wɔɔsaa a nyɩtɛa 'lɛ 'nyɩ a namʋa 'lɛ bha?» Na, ma ya ‑cʋʋ 'plɩ 'nyɩ ma ya 'nylugo. 18Maa nɩkplaan bhlo, ma la 'lɛ Kleopasɩ na, yɔɔ neenŋonu lebhe: «‑Mɔɔ bhlogbɩɩ ‑tɛɛ ‑ɔ ‑kʋ 'lɛ Zolizalɛmʋdua nɩkplaan 'nyɩ ‑ɔ 'ta 'lɛ ɩmɩa ‑ɩ 'plɩ 'lɛ 'yɛpɩ clɩɩ ‑kli ‑naa nɩkplaan na 'nu!» 19Ɔ ya maa neencla lebhe: «‑Anɩsaa bha?» Ma yɔɔ neenŋonu lebhe: «Nazalɛtɩnyɔ Zozii, ɔ ‑glɩa 'lɛ Laagɔnekʋnyɩtɛnyɔ* 'kadie nʋnʋgbɩɩn ɩya wɔɔnyɩtʋʋn, Laagɔ ɩya 'bhlɩnyaa 'fɩan 'ci 'kʋ na, ɔla cɩa wɔlɩa: 20Saa ‑ala ‑teyiyinyaa tocɩa ɩya ‑ala ‑kwletocɩa ‑sasalɩɔ 'lɛ, ma zʋɔ 'lɛ 'tɩtɩ le ma 'bhlɔɔ 'nyɩ ma bhoo 'lɛ dabhlalɩsua 'ciin na. 21'Nyɩ ‑anyɩ, ‑a gugua le ɔmɔ ‑ɔ ‑cɩ kaa 'lɛ Izlayɛlɩbhlɩa* gbʋʋnsa. ‑Ma ɩmɩ ‑naa 'fɩan 'la 'wlukodaa ‑glɩ 'lɛ le wɔlɩ ‑naa ‑kaa 'lɛ 'plɩ na, 'lɩka ɩla ‑mɔta ‑zelɩa. 22'Bhlɩmɔɔn ‑ala nɩkplaan 'ŋwlɛ ‑zlʋsaasa ya ‑ala wɔɔgugwiea gblogblolu: Ma ya ‑zʋkpanɩ 'pɩɩ lesua 'kʋ mʋ 23'nyɩ ma 'ta 'lɛ ɔla ‑blaanyɛkɛa 'lɩ na, ma ya ci 'nyɩ ma ya 'cla lebhe maa ma ya 'bhlaandleecɩ 'ciinlɩ 'nyɩ ma nabhe ɔ ‑ja. 24‑Ala 'namʋnya ‑anʋa ya lesua 'kʋ mʋ 'nyɩ ɩmɩa mala 'ci 'lɩ 'lɛ na ɩya ɩmɩa 'ŋwlɛa 'bhli 'lɛ 'kʋ na, ‑ɩ ‑glɩ bhlo. 'Bhlɩmɔɔn, ɔmɔ ma 'tɔɔ 'lɩ.»
25Na, Zozii ya maa 'cla lebhe: «A ‑glɩ ncɛlɩa ‑ɔ 'ta 'lɛ dɩgalɩ ‑ci na, 'nyɩ ala pɔlɩa mino 'ta 'lɛ ɩya ɩ 'ka wɔlɩa Laagɔnekʋnyɩtɛnyaa 'bhli 'lɛ 'kʋ na ‑nʋawlɛ la! 26Ɩ 'taa ‑fata le Laagɔ 'la ‑Sasanyɔa*, 'kwlɩɩ ‑naa bhɩa 'mɔɔ ɩya ɔ ble Laagɔ 'la 'klʋagbaa nɩkplaan bha?» 27Na, ɔ ya Moyizi 'kʋ bhɔlʋ, ɔ ya Laagɔnekʋnyɩtɛnyaa 'fɩan 'kʋ 'plɩlɩ 'nyɩ ɔ ya maa ɔla cɩa wɔlɩa ‑ɩ ‑kʋa 'lɛ Zieziewɔlɩa* nɩkplaan na ‑zɔnsa.
28Daa ma mɛ 'lɛ 'dua 'kʋa gɩlɩnyaa ‑mɔsɔa mʋa 'lɛ na cɩ na, Zozii ya nʋ le saa ɔ mʋa 'lɛ 'kʋklʋʋn 'koonkoon na. 29‑Ma ma yɔɔ ne cɩ 'bhlalɩ 'nyɩ ma yɔɔ 'cla le: «Kʋ anyɩ cɩ, sa 'ylʋa ya tooto 'plɩ, 'nyɩ 'tutu mʋnɩ plakan.» 'Nyɩ ɔ ya ble le ɔ 'ka maa cɩ kʋ. 30Daa ɔya maasɔ 'plɩ 'lɛ 'tlɔnblɩ 'kʋ le ma 'kaa li na, ɔ ya 'flawoa 'ma, ɔ ya Laagɔ bhɔlʋ, ɔ yʋʋ 'kleendɩ 'nyɩ ɔ yʋʋ maa 'nyɩnɩ. 31Na, mala 'cia ya 'gbokalɩ 'nyɩ ma yɔɔ cibhlili. ‑Ma ɔ ya maa 'ciinmlɔnʋ. 32Na, ma 'claclalɩa neen lebhe: «Daa ɔ ‑kʋa 'lɛ ‑anyɩ ‑gugwiea 'kʋ, soluda, 'nyɩ ɔ saa 'lɛ ‑anyɩ Zieziewɔlɩa ‑zɔn na, ‑ala pɔlɩa 'dɩdɔ 'taa bha?»
33'Dɛ 'la 'ŋwacɩa bhlogbɩɩ 'kʋ, ma ya 'kʋbho 'nyɩ ma ya Zolizalɛmʋ cɔlɔ. Ma ya 'yɛpɩ gɩlɩnyaa 'kʋgba bhloa ɩya mala 'namʋnyaa 'wluwlalɩda ŋeni. 34Ma ‑naa ya ma 'cla lebhe: «‑Zaagbʋsa, ‑Kwlenyɔa ya 'kwɩɩnkʋbho 'nyɩ ɔ ya ɔcɩ Simɔɔn pala.» 35Na, maa ‑ma, ma ya ɩmɩa ‑ɩ 'plɩa 'lɛ ‑gugwiea 'kʋ ɩya saa ma cibhlili cibhlilia 'mɔɔ 'lɛ daa ɔ 'dɩdɩlɩa 'flawoa 'la 'kliin na, 'dɩkʋsalɩ.
Zozii ya ɔcɩ gɩlɩnyaa pala
(Zan 20.19-23)
36Na, daa gɩlɩnyaa* ‑mɔsɔa ‑kʋa 'lɛ ɩmɩ ‑naa nyɩtɛda na, Zozii 'titi ya maa 'ciinfutolu 'nyɩ ɔ ya maa 'cla lebhe: «Pupue ŋeni anyɩ.» 37Pɔlɛɛn ya maa 'wlʋ 'nyɩ ŋanɔ ya maa pla, ma gugua le 'kuo ma ‑jlɛa 'lɛ. 38‑Ma ɔ ya maa 'cla lebhe: «'Lɩsaa 'la gbʋ 'wugo ‑wlʋa 'lɛ anyɩ 'wlu 'nyɩ ala pɔlɩa ‑polioa 'lɛ bha?» 39A kope 'na ‑kɔgbʋa ɩya 'na kplia: ‑Amʋ 'titi ‑kʋ 'lɛ. A klaan cɩ, a kope. 'Wugo 'ta 'nyɛkɛ ‑ka naa, ʋ 'ta 'kwie ‑ka lesaa a ‑jlɛɛn 'lɛ 'nyɩ n ‑kɩɩ 'lɛ na. 40Daa ɔ nyɩtɛ 'lɛ ‑sa na, ɔ ya maa ɔla ‑kɔgbʋa ɩya ɔla kplia pala. 41Pɔlɛ 'kʋ mɛnɩa maa, 'nyɩ nikpoo ‑slaa maa, ‑ma maa la 'ta ka ‑azla ‑nʋawlɛ. Na, ɔ ya maa neencla lebhe: «A ‑ka ‑da lililʋʋ bha?» 42Ma yɔɔ ylaylazlii kle 'nyɩ. 43Ɔ yɛɛ 'ma 'nyɩ ɔ yɛɛ maa 'ci 'kʋ lili.
44'Nyɩ ɩla leean, ɔ ya maa 'cla lebhe: «'Lɩka wɔlɩ ‑naa n solua 'lɛ anyɩ, daa n ‑ya anyɩsɔ ‑kʋ kaa 'lɛ na: Ɩ ‑fata le 'na cɩa wɔlɩa ‑tɛtɛa ‑ɩ ‑zieo 'lɛ Moyizi 'la ‑jlɩmaa, Laagɔnekʋnyɩtɛnyaa 'la ‑afluwia ɩya labhlɩfluwia nɩkplaan na, ɩ ‑glalɩ 'kʋ.» 45Na, ɔ ya mala wɔɔgugwiea 'gbokalɩ le ma 'kaa Zieziewɔlɩa* 'la ‑zɔn 'nu, 46'nyɩ ɔ ya maa 'cla lebhe: «Sɛɛ ɩ ‑zieo 'lɛ: 'Kwlɩ cɩ ka Laagɔ 'la ‑Sasanyɔa* bhɩa ɩya ‑mɔta ‑zelia, ɔ 'ka 'kwɩɩnkʋbho. 47Ma cɩ 'ka ɔla 'ŋlɩa nɩkplaan, 'bhlɩ 'bhlɩ 'kʋ 'la ncɛlɩa ‑tɛtɛa kwlacalalɩɛ ɩya nyinyivalɩɛ plici. Zolizalɛmʋ ma cɩ 'ka 'lɛ bhɔlʋ. 48Anyɩ ‑ɔ ‑glɩ 'lɛ ɩmɩ ‑naa 'la ‑danʋfʋɛ. 49Na, ‑amʋ n cɩ 'ka gba ɩya ‑ndanyɩa n To ta 'lɛ na, ka anyɩ 'kʋ ŋeni. ‑Ma anyɩ, a kʋ 'dua nɩkplaan ‑aan ɩya ‑laagɔɔn 'la 'tɛtɩa 'ka anyɩ nɩkplaan ble.»
Zozii ya ‑laagɔɔn ‑gblaa
(Mak 16.19; Lobh 1.4-14)
50Na, Zozii ɔ ya ɔla gɩlɩnyaa* Betaniidua cɩ famʋ. Ɔ ya sɩ 'kʋbho 'nyɩ ɔ ya maa 'nyupalɩ. 51'Nyɩ daa ɔ ‑kʋa 'lɛ maa 'nyupalɩdaa na, ɔya maasɔ ya cɩsasalɩ, ɔ ya fle 'nyɩ ɔ ya ‑laagɔɔn mʋ. 52‑Ɔ ‑glɩ 'lɛ maa na, ma yɔɔ ‑deliin ‑kukoonkplii sasla 'nyɩ maya pɔlɛkʋmɛnɔ ya Zolizalɛmʋ cɔlɔ. 53Na, clɩɩa ‑tɛtɛa, ma ‑kʋa Laagɔpaakadiea* ‑zɔn, ma woa Laagɔ ‑evli.

© 2013 Bible Society of Côte d'Ivoire

Learn More About New Testament