Zan 21
21
Zozii ya gɩlɩnyaa ‑ngbɔɔsɔa 'ciinfutolu
(Luk 5.1-11)
1Ɩmɩ ‑naa 'la leen, Zozii ya ‑awlɛ ɔcɩ gɩlɩnyaa* pala, Tibeliadɩ 'la 'nyɩa cɩ. 'Lɩka saa ɔ palapalalɩ 'lɛ maa ɔcɩ na. 2Simɔɔn Pɩɛlɩ, Tomaa ma la 'lɛ daplɩcoa na, Natanayɛlɩ ‑ɔ 'wlʋlʋ 'lɛ Galileebhlɩa 'kʋ 'la 'dua ma la 'lɛ Kanaa 'kʋ na, Zebedee 'la 'cuoa ɩya ‑daa gɩlɩnya ‑mɔsɔ, ‑kʋa nebhlo. 3Simɔɔn Pɩɛlɩ ya maa 'cla lebhe: «N mʋ ka 'nyi 'kʋtaan.» Ma yɔɔ 'cla lebhe: «Ka ‑ayɔɔsɔ mʋ 'lɛ.» 'Nyɩ, ma ya 'kʋbho, ma ya gɔlʋa nɩkplaan 'tɔ 'nyɩ ma ya mʋ. ‑Ma 'dɛ 'la dobhea ma 'taa lʋʋ ‑ylɛylɛ 'lɩ. 4Na, daa ‑zeli mʋ 'lɛ zekan na, Zozii ‑kʋa 'nyia cɩ. ‑Ma gɩlɩnyaa 'taa sɛɛ ‑ci lebhe ɔmɔ ‑kʋa 'lɛ 'dɛ. 5Zozii ya maa neencla lebhe: «'Naa 'cuonyɩ, a 'ta ‑zlii pɛ ‑ka bha?» ‑Ma yɔɔ neenŋonu lebhe: «‑Wɔɔ!» 6Na, ɔ ya maa 'cla lebhe: «A 'palɩ ‑dadaa gɔlʋa 'la 'lipasɔa 'kʋ ɩya 'ka ‑zlii 'kʋbhli.» Ma ya ‑dadaa 'pa 'nyɩ saa 'tɩtɩa ‑zliia ma bhli 'lɛ 'kʋ na, ɩ ‑zua 'lɛ na, maa mino 'taanɩa ɩya ma 'kaa ‑dadaa 'nyiin ‑sa. 7Na, gɩlɩnyɔa* Zozii ‑waa 'lɛ ‑gbɔɔn na, ya Pɩɛlɩ 'cla lebhe: «‑Kwlenyɔa ‑kʋ 'lɛ!» Daa Simɔɔn Pɩɛlɩ 'nu 'lɛ wɔlɩ ‑naa na, ɔ ya ɔla nɩkplaanplalokwia guoon gʋalɩ, 'nyɩ ɔ ya 'nyiin bhlili, sa ɔ 'taa nɩkplaaan -pla na.
8‑Daa gɩlɩnyaa ya gɔlʋa 'lu, ma ya ‑dadaa ‑a yea 'lɛ ‑zlii 'kʋ na jli 'nyɩ ma ya 'nyigboa 'kʋ 'pɛ. Daa ma ‑kʋa 'lɛ na, ɩya 'nyigboa 'kʋ cɩa ‑sa 'mɛtlɩ ‑gwlɩɩ ‑ngbi nʋ. 9Daa ma 'wlʋ 'lɛ gɔlʋa nɩkplaan, 'nyɩ ma kwli 'lɛ na, ma ya dɩpɩa ‑kosu ŋeni, ‑zlii ‑gbɛa 'mʋʋ 'kʋ 'nyɩ 'flawo ‑kʋa dɩpɩa. 10Zozii ya maa 'cla lebhe: «‑Zliia a bhli 'lɛ 'kʋ na, a ‑lamʋ ‑zlʋsaasa.» 11Simɔɔn Pɩɛlɩ ya gɔlʋa nɩkplaan 'tɔ, ɔ ya ‑dadaa jli, 'nyɩ ɔ yaa 'nyɩgbo 'kʋ ‑la. A yea ‑zlii 'kadɩ ‑gwlɩɩ ‑ngbɔɔsɔ ɩya 'kʋgba ‑mɔta 'lɛ 'kʋ. ‑Zliia ‑zua 'bhlɩɩ, ‑ma ‑dadaa 'ta 'ŋatɔ. 12Zozii ya maa 'cla lebhe: «A ci ɩya a 'ka li.» Gɩlɩnyaa ‑cia sɛɛ lebhe ‑Kwlenyɔa ‑kʋ 'lɛ 'bhlɩ, ‑ma maa nɩkplaan bhlogbɩɩ 'lɩ 'taa 'tɛtɩ ɩya ɔ 'ka 'mɔɔ neecla lebhe: «Ncaasaa ‑n ‑glɩa 'lɛ bha?» 13Na, Zozii ya ‑kosua cɩ ci, ɔ ya 'flawoa 'ma, ɔ yʋʋ maa poli. Ɔ ya maa ‑zliia ‑ma poli. 14Daa Zozii ‑kaa 'lɛ 'kwɩɩn 'kʋ ‑bho na, ‑mɔtada ɔ futolua 'lɛ ɔla gɩlɩnyaa 'ciin.
Zozii ya ɔla 'bhlabhlɩa Pɩɛlɩ wlɩɩn zʋ
15Daa ma bhɩalɩ 'lɛ lilɩɛ na, Zozii ya Simɔɔn Pɩɛlɩ neencla lebhe: «Zaan ‑yowli Simɔɔn, ‑n ‑waan 'nyɩ ‑n zi ‑anʋa ‑naa 'kʋ bha?» Pɩɛlɩ yɔɔ neenŋonu lebhe: «‑Ghɛɛ, ‑Kwlenyɔ, ‑n ‑ci sɛɛ lebhe n ‑wɔɔ.» Na, Zozii yɔɔ 'cla lebhe: «Kpa 'na 'bhlabhlɩa.» 16Zozii yɔɔ ‑mɔsɔda neencla lebhe: «Zaan ‑yowli Simɔɔn, ‑n ‑waan bha?» Ɔ yɔɔ neenŋonu lebhe: «‑Ghɛɛ, ‑Kwlenyɔ, ‑n ‑ci sɛɛ lebhe n ‑wɔɔ.» Zozii yɔɔ 'cla lebhe: «'Plɩ 'na 'bhlabhlɩa 'la kpanyɔ.» 17Ɔ ya ‑awlɛɔ ‑mɔtada neencla lebhe: «Zaan ‑yowli Simɔɔn, ‑n ‑waan bha?» Pɩɛlɩ ya cɩɩnkalɔ 'lɩ, ‑ofi lebhe Zozii yɔɔ ‑mɔtada neencla lebhe: «‑N ‑waan bha?» 'Nyɩ ɔ yɔɔ neeŋonu lebhe: «‑Kwlenyɔ, ‑mɔa ‑ɔ ‑ci 'lɛ wɔlɩa ‑tɛtɛa na, ‑n ‑ci sɛɛ lebhe n ‑wɔɔ ‑ma!» Na, Zozii yɔɔ 'cla lebhe: «Falɩ 'na 'bhlabhlɩa pɔlɛ cɩ.» 18'Nyɩ ɔ ya ‑awlɛɔ 'cla lebhe: «N soluo mɩ, ɩ ‑glɩ ‑nʋawlɛ, daa ‑n ‑glɩa 'lɛ nyɩgbɩɔ na, ‑mɔɔ 'titii ylo 'lɛ ‑ncɩ 'nyɩ ‑n mʋ 'lɛ daa ‑n ‑wa 'lɛ na. ‑Ma daa ‑n ‑cɩ ka 'lɛ ‑glɛɛglɛnyɔ 'plɩ na, ‑n ‑cɩ ka ‑naa sɩa neen lɛlɩ ɩya ‑buun nclɔɔ 'kɔɔ 'lɛ ylo ɩya ɔ kɔɔ 'lɛ gbazɩa ‑n 'ta 'lɛ ‑wa na, fa.» 19Ka Zozii nyɩtɛ 'lɛ ‑sa ɩya ɔ 'ka 'kwɩa Pɩɛlɩ cɩ 'ka 'lɛ 'ku ɩya ɔ 'ka 'lɛ Laagɔ 'klʋgba na pala. Na daa Zozii 'bhli 'lɛ ɩmɩ ‑naa 'kʋ na, ɔ ya Pɩɛlɩ 'cla lebhe: «Gɩlɩɩn.»
Pɩɛlɩ ɩya Zozii nyɩtɛ Zaan 'la wɔlɩ
20Daa Pɩɛlɩ cala 'lɛ kwla na, ɔ ya gɩlɩnyɔa* Zozii ‑waa 'lɛ ‑gbɔɔn na, macɩ leen 'lɩ. Ɔmɔ ‑ɔ faa 'lɛ ɔla 'wlua Zozii cɩ, daa ma ‑kʋa 'lɛ lida na, 'nyɩ ɔ yɔɔ 'lɛ neencla lebhe: «‑Kwlenyɔ, ncaasaa ‑ɔ cɩ kɔɔ 'lɛ 'pɛlʋzʋ bha?» 21Na, daa Pɩɛlɩ 'lɩɔ 'lɛ na, ɔ ya Zozii neencla lebhe: «‑Kwlenyɔ, 'nyɩ ‑anɔ ‑naa, wɔɔsaa ‑ɩ cɩ kɔɔ 'lɛ ŋeni bha?» 22‑Ma Zozii yɔɔ 'cla lebhe: «Ɩ ‑ka ‑kʋ lebhe n ‑ka ‑wa lebhe ɔ kʋ ‑aan ɩya 'na cidaa 'ka ŋeni na, 'lɩsaa ɩ cɩ kɔɔ 'lɛ nʋ bha? ‑Mɔɔ, 'maa gɩlɩɩn!» 23Na, wɔlɩ ‑naa ya ‑daa gɩlɩnyaa* cɩ ŋeni le gɩlɩnyɔ ‑naa cɩ 'taa 'ku. 'Bhlɩmɔɔn, Zozii 'ta ka Pɩɛlɩ 'cla lebhe 'dɛ 'la gɩlɩnyɔa cɩ 'taa 'ku, ‑ma ka ɔ 'clɔɔ 'lɛ lebhe: «N ‑ka ‑wa lebhe ɔ kʋ ‑aan ɩya 'na cidaa 'ka ŋeni na, 'lɩsaa ɩ cɩ kɔɔ 'lɛ nʋ bha?»
Bhɩalɩwɔlɩ
24Gɩlɩnyɔ* ‑naa, ɔmɔ -ɔ li 'lɛ wɔlɩ ‑naa 'la ‑danʋfʋɛ 'nyɩ ɔ yɩɩ 'lɛ zie. 'Nyɩ ‑a ‑ci lebhe ɔla ‑danʋfʋɛliliea ‑glɩ ‑nʋawlɛ. 25Zozii ya ‑awlɛ ‑buun -wɔlɩ ‑bhutukpa nʋ. ‑Ma ɩ ‑ka ‑kʋ lebhe ma ‑kaa ɩmɩa ‑tɛtɛa bhloonbhloon zie na, n gugu 'ta lebhe ‑afluwia ‑ɩ cɩ kaa 'lɛ ‑zieo na, ɩ cɩ 'kaa ‑laagɔzɔan plalɩɛ mino.
Currently Selected:
Zan 21: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.