Zan 2
DNT
2
Zozii 'la ‑bɛka ‑ciinzizielɩlobholi
1Na, ‑mɔta ‑zelia ze 'lɛ na, 'cɩcɩɛ ‑kʋa Galileebhlɩa 'la 'dua ma la 'lɛ Kanaa na 'kʋ. Zozii 'nɔ ‑kʋa 'dɛ. 2Ma ya Zozii ‑ma ɔya ɔla gɩlɩnyaa* 'cɩcɩɛnʋtlɔnblɩa 'kʋ la. 3Sa ‑diinvɛɛn 'taanɩa 'lɛ ‑kʋ na, Zozii 'nɔ yɔɔ 'cla lebhe: «Ma 'tanɩ ‑diinvɛɛn ‑ka.» 4‑Ma Zozii yɔɔ 'cla lebhe: «N 'nɔ, wɔɔsaa ‑kʋa 'lɛ n ‑yɔɔsɔ ‑gbaaglɩɩn bha? 'Na 'ŋwacɩa 'ta ka ka ŋeni.» 5Ɔ 'nɔ ya lobhocuoa 'cla lebhe: «Ɩmɩa 'fɩan ɔ cɩ 'ka 'lɛ anyɩ solu na, a nʋɩ.»
6Cɔkʋnyukondi ‑ngbʋflʋ ‑kʋa dɩpɩa, Zifʋnyaa* zʋa 'lɛ 'nyuun le ma 'ka cɩ wɔlʋ saa mala ‑jlɩmaa bhli 'lɛ 'kʋ na. 'Nyukonde bhlo cɩa ‑sa 'anbhlu bhlo ‑aana 'anbhlu bhlo ɩya 'kle 'wlʋ. 7Na, Zozii ya lobhocuoa 'cla lebhe: «A yeli 'nyukondi ‑naa 'nyu 'kʋ.» 'Nyɩ ma yɩɩ yeli ‑tɛkɛ ‑tɛkɛ. 8Zozii ya 'maa 'cla lebhe: «A 'lunɩ ‑pɔtɔnʋ ɩya a fa 'tlɔnblɩa toa.» Ma yɔɔ mʋ fa 9'nyɩ ɔ ya 'nyua ‑ʋ kaci 'lɛ ‑diinvɛɛan na neencla. Ɔ 'taa daa ɛ 'wlʋlʋa 'lɛ na ‑ci, ‑ma lobhocuoa ‑ɔ 'lua 'lɛ 'nyua na, maa ma ‑cia daa ɛ 'wlʋlʋa 'lɛ na. Na, ɔ ya 'cɩcɩɛnʋnyɔa la 10'nyɩ ɔ yɔɔ 'cla lebhe: «Ncɛlɩa 'fɩan ‑diinvɛɛn 'nanɛa ma polili 'lɛ ‑bɛɛ 'nyɩ daa lalanyaa ya 'lɛ 'mla ‑aan 'nyɩ ma yanɩ 'lɛ lo na, ma lamʋnɩ 'lɛ ɛmɛa ‑ɛ 'ta 'lɛ ‑gbɔɔn nanɩ na. ‑Ma ‑mɔɔ ‑n ya ‑diinvɛɛn 'nanɛa saazʋ ‑aan ‑daandanɩ!»
11Na, 'lɩka Zozii 'la ‑bɛka -ciinzizielɩlobholia ‑ɩ 'plɩlɩ 'lɛ 'yɛpɩ Kanaa, Galileebhlɩa 'kʋ na. Ɔ ya ɔla 'klʋagbaa pala 'nyɩ ɔla gɩlɩnyaa ya ɔla pɔɔtɛtɛ 'lɩ. 12Ɩla leen, ɔya ɔ 'nɔ, ɔ bholiecɩ ɩya ɔla gɩlɩnyaa ya 'dua ma la 'lɛ Kapɛnayumʋ na 'kʋ mʋ, ‑ma clɩɩ ‑zlʋsaasa ‑tɛɛ ma li 'lɛ 'yɛpɩ.
Zozii ya Laagɔpaakadiea ‑zɔn ble
(Mat 21.12-13; Mak 11.15-17; Luk 19.45-46)
13Zifʋnyaa* 'la geyliinwlʋfɛtlɩa* yaa cɩmɛ 'nyɩ Zozii ya Zolizalɛmʋ mʋ. 14Ɔ ya Laagɔpaakadiea* ‑zɔn ble 'nyɩ ɔ ya 'yɛpɩ bhlii, 'bhlabhlɩ, 'kpakpɩ 'la 'pɛlʋzʋnya ɩya 'dalakacinya sakʋda ŋeni. 15Na, ɔ ya 'bhli 'ma, ɔ yɩɩ ‑ngblie cɩ nʋ 'nyɩ ɔ ya maa 'fɩan Laagɔpaakadiea ‑zɔn 'tli, maya mala 'bhlabhlɩa ɩya mala bhliicɩa. Ɔ ya 'dalakacinyaa 'la 'dalaa dlolu, ɔ ya mala 'tlɔnblɩcɩa sagblii 16'nyɩ ɔ ya 'kpakpɩpɛlʋzʋnyaa 'cla lebhe: «A ‑sa ‑da ɩmɩ ‑naa 'fɩan ɩya a 'la plea n To 'la ‑palʋa 'kɔsɛylapalʋ.» 17Na, ɔla gɩlɩnyaa* ya luoli le ɩ ‑zieo lebhe: «‑Naa ‑palʋa 'la 'tʋ bhlaan ‑gbɔɔn.»
18Zifʋnyaa tocɩa yɔɔ neencla lebhe: «Ɩmɩa ‑n nʋ 'lɛ ‑sa na, 'ciinzizielɩlobholi saa ‑n -cɩ kaa 'lɛ nʋ ɩya ‑n ka ‑anyɩ pala lebhe ‑n ‑ka ɩla ‑jioli bha?» 19Zozii ya maa 'cla lebhe: «A gbɔlʋ Laagɔpaakadie ‑naa, ‑ma clɩɩ ‑mɔta ‑gbaaglɩɩn n cɩ 'kʋʋ 'sla.» 20Na, Zifʋnyaa yɔɔ 'cla lebhe: «‑Palʋ ‑naa 'la 'slalɩɛa ya liowli ‑gwlɩɩ ‑mɔsɔ ɩya ‑ngbʋflʋ 'ma, 'nyɩ ‑mɔɔ ‑n cɩʋ clɩɩ ‑mɔta ‑gbaaglɩɩn 'slalɩ bha?» 21‑Ma ɔmɔ, ɔla 'nyɛkɛa 'la wɔlɩ ɔ nyɩtɛa 'lɛ. 22Na, daa Zozii ‑bho 'lɛ 'kwɩɩn 'kʋ na, ɔla gɩlɩnyaa ya luoli lebhe ɔ ya sɛɛ 'kʋbhli 'nyɩ ma ya Zieziewɔlɩa* ɩya ɔla niwɔlɩa ‑nʋawlɛ la.
Zozii ‑ci nclɔɔ
23Daa Zozii ‑kʋa 'lɛ Zolizalɛmʋ, Zifʋnyaa* 'la geyliinwlʋfɛtlɩa* 'kʋ na, ncaabhutukpa yɔɔ mala pɔɔtɛtɛa 'kʋ zʋ, 'ciinzizielɩlobholia ɔ nʋa 'lɛ 'nyɩ ma 'lɩ 'lɛ na 'la gbʋ. 24‑Ma Zozii, ɔmɔ ɔ 'taa mala pɔɔtɛtɛ ‑ka, sa ɔ ‑cia maa 'fɩan 25'nyɩ 'ɔ 'matɩ 'taa lebhe ma soluanɩa 'mɔɔ nclɔɔ 'la cɩa wɔlɩ, sa ɔmɔ 'titi ɔ ‑cia ɩmɩa ‑ɩ ‑kʋ 'lɛ nclɔɔ nɩkplaan na.

© 2013 Bible Society of Côte d'Ivoire

Learn More About New Testament