Zan 18
18
Ma ya Zozii 'kʋ bhli
1Daa Zozii bhɩalɩ 'lɛ ‑sa nyɩtɛlɩɛ na, ɔya ɔla gɩlɩnyaa* ya 'nyidɔlʋa ma la 'lɛ Sedlɔɔn na, leen mʋ. 'Kɔɔkuo ‑kʋa dɩpɩa, ɔya ɔla gɩlɩnyaa yaa nɩkplaan ble. 2Zuda, ɔmɔa ‑ɔ zʋa 'mɔɔ 'lɛ 'pɛlʋ na, ‑cia dɩpɩa da, sa ka Zozii ‑ya ɔla gɩlɩnyaa mʋa ‑azla 'yɛpɩ na. 3Na, Zuda ‑ya 'sojaa 'la 'kpaa ɩya Laagɔpaakadiea* 'la ‑bɛnyaa, ‑teyiyinyaa tocɩa ɩya Falizɩɛnnyaa* ‑sa 'lɛ na, ya 'kɔkuoa kla. Ma bhɛa ylɩ, ‑kaniecɩ ɩya 'papalɩɩ.
4Na, Zozii ‑cia 'lɛ ɩmɩa ‑tɛtɛa ‑ɩ ‑cɩ kaa 'mɔɔ 'lɛ ŋeni na, ɔ ya maa 'bɩɩnmʋnʋ 'nyɩ ɔ ya maa neencla lebhe: «Ncaasaa a 'matɩa 'lɛ bha?» 5Ma yɔɔ neenŋonu lebhe: «Nazalɛtɩnyɔ Zozii.» Ɔ ya maa 'cla lebhe: «‑Amʋ ‑kʋ 'lɛ.» Zuda, ɔmɔa ‑ɔ zʋa 'mɔɔ 'lɛ 'pɛlʋ na, 'nylugoa maa sidiin. 6Na, daa Zozii 'cla 'lɛ maa lebhe: «‑Amʋ ‑kʋ 'lɛ na», maa 'fɩan ya leenleen mʋnʋ 'nyɩ ma ya bhli. 7'Nyɩ Zozii ya ‑awlɛ maa neen 'cla lebhe: «Ncaasaa a 'matɩa 'lɛ bha?» Ma yɔɔ neenŋonu lebhe: «Nazalɛtɩnyɔ Zozii» 8Na, Zozii ya maa 'cla lebhe: «N ya anyɩ sɛɛ tooto 'cla lebhe ‑amʋ ‑kʋ 'lɛ. Na, ɩ ‑ka ‑kʋ lebhe ‑amʋ a 'matɩ 'lɛ na, 'dɛndlana a 'talɩ ‑anʋa ‑naa 'cin ɩya ma mʋ.» 9'Lɩka ‑sa ɩmɩa ɔ 'bhlia 'lɛ 'kʋ na ‑glalɩ 'lɛ 'kʋ, daa ɔ 'claa 'lɛ lebhe: «Maa ‑n 'nyɩɩn 'lɛ na, n 'ta bhlogbɩɩ damlɔ.»
10Na, Simɔɔn Pɩɛlɩ ‑kaa lɛtɛ. Ɔ yɛɛ ɛla tɩkpaa nɩkplaan ‑sa, ɔ ya ‑teyiyinyɔ ‑kpasa 'la lobhocoa 'kʋpa 'nyɩ ɔ ya ɔla 'lipasɔnyukwlia 'kʋdɩ. Lobhoco ‑naa, ɔmɔ ma laa 'lɛ Makusu. 11‑Ma Zozii ya Pɩɛlɩ 'cla lebhe: «Cala ‑naa lɛtɛa ɛla tɩkpaa nɩkplaan. ‑Kɔbhɛa n To 'nyɩ 'lɛ na, n cɩ 'tɛɛ 'mla bha?»
Ma ya Zozii ‑teyiyinyɔ Anɩ ‑deliin fa
(Mat 26.57-58; Mak 14.53-54; Luk 22.54)
12'Sojanyaa 'la 'kpaa ‑ya mala ‑kwletoa ɩya Zifʋnyaa* tocɩa 'la ‑bɛnyaa ya Zozii 'kʋbhli 'nyɩ ma yɔɔ gʋa. 13‑Bɛɛ, ma yɔɔ ‑teyiyinyɔ Anɩ ‑deliin fa. Ɔmɔ ‑naa ‑glɩa Kayifʋ, ‑ɔ ‑glɩa 'lɛ 'dɛ 'la lioa nɩkplaan ‑teyiyinyɔ ‑kpasaa na, ɔla 'mɩsɩa. 14Kayifʋ ‑naa, ɔmɔ 'cla 'lɛ Zifʋnyaa lebhe: «Ɩ nanɩ ala da lebhe nclɔɔ bhlogbɩɩ 'ku ncɛlɩa 'fɩan 'la 'jeen.»
Pɩɛlɩ ya cɩcɛlɩ
(Mat 26.69-70; Mak 14.66-68; Luk 22.55-57)
15Simɔɔn Pɩɛlɩ ɩya ‑daa gɩlɩnyɔ* bhlo yaa Zozii gɩlɩ. Sa gɩlɩnyɔ ‑naa ‑cia 'lɛ ‑teyiyinyɔ kpasaa na, ɔya Zozii ya ɔ 'bhisleen ble. 16‑Ma Pɩɛlɩ ya ‑jlukuun 'sligbinea cɩ ‑to. Na, ‑daa gɩlɩnyɔa ‑teyiyinyɔ kpasaa ‑cia 'lɛ na, ya ‑zɔnwlʋ, ɔ ya 'ŋlɔa ‑ɔ ‑bɛa 'lɛ gbinea na solu 'nyɩ 'ŋlɔa ya Pɩɛlɩ blee. 17Lobhoŋlɔa ‑ɔ ‑bɛa 'lɛ gbinea na, ya Pɩɛlɩ neencla lebhe: «‑Mɔɔ ‑masɛ, ‑n 'ta nclɔɔ ‑naa 'la gɩlɩnyɔ ‑glɩmʋ bha?» ‑Ma Pɩɛlɩ yɔɔ neenŋonu lebhe: «N 'ta maa nɩkplaan -kʋmʋ.» 18Lobhocuoa ɩya Laagɔpaakadiea* 'la ‑bɛnyaa ya ‑kosu ‑zla 'nyɩ ma wɔlɔa, sa wɔtlɩa cia na. Pɩɛlɩ ‑kʋmʋa maa cɩ 'nyɩ ɔ wɔlɔa ‑kosu.
‑Teyiyinyɔ ‑kpasaa claa Zozii neen
(Mat 26.59-66; Mak 14.55-64; Luk 22.66-71)
19Anɩ, ‑teyiyinyɔ -kpasaa ya Zozii, ɔla gɩlɩnyaa* ɩya ɔla cacawɔlɩa 'la cɩa wɔlɩ neencla. 20Zozii yɔɔ neenŋonu lebhe: «'Clikpoon n solulu 'lɛ ncɛlɩa 'fɩan. Bhibhiepalɩa* ‑zɔn n calɩ 'lɛ clɩɩa 'fɩan. 'Nyɩ Laagɔpaakadiea* ‑zɔn, daa Zifʋnyaa* 'fɩan 'wlalɩ 'lɛ 'wlu na, n ta wɔlɩ ‑ylɛylɛ ziziekoteen nyɩtɛlɩ. 21Na, 'lɩsaa la gbʋ ‑n claan 'lɛ neen bha? Ɩmɩa n nyɩtɛ 'lɛ na, 'clɩɩ maa ‑ɔ 'nuɩ 'lɛ na neen. Ma ‑ci ɩmɩa n nyɩtɛ 'lɛ na wɩaan.» 22Na, daa Zozii 'bhli 'lɛ wɔlɩ ‑naa 'kʋ na, ‑bɛnyaa nɩkplaan bhlo ‑ɔ ‑kʋa 'mɔɔ 'lɛ cɩ na, yɔɔ 'ciinsɛpɛ 'nyɩ ɔ yɔɔ 'cla lebhe: «‑Sa ‑n solu 'lɛ ‑Teyiyinyɔ ‑kpasaa bha?» 23‑Ma Zozii yɔɔ 'cla lebhe: «Ɩ ‑ka 'kʋ lebhe n ya wɔɔnyinyi nyɩtɛ na, 'maa ‑sɩɩ ‑zɔn. 'Nyɩ ɩ ‑ka ‑kʋ lebhe 'nanɩ n nyɩtɛ 'lɛ na, 'lɩsaa 'la gbʋ ‑n bhlaan 'lɛ bha?» 24Na, Zozii 'la gʋagʋa ‑naanɔa, Anɩ 'cla 'lɛ lebhe ma fa ‑teyiyinyɔ -kpasaa ma la 'lɛ Kayifʋ na, 'bhlɩ.
Pɩɛlɩ ya ‑awlɛ cɩcɛlɩ
(Mat 26.71-75; Mak 14.69-72; Luk 22.58-62)
25'Dɛ 'la daa, Simɔɔn Pɩɛlɩ ‑kʋa ‑kosua cɩ, ɔ wɔlɔa. Ma yɔɔ neencla lebhe: «‑Mɔɔ ‑ma, ‑n 'ta ɔla gɩlɩnyaa* nɩkplaan bhlo ‑glɩmʋ bha?» ‑Ma Pɩɛlɩ ya cɩcɛlɩ 'nyɩ ɔ ya 'cla lebhe: «N 'ta maa nɩkplaan ‑kʋmʋ.» 26‑Teyiyinyɔ ‑kpasaa 'la lobhoco bhlo, ‑ɔ ‑glɩa 'lɛ nclɔɔa Pɩɛlɩ 'dɩa 'lɛ 'nyukwlia 'kʋ na, 'la 'lɔlʋnyɔ na, yɔɔ neencla lebhe: «N 'ta ‑n ‑yɔɔsɔ 'kɔkuoa nɩkplaan 'lɩ bha?» 27‑Ma Pɩɛlɩ ya ‑awlɛ cɩcɛlɩ 'nyɩ dɩpɩa bhlogbɩɩ ‑gʋgɔ ya 'pa.
Zozii ‑kʋ Pilatɩ ‑deliin
(Mat 27.1-2,11-14; Mak 15.1-5; Luk 23.1-5)
28Na, ma ya Zozii Kayifʋ 'bhlɩ 'ma 'nyɩ ma yɔɔ goonvlaa 'bhisleen fa. Ɩ ‑glɩanɩa ‑zʋkpasa 'pɩɩ. ‑Ma Zifʋnyaa* tocɩa 'ta goonvlaa 'la 'slea nɩkplaan blemʋ, sa ma ‑waa lebhe ma 'kaa cɩkplɔ ɩya ma 'kaa geyliinwlʋfɛtlɩa* lilɩɛ mino. 29Na, Pilatɩ, ‑ɔ ‑glɩa 'lɛ goonvla na, ya maa ‑jlukuun ŋeni 'nyɩ ɔ ya maa neen 'cla lebhe: «Wɔɔnyinyisaa a gɩa 'lɛ nclɔɔ ‑naa 'kʋ bha?» 30Ma yɔɔ neenŋonu lebhe: «Ɩ ‑ka ‑kʋ lebhe nclɔɔ ‑naa 'ta wɔɔnyinyi nʋ na, ‑a cɩa -mɔɔ mɔ ‑la bha?» 31Na, Pilatɩ ya maa 'cla lebhe: «A 'mɔɔ ɩya a 'plɩlɩ anyɩ 'titi ala ‑jlɩmaa 'kʋ ɩya a ‑pla ɔla 'tɩtɩa.» ‑Ma, ma yɔɔ 'cla lebhe: «‑A 'ta ‑jioli ‑ka ɩya ‑a ka nclɔɔ 'bhla.» 32'Lɩka ‑sa wɔlɩa Zozii nyɩtɛa 'lɛ lebhe ɔ cɩ 'kaa saa ɔ cɩ 'kaa 'lɛ 'kukulu na, pala na, ‑glalɩ 'lɛ 'kʋ.
33Na, Pilatɩ ya ɔla ‑palʋa ‑zɔn ble, ɔ ya gba ma ya Zozii la, 'nyɩ ɔ yɔɔ neen 'cla lebhe: «‑Mɔ ‑glɩ 'lɛ Zifʋnyaa* 'la nyɩbhɛlʋa bha?» 34Zozii yɔɔ 'cla lebhe: «‑Naa 'wluun n nyɩtɛlɩ 'lɛ ɩmɩ ‑naa bha? ‑Ma ka ‑buun ncɛlɩ soluo 'lɛ 'na wɔlɩ, dɛ ‑n gugu 'lɛ sɛɛ bha?» 35‑Ma Pilatɩ yɔɔ neenŋonu lebhe: «‑Amʋ, Zifʋnyɔ* n ‑glɩ bha? ‑N 'bhlɩnya 'titi ɩya ‑teyiyinya kpasɩaa ‑sɔɔ 'lɛ 'nyɩ ‑ɔ yaan 'lɛ 'nyɩ. Na, wɔɔsaa ‑n nʋa 'lɛ bha?» 36Zozii yɔɔ neenŋonu lebhe: «'Na Nyɩbhɛlɩdua 'ta ‑dʋdʋ ‑naa 'kʋ ‑naanʋ ‑glɩ. Ɩ ‑kaa ‑kʋ lebhe 'na Nyɩbhɛlɩdua ‑kaa ‑dʋdʋ ‑naa 'kʋ ‑naanʋ ‑glɩa na, 'na lobhocuoa cɩ 'kaa 'na da vʋ ɩya ncɛlɩ 'la kaa ‑amʋa Zifʋnyaa tocɩa wlɩɩnzʋlɩɛ mino. ‑Ma 'na Nyɩbhɛlɩdua 'ta ‑wɔlʋ ‑naanʋ ‑glɩ.» 37Na, Pilatɩ yɔɔ neencla lebhe: «Na, nyɩbhɛlʋ ‑n ‑glɩ 'lɛ ‑na!» Zozii yɔɔ neenŋonu lebhe: «Ɩmɩ ‑n bhli 'lɛ 'kʋ: Nyɩbhɛlʋ n ‑glɩ 'lɛ. Ka ma valɩɩn 'lɛ 'nyɩ n ya 'lɛ ‑laagɔzɔan ci le n 'ka ‑nʋawlɛ 'la cɩa wɔlɩ nyɩtɛ. Na, ncaatʋtʋʋntʋa ‑ɔ ‑glɩ 'lɛ ‑nʋawlɛɛnyɔ na, 'plɩlɩ ɩmɩa n nyɩtɛ 'lɛ na 'kʋ.» 38Na, Pilatɩ yɔɔ neen 'cla lebhe: «'Lɩsaa ma laa 'lɛ ‑nʋawlɛ bha?»
Ma ya Zozii 'la 'bhlawɔlɩ kpo 'kʋ zʋ
(Mat 27.15-31; Mak 15.6-20; Luk 23.13-25)
Daa Pilatɩ nyɩtɛ 'lɛ wɔlɩ ‑naa na, ɔ ya ‑awlɛ mʋ, ɔ ya Zifʋnyaa* ‑jlukuun ŋeni 'nyɩ ɔ ya maa 'cla lebhe: «'N 'lɩ 'ta wɔlɩa 'wluku 'titia n cɩ 'ka 'lɛ 'cla lebhe ma 'bhla nclɔɔ ‑naa na. 39‑Ma saa n 'talɩa ‑azla 'lɛ ‑palʋʋnpapanyɔ bhlo 'cin ala geyliinwlʋfɛtlɩa* 'kʋ 'nyɩ n nyɩ 'lɛ anyɩ na, a ‑wa lebhe n 'talɩ Zifʋnyaa 'la nyɩbhɛlʋa 'cin, n 'nyɩ anyɩ bha?» 40Ma yaan ‑gaa 'nyɩ ma yɔɔ 'cla lebhe: «‑N 'ta ɔmɔ, ‑ma Balabasɩ ‑a ‑wa 'lɛ.» 'Bhlɩmɔɔ Balabasɩ ‑naa ‑glɩa ‑bhɩakpanyɔ.
Currently Selected:
Zan 18: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.