Zak 3

A kla ala mɩɔ 'kʋ

1N bholiecɩnyɩ, anyɩa ‑tɛtɛa 'la 'plɩa sɛɛ canya, sa a ‑ci sɛɛ lebhe 'tɩtɩa ma cɩ 'ka 'lɛ ‑anyɩ canyaa ‑pla na, ɩ cɩ 'ka 'tɛbhalɩ, 2saa 'titia ‑anyɩa 'fɩan ‑a mlɔ 'lɛ na ɩla gbʋ. Gbazɩ nclɔɔ ‑ka nyɩtɛda ‑kʋ, 'nyɩ ɔla ne 'ta ‑dla na, 'dɛndlana ɔ ‑glɩ nclɔɔa ‑ɔ ‑glalɩ 'lɛ 'kʋ, 'nyɩ ‑ɔ cɩ 'lɛ ɔla 'nyɛkɛa ‑tɛtɛa 'kʋklalɩɛ mino na. 3‑A zʋ 'lɛ ‑kpangwɩa 'la nia nɩkplaan 'bhli, le ɩla 'nyi 'ka ‑anyɩ yi na, dɛ ‑a mino 'lɛ 'nyɩ ‑a kalɩlɩ 'lɛ ɩla 'nyɛkɛ bhuoa -jioli 'kʋ. 4A 'pa ‑awlɛ ‑kosugɔlɩa ‑ɩ 'plɩlɩ 'lɛ 'nyi 'kʋtaan na pɔlɛ. Saa 'fɩan ɩ cɩ 'lɛ 'ghlibholighlibholili, 'nyɩ ‑pupolua ‑ʋ famʋɩ 'lɛ na, ʋ cɩ 'lɛ nɩkplaan 'tɛbhalɩ na, -lʋʋ lɛɛ ʋla klʋlɩnyɔa didio 'lɛ, 'nyɩ ɔ falɩʋ 'lɛ daa ɔ ‑wa 'lɛ na. 5'Sɛtɛɛ bhlogbɩɩ, mɩɔ ‑glɩ 'lɛ 'nyɛkɛ 'la lʋʋco, 'nyɩ ʋ kpoli 'lɛ gbɩɩn le ʋ cɩ wɔɔkadɩ nʋlɩɛ mino na. A kope saa ‑kosuunpie gba 'lɛ 'nyɩ 'kɔkpʋkadie 'ma 'lɛ 'mle na. 6Na, mɩɔ ‑ma, ʋ ‑glɩ ‑kosu, ʋ ‑glɩ ‑abhɔlɛ 'la ‑laagɔzɔan ‑ʋ 'slalɩɔ 'lɛ ala 'nyɛkɛa nɩkplaan, 'nyɩ ʋ nyumo 'lɛ ɛla ‑lɩɩbhuoa na. Ʋmʋ ‑ʋ zʋ 'lɛ ‑ala jabhʋa 'la ‑lɩɩbhuoa ‑kosu, 'nyɩ ‑kosu ‑naa, ‑kosua ‑ʋ ŋomu 'ta 'lɛ na nɩkplaan ʋ 'wlʋlʋ 'lɛ. 7Mlaa ‑tɛtɛa sidiin, mlaanyinyi, libhli, ‑blɛblɛmla, ɩya ‑zlii, mlɛa nclɔɔ 'ta 'lɛ ‑kwle na, ɛ 'ta ‑kʋ. 8‑Ma mɩɔ, nclɔɔ bhlogbɩɩ mino 'ta ɩya ɔ 'kʋʋ 'kʋ kla. Ʋ ‑glɩ ‑lʋʋnyunyua ‑ʋ kʋ 'ta 'lɛ 'cɩɩ na, ʋ ‑yelio tɩtɔnyunyua ‑ʋ bhla 'lɛ na. 9‑A mʋʋ 'nyɩ ‑a bhɔlʋ -ala ‑Kwlenyɔ ɩya ‑a To, 'nyɩ ‑a ma ‑awlɛ 'lɛ ʋmʋ ‑sakasaka, 'nyɩ ‑a pa 'lɛ ncɛlɩa ɔ ya 'lɛ ɔcɩ 'bhisa 'kʋ nʋ na. 10Nea bhlogbɩɩ nɩkplaan 'nyupalɩɛ ɩya 'palɩɛa 'wlʋlʋ 'lɛ. Na, bholiecɩnyɩ, ɩ 'ta ‑fata lebhe ɩ kʋ sɛɛ. 11'Nyukobhua bhlogbɩɩ nyɩ mɛnɔmenɔnyu ɩya kalɔkalɔnyu bha? 12Bholiecɩnyɩ, 'figisu cɩ olivʋca tlʋlɩɛ mino bha? ‑Aana ‑ghlɛzɛɛnbhlukpo cɩ 'figica tlʋlɩɛ mino bha? 'Nyɩ 'nyukobhua ‑ʋ ‑ka 'lɛ ‑glii na, ʋ cɩ 'nyua ‑ʋ mɛnɩ 'lɛ na nɩkplaan kalɩ bha?

Dɩgalɩa ‑ɩ 'wlʋlʋ 'lɛ ‑laagɔɔn na

13Wɔɔbhlilinyɔ ɩya dɩgalɩnyɔ ‑kʋ anyɩ sidiin bha? 'Naa ɔ palalɩɩ ɔla 'namʋ 'nanʋa nɩkplaan, 'naa ɔ palalɩ nʋnʋgbɩa ‑ɩ ‑pupuo 'lɛ na nɩkplaan lebhe ɔ ‑ci wɔlɩ. 14‑Ma ɩ ‑ka ‑kʋ lebhe woze ɩya cɩɩnkalɔ ‑ka ala pɔlɩa ‑yelio, 'nyɩ a ‑ka ‑lɩɩtɩtɔwugo ‑ka na, 'dɛndlana, a 'la kpolia gbɩɩn le a ‑ci wɔlɩ ɩya a 'la zʋlʋa ‑nʋawlɛa yodi kpʋkpʋʋn! 15‑Sa 'la wɔɔcibhlililie ‑naa 'wlʋlʋ 'ta ‑laagɔɔn, ‑dʋdʋ 'kʋ ‑naanɩ ɩ ‑glɩ 'lɛ, ncaanaanɩ, gɔzɩnaanɩ. 16‑Masa daa woze, ɩya ‑lɩɩtɩtɔwugo ‑kʋ 'lɛ na, ka ‑wuyawuya ɩya nʋnʋgbanyinyi kʋ 'lɛ 'dɛ. 17‑Ma wɔɔcibhlililiea ‑ɩ 'wlʋlʋ 'lɛ ‑laagɔɔn na, ‑bɛɛ ɩ ‑kplɔ, ɩ lamʋ pupue, pɔɔwɔtɛ, nebhloplɩlɩɛ, ŋaazɩɩnlɩlɩɛ 'nyɩ ɩ ‑yelio 'lɛ nʋnʋgbɩ 'nanɩ. 'Ɩ gbazlɩlɩ 'ta nɩkplaan, 'nyɩ ɩ 'ta ‑kplakpla ‑ka. 18Maa ‑ɔ ‑wa 'lɛ pupue na, pupue ma moni 'lɛ macɩ cɩ, 'nyɩ 'caa ma sa 'lɛ na, ɩ ‑glɩ 'lɛ 'kʋnylugolunʋnʋgbɩ.

Currently Selected:

Zak 3: NTLD13

Highlight

Copy

Compare