Ebl 13

‑Kandea ‑a -ka 'lɛ Laagɔ 'tʋ na

1'Naa ‑walʋa bholiecɩ ‑wawalɩ 'lɛ na, kʋ anyɩ sidiin. 2A 'la bolua lowie 'la klalɩɛ 'kʋ, sa ɩ ya gba, ncɛlɩa ‑anʋa ya 'bhlaandleecɩ* kla, ‑ma ma 'taa sɛɛ cibhlili. 3A luoli maa ‑ɔ ‑kʋ 'lɛ ‑palʋʋnpapalɩa ‑zɔn na, le saa aya maasɔ ‑glɩ 'lɛ ‑palʋʋnpapanya na. A luoli maa ma sa 'lɛ gbaylɩa na, ‑masa anyɩ ‑masɛɛ a ‑kamʋ 'nyɛkɛ na.

4'Naa ncɛlɩa ‑tɛtɛa 'nyɩ 'cɩcɩɛ 'klʋ ɩya 'ŋlɔ ɩya ŋodi 'la ‑pla mala pʋdaa ‑bhʋbhɔlɩ. Sa Laagɔ cɩ 'ka ‑badaaglulinyaa ɩya maa ‑ɔla 'nyi yi 'ta 'lɛ mala 'cɩcɩɛ na 'tɩtɩpla. 5Ala 'namʋ 'la 'slalɩa 'dala 'la ‑walʋ 'kʋ. 'Naa lʋʋa a ‑ka 'lɛ na bhlili anyɩ pɔlɛɛn, sa ‑Kwlenyɔ 'titi ya 'cla lebhe: 'N cɩ 'tɔɔ 'cintalɩ, n cɩ 'tɔɔ te. 6'Dɛ ‑delikʋtɛlɔ nɩkplaan, ‑a mino 'lɛ 'nyɩ ‑a cla 'lɛ lebhe:

‑Kwlenyɔ ‑glɩ 'na 'kʋcinyɔ,

n cɩ 'ta lʋʋ bhlogbɩɩ 'gulu.

'Lɩsaa nclɔɔ cɩ 'kaan 'lɛ nʋlɩɛ mino bha?

7A luoli ala 'kʋklʋʋnpʋnyaa ‑ɔ solua 'lɛ anyɩ Laagɔ 'la wɔlɩa na. A 'pa saa mala 'pʋpʋa 'kʋ bhɩabhɩalɩ 'lɛ na pɔlɛ, ɩya a dɩbalɩ mala pɔɔtɛtɛa. 8Saa Zozi Klisi ‑kʋa 'lɛ ‑cɩpaa na, sɛɛ bhlogbɩɩ ɔ ‑kʋ ka 'lɛ ‑yaka, 'nyɩ sɛɛ bhlogbɩɩ ɔ cɩ 'ka 'lɛ kʋ 'lʋkʋlʋkʋ ɩya 'lʋkʋlʋkʋ. 9A 'la 'talɩa acɩ 'cin ɩya cacawɔlɩ ‑mizi -mizia ma 'ta 'lɛ ɩla 'wlʋlʋda ‑ci na, ɩ 'la mlɔa anyɩ. Sa ɩ nanɩ lebhe pɔlɛ 'lɩlɩ ɛla 'tɛtɩa Laagɔ 'la ‑dananɔa nɩkplaan, ‑ma ‑n 'ta lililɩɩa ‑ɩ 'ta ka ‑azla 'lɛ maa ‑ɔ 'plɩlɩ 'lɛ ɩla ‑jlɩmaa 'kʋ na, lʋʋ bhlogbɩɩ lalɩ na.

10Gʋgwlagbatɩa ‑a ‑ka 'lɛ na, maa ‑ɔ nʋnʋ 'lɛ mala ‑teyiyilobholia ‑paaplua ‑zɔn na, ma 'ta ɛla 'kʋa lɩɩa 'la lijioli ‑ka. 11Sa mlaa 'la ‑dolua ‑teyiyinyɔ ‑kpasaa famʋ ‑kplɔkplɔdaa nyinyi 'la valɩɛa 'la gbʋ na, ka ma ‑yɩɩsɩ 'wlʋ 'lɛ mala sakʋdaa, 'nyɩ ma sii 'lɛ. 12Ɩmɩ ‑naa 'la gbʋ, dɛ Zozii ‑ma ɔ 'ka 'lɛ 'lɔlʋa ‑kplɔ na, ɔ ya 'lɛ 'dua 'la gbinia leen sɛlɩ. 13Na, ‑a 'wlʋnɩ ‑zɔn, ‑a mʋnʋɔ 'bɩɩn ɩya -a ŋonu le ‑ayɔɔsɔ cɩ ɔla sʋkpʋɛa 'kʋ 'wlalɩ. 14Sa ‑a 'ta wɔlʋ ‑laagɔzɔan 'dua ‑a cɩ 'lɛ nɩkplaan kʋ 'lʋkʋlʋkʋ na ‑ka, ‑ma 'dua ‑a ‑cɩ ka 'lɛ ‑cɩpa bhlo nɩkplaan kʋ na, ʋmʋ ‑a 'matɩ 'lɛ. 15Na, ‑a 'plɩlɩɔ 'kʋ, ɩya Laagɔ 'la ‑evliwolɩɛ 'plɩ ‑ala 'la clɩɩa 'fɩan 'la ‑teyiyilɩɛ, ɩ ‑glɩ vavalʋlʋa ‑ʋ 'wlʋlʋ 'lɛ nea ‑a slɔɔ 'lɛ 'ŋlɩ na nɩkplaan na. 16A 'la bolua 'nanɩnʋlɩɛ 'kʋ, ɩya a klalɩklalɩlɩ, sa 'sɛ 'la ‑teyiyilɩɛa ɩmɩ ‑ɩ ‑ka 'lɛ Laagɔ 'tʋ.

17A zʋ ala 'kʋklʋʋnpʋnyaa, ɩya a ‑la acɩ ‑dʋdʋ 'kʋ, ɩya anyɩ maa. Sa maa 'titi 'lɩ anyɩ 'klʋ, ‑ofi lebhe maa cɩ ka saa ma 'lɩlɩ anyɩ 'lɛ 'klʋ na ɩla wɔlɩa Laagɔ ‑deliin nyɩtɛ. Na, a ‑ka mala zʋlɩɛ ‑ka na, dɛ ma cɩ 'kɩɩ 'lɛ pɔlɛkʋmɛnɔɔn nʋnʋ, ‑ma ‑n 'ta bhalɩlɩɛɛn, 'nyɩ ma ‑ka bhalɩ na, ɩ cɩ 'ta anyɩ namanɩ. 18A bhibhie ‑ala da, sa ‑a ‑ci sɛɛ lebhe ‑ala wɔɔguwiea ‑kplɔ, 'nyɩ ‑a -wa lebhe ‑tɛtɛa 'fɩan nɩkplaan ‑a cɩ 'nanɩ namʋ. 19Na, n 'clalɩɩ anyɩ ‑gbɔɔn, ‑a nʋɩ ‑ma ɩ cɩ gba 'nyɩ n cɩ anyɩ 'bhlɩ cɔlɔ 'faanfan.

Bhɩalɩwɔlɩa n 'clalɩ 'lɛ na

20'Naa Laagɔa ‑ɔ nyɩ 'lɛ pupue na 'nyɩ ‑ɔ ‑bho 'lɛ ‑ala ‑Kwlenyɔ Zozii, 'blabhlɩa 'la kpanyɔ 'kadiea 'kua sidiin 'kʋ, mɛnʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, 'la ‑dolua nɩkplaan na, 21ɔ gba ɩya a mino ɩmɩa ‑tɛtɛa ‑ɩ nanɩ 'lɛ na nʋlɩɛ, ɩya a 'ka ɔla pɔɔsa nʋ. 'Naa ɔ nʋnʋ ‑anyɩ nɩkplaan ɩmɩa ‑ɩ ‑kɔɔ 'lɛ 'tʋ na, Zozi Klisi 'la 'kʋplɩlɩɛa nɩkplaan, ɔmɔa 'Klʋagba ‑glɩ 'lɛ ɔla da 'lʋkʋlʋkʋ ɩya 'lʋkʋlʋkʋ na. Ɩ kʋ sɛɛ.

‑Ayopalɩɛ

22Bholiecɩnyɩ, n 'clalɩ anyɩ le a ŋonu ɩya a 'ma wɔɔnyɩtʋ -klipɛ ‑naa. 23A cibhlili sɛɛ lebhe ma ya ‑a bholi Timoti 'cintalɩ. Na, ɔ ‑ka ‑bhazlɔ cili na, n ‑yɔɔsɔ cɩ 'ka anyɩ kopekan ci.

24A 'pa ala 'kʋklʋʋnpʋnyaa ɩya ‑kplɔkplɔnyaa 'fɩan ‑ayo. Italiibhlɩa 'kʋ ‑naanʋa pa anyɩ ‑ayo.

25'Naa Laagɔ 'la 'nyupalɩɛa kʋ anyɩa 'fɩan 'kʋ.

Currently Selected:

Ebl 13: NTLD13

Highlight

Copy

Compare