Wani 20
20
Ketsutsi kemɨranukuke mɨkite watsata
(Wa 20:1-8 – Mat 28:1-18, Mar 16:1-8, Ruk 24:1-10)
1Merikɨtsɨ mexɨakame tukariyaritsie tsemanayaritsie Mariya Mararatanaka teukiyapa kaninuani yuimuana 'uyɨwikaku 'akuxi, tete teukiyapa heuhɨiyakame kaniuxeiya hɨxiena meukatei. 2Hikɨ 'unautsarɨmetɨ kaneyani, Tsimuni Pekuru hetsɨa kaninuani meta xeime hetsɨa tiyɨ'ɨkitɨwame Ketsutsi minaki'eriekai hetsɨa, mɨpaɨ katiniwarutahɨawe:
—Ti'aitame teukiyapa mekaniwayekweni, 'atsitepɨkatemate hakewa memeite.
3Hikɨ Pekuru kaneyani xewitɨ tiyɨ'ɨkitɨwame hamatɨa, teukiyapa mekanekɨne. 4Yu'aurie me'uhutɨ mekaniunautsaxɨaximekaitɨni. Xewitɨ tiyɨ'ɨkitɨwame matsi waɨkawa kaniutanautsa, Pekuru kananuku'iwa, kanaye'ani mɨkɨmeri teukiyapa. 5'Anahuka kanixeiya 'ixurikite mana 'akateme, peru muwa pɨkaheutaha. 6Hikɨ Tsimuni Pekuru 'utɨmanake kaninuani, teukiyata kaneutahani. 'Ixurikite kaniuxeiya mana 'akateme. 7Tuwaxata kaniuxeiya mu'uya mɨ'eimekai 'ixurikite 'aurie pɨkatikatei, yateewa pɨta pɨtikatei tunitɨ. 8'Anaketa kaneutahani tiyɨ'ɨkitɨwame 'umexɨatɨ munua teukiyapa, hikɨ 'ixeiyaka, yuri katiniuta'erieni. 9Mɨkɨ 'akuxi mepɨkaheitimaiwawekai 'utɨarika meuyewekaikɨ mɨkite watsata manukukeni maine.
Matsiɨkɨtɨ kemɨrayuyeitɨa Ketsutsi Mariya Mararatanaka hɨxie
10Hikɨ teyɨ'ɨkitɨwamete yukie mekanekɨne, 11merikɨtsɨ Mariya teukiya hɨxie kaniutiwekaitɨni takwa 'utatsuatɨ. Hikɨ 'utatsuatɨ kananahuni teukiyata kaneutaniere, 12mana kaniwaruxeiya niuki tuayamete yuhutame me'anakatuxame. Xewitɨ Ketsutsi mu'uya manukatei kanakateitɨni, xewitɨta manuka'ɨkakai rakatei hakewa Ketsutsi kaxarieya manutekiekai.
13Mɨkɨ mɨpaɨ mekatenitahɨawe:
—¿Neuxei, 'ukaratsi, titayari petiutatsuaka?
Mɨkɨ mɨpaɨ katiniwaruta'eiya:
—Neti'aitɨwame mepekwei, 'atsinepɨkatimate hakewa memeite.
14Mɨpaɨ 'utayɨka ta'aurie kanaweni, hikɨ Ketsutsi kaniuxeiya mana 'utiweme, matsi 'atsipɨkatimaikai xɨka Ketsutsi hɨkɨtɨkaitɨni. 15Ketsutsi mɨpaɨ katinitahɨawe:
—¿Neuxei, 'ukaratsi, titayari petiutatsuaka? ¿Kepaikɨ pepɨrakuwaune?
Mɨkɨ harawerikame 'erietɨ mɨpaɨ katinitahɨawe:
—Neuxei, 'uki, xɨka 'ekɨ peheikweni, kenetineutaxatɨa hakewa pepeihɨa. Neri nekanenukweimɨkɨ.
16Ketsutsi mɨpaɨ katinitahɨawe:
—Mariya 'aku.
Mɨkɨ hepana 'aniereka mɨpaɨ katinitahɨawe 'arameu niukiyarikɨ:
—Xawuni (taniukikɨ Ti'ɨkitame manuyɨne).
17Ketsutsi mɨpaɨ katinitahɨawe:
—Pepɨkanetsikuwiwiyani, ne'ukiyari hetsɨa nepɨka'anutiyeiwe 'akuxi. Matsi ne'iwama wahetsɨa kenemie. Mɨpaɨ ketiniwaretahɨawi: “Ne'ukiyari hetsɨa mɨxe'ukiyari hetsɨa nekananutiyeimɨkɨ, nekakaɨyari hetsɨa mɨxekakaɨyari hetsɨa neranutiyanita”.
18Hikɨ Mariya Mararatanaka mana kaninuani teyɨ'ɨkitɨwamete mɨpaɨ tiwakuxaxatɨwatɨ: «Ti'aitame muxeikɨ», mɨpaɨ mɨrehɨawekaikɨ.
Matsiɨkɨtɨ kemɨrayuyeitɨa Ketsutsi teyɨ'ɨkitɨwamete wahɨxie
19Merikɨtsɨ 'akayuneku mɨkɨ mexɨakame tukariyari tsemanayaritsie, teyɨ'ɨkitɨwamete meyuxeɨriekaku kiteniete reunatɨkaikaku memɨwamakaxekaikɨ huriyutsixi, Ketsutsi kaninuani. Wahixɨapa kaniutakeni, mɨpaɨ katiniwarutahɨawe:
—Xɨka xeka'uximatɨarieka yu'iyaritsie.
20Mɨpaɨ 'utayɨka kaniwaruxeitsitɨani yumamate meta yu'aki. Teyɨ'ɨkitɨwamete mekaniyutemamawiekaitɨni Ti'aitame mexeiyatɨ.
21Hikɨ Ketsutsi tawarita mɨpaɨ katiniwarutahɨawe:
—Xɨka xeka'uximatɨarieka yu'iyaritsie. Ne'ukiyari mɨnereyenɨ'a hepaɨ, neta mɨpaɨ nekatinixeheutanɨ'axɨani.
22Mɨpaɨ 'utayɨka kaniwaruhɨtsieni, mɨpaɨ katiniwarutahɨawe:
—Xekeneutanaki'eri 'Iyari Mɨtiyupata. 23Tsepa kemɨ'ane xemɨtewareuyehɨwirieni tita 'axamemɨteyurie, mekateneuyehɨwiyariekuni. Tsepa kemɨ'ane xemɨkateheuyehɨwiri tita 'axamemɨteyurie, mepɨkateheuyehɨwiyarieni.
Tumaxi yuri kemɨkati'eriekai
24Merikɨtsɨ Tumaxi Kwate mɨtitewakai tamamata heimana yuhutame wahetsɨa mieme kanihɨkɨtɨkaitɨni. Mɨkɨ wahamatɨa pɨka'uyeikakai kepauka Ketsutsi munua. 25Hikɨ hipatɨ teyɨ'ɨkitɨwamete mɨpaɨ mekatenikuxaxatɨwakaitɨni:
—Ti'aitame tekaniuxeiya.
Tumaxi mɨpaɨ katiniwarutahɨawe:
—Xɨka mamayatsie neka'ixeiyani kɨrapuxi 'uxayari, xɨka ne'itɨwamekɨ neka'imayɨani kɨrapuxi 'uxayari, meta 'akieya xɨka nemamakɨ neka'umayɨani, yuri nepɨkatita'erieniri.
26Merikɨtsɨ 'atahairieka tukari 'anukayaku tawarita teyɨ'ɨkitɨwametemama kiita mekanayetekaitɨni, Tumaxi wahamatɨa kanayekateitɨni. Hikɨ kiteniete reunatɨkaikaku Ketsutsi kaninuani, wahixɨapa kaniutakeni, mɨpaɨ katiniwarutahɨawe:
—Xɨka xeka'uximatɨarieka yu'iyaritsie.
27Hikɨ mɨpaɨ Tumaxi katiniutahɨawe:
—Kenaye'a, 'a'itɨwamekɨ keneneumayɨa nemamatetsie, 'amamakɨ keneneumayɨani ne'akita. Yuri pekati'erietɨ pepɨka'ayuyeitɨwani, matsi pɨta yuri peti'erietɨ kenaye'a.
28Tumaxi mɨpaɨ katinita'eiya:
—Neti'aitɨwame meta nekakaɨyari 'aku.
29Ketsutsi mɨpaɨ katinitahɨawe:
—Yuri pepɨtiuta'eri pemɨnetsi'uxeikɨ. Mɨkɨ memɨkanetsixeiyawawe peru yuri memɨte'erie, mɨkɨ mekaniyutemamawieka.
30Merikɨte, 'inɨari yɨkɨ 'aneneme mɨireme yakatiniyurienekaitɨni Ketsutsi teyɨ'ɨkitɨwamete wahɨxie, kemɨkare'utɨarie 'ikɨ xapatsie. 31Peru 'ikɨ kanaka'utɨarieni yuri xemɨte'eriekakɨ kename Ketsutsi Kɨritsitu hɨkɨ, Kakaɨyari Nu'aya, yuri xete'erietɨ tukari xemexeiyanikɨ hetsɨana xemiemetetɨtɨ.
Currently Selected:
Wani 20: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.