HEBREOS 1
1
1Jecy'ajty Dios ayuc yejcy ma ajt nmɨj'ap nmɨjteedy canaag'oc etz canaagnax mɨɨd je yprofetas ajcxy, je' ajcxy huɨdibɨ najtzcapxɨɨy Dios y'ayuc. 2E jadachambɨ ma xɨɨ tiempo yhuingoonɨ co je naaxhuiñybɨ ycɨxanɨ, Dios ayuc yecy ma ɨɨch ajt mɨɨd je' y'ung. Dios mɨɨd y'ung yaj'oyɨɨy je naaxhuiñybɨ etz tüg'ócɨy tijaty huɨdibɨ yajpatp. E Dios tɨ y'ung yajmɨgo'ixmadzɨydäy tüg'ócɨy. 3Dios y'ung ymɨɨd Dios y'oy'ájtɨn, yɨ' je' Dios ytɨɨcxɨn'ajtpy yjajɨn'ajtpy. Yɨ' je' codɨnaayb etz yajniguëxɨ̈gy nej je' je Dios. Dios y'ung huijtz'ijtaayb tüg'ócɨy mɨɨd je' y'ayuc etz ane'mɨn mɨc'ajt mɨɨdpɨ. Co Dios y'ung tɨ xyajhuaatzɨm ajt nbocy, chi cöbɨjcy je mɨj'ane'mɨn jiiby tzajpjoty, jadu'n nej jɨhuɨ̈y y'ixtacy a'oy'amy ma je mɨjpɨ Dios ymɨjc jiiby tzajpjoty.
Dios y'ung jacmɨj yɨ'ca'ydɨ ángeles ajcxy
4Je Dios y'ung jac mɨj je' ymɨc'ajt y'ane'mɨn mɨɨdɨty, ca'ydɨ je ángeles ajcxy. Com yɨ' je' Dios y'ung, paady ycɨxpɨ mɨc'ajt mɨɨdɨty jaydëbɨ ane'my huɨdibɨ Dios yje'ajtpy, e ca'ydɨ yɨ ángeles ajcxy yɨ jadu'mbɨ mɨc'ajt mɨɨd. 5Com Dios ca' yɨ' ni tüg ángel nɨmay:
Ɨɨch miich n'ung'ajtpy. Ɨɨch miich tɨ nyajpi'c'aty jadachambɨ xɨɨ.
Nañ jadu'n ca' Dios ni tüg ángel nɨmay:
Miich xyteedy'adɨɨbɨch, ɨɨch miich n'ung'adɨɨyb.
6Co Dios y'ungoob oy quexy ma naaxhuiñyjäy chɨnäy, chi yɨ' ane'mɨn pɨdacy:
Huen je ángeles ajcxy nidüg'ócɨy huindzɨgɨ̈huɨpy pa'tjɨhuɨ̈huɨpy je' y'ung.
7E mɨɨd je ángeles ycɨxpɨ, Dios ymɨna'ñ:
Yɨ ángeles jadu'n yɨ' ajcxy nej poj. Yɨ' ajcxy huɨdibɨ tzajpjoty tzɨnaayb, jadu'n yɨ'ajcxy nej huɨdzuc, nej jɨɨnye'n.
8Jadu'n Dios ymɨnañ mɨɨd y'ung ycɨxpɨ:
Miich, Dios'ajtp, miich m'ane'mɨn huinɨxɨɨ huinɨtiempo yɨ' y'ɨdɨpy. Mɨɨd mdudägy'ajtɨn miich m'ane'mɨpy.
9Tɨ mdzocy je tɨy'ajt tɨybɨ, e ca' tɨ m'ixa'ñ je jɨbɨcpɨ. Paady ycɨxpɨ Dios, miich mDios, tɨ xyhuin'ixy, e tɨ yejctäy nïgɨ ma miich je jotcujc'ajtɨn je xondaacɨn, ca'ydɨ ma yɨ mmɨ'ane'mbɨdɨjc.
10Dios nañ jadu'n ymɨna'ñ:
Miich, Huindzɨn Dios, oga'n'aty mbɨdac nej naaxhuiñybɨ chondacy, e mɨɨd miich mmɨc'ajt myaj'oyɨɨy je tzajp.
11Cɨjxtähuɨp yɨ naaxhuiñybɨ etz yɨ tzajp, per miich huɨ'mɨp huinɨxɨɨ huinɨtiempo. Jadu'n yɨ naaxhuiñybɨ etz yɨ tzajp y'amɨjɨydähuɨpy nej huit.
12Jadu'n miich yɨ naaxhuiñybɨ etz yɨ tzajp m'anëgɨpy nej tüg huit yaj'anëgyɨn. Jadu'n miich yɨ naaxhuiñybɨ etz yɨ tzajp myajtɨgadzɨpy nej jäy ajcxy yajtɨgach yhuit. Chi miich je'nɨ m'idɨpy, je mxɨɨ mjɨmɨjt ni mɨna ycacɨxɨpy ycatɨgoyɨpy.
13Ni camɨna Dios canɨmay ni tüg je ángeles ajcxy:
Ɨña' ma ɨɨch nmɨjc a'oy'amy, ixtɨ mabaad ɨɨch miich je mmɨdzip nmɨmadactäyɨch, jadu'n yɨ'ajcxy nipaadɨpy nej yɨ' miich mdecypocxpejt'adyii.
14Tüg'ócɨy je ángeles ajcxy ac espíritu yɨ' ajcxy, e ytungɨxy ma Dios, yquexyöygɨxy jɨgɨx pubedɨpy je jäy ajcxy huɨdibɨ ajcxy y'alma padam ñïdzoocɨn.
Currently Selected:
HEBREOS 1: mco
Highlight
Share
Copy
Want to have your highlights saved across all your devices? Sign up or sign in
© 1976, Wycliffe Bible Translators, Inc. All rights reserved.