Luka 2

Ku pepwa kwa Jesu

(Mat 1.18-25)

1Ka ona mazazi ao kwa zwa taelo ku Sesare Augusto ya kuli ku balwe batu kamukana ba ba mwa puso ya hae. 2Ku balwa koo, kwa pili, kwa ezwa Kuirino ha n'a li mubusisi wa Siria. 3Kiha ba y'o iñolisa, yo muñwi ni yo muñwi mwa munzi wa habo.

4Josefa ni yena a zwa mwa Galilea, mwa munzi wa Nazareta, ku ya kwa Judea mwa munzi wa Davida o bizwa Betelehema, kakuli n'a li wa mukowa ni wa lusika lwa Davida. 5A y'o iñolisa hamoho ni Maria y'a n'a beelelize. Maria n'a itwezi. 6Ha ne ba sa li mwa Betelehema, nako ya hae ya ku puluha ya fita. 7A pepa mweli wa hae wa mushimani. A mu putela mwa masila a limbututu, mi a mu lobaza mwa sikungu, kakuli ne ba si na sibaka mwa ndu ya baenyi.

Balisana ni mangeloi

8Mwa naha mo, ne ku na ni balisana ba ba ne ba lobalela mitapi ya bona busihu. 9#Tob 5.4 Lingeloi la Mulena la iponahaza ku bona, mi kanya ya Mulena ya ba beya mwahali. Kiha ba kenelwa ki sabo ye tuna. 10Kono lingeloi la li ku bona, “Mu si ke mwa saba! Ni mi zibisa litaba ze nde, ze ka tabisa hahulu batu kaufela. 11Bona busihu bo, mwa munzi wa Davida, mu pepezwi Mupilisi. Ki Kreste Mulena. 12Mi mu ta mu ziba ka sisupo se. Mu ta fumana mbututu ya putezwi mwa masila, ya lobalizwe mwa sikungu.”

13Kapili mangeloi a maata a lihalimu a t'o kopana ni la pili, a opela ku lumbeka Mulimu, a li,

14“Kanya i be ku Mulimu kwa lihalimu,

mi kozo ya hae i be kwa batu ba lifasi ba ba latwa ki yena!”

15Mangeloi ha s'a ba siile ku kutela kwa lihalimu, balisana ba bulelisana, ba li, “A lu yeñi kwa Betelehema, lu y'o bona ze tahile, z'a lu zibisize Mulena.”

16Ba akufela kwa teñi, mi ba fumana Maria ni Josefa ni mbututu a nz'a lobalizwe mwa sikungu. 17Ha ba se ba mu boni, balisana ba talusa ze ne ba bulelezwi ki lingeloi bakeñisa mwana yo. 18Mi ba ba li utwa kaufela ba komokiswa ki ze ba bulelelwa ki balisana. 19Kono Maria n'a li buluka kaufela a nz'a kengeyela. 20Balisana kiha ba kuta ba nze ba opela ku lumbeka Mulimu ka ze ne ba utwile ni ku bona kaufela, kakuli linto kamukana ne li ezahalile sina mo ne li ba bulelezi lingeloi.

Jesu u beiwa libizo

21 # Malivi 12.3; Luk 1.31 Ha ku se ku felile mazazi a supile ka li li liñwi, mwana a isiwa kwa mupato mi a beiwa libizo la Jesu, ili libizo l'a n'a beilwe ki lingeloi, m'ahe a si ka itwala kale yena.

Jesu u tiswa kwa Tempele

22 # Malivi 12.6-8 Ka Mulao wa Mushe, mazazi a ku zwa mwa siyopu ha s'a felile, Maria ni Josefa ba ya ni mwana kwa Jerusalema ku y'o mu tahisa ku Mulena. 23#Mut 13.2, 12 Kakuli mwa Mulao wa Mulena ku ñozwi kuli, “Mweli kaufela wa mushimani u ta bizwa ya ketezwi Mulena.” 24Ba tisa ni sitabelo sina m'o bulelela Mulao wa Mulena, ili sa “maiba a mabeli kamba tunkwilimba to tubeli.”

25Cwale, mwa Jerusalema ne ku na ni munna ya n'a bizwa Simioni. Munna yo n'a lukile. N'a sebeleza Mulimu, mi n'a libelezi ya n'a swanezi ku pilisa Isilaele. Moya o Kenile n'o li ku yena. 26N'a lemusizwe ki ona kuli h'a na ku shwa a si ka bona kale Mesia ya n'a sepisizwe ki Mulena. 27Ka ku susuezwa ki Moya, a taha kwa Tempele. Mi bashemi ba Jesu ba mu tisize mwateñi sina mo n'o bulelela Mulao. 28Cwale Simioni a mu nga, a mu swala mwa mazoho, mi a lumbeka Mulimu, a li,

29“Cwale Mulena, sepiso ya hao i ezahalile.

U lukulule mutang'a hao, a ikele ka kozo,

30kakuli meeto a ka a boni ku pilisa kwa hao,

31k'o lukisize fapil'a batu kaufela.

32 # Isa 42.6; 49.6; 52.10 Ki liseli le li bonisa ba macaba nzila ya hao,

ni le li fa kanya kwa sicaba sa hao sa Isilaele.”

Simioni wa polofita

33Ndat'ahe ni m'ahe ne ba komokiswa ki z'a n'a bulela Simioni bakeñisa mwana. 34Simioni a ba tohonolofaza, mi a li ku Maria m'ahe Jesu, “Bona, Mulimu u ketile mwana yo ku tahiseza ba bañata mwa Isilaele lifu kamba bupilo. Ki sisupo sa Mulimu se si ta kananiwa. 35Kamukwaocwalo, si ta bonahaza mihupulo ye patilwe mwa lipilu za ba bañata. Haili wena, musali, maswabi a ka taba pilu ya hao inge lilumo!”

Anna mupolofita wa musali

36 # Judi 8.4, 5 Ne ku na ni mupolofita wa musali ya n'a bizwa Anna, mwan'a Fanuele, wa lusika lwa Asere. N'a supezi hahulu. Ku zwa kwa bwalyanjo bwa hae n'a pilile feela lilimo ze supile ni munn'a hae. 37Ku zwa fo, a ba mbelwa cwalo, mi n'a s'a na ni lilimo ze mashumi a supile ka li li liñwi ni ze ne. N'a sa zwi kwa Tempele. N'a sebeleza Mulimu busihu ni musihali a nz'a lapela ni ku itimanga lico. 38A t'o fita ka yona nako yeo. A itumela ku Mulimu, mi a bulela za mwana kwa batu kaufela ba ba ne ba libelezi Mulimu f'a ka lukululela Jerusalema.

Ba kutela kwa Nazareta

39 # Mat 2.23 Bashemi ba Jesu ha ba se ba felize lika kaufela ka ku ya ka Mulao wa Mulena, ba kutela ni yena kwa Galilea mwa munzi wa bona wa Nazareta. 40Mwana a hula, a tiya, a ba ni butali, mi sishemo sa Mulimu sa ba fahalimw'a hae.

Jesu u ya kwa Tempele a na ni lilimo ze lishumi ka ze peli

41 # Mut 12.1-27; Mul 16.1-8 Ka mwaha ni mwaha bashemi ba Jesu ne ba yanga kwa Jerusalema kwa Mukiti wa Paseka. 42Jesu ha s'a na ni lilimo ze lishumi ka ze peli, ba ya kwa mukiti wo, sina mo ne ba ezezanga. 43Mukiti ha u s'o felile, ba kutela kwa hae, kono mwana, yena Jesu, a siyala mwa Jerusalema, bashemi ba hae ba sa zibi. 44Ne ba hupula kuli n'a zamaya mwahal'a batu. Ba zamaya cwalo lizazi leo kaufela. Kiha ba kala ku mu bata mwahala banabahabo ni balikani ba bona. 45Kono ha ba si ka mu fumana. Cwale kiha ba kutela kwa Jerusalema ba nze ba mu bata. 46Mwamulaho a mazazi a malalu ba t'o mu fumana kwa Tempele. N'a inzi mwahal'a baluti ba Majuda, a teeleza ni ku ba buza lipuzo. 47Ba ba ne ba mu utwa kaufela ne ba komokiswa ki kutwisiso ya hae ni mw'a n'a alabela lipuzo. 48Bashemi ba hae ba komoka ha ba mu bona, mi m'ahe a li ku yena, “Mwan'a ka, kiñi ha u lu ezize cwalo? Bona, ndat'aho ni na, ne lu tukufalezwi ku ku bata.”

49A ba alaba, a li, “Ne mu ni batelañi? Ne mu sa zibi kuli ni swanezi ku ba mwa ndu ya Ndate?” 50Kono ha ba si ka utwisisa s'a n'a ba bulelela.

51Jesu a kutela ni bona kwa Nazareta, mi n'a ikokobeza ku bona. M'ahe yena n'a nz'a buluka litaba zeo kaufela mwa pilu ya hae. 52#1 Sam 2.26; Mash 3.4 Jesu n'a hula ka mubili ni ka ngana, mi n'a tabisa Mulimu ni batu.

Currently Selected:

Luka 2: Lozi09

Highlight

Copy