Buka ya Pili ya Makabaeusi 7
7
Demetriusi u ba Mulena, mi u luma Bakidesi ni Alusimusi kwa Judea
(2 Mak 14.1-36; 15.1-36)
1Ka silimo sa mwanda ka mashumi a ketalizoho, Demetriusi, mwan'a Seleukisi, a toba mwa Roma mi a t'o fita ni batu ba sikai feela mwa munzi wa fa likamba la liwate, mi a kala ku busa mwateñi. 2Ha s'a kena mwa linaha za bo kukw'a hae, mpi ya hae ya swala Antiokusi ni Lisiasi, ka muhupulo wa ku ba tisa ku yena. 3Kono Demetriusi h'a utwa cwalo, a li, “Ni si ke na ba bona ni hanyinyani.” 4Cwale masole ba bulaya batu bao, mi Demetriusi a kena fa bulena bwa mubuso wa habo.
5Cwale a telwa ki libangoki, bona bahedeni kaufela ba mwa Isilaele, ba ba ne ba etelezwi ki Alusimusi ya n'a bata ku ba muprisita yo muhulu. 6Ba t'o nyaza batu fapil'a mulena, ba li, “Judeasi ni banabahabo ba bulaile balikani ba hao kamukana, mi yena u lu lelekile mwa naha. 7Cwale u lume mutu y'o sepile. A ye, mi a y'o bona mw'a sinyelize ku luna ni mwa naha ya mulena kaufela, mi a y'o lwanisa Judeasi, banabahabo ni batusi ba bona kamukana.”
8Mulena a keta Bakidesi, yo muñwi wa Balikani ba Mulena, mubusisi wa naha ya kwa wiko wa nuka, ili munna ya tumile mwa mubuso, ya sepahala ku mulena. 9A mu luma hamoho ni yena muhedeni yo Alusimusi, y'a n'a s'a file maata a ku ba muprisita yo muhulu, mi a ba laezi ku y'o kutiseza Maisilaele bumaswe. 10Cwale ba funduka, ba na ni mpi ye tuna, mi ha ba fita mwa naha ya Judea ba luma linumwana ku Judeasi ni banabahabo ka manzwi a bupumi kuli ba bata ku eza kozo. 11Kono Judeasi ni ba bañwi ba tokwa ku ba sepa kakuli ne ba bona kuli ba tile ni mpi ye tuna hahulu.
12Nihakulicwalo sikwata sa bañoli ba Judea ba ya ku Alusimusi ni Bakidesi ku y'o ambolisana ni bona ka litumelelano za kozo. 13Batu ba pili kwa Maisilaele ku buza ka za kozo n'e li Mahasidea. 14Ne ba ize, “Yo ki muprisita wa mba ya Aruni, ya tile ni makuta a ndwa. H'a na ku lu eza maswe.” 15Kaniti a ambolisana ni bona ka za litumelelano za kozo, mane a be a itama ka luci, a li, “Ha lu na ku lika ni hanyinyani ku mi lwanisa, hamoho ni balikani ba mina.” 16Ba lumela z'a n'a bulezi, kono a swala ku bona batu ba mashumi a silezi, mi a ba bulaya ka lizazi li li liñwi, ili ku taleleza manzwi a ñozwi, a li, 17#Lipi 79.2-3 “Ba hasanyize mibili ya ba ba itamile ku wena, ba suluzi mali a bona mwa Jerusalema kaufela, kono ha ku na ya ba pumbekile.”
18Kamukwaocwalo batu kamukana ba kenwa ki sabo ye tuna hahulu, mane ba njanja, ba li, “A mu bone batu ba, ha ba na niti kamba buitamo. Ba sinyize tumelelano ni maci a ne ba ikonkile ka ona.” 19Cwale Bakidesi a zwa mwa Jerusalema mi a y'o toma mafulo kwa Betizaiti. Ku zwa fo a luma masole mi ba y'o swala buñata bwa batu ba ba ne ba mu tobezi hamoho ni batu feela. A bulaya ba bañwi, mi a ba nepela mwa musima o mutuna. 20Kih'a beya Alusimusi kuli a zamaise sikiliti seo, mi a siyala ni mpi kuli i mu tuse. Haili Bakidesi yena, a kutela ku mulena.
21Alusimusi a zwelapili ku sebeza ka tata kuli a be muprisita yo muhulu. 22Ba ba ne ba tisa mifili-fili ya ku sinya kozo ya macaba a bona ba kena ku yena. Ha ba se ba na ni maata a ku busa naha ya Judea ba sinya hahulu mwa Isilaele. 23Judeasi a bona kuli bumaswe kaufela bo ne bu ezizwe ki Alusimusi ni batusi ba hae ne bu fitelela bo ne bu ezizwe ki bahedeni. 24Cwale a ya mwa naha kamukana ya Judea ku y'o kutiseza batu ba ba ne ba mu tobezi bumaswe, ni ku ba paleliswa ku izamaela mwa naha mo ba latela. 25Alusimusi h'a bona maata a Judeasi ni batusi ba hae f'a fita, a lemuha kuli ba na ni maata a ku itwanela ku bona, a kutela ku mulena, mi a y'o mu tameleza litaba za lipulao.
Nikanora mwa Judea. Ndwa ya Kafarasalama
26Mulena a luma Nikanora, yo muñwi wa bazamaisi ba mpi ya hae, ye n'e li wa situlo se situna mi ili sila sa Isilaele se si maswe hahulu. A mu laela kuli a y'o yundisa batu. 27Nikanora h'a fita kwa Jerusalema ni mpi ye tuna, a lumela manzwi a bupumi ku Judeasi ni banabahabo kuli ba ambolisane ka za tumelelano ya kozo. 28A li, “Lu si ke lwa itwanisa. Ni ka taha ni sitopa sa batu ba sikai feela, lu t'o ambolisana lu talimani hande ka kozo.” 29A taha ku Judeasi mi ba itumelisa ka kozo. Nihakulicwalo lila ne li itukiselize ku swala Judeasi kuli ba mu nge. 30Judeasi ha s'a lemuhile mulelo wa Nikanora kuli ne li wa bupumi, a saba mi a hana ku kopana ni yena hape kuli ba ambolisane. 31Cwale Nikanora ha s'a bona kuli mulelo wa hae u limbuluzwi, a latelela Judeasi, mi ba y'o lwanela fakaufi ni Kafarasalama. 32Kwa batu ba Nikanora kwa shwa ba ba bata ku ba ba mianda i ketalizoho. Ba ba ne ba bandile, ba sabela mwa Munzi wa Davida.
Ku fumbelwa Tempele
33Mwamulaho wa likezo zeo, Nikanora a ya kwa Lilundu la Sione. Baprisita ba bañwi ni bahulu ba sicaba ba zwa mwa sibaka se si kenile ku t'o mu katanyeza ka kozo ni ku mu bonisa litabelo za ku cisa ze ne li ezezwanga mulena. 34Kono yena a nyefula mi a ba shendaula, mane a bulela ka buikumuso. 35A konka ka buhali bo butuna, a li, “Haiba Judeasi ni mpi ya hae a sa tiswi ku na, ha ni ka y'o kuta ni iketile hande, ni konka kuli ni ka t'o cisa yona ndu ye lotee!” Cwale a zwa mwateñi a halifile hahulu.
36Hona fo, baprisita ba kutela mwateñi hape, mi ba y'o yema fapil'a katala ni Sibaka se si Kenile ba nze ba lila, ba li, 37“Ki wena u ketile ndu ye kuli i bizwe ka libizo la hao, kuli i be ndu ya litapelo ni ku itilelela kwa batu ba hao. 38U kutiseze mutu yo ni mpi ya hae bumaswe, mi ba te ba bulawe ka mukwale. U hupule bunyefuli bwa bona mi u ba paleliswe ku zwelapili ku eza cwalo.”
Lifu le Nikanora kwa Adasa
39Nikanora a funduka mwa Jerusalema mi a y'o tibelela kwa Beti-Horoni kw'a n'a il'o ekezwa ki mpi ye ne zwa kwa Siria. 40Judeasi yena a tibelela kwa Adasa a na ni banna ba likiti ze talu, mi a lapela tapelo ye, a li, 41#2 Male 19.35 “Batu ba ba ne ba lumilwe ki mulena wa Asiria ha ba kile ba nyefula, ku kile kwa taha lingeloi la hao mi la bulaya batu ba likiti ze mwanda ka mashumi a supile ni li li liñwi ka ze ketalizoho ku bona. 42Kamukwaoswana lu kupa kuli u tube mpi ye kacenu, ili kuli batu kamukana ba te ba zibe kuli mutu yo n'a nyefuzi Sibaka sa hao se si Kenile. U mu atule ka bumaswe bwa hae.”
43Limpi za lwana ka la bulishumi ni a malalu la kweli ya Adara, mi mpi ya Nikanora ya tulwa maswe, mane yena kasibili ki yena ya n'a kalile ku shwa mwa ndwa. 44Makuta a hae h'a bona kuli Nikanora u shwile, ba latela lilwaniso za bona fafasi mi ba baleha. 45Majuda ba ba matisa lizazi mutumbi, ku zwa kwa Adasa mane ku y'o fita kwa Gezeri. Majuda ne ba liza litolombita za bona ha ne ba ba lelekisa, ili ku zibisa batu ba mwa minzi. 46Kwa taha batu ba mwa minzi ye mwa matuko kamukana ya Judea ku t'o katanyeza lila, ba kwalela lila nzila mi zona za kwenuha ku liba kwa masole ba Judeasi. Bona ba li bulaya kamukana ku tokwa ni wa lubandangoti.
47Ba hapa tutu kaufela mi ba puma toho ni lizoho la Nikanora la silyo ili lona l'a n'a kile a supa ka lona ha n'a nyefula. Zeo z'a ngiwa mi za y'o beiwa fa sibaka se si bonahala mwa Jerusalema. 48Batu ba taba hahulu mi ba buluka lizazi leo ku li eza lizazi la pumulo ye tuna. 49Kaniti ba hupula ku li eza la mukiti wa silimo ni silimo ka la bulishumi ni ze talu la kweli ya Adara. 50Naha ya Judea ya ba mwa kozo ka nakonyana.
Currently Selected:
Buka ya Pili ya Makabaeusi 7: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.