Buka ya Pili ya Makabaeusi 6
6
Lifu la Antiokusi Epifanesi
(2 Mak 1.11-17; 9.1-29; 10.9-11)
1Ka yona nako yeo Mulena Antiokusi ha n'a zamaya mwa linaha za malundu, a utwa kuli mwa Peresia ne ku na ni muleneñi o n'o bizwa Elimaisi mi n'o tumile ka bufumu bwa ona, ili ka silivela ni gauda. 2A utwa hape kuli ne ku na ni tempele ye n'e tezi bufumu bo, ili liapalo za ndwa za gauda, lisilelezo za fa sibufa ni lilwaniso ze ne li siilwe mwateñi ki Alexandere mwan'a Filipi mulena wa Masedonia, yena wa pili kwa ku busa Magerike. 3Cwale a y'o lwanisa muleneñi wo kuli a u tule, kono a palelwa kakuli bañi ba ona ne ba lemuhile mulelo wa hae. 4Ba itwanela ka maata, mane a saba. A kuta a swabile hahulu mi a liba kwa Babilona.
5Kono ha n'a sa li mwa Peresia a utwa kuli limpi, ze ne li il'o lwanisa naha ya Judea, ne li tuzwi. 6Hape Lisiasi yena kasibili ya n'a ngile mpi ye maata hahulu a tulwa ki Majuda. A utwa hape kuli Majuda ne ba tiisizwe ki lilwaniso ni lika ze ñwi ze ne ba hapile kwa limpi ze ne ba yundisize. 7#1 Mak 1.54 Hape n'a zibisizwe kuli ne ba tubile katala-tuna ka ka tomilwe ki yena fa katala ka mwa Jerusalema, mane ba silelelize sibaka se si kenile ka mamota a matelele sina pili, ni Beti-Zuri muleneñi wa hae o muñwi.
8Mulena ha s'a utwile litaba zeo, a komoka hahulu mi a kenwa ki sabo ye tuna. A ikwiseza fa mumbeta wa hae a swabile ni ku filikana hahulu kabakala kuli lika ne li si ka ezahala sina mw'a n'a lelezi. 9Ku zwa fo, a ina cwalo mazazi a mañata a nz'a filikani hahulu, mi manyando ni linonge ze tuna za mu kataza maswe kuli mane a ipona kuli wa shwa. 10Cwale a biza balikani ba hae kamukana mi a li ku bona, “Buloko bu se bu felile mwa meeto a ka, mi se ni bona kuli ha ni sa na sepo ya ku pila. 11Ni se ni ipuzize mwa pilu ka za butata ni manyando a matuna a swana sina muunda o mutuna o ni se ni li ku ona, na, ya n'a li yo munde ni ku latiwa hahulu ka nako ya puso ya ka. 12Kono cwale ni hupula bumaswe bo ne ni ezize mwa Jerusalema, ha ne ni ngile linkwana kamukana za gauda ni silivela, ni ku laela kuli batu ba Judea kaufela ba timezwe, ku si na mulatu ni o mukana. 13Ni lumela kuli ki lona libaka ha ni tahezwi ki bumai bo, mi cwale kikabakaleo ni t'o shwela mwa naha i sili.”
Ku yoliswa kwa Antiokusi
14Cwale Mulena Antiokusi a biza Filipi, yo muñwi wa Balikani ba hae, mi a mu fa maata a ku etelela mubuso wa hae kaufela. 15A mu fa kuwani ya bulena, siapalo sa hae sa bulena, ni lisale la hae la bulena, ka muhupulo wa kuli a te a babalele ni ku luta mwan'a hae Antiokusi kuli h'a ka hula a mu beye fa bulena. 16Ku zwa fo, Mulena Antiokusi a shwa ka silimo sa mwanda ka mashumi a mane ni ze supile ka ze peli.
17Lisiasi ha s'a utwile kuli mulena u shwile, a yolisa mwan'a hae Antiokusi fa bulena, ili mwana y'a n'a hulisize ku zwa kwa bwanana, mi a mu beya libizo la Eupatori.
Judeasi Makabaeusi u lwanisa ba mwa Lukwakwa lwa Jerusalema
(2 Mak 13.1-26; 11.22-26)
18Batu ba ba ne ba li mwa Munzi wa Davida ba fetuha lila za Maisilaele, ba ba ne ba li fakaufi ni sibaka se si kenile, ka ku batisisa mikwa ya ku ba zieza ka yona ili kuli ba tuse hahulu bahedeni. 19Judeasi kih'a hupula ku ba yundisa, mi a kopanya sicaba kamukana kuli ba ba kwalele mwahali. 20Batu ba kopana mi ka silimo sa mwanda ka mashumi a ketalizoho ba beya lukwakwa mwahali, ba eza miundo ya ku kunupela ni limishini za ku lwanisa, ili ze posa macwe.
21Kono ba bañwi ba ku ba ba ne ba kwalezwi mwahali, ba punya mi ba kopana ni palo ya Maisilaele ba ba maswe. 22Ba ya ku mulena mi ba li, “U ka litela nako ye kuma kai kuli u eze swanelo ya ku kutiseza bumaswe ku ba ba bulaile bahabo luna? 23Ne lu itamile ku pilisa ndat'aho, ni ku latelela litaelo za hae, ni ku buluka milao ya hae. 24Banabahabo luna ba, ha ku na se ba ka lu ezeza. A mu bone, ba bulaile ba ku luna ba ba konile ku swalwa mi ba hapile tutu ya luna. 25Ha ba si ka sinyeza luna feela, kono ba ezize cwalo ni mwa linaha za hao kamukana. 26Ka yona nako ye, ba beile Lukwakwa lwa mwa Jerusalema mwahali, mi ba tomile lilwaniso ze tuna kuli ba u hape. Ba silelelize sibaka se si kenile hamoho ni Beti-Zuri. 27Haiba u sa ba tibeli ku eza cwalo, ba ta eza nihaili lika ze tuna ku fita zeo, mi ha u na ku kona ku ba zamaisa.”
Ndwa ya kwa Beti-Zakaria
28Mulena h'a utwa cwalo a halifa hahulu, mi a biza Balikani ba hae kaufela, bona bazamaisi ba makuta a hae ni balaeli ba masole ba lipizi. 29A kopanya ni masole ba ba lifiwa mali, ba ba zwa mwa linaha ze ñwi ni mwa lioli za mwa liwate. 30Mpi ya hae ne i na ni masole ba mahutu ba likiti ze mwanda, ba lipizi ba likiti ze mashumi a mabeli, ni litou ze mashumi a malalu ni ze peli ze ziba hande mo ku lwanelwa mwa ndwa. 31Ba fita mwa Edomo mi ba liba kwa Beti-Zuri, ba u beya mwahali mi ba u lwanisa ka mazazi a mañata. Ba toma ni limishini za ku lwanisa, kono batu ba mwateñi ba itwanela ka bundume mane ba cisa limishini zeo za lindwa.
32Ka yona nako yeo Judeasi a tuhela ku lwanisa Lukwakwa lwa mwa Jerusalema, mi a y'o tibelela kwa Beti-Zakaria ku libana ni mafulo a mpi ya mulena. 33Habusa kakusasana mulena a zuha mi a zamaisa mpi ya hae mwa libaka za ona, mi ba liza litolombita. 34Litou za nwisiwa mulo o mufubelu wa miselo ya veine o kopanyizwe ni namulomo kuli li itukiseze ndwa. 35Ba abela lifolofolo zeo mwa libaka za zona. Tou ye ñwi ni ye ñwi ne i na ni batu ba sikiti ba ba apezi liapalo za sipi, ba na ni likuwani za kopa. Ku lona likolo la tou yeo ne ku na ni masole ba fa lipizi ba mianda i ketalizoho. 36Masole ba fa lipizi bao, ne ba swalisana ni tou. Ko ne i ya tou kamukana, ni bona ne ba tamehile ku ya kwateñi, mi ne ba sa kauhani ni yona ni hanyinyani. 37Tou ye ñwi ni ye ñwi, ne i silelelizwe ki mabala fo ne ku pahami sitopa sa balwani hamoho ni muzamaisi wa yona tou yeo. 38Makuta a n'a siyezi a masole ba ba pahami lipizi n'a li mwa maneku a mabeli a mpi, ku i sileleza ni ku sabisa lila.
39Lizazi ha se li benya fa litebe za kopa ni gauda, malundu a benyiswa ki liseli leo, mi kwa kanya hahulu mane kwa bonahla ku ba sina mamonyi. 40Kalulo ye ñwi ya mpi ya mulena ya bonahala mwa malundu a pahami, mi ye ñwi n'e li mwa misindi. Kaufela zona likalulo zeo za taha ka maata ni sepo, mi masole ba zona ne ba yemisizwe hande.
41Batu kamukana ba sabiswa ki mulumo o n'o eziwa ki bona buñata bwa masole bao, sihulu mulumo wa misindo ya makolo h'a zamaya, ni lilata la lilwaniso za bona, kakuli mpi ne li ye tuna hahulu. 42Judeasi ni mpi ya hae ba ba kena, mi kwa shwa masole ba mulena ba mianda ye silezi. 43Elizare, ya na bizwa Avarani, h'a bona tou ye n'e li yona ye tuna hahulu ku fita ze ñwi kamukana, mi i na ni tumo ni sipula sa mulena, a hupula kuli mwendi ki yona ya n'a pahami. 44A itombola bupilo bwa hae kuli a pilise sicaba sa habo, ni kuli a ipumanele libizo le li si ke la fela kuya kuile. 45Cwale ka bundume a liba ku yona, a fita mwahal'a buñata bwa masole ba lila a nz'a ba bulaya kwa silyo ni kwa nzohoto, mi a ba hasanya mane a be a y'o fita ku yona. 46A kena mwatas'a yona tou yeo, a i tabaka ka mukwale wa hae, mane ya shwa. Folofolo yeo ya mu wela fahalimu, mi ni yena mutu yo a shwela hona foo. 47Cwale ha ba bona ku tiya kwa mulena ni ku sabisa kwa makolo a hae, Majuda ba saba.
Beti-Zuri wa hapwa mi Lilundu la Sione li bewa mwahali ki Masiria
48Mpi ya mulena ya ba latelela ku y'o ba lwaniseza kwa Jerusalema, mi mulena ni batu ba hae ba beya munzi mwahali. 49A eza litumelelano za kozo ni batu ba Beti-Zuri ba ba ne ba zwile mwa munzi mo. Ne ba si na lico ze ne ba ka ca ka nako ye ne ba kwalezwi ki lila, kakuli silimo seo n'e li silimo sa pumulo ya naha. 50Mulena ha s'a hapile Beti-Zuri a beya masole mwateñi ku u libelela. 51Cwale a beya sibaka se si kenile mwahali ka nako ye telele. A toma tufwililo ni limishini za ndwa za ku posisa macwe, za ku cisisa mulilo, za ku posisa malumo, ni za ku posisa masho. 52Ba mwahali ba itwanela ka ku lukisa mishini ya bona ya ku posisa lilwaniso mi kikabakaleo ne ba konile ku itwanela nako ye telele. 53Kono ne ba si na lico ze ne ka ba tusa nako ye telele kakuli n'e li silimo sa pumulo ya naha, hape ni kuli ba ba ne ba sabezi mwa naha ya Judea, ili ba ba ne ba ina kwa bahedeni, ne ba cile lico ze ne siyezi kaufela. 54Kabakala tala, kwa siyala batu ba sikai feela mwa sibaka se si kenile. Buñata ba hasana mi ba ya kwa minzi ya bona.
Mulena u lumelela Majuda ku lapela mo ba latela
55Filipi n'a ketilwe ki mulena Antiokusi pili a si ka shwa kuli a babalele mwan'a hae yena Antiokusi ni kuli a te a mu beye fa bulena. 56H'a kutile ku zwa kwa Peresia ni Media a na ni makuta a n'a ile ni mulena, n'a lelile ku nga maata a mubuso. Lisiasi a utwa litaba zeo. 57Kapili a hupula ku zwa mi a ya ku mulena yo munca, kwa balaeli ba mpi, ni kwa masole, mi a li, “Ka zazi ni zazi lwa fokola, kakuli lico za luna ki ze nyinyani, mi hape sibaka se lu tabanisa si silelelizwe ka tata hahulu. Hape litaba za mubuso lu libelezi luna. 58A lu utwaneñi ni batu ba, mi lu eze ni bona tumelelano ya kozo hamoho ni sicaba sa bona kaufela. 59Lu ba lumelele ku latelela milao ya sihabo bona sina pili, kakuli ki kabakala luna, ha ne lu ba hanisize ku buluka milao ya habo bona, ha ba itwanela cwalo.”
60Mulena ni balaeli ba mpi ya hae ba lumela taba yeo. Kiha yena Lisiasi a lumela Majuda manzwi a tumelelano ya kozo, mi ba a lumela. 61Mulena ni balaeli ba mpi ba tiisa tumelelano yeo ka luci, mi cwale batu ba ba ne ba kwalezwi mwahali bao, ba zwa mwa lukwakwa mo. 62Cwale mulena a kena mwa lukwakwa lwa fa Lilundu la Sione, kono ha sa y'o bona mo si silelelizwe sibaka seo, a sinya buitamo bw'a n'a ikonkile ka luci mi a laela kuli mamota a n'a potolohile sibaka seo a tubiwe. 63Cwale a akufela ku fulalela mafulo, mi a kuta kwa Antioke, kw'a n'a il'o fumana Filipi a li yena muñ'a munzi. Antiokusi a mu lwanisa mi a hapa munzi.
Currently Selected:
Buka ya Pili ya Makabaeusi 6: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.