Buka ya Pili ya Makabaeusi 5
5
Majuda ba lwanisana ni ba ba bapana ni bona
(2 Mak 10.14-33; 12.10-45)
1Macaba a n'a ba potolohile h'a utwa kuli katala ne ka se ka yahilwe sinca, ni kuli sibaka se si kenile ne si se si lukisizwe sinca sina mo ne si inezi pili, a nyema hahulu. 2Hape a lela ku timeza ba lusika lwa Jakobo kamukana ba ba ne ba pila mwahal'a bona. Ba kala ku bulaya ni ku nyandisa Majuda ba mwa naha.
3Judeasi a lwanisa bana ba Isau mwa Edomo, ili mwa naha ya Akarabatene mo ne ba kwalezi Maisilaele mwahali. A ba lwanisa ni ku ba tula maswe mi a hapa tutu ya bona. 4Hape a hupula bumaswe bwa bana ba Baeani ba ba ne ba li lila ni silaha sa batu kabakala ku bandamenanga batu mwa linzila. 5Judeasi ha s'a ba kwalezi mwa litawala, a ba lwanisa mi a ba feza, kih'a cisa litawala za bona ni ba ba ne ba li mwateñi kamukana. 6Ku zwa fo, a silela mwabuse kwa Maamoni kw'a n'a il'o fumana mpi ye maata ni batu ba bañata hahulu ba ba ne ba zamaiswa ki Timoteasi. 7A ba lwanisa mwa libaka ze ñata, a ba tula maswe mane a ba eza tukwata-kwata. 8Ha s'a hapile Jazeri ni minzinyana ya ona, a kutela kwa Judea.
Ku iswa ndwa mwa Judea ni mwa Giliadi
9Cwale bahedeni ba mwa Giliadi ba kopana hamoho ku lwanisa Maisilaele ba ba ne ba pila mwa naha ya bona kuli ba ba yundise. Kono Maisilaele ba sabela mwa makwakwa a mwa Datema. 10Ba ñolela Judeasi ni banabahabo liñolo le li li, 11“Bahedeni bo lu pila ni bona ba kopani hamoho ku lu lwanisa ili kuli ba lu timeze kaufela. 12Mane ba itukiseza ku t'o lwanisa ni ku hapa makwakwa mo lu sabezi, mi makuta a bona a zamaiswa ki Timoteasi. Cwale mu akufe, mu t'o lu lamulela ku bona kakuli se lu sinyehezwi hahulu. 13Banabahabo luna kamukana ba ba pila mwahal'a Matobia ba bulailwe, basali ba bona hamoho ni bana cwalo ba hapilwe, tutu ya bona ni yona i ngilwe, mi mpi ya batu ye bata ku ba ba sikiti, se i felizwe kamukana yona.”
14Liñolo ha ne li sa balwa cwalo, kwa fita linumwana ze ne li zwa Galilea. Bona ba taha ba hahuzi liapalo za bona mi ba t'o biha litaba ze swana, ze li, 15“Batu ba Pitolemaisi, ba Tire, ni ba Sidoni, ba kopanyize limpi ni bahedeni kaufela ba mwa Galilea kuli ba lu yundise.”
16Judeasi ni batu ha ba utwa cwalo, kwa ezwa mukopano o mutuna wa ku lelisana ka za se ne si swanela ku ezwa bakeñisa manyando a banabahabo bona ba ba ne ba lwaniswa ki lila. 17Judeasi a li ku mwanahabo Simoni, “U kete banna ba batabani, mi u ye, u y'o lamulela banabahabo wena mwa Galilea. Na, ni mwanahesu Jonatani, lu libe kwa Giliadi.” 18A siya Josefa mwan'a Zakaria, ni Azaria muzamaisi wa batu, hamoho ni mpi kamukana ye ne siyezi mwa Judea, kuli ba libelele naha. 19A ba fa litaelo, a li, “Mu libelele sicaba se, mi mu si ke mwa lwanisa bahedeni ku fitela lu kuta.” 20Simoni a nga masole ba likiti ze talu ba mpi ye ne ya kwa Galilea, Judeasi yena a nga ba likiti ze supile ka si li siñwi ba mpi ye ne ya kwa Giliadi.
Lindwa za mwa Galilea ni Giliadi
21Simoni a kena mwa Galilea, a lwanisa bahedeni mwa lindwa ze ñata mi a ba shandaula. 22A ba matisa mane ku y'o fita kwa munyako wa Pitolemaisi, mi ba shwelwa ki banna ba likiti ze talu. Yena a hapa tutu ya bona. 23A nga Majuda ba mwa Galilea ni mwa Aribata, ni basali hamoho ni bana ba bona, ni liluwo la bona kaufela, mi a li tisa mwa Judea ka tabo ye tuna.
24Judeasi Makabaeusi ni mwanahabo yena Jonatani ba sila Jordani, mi ba zamaya mazazi a malalu mwa lihalaupa. 25Ne ba il'o katana ni Manabata. Manabata ba ba amuhela ka tabo ni ku taluseza hande ku bona ze n'e li ezahalile kwa banabahabo bona mwa Giliadi. 26Ba li, “Buñata bwa bona ne ba kwalezwi mwa Bozira, Bosori, Alema, Kasifo, Makedi ni Karinaimi, ili minzi ye mituna ye n'e silelelizwe ka makwakwa. 27Ba bañwi ne ba kwalezwi mwa minzi ye miñwi ya mwa Giliadi, mi lila ne li lelile ku lwanisa ni ku hapa minzi yeo ka le li tatama, ili kuli ba yundise batu ba mwateñi ka lizazi li li liñwi feela.”
28Kapili-pili Judeasi ni mpi ya hae a kwenuha mi a liba kwa Bozira ka nzila ya mwa lihalaupa. A man'o hapa munzi, a bulaya banna kamukana ka mikwale, a hapa tutu kaufela mi a cisa munzi wo. 29Ka nako ya busihu ba zwa mwa sibaka seo mi ba zwelapili ku zamaya mane ba y'o fita kwa makwakwa a mwa Datema. 30Malungasiku ha ku patalala, ba bona buñata bwa batu ba ba sa konwi ku balwa, ba toma lipahamelo ni litabaniso za mishini kuli cwale ba hape minzi yeo ya mwa makwakwa, mane ne ba se ba kala ku i lwanisa. 31Judeasi a bona kuli ndwa se i kalisize ni kuli mane ni mukosi n'o luma ni mwahalimu inge tolombita, ni sililo se situna hahulu sa mwa munzi. 32A li kwa makuta a mpi ya hae, “Kacenu, mu lukela ku lwana. Mu lwanele banabahabo mina.”
33Ha s'a aluzi mpi ya hae ka makuta a malalu, a liba lila kwamulaho, a nz'a liza litolombita ni ku lapela ka ku huweleza. 34Makuta a Timoteasi, ha s'a lemuha kuli mutu yo ne li Makabaeusi, a baleha, Makabaeusi a nz'a ya kwapili. Makabaeusi a ba tula maswe. Kwa shwa batu ba ba bata ku eza likiti ze supile ni si li siñwi ka lona lizazi leo.
35Cwale a liba kwa Alema, a u lwanisa mi a hapa munzi wo. A bulaya banna kamukana, a hapa tutu ya mwateñi mi a cisa sibaka seo. 36Ku zwa fo, a zwelapili mi a hapa Kasifo, Makedi, Bosori, ni minzi ya Giliadi kamukana ye n'e siyezi.
37Mwamulaho wa lindwa zeo, Timoteasi a kopanya mpi ye ñwi mi a y'o toma mafulo kwa sibaka se si libani ni Rafoni, ili kwa buse bwa mulapo. 38Judeasi a luma batu ku y'o twela mpi yeo mwa mafulo, mi bona ha ba kuta, ba li, “Ku yena ku kopanezi bahedeni kamukana ba ba lu beile mwahali, mi ba ezize mpi ye tuna hahulu. 39Hape ba ekelizwe ki masole ba Maarabe ba ba lifiwa kuli ba tuse. Ba tibelezi fa sibaka se si kwa buse, fa munanga wa mulapo, mi ba itukiselize ku ku lwanisa.” Cwale Judeasi a y'o ba katanyenza.
40Ha s'a li fakaufi ni munanga hamoho ni makuta a hae, Timoteasi a li kwa balaeli ba makuta a hae, “Haiba a ka kala ku silela buse bwa kwanu ha lu na ku kona lu itwanela ku yena kakuli u ka fumana sibaka sa ku lu tula. 41Kono haiba a ka saba mi a tibelela mwabuse bwale bwa mulapo, fohe, lu ka sila lu ye ku yena, mi cwale lu ka mu tula.”
42Judeasi a sa fita feela fa likamba, a yemisa bazamaisi ba batu fa munanga wa mulapo, mi a ba fa taelo ye, a li, “Mu si ke mwa lumelela mutu ni yo mukana ku toma tende. Kaufel'a bona ba ye kwa ku lwana.” 43A ba yena wa pili ku silela mwa sibaka sa lila, a nz'a latelelwa ki batu kamukana. Bahedeni kaufela ha ba ba bona ba saba, ba latela litabaniso za bona fafasi, ba mata mi ba y'o ipata mwa sibaka sa mwahal'a tempele ya mwa Karinaimi. 44Majuda ba kala ku hapa munzi, mi cwale ba cisa sibaka sa mwahal'a tempele hamoho ni batu kamukana ba ba ne ba li mwateñi. Mi cwale Karinaimi wa hapiwa mi lila za palelwa ku itwanela hape ku Judeasi.
45Ku zwa fo Judeasi a kopanya Maisilaele kamukana ba ba ne ba pila mwa Giliadi, ku kala kwa batu feela ku isa kwa bazamaisi ba litulo hamoho ni basali ni bana ba bona, ni liluwo la bona cwalo. A kopanya cwalo ni mpi ye tuna hahulu ku ba isa mwa naha ya Judea. 46Ba y'o fita mwa Eferoni, ili munzi o mutuna o n'o inzi mwa nzila, mi n'o silelelizwe ka lukwakwa lo lu tiile hahulu. Sina ha ne ku li tata ku u potoloha kwa silyo kapa kwa nzohoto, ne ku si na mo ne ku ka ezezwa, haisi feela ku u fita fahali. 47Kono batu ba mwa munzi mo ba ba hanisa ku fita, mi ba kwala munyako ka macwe. 48Judeasi a ba lumela manzwi a ku ba shemba-shemba, a li, “Mu lu lumelele ku fita mwa naha ya mina, lu ye ku ya luna. Ha ku na ya ka mi eza se siñwi. Lu bata feela ku fita.” Kono ba hana ku ba kwalulela.
49Cwale Judeasi a laela mpi ya hae kuli mutu ni mutu a yeme hona f'a yemi. 50Batabani ba yema mwa libaka za bona. Judeasi a lwanisa munzi musihali kamukana ni busihu, mi a u tula. 51A bulaya banna kaufela, a tubaka munzi wo, a hapa tutu ya ona, mi cwale ba fita mwahal'a munzi ba nze ba zamaya fahlimw'a litupu za batu. 52Cwale Majuda ba sila Jordani, ba ya mwa libala le lituna hahulu le li libani ni Beti-Sheani. 53Ka nako kaufela Judeasi n'a sweli ku kopanya batu ba ba ne ba li mwamulaho hahulu, ni ku susueza batu mwa nzila kaufela kuli ba itiise ku fitela ba y'o fita mwa naha ya Judea. 54Ba kambama Lilundu la Sione ka tabo ni nyakalalo mi ba eza litabelo kakuli ne ba kutile ba iketile hande, ba si ka shwelwa ki mutu ni yo mukana.
Ku tulwa kwa ndwa ya Jamunia
55Bo Judeasi ni Jonatani ha ne ba li mwa naha ya Giliadi, Simoni mwanahabo Judeasi n'a li mwa Galilea a nz'a lwanisa Pitolemaisi. 56Azaria ni Josefa mwan'a Zakaria, ba ba ne ba li balaeli ba mpi ye n'e siyezi, ba utwa mo ne ba tumela ba bañwi ni mo ne ba tulela mwa ndwa, mi ba li, 57“A lu ipumanele mabizo ni luna. Cwale a lu ye lu y'o lwanisa macaba a lu bapani ni ona.” 58Kiha ba laela bazamaisi ba makuta a mpi ya bona mi ba yela Jamunia. 59Kono Gorgiasi ni batu ba hae ba zwa mwa munzi ku t'o ba katanyeza ka ndwa. 60Josefa ni Azaria ba tulwa maswe mi ba lelekiswa hahulu mane ku y'o fita kwa mululwani wa Judea. Ka lona lizazi leo kwa shwa Maisilaele ba ba bata ku ba ba likiti ze peli. 61Cwale batu ba shwelwa hahulu kabakala kuli ne ba si ka mamela taelo ya Judeasi ni banabahabo, kono ba sepa feela maata a bona. 62Hape bao bona ne ba sa swani ni bani ba ba ne ba filwe ku pilisa Isilaele.
Ku tulwa kwa Edomo ni Filisita
63Mulwani yo mutuna yo Judeasi ni banabahabo ba kutekeha hahulu mwa Isilaele kaufela, ni mwahal'a macaba kamukana a n'a ba utwile. 64Batu ba kopana hamoho ku t'o ba lumba. 65Judeasi ni banabahabo ba funduka ku y'o lwanisa Maedomo mwa naha ya kwa mboela. A lwanisa Heberoni ni minzinyana ya ona, a lutulula makwakwa a ona mi a cisa litawala za ona ze ne li u potolohile. 66H'a zwa fo, a ya kwa naha ya Mafilisita mi a fita mwahal'a Marisa. 67Ka lona lizazi leo kwa shwa baprisita ba ba ne ba itakaleza ku y'o lwana kuli ba bonise bundume bwa bona ka ku kena mwa ndwa, ili nto ya bukuba. 68Ku tuha fo Judeasi a liba kwa Azoto, ili mwa naha ya Mafilisita. A y'o lutulula tutala twa bona, a cisa maswaniso a milimu ya bona mi a kutela kwa naha ya Judea, ku siya minzi ya bona i tukutilwe maswe.
Currently Selected:
Buka ya Pili ya Makabaeusi 5: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.