1 Bakorinte 10

Temuso ka milimu ya maswaniso

1 # Mut 13.21-22; 14.22-29 Banabahesu, ni lata kuli mu hupule se si ezahalile ku bo kukw'a luna ba ba ne ba zamaya ni Mushe. Kaufel'a bona ba bile mwa pabalelo ya lilu, mi ba silile hande Liwate le Lifubelu. 2Mwa lilu ni mwa liwate, kaufel'a bona ba kolobelizwe ka ku kopana hamoho ni Mushe. 3#Mut 16.35 Kaufel'a bona ba cile buhobe bwa moya. 4#Mut 17.6; Lipa 20.11 Kaufel'a bona ba nwile mezi a moya. Ne ba nwa ku lona licwe la moya le ne li zamaya ni bona, mi licwe leo i ne li Kreste kasibili. 5#Lipa 14.29-30 Kono nihakulicwalo, buñata bwa bona ha ba si ka tabisa Mulimu, mi ki lona libaka ha ba shwezi mwa lihalaupa.

6 # Lipa 11.4 Cwale zeo kaufela ki litemuso ku luna, ku lu lemusa kuli lu si ke lwa lakaza ze maswe sina bona. 7#Mut 32.6 Mu si ke mwa lapela milimu ya maswaniso, sina mo ba ezelize ba bañwi ku bona. Sina mo ku ñolezwi kuli, “Sicaba sa ina ku ca ni ku nwa, mi kiha si yema ku bina.” 8#Lipa 25.1-18 Lu si ke lwa pila mwa buhule sina mo ba ezelize ba bañwi, mi ka lizazi li li liñwi feela kwa shwa batu ba likiti ze mashumi a mabeli ka ze talu. 9#Lipa 21.5-6 Lu si ke lwa lika Mulena, sina mo ba ezelize ba bañwi, mi ba bulaiwa ki linoha. 10#Lipa 16.41-49 Mu se ke mwa bilaela, sina mo ba ezelize ba bañwi, mi ba t'o fezwa ki Lingeloi la Lifu.

11Za bumai zeo li ba tahezi kuli li be temuso ku ba bañwi. Li ñozwi kuli li be inge litemuso ku luna, kakuli lu pila ka nako ya mafelelezo.

12Hakulicwalo, ya hupula kuli u yemi, a tokomele kuli a si ke a wa. 13#Judi 8.25-27; Litu 15.11-20 Miliko ye mi tahezi, ki mufuta wa miliko ye tahela batu kamukana. Kono Mulimu u buluka lisepiso za hae, mi h'a na ku lumela kuli mu likiwe ka miliko ye mu sa koni ku tula. Nako kaufela ha mu ka likwa, u ta mi fa maata a ku tula miliko ya mina, mi cwalo, mu ta fumana mukwa wa ku zwa ku yona.

14Cwalehe, balikani ba ba latiwa, mu ambuke ku lapela milimu ya maswaniso. 15Ni bulela ni mina sina batu ba ba na ni kutwisiso. Mu atule ili mina ze ni bulela. 16#Mat 26.26-28; Mar 14.22-24; Luk 22.19-20 Mu hupule sinwelo sa litohonolo seo lu itumela Mulimu ka sona. Kana ha lu ikabeli mali a Kreste ha lu nwa mwa sinwelo seo, naa? Ni buhobe bo lu komona, kana ha lu ikabeli mubili wa Kreste ha lu ca buhobe bo, naa? 17Buhobe ki bu li buñwi. Cwale niha lu li ba bañata, lu mubili u li muñwi, kakuli kamukan'a luna lu ikabela musulo u li muñwi.

18 # Malivi 7.6 Mu bone Maisilaele. Ba ba ca ze ezizwe litabelo, ba na ni kopano ni Mulimu fa katala. 19Ni bulelañi? Kana ni bulela kuli mulimu wa siswaniso kamba se si tabezwi siswaniso seo ki sika luli? 20#Mul 32.17 Batili! Se ni bulela kikuli se ba taba bahedeni, ba si tabela mioya ye maswe, isiñi Mulimu. Cwale, ha ni lati kuli mu swalisane ni mioya ye maswe. 21Ha mu koni ku nwa mwa sinwelo sa Mulena ni mwa sinwelo sa mioya ye maswe. Ha mu koni ku ca fa tafule ya Mulena ni fa tafule ya mioya ye maswe. 22#Mul 32.21 Kikuli lu bata ku shangumuna muna wa Mulena, nji? Kana mu hupula kuli lwa mu fita kwa maata, nji?

23 # 1 Bakor 6.12 Ba bañwi ba li, “Lu lumelezwi ku eza lika kamukana.” Ee, kono lika ha si ze nde kamukan'a zona. “Lu lumelezwi ku eza sifi ni sifi.” Kono ha si lika kamukana ze na ni tuso kwa neku la tumelo. 24Mutu a si ke a ipatela za hae feela a li nosi, kono a hupule ze batwa ki ba bañwi.

25Mu lukuluhile ku icela sifi ni sifi se si lekiswa mwa misika ya linama, mu sa buzi lipuzo kabakala lizwalo. 26#Lipi 24.1 Kakuli, sina mo ku ñolezwi, “Lifasi ni ze ku lona kamukana ki za Mulena.”

27Haiba ya si ka lumela a mi memela kwa lico, mi mu hupula ku ya kwateñi, mu ce ze mu ka fiwa kaufela, mu sa buzi lipuzo kabakala lizwalo. 28Haiba yo muñwi a mi bulelela kuli, “Nama ye i zwa kwa ku pailela milimu,” mu si ke mwa ca kwateñi, kabakala ya mi bulelezi cwalo, ni kabakala lizwalo. 29Ha ni buleli lizwalo la mina, kono la yo muñwi.

Ba bañwi ba ka li, “Cwalehe, kikabakalañi tukuluho ya ka ha i haniswa ki lizwalo la mutu u sili? 30Ha ni itumela ku Mulimu ka lico ze ni ca, kiñi ha ni hanyezwa ka lico ze ni itumezi ka zona?”

31Hakulicwalo, se mu eza kaufela, i be ku ca, kamba ku nwa, mu si eze ka ku lumba Mulimu. 32Mu pile mu nze mu tokomela ku sa sitatalisa Majuda kamba Balicaba, kamba ba Keleke ya Mulimu. 33Mu eze mo ni ezeza na. Ni lika ku tabisa batu kamukana ka ze ni eza, ni sa hupuli ku ikezeza ze nde, kono ni nze ni hupula ku ezeza batu kamukana hande, kuli ba kone ku piliswa.

Currently Selected:

1 Bakorinte 10: Lozi09

Highlight

Copy

Compare