Salmo 91
91
SALMO 91
Bou di alanan di Dios mi ta sigur
1Abo ku ta biba bou di amparo di Altísimo,
ta hospedá den sombra di Dios omnipotente,
2bisa SEÑOR: ‘Mi refugio, mi fòrti,
mi Dios, den kende mi ta pone mi konfiansa!’
3Pasobra E ta libra bo for di kui di monchadó,
E ta tene bo leu for di pèster fatal.
4Lo E kubri bo ku su alanan, bou 'i nan bo ta sigur,#Deuteronomio 32:10-11; Salmonan 17:8; 61:4; Sirag 34:13-16
su fieldat lo ta pa bo un eskudo, un harnas.
5Bo n' tin mester di tene miedu di peliger di anochi,
ni di ningun flecha ku por bula den dia;
6ni di pèster ku ta rondia den ora di tiniebla
o di plaga mortal ku ta kohe bo mèrdia.
7Ni maske mil hende kai banda di bo
i dies mil na bo man drechi: nada lo no kohe bo!
8Solamente habri wowo i mira rònt
kon pekadónan ta haña nan kastigu.
9Komo b'a yama SEÑOR ‘Mi Refugio’
i a bai skonde serka Dios Altísimo,
10ningun desgrasia lo no yega serka bo,
ningun plaga lo no yega na bo tènt.
11Pasobra El a manda su angelnan
warda bo unda ku bo bai.#Mateo 4:6; Lukas 4:10
12Nan lo karga bo den nan man,
pa bo no dal bo pia kontra piedra.#Mateo 4:6; Lukas 4:11
13Riba leon i kolebra lo bo kana
i trapa yu di leon i dragon.#Lukas 10:19
14‘Si e tene na Mi, lo Mi salb'é;
lo Mi als'é, si e tin rèspèt pa mi nòmber.
15Ora e yama Mi lo Mi kontest'é,
den problema Mi ta huntu kuné,
lo Mi libr'é i kolm'é ku honor.
16Mi ta pon'é disfrutá di un bida largu
i lo lag'é kontemplá mi salbashon.’
Currently Selected:
Salmo 91: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013