YouVersion Logo
Search Icon

Kolosensenan 1

1
Saludo
1Esaki ta un karta di Pablo, ku pa boluntat di Dios ta apòstel di Kristu-Hesus i di ruman Timoteo, 2pa esnan na Kolose ku ta pertenesé na e pueblo santu, nos rumannan fiel den Kristu-Hesus.
Dios nos Tata#1:2 Tin manuskrito ku ta añadí: i Señor Hesu-Kristu. duna boso grasia i pas.
Pablo ta resa pa su lesadónan
3Kada be ku nos resa pa boso, nos ta yama Dios, Tata di nos Señor Hesu-Kristu, danki. 4Pasobra nos a tende di boso fe den Kristu-Hesus i di boso amor pa henter e pueblo santu. 5E fe i amor ei ta basá riba e speransa di risibí loke tin wardá pa boso den shelu. Boso a tende di e speransa ei dia e mensahe di bèrdat, e bon notisia, 6a alkansá boso. E bon notisia akí ta sigui plama i karga fruta rònt mundu, meskos ku ta sosodé serka boso for di dia ku boso a tend'é i a siña konosé grasia di Dios manera e ta di bèrdat. 7Ta Epafras, nos kerido kompañero di trabou, a siña boso esei;#Kolosensenan 4:12; Filemon 23 e ta un fiel sirbidó di Kristu pa boso.#1:7 boso; otro manuskrito tin: nos 8El a konta nos di e amor ku Spiritu Santu a inspirá den boso.
9P'esei fo'i dia nos a tende esei, nos no a stòp di resa pa boso. Nos ta pidi Dios pa yena boso ku tur sabiduria i ku komprondementu spiritual pa asina boso por konosé su boluntat kompletamente. 10E ora ei boso por biba na un manera ku ta honra Señor i boso por hasi semper loke ta agrad'É. Asina boso lo karga fruta hasiendo tur klase di bon obra i boso lo krese den konosementu berdadero di Señor. 11Dios fortalesé boso ku su poder glorioso pa asina boso por soportá tur kos ku pasenshi.
Kristu ta rekonsiliá hende ku Dios
12Gradisí Tata ku legria, pasobra El a prepará boso pa tuma parti na e benefisionan ku E ta warda den reino di lus pa e pueblo santu. 13El a reskatá nos for di poder di skuridat#Efesionan 6:12 i a pasa nos pa reino di su Yu stimá. 14Pa medio di su Yu nos tin nos salbashon,#1:14 Tin manuskrito ku ta añadí: a base di e sanger ku El a drama. ke men pordon di nos pikánan.#Efesionan 1:7
15E ta imágen visibel di Dios invisibel;
E ta Esun promé,
alsá riba henter kreashon.
16Pasobra ta pa medio di djE, Dios a krea tur kos
den shelu i riba tera,
loke ta visibel i invisibel,
inkluso e podernan spiritual,
potensianan, outoridatnan i gobernantenan.#Efesionan 6:12
Dios a krea tur kos pa medio di djE
i tur kos ta dirigí riba djE.
17E tabata eksistí promé ku tur kos
i pa medio di djE tur kos ta keda na nan lugá.#Huan 1:1-3,18; Hebreonan 1:2-3
18E ta kabes di e kurpa, esta di Iglesia.#Efesionan 1:22-23; 4:15
E ta orígen di tur kos,
Esun promé ku a lanta for di morto,
pa asina E ta Esun promé den tur kos.#Echonan 26:23; Revelashon 1:5
19Pasobra a agradá Dios
pa biba kompletamente den su Yu
20i pa medio di djE
rekonsiliá henter kreashon ku Dios mes.#Efesionan 2:16
Su Yu a drama su sanger riba krus;
di e manera ei Dios a establesé pas
entre loke tin riba tera i loke tin den shelu ku Dios mes.
21Un tempu boso tambe tabata leu for di Dios i boso tabata su enemigu pa motibu di tur kos malu ku boso tabata pensa i hasi. 22Pero awor Dios, pa medio di morto físiko di su Yu, a drecha tur kos entre boso ku E mes pa asin'ei E presentá boso santu, sin mancha i liber di tur reproche, dilanti di djE mes. 23Un kos sí, boso mester keda para firme, sin tambaliá den boso fe i sin bandoná e speransa ku boso a risibí dia boso a tende e bon notisia. Ta di e bon notisia ei, ku boso a tende i ku a keda proklamá na tur kriatura riba mundu, ami, Pablo, a bira un sirbidó.
Pablo ta sufri pa iglesia
24Na e momentonan akí mi ta kontentu ku mi por sufri pa boso, pasobra asina mi ta kompletá den mi bida loke ta falta ainda na e tribulashonnan di Kristu pa su kurpa, esta iglesia. 25Dios a duna mi enkargo pa sirbi iglesia dor di proklamá e mensahe di Dios kompletamente.#Efesionan 3:2 26E mensahe ta e plan ku tabata skondí pa tur hende durante tur e siglonan ku a pasa, ma ku awor El a revelá na e pueblo santu. 27Dios ker a laga nan konosé e rikesa glorioso ku e plan ei ta enserá pa tur pueblo. Esta ku Kristu ta den boso i ku t'E ta e speransa ku boso lo tuma parti na gloria di Dios.
28T'É nos ta proklamá, ora nos, yená ku sabiduria, koregí i siña tur hende pa hiba nan na madures den union ku Kristu. 29Esei ta meta di mi lucha i di e trabou duru ku mi ta hasi, ku yudansa di poder di Kristu ku ta traha fuertemente den mi.

Currently Selected:

Kolosensenan 1: BPK13

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy