Huan 7
7
Hesus i su rumannan
1Despues Hesus a sigui biaha rònt Galilea. E no ker a biaha rònt Hudea, pasobra e outoridatnan hudiu tabata buska moda di mat'É. 2Awor fiesta di Ramada, un fiesta hudiu, tabata serka.#Levítiko 23:34; Deuteronomio 16:13 3P'esei su ruman hòmbernan a bis'É: ‘Sali for di e lugá akí bai Hudea pa bo disipelnan mira e kosnan ku bo ta hasi. 4Un hende ku ke ta konosí no ta tene loke e ta hasi sekreto. Ya ku bo ta hasi e kosnan akí, laga henter mundu mira ken bo ta!’ 5Su rumannan a papia asina, pasobra nan mes no tabata kere den djE.
6E ora ei Hesus a bisa nan: ‘Mi tempu no a yega ainda, ma pa boso sí tempu ta hechu semper. 7Mundu no por odia boso, ma Ami sí e ta odia, pasobra Ami ta testiguá ku su aktonan ta malu. 8Bai fiesta di Ramada numa; Ami no ta bai e fiesta ei, pasobra mi tempu no a yega ainda!’ 9I despues di a kontestá asina, El a keda Galilea.
Hesus na fiesta di Ramada
10Despues ku Hesus su rumannan a bai fiesta di Ramada, E tambe a bai, ma den sekreto i no públikamente. 11Outoridat hudiu tabata busk'É durante e fiesta; nan tabata puntra: ‘Ma ta na unda e hòmber ei ta?’ 12Ketu ketu tabatin hopi komentario riba djE den pueblo. Tin hende tabata bisa: ‘E ta un bon hende!’ i otro tabata komentá: ‘Nò, e ta kohe e hendenan kabes abou!’ 13Sinembargo niun hende no tabata papia abiertamente di djE, pasobra nan tabatin miedu di e outoridatnan hudiu.
14Na mitar di e fiesta, Hesus a bai tèmpel kaminda E tabata siña e hendenan. 15E pueblo a keda asombrá i bisa: ‘Kon bini e hòmber akí sa tantu asina, anto e no ta studiá?’ 16Hesus a kontestá nan: ‘Mi siñansa no ta bini di Mi mes, ma di Esun ku a manda Mi. 17Si un hende tin deseo di kumpli ku boluntat di Dios, e ta haña sa si loke Mi ta siña, ta di Dios òf si ta riba mi mes kuenta Mi ta papia. 18Esun ku ta papia riba su mes kuenta ta buska gloria pa su mes. Ma esun ku ta buska gloria pa esun ku a mand'é ta honesto i no tin maldat den dje.
19Moises a duna boso lei, ma niun di boso no ta obedesé e lei ei. Pakiko boso ta buska Mi pa mata?’ 20E multitut a kontestá: ‘Bo tin un demoño den Bo! Ken ta buska Bo pa mata?’ 21Hesus a bisa nan: ‘Mi a hasi un milager riba sabat i boso tur a keda asombrá. 22P'esei Moises a pone den lei ku boso mester sirkunsidá#Levítiko 12:3 boso yu hòmbernan, ounke no ta Moises sino boso antepasadonan a kuminsá ku esei.#Génesis 17:10 I riba sabat tambe boso ta sirkunsidá mucha hòmber. 23Awor si un mucha hòmber risibí sirkunsishon riba sabat pa no kibra ku lei di Moises, kon bini antó boso ta bira razu riba Mi, pasobra Mi a kura henter kurpa di un hende riba sabat?#Huan 5:9 24No husga segun aparensia, ma ku hustisia.’
Algun hende ta aseptá Hesus komo Mesias
25E ora ei algun hende di Herusalèm a bisa: ‘Ma no ta e hòmber akí nan ta buska pa mata? 26At'é ta para papia públikamente, i niun hende no ta bis'é nada! No bisa mi ku e lidernan a realisá ku t'é ta e Mesias? 27Pero nos sí sa di unda e hòmber akí ta bini, sinembargo ora e Mesias mes bini, niun hende lo no sa di unda E ta bini!’
28P'esei miéntras Hesus tabata siña e hendenan den tèmpel, El a bisa na bos altu: ‘Sí, boso konosé Mi i sa di unda Mi ta bini. Mi no a bini riba mi mes kuenta; tin un ku a manda Mi#7:28 Tin…manda; otro posibel tradukshon ta: Esun ku a manda Mi ta berdadero i boso no konos'É. 29Ma Ami sí konos'É, pasobra Mi a bini di djE i t'E a manda Mi.’
30P'esei nan a buska moda di kohe Hesus prezu, ma niun hende no por a pone man riba djE, pasobra su ora no a yega ainda. 31Hopi hende den e multitut a kere den djE; nan a bisa: ‘Akaso e Mesias, ora e bini, lo por hasi mas señal milagroso ku e hòmber akí a hasi?’
Nan ta manda sòldá pa bai kohe Hesus prezu
32E fariseonan a tende e multitut komentá e kosnan akí tokante Hesus; pa e motibu ei nan i e saserdotenan importante a manda guardia pa bai kohe Hesus prezu. 33P'esei Hesus a bisa: ‘Lo Mi pasa djis un temporada kòrtiku mas huntu ku boso i despues Mi ta bai serka Esun ku a manda Mi. 34Boso lo buska Mi, ma boso lo no haña Mi. Boso lo no por bini, kaminda Mi ta!’ 35E hendenan di pueblo a puntra otro: ‘Ta unda E ke bai ku nos lo no por hañ'É? Ta serka nos hendenan hudiu den estranheria, esnan ku ta biba huntu ku e griegonan, E ta bai pa E siña e griegonan? 36Ta kiko E ke men ku “Boso lo buska Mi, ma boso lo no por bini kaminda Mi ta”?’
Riunan di awa ku ta duna bida
37E último dia di fiesta di Ramada,#Levítiko 23:36; Numbernan 29:35 esta e dia di mas importante, Hesus a lanta para bisa na bos altu: ‘Esun ku tin set, mester bin bebe serka Mi.#Huan 4:10-14 38Manera Skritura ta bisa: “Esun ku kere den Mi, riu di awa ku ta duna bida, lo brota for di profundidat di su ser.” ’#Ezekiel 47:1; Zakarías 14:8 39Hesus tabata papia tokante Spiritu Santu ku esnan ku ta kere den djE lo a bai risibí. Ma na e momentonan ei Spiritu Santu no tabat'ei ainda, pasobra no a alsa Hesus na un posishon di honor ainda.
Desakuerdo entre e hendenan
40Algun hende den e multitut a tende e palabranan di Hesus i nan a bisa: ‘Enberdat, e hòmber akí ta e Profeta!’ 41Otro a bisa: ‘E hòmber akí ta e Mesias!’ Ma otronan a komentá: ‘E Mesias n' ta bini di Galilea, tòg? 42Akaso Skritura no ta bisa ku e Mesias lo ta desendiente di rei David#2 Samuel 7:12-13; Salmonan 89:3-4; 132:11-12 i ku lo E bini di Betlehèm,#Mikéas 5:2 siudat di David?’ 43Awor e multitut tabata den desakuerdo pa Hesus su motibu. 44Algun di nan ker a koh'É prezu, ma niun hende no a hasi nada.
Outoridat hudiu no ta aseptá Hesus
45P'esei ora e sòldánan di tèmpel ku mester a kohe Hesus prezu a bai serka e fariseonan i e saserdotenan importante, esakinan a puntra nan: ‘Pakiko boso no a trese Hesus?’ 46E sòldánan a kontestá: ‘Niun hende no a yega di papia manera e hòmber akí ta papia!’ 47E fariseonan a puntra nan: ‘Basta e no a tira santu den boso wowo tambe! 48Akaso boso a yega di topa un miembro di konseho supremo òf un fariseo ku ta kere den dje? 49Ma e pueblo akí no konosé lei; nan ta maldishoná!’ 50Awor Nikodemo, un di e fariseonan ku a yega di bishitá Hesus,#Huan 3:1-2 a remarká: 51‘Segun nos lei nos no por husga un hende sin tend'é promé i sin konosé su aktonan.’ 52Ma nan a kontest'é: ‘Ta di Galilea bo tambe ta? Bai studia Skritura i bo ta mira ku niun profeta no ta bini di Galilea!’
E muhé ku nan a haña den adulterio
53Tur hende a bai nan mes kas,
Currently Selected:
Huan 7: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013