Huan 14
14
Hesus, e úniko kaminda pa yega serka Tata
1No bira sobresaltá; boso ta kere den Dios, kere den Mi. 2Den kas di mi Tata tin hopi lugá; Mi ta bai prepará un lugá pa boso. Si no tabata asina, lo Mi no a bisa boso.#14:2 Den kas…boso; otro posibel tradukshon: Den kas di mi Tata tin hopi lugá; si no tabata asina lo Mi a bisa boso ku Mi ta bai prepará un lugá pa boso? 3Despues di prepará un lugá pa boso, Mi ta bolbe bini i tuma boso serka Mi pa boso ta kaminda Mi ta. 4Boso konosé e kaminda ku ta kondusí na e lugá ku Mi ta bai.’
5Tomas a bis'É: ‘Señor, nos no sa unda Bo ta bai; kon nos por konosé e kaminda pa yega aya?’ 6Hesus a kontest'é: ‘Ami ta e kaminda, bèrdat i bida; niun hende no por yega serka Tata, si no ta pa medio di Mi.#Mateo 11:27; Huan 1:18; 6:46; Echonan 4:12 7Si boso a siña konosé Mi, boso konosé mi Tata tambe. For di awor boso konosé Tata i boso a mir'É.’
8Filipo a bis'É: ‘Señor, mustra nos Tata; esei ta sufisiente pa nos.’ 9Hesus a bis'é: ‘Mi tin asina tantu tempu huntu ku boso i bo no konosé Mi ainda, Filipo? Esun ku mira Mi, a mira Tata. Pakiko bo ta pidi antó pa Mi mustra boso Tata? 10Bo no ta kere ku Mi ta den Tata i Tata ta den Mi? Mi palabranan na boso no ta di Mi mes; ta Tata ta den Mi, ta hasi su mes trabou. 11Kere Mi ora Mi bisa: Mi ta den Tata i Tata ta den Mi; òf a lo ménos kere pa motibu di mi obranan antó. 12Mi ta sigurá boso: esun ku kere den Mi, tambe lo hasi e obranan ku Mi a hasi i asta obra mas grandi ainda, pasobra Ami ta bai serka Tata. 13Kiko ku boso pidi den mi nòmber lo Mi hasi, ya asin'ei e Yu ta mustra gloria di Tata. 14Kiko ku boso pidi Mi den mi nòmber, Mi ta hasi.#Mateo 7:7-11; Lukas 11:9-13; Huan 15:7,16; 16:23-24; 1 Huan 3:21-22; 5:14-15
Promesa ku Spiritu Santu lo bini
15Si boso ta stima Mi, boso lo warda mi mandamentunan.#Deuteronomio 6:4-9; 11:1; Sirag 2:15-16; Sabiduria 6:18 16Lo Mi pidi Tata i lo E manda un otro pa yuda boso, ku lo keda pa semper huntu ku boso. 17E ta e Spiritu di bèrdat, ku mundu no por risibí; pasobra nan no ta mir'É nan no konos'É. Ma boso konos'É, pasobra E ta keda serka boso i lo ta den boso. 18Lo Mi no laga boso manera wérfano; Mi ta regresá serka boso. 19Djis poko tempu mas i mundu no ta mira Mi, ma boso sí lo mira Mi. Pasobra Mi ta biba, boso tambe lo biba. 20Ora e dia ei yega, boso lo sa ku Ami ta den Tata i ku boso ta den Mi, meskos ku Ami ta den boso. 21Esun ku aseptá mi mandamentunan i obedesé nan, ta stima Mi. Mi Tata ta stima esun ku stima Mi i Mi tambe lo stim'é i mustr'é ken Mi ta.’ 22Hudas, no Hudas Iskariot, a bisa: ‘Señor, kon bini Bo ta mustra nos ken Bo ta i Bo no ta mustra e hendenan ku no konosé Dios, ken Bo ta?’ 23Hesus a kontest'é: ‘Si un hende ta stima Mi, e ta obedesé mi palabra i mi Tata lo stim'é; nos lo bini serka dje i keda biba serka dje. 24Esun ku no ta stima Mi, no ta obedesé mi palabranan. I e palabranan ku boso a tende, no ta di Mi, ma di mi Tata ku a manda Mi.
25Mi ta papia e kosnan akí ku boso miéntras Mi ta huntu ku boso. 26Pero esun ku lo yuda boso, esta Spiritu Santu ku Tata lo manda den mi nòmber, lo siña boso tur kos i rekordá boso tur loke Ami a bisa boso.
27Pas Mi ta laga pa boso; mi pas Mi ta duna boso, ma no manera mundu ta deseá otro pas ora nan ta kumindá otro. No laga boso kurason bira intrankil, ni no kobardiá. 28Boso a tende Mi bisa ku Mi ta bai, ma ku Mi ta bini bèk serka boso. Si boso ta stima Mi, boso lo ta kontentu ku Mi ta bai serka mi Tata, pasobra E ta mas importante ku Mi. 29Mi ta bisa boso esaki promé ku e sosodé, ya boso ta kere ora e sosodé. 30Mi no por sigui papia muchu mas ku boso, pasobra gobernadó di e mundu akí ta na kaminda. E no tin poder riba Mi, 31ma mundu mester sa ku Mi ta stima Tata i ku Tata ta stima Mi i ku Mi ta hasi loke Tata manda Mi hasi.
Bon, lanta ariba, ban fo'i djaki!
Currently Selected:
Huan 14: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013