2 Korintionan 1
1
Saludo
1Esaki ta un karta di Pablo, apòstel di Kristu-Hesus di akuerdo ku boluntat di Dios, i di nos ruman Timoteo, pa e iglesia di Dios na Korinte#Echonan 18:1 i pa tur e otro rumannan den henter Gresia.
2Dios nos Tata i Señor Hesu-Kristu duna boso grasia i pas.
Pablo ta gradisí Dios pa tur sufrimentu
3Laga nos alabá Dios i Tata di nos Señor Hesu-Kristu! E ta un Tata mizerikordioso i un Dios ku semper ta konsolá. 4E ta Esun ku ta konsolá nos den tur nos tribulashonnan, ya nos por hasi uso di e konsuelo ei, pa konsolá otro hende ku tambe ta pasa den tur sorto di tribulashon. 5Pasobra meskos ku nos ta tuma parti na e hopi sufrimentunan di Kristu, asina tambe nos ta haña hopi konsuelo pa medio di djE. 6Ke men si nos ta sufri, ta pa boso haña konsuelo i salbashon. Si Dios konsolá nos, ta pa boso haña konsuelo i kapasidat pa soportá ku pasenshi e sufrimentunan ku nos tambe ta pasa aden. 7Pa loke ta trata boso, nos speransa ta firme, pasobra nos sa ku meskos ku boso ta tuma parti na e sufrimentu, boso lo tuma parti tambe na e konsuelo.
8Rumannan, nos ke pa boso ta na altura di e tribulashonnan ku nos a pasa aden na provinsia di Asia.#1 Korintionan 15:32 E kosnan ei tabata asina pisá, asina riba nos forsa, ku nos a desesperá kere ta muri mes nos ta bai muri! 9Tabata komo si fuera ta sentensia di morto mes a kai kontra nos. Anto esei a sosodé pa siña nos ku nos no mester a konfia den nos mes, sino den Dios, ku ta lanta hende for di morto! 10Sí, Dios a salba nos di peliger grandi di morto i lo E bolbe hasié; ta den djE nos ta pone nos konfiansa, p'esei nos sa ku lo E bolbe hasié! 11Boso ta koperá ku esei si boso resa pa nos. Asina hopi hende lo gradisí Dios mashá pa e bondat ku El a mustra nos.
Kambio den biahe di Pablo
12Ún kos ta hasi nos orguyoso: e echo ku nos konsenshi ta sigurá nos ku nos komportashon, en general i spesialmente ku boso, tabata dominá pa e simplesa i sinseridat ku Dios ta duna. No ta sabiduria di hende a guia nos, sino grasia di Dios. 13Den nos kartanan, nos no ta skibi nada ku boso no por lesa i komprondé. Mi ta spera ku un dia boso lo komprondé kompletamente 14loke boso a komprondé parsialmente kaba, esta ku nos ta motibu pa boso ta orguyoso dia Señor Hesus bini bèk, meskos ku boso ta motibu pa nos ta orguyoso.
15Komo mi tabata konvensí di esei, mi a plania pa bin bishitá boso promé mi bai Masedonia i asina mustra boso kariño dos be. 16Pasobra mi a plania pa bin bishitá boso ora di bai Masedonia#Echonan 19:21 i pa di dos be ora mi ta di regreso. Ya asina boso lo por a yuda mi pa mi sigui ku mi biahe pa Hudea. 17Awor esei no ke men tòg ku mi no tabata serio ora mi a plania un ke otro? Òf ku mi ta traha plan basá riba probecho propio ku mi ta kla pa bisa ‘sí’ ku ‘nò’ pareu? 18Pa Dios ku ta fiel, mi ta hura boso ku mi no ta bisa boso ‘sí’ ku ‘nò’ pareu. 19Pasobra Hesu-Kristu, Yu di Dios, ku ami, Timoteo i Silas a prediká na boso,#Echonan 18:5 no ta ‘sí’ ku ‘nò’ pareu. Al kontrario, den djE Dios a duna su ‘sí’. 20Kristu ta konfirmashon di tur promesa ku Dios a hasi, p'esei ta pa medio di djE, nos ta bisa ‘amèn’ na honor di Dios. 21Ta Dios mes ta sigurá tantu nos komo boso di e bida ku nos tur tin den union ku Kristu. T'É mes a konsagrá nos, 22seya nos komo su propiedat i pone Spiritu Santu den nos kurason komo garantia#Efesionan 1:14 di tur loke lo E bai duna nos.
23Mi ta yama Dios mes pa testigu i mi ta hura pa mi mes bida: ta pa spar boso, mi no a bai Korinte mas! 24No ku nos ke hasi manera ta boso doño nos ta, pasobra boso ta firme den boso fe kaba. Nos ke djis kolaborá ku boso pa hasi boso kontentu.
Currently Selected:
2 Korintionan 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013